ວັນອັງຄານ, ວັນທີ 13 ຕຸລາ 2026
ສົ່ງເສີມສິດທິດ້ານແຮງງານໃນຂະແໜງ ກາເຟ-ຊາ ແລະ ປ່າໄມ້ ໃນ ສປປ ລາວ
ເວລາອອກຂ່າວ: 2026-10-02 09:07:21 | ຜູ້ຂຽນ : admin1 | ຈຳນວນຄົນເຂົ້າຊົມ: 148 | ຄວາມນິຍົມ: 
ພິທີນຳສະເໜີໂຄງສ້າງ ຄວາມກ້າວໜ້າໃຫ້ແກ່ລະບົບປົກປ້ອງສັງຄົມ ແລະ ສິດທິດ້ານແຮງງານໃນຂະແໜງກາເຟ, ຊາ ແລະ ປ່າໄມ້ ໄລຍະ II (SOLAR II), ໃນວັນທີ 29 ກັນຍາ 2026 ໂດຍໄດ້ຮັບທຶນສະໜັບສະໜູນຈາກສະຫະພາບເອີຣົບ (EU) ແລະ ນຳພາໂດຍອົງການແຮງງານສາກົນ (ILO) ເພື່ອສ້າງຄວາມເຂັ້ມ ແຂງດ້ານສິດທິດ້ານແຮງງານ, ການປົກປ້ອງສັງຄົມ ແລະ ສະ ພາບການເຮັດວຽກທີ່ດີໃນຂະ ແໜງ ກາເຟ, ຊາ ແລະ ປ່າໄມ້ຂອງ ສປປ ລາວ.
ໂຄງການນີ້, ຈະຈັດຕັ້ງປະຕິ ບັດໄລຍະປີ 2026-2030 ດ້ວຍ ງົບປະມານ 3,5 ລ້ານເອີໂຣໂດຍຕໍ່ຍອດຈາກຜົນສຳເລັດ ແລະ ບົດ ຮຽນຂອງໂຄງການ SOLAR ໄລຍະທີ I ເຊິ່ງ ໄດ້ເຮັດວຽກຮ່ວມກັບຊາວກະສິກຳ ແລະ ຄູ່ຮ່ວມງານທ້ອງຖິ່ນໃນພາກໃຕ້ ຂອງ ສປປ ລາວ ລະຫວ່າງປີ 2021 ແລະ 2024. ໂຄງການໄລຍະທຳອິດໄດ້ເຂົ້າເຖິງກະສິກຳ ຫຼາຍກວ່າ 12.600 ຄົນ ແລະ ໄດ້ເພີ່ມຄວາມເຂົ້າໃຈກ່ຽວກັບປະກັນສັງຄົມ, ຄວາມປອດໄພ ແລະ ສຸຂະພາບແຮງງານ, ຄວາມສະເໝີພາບ ລະຫວ່າງ ຍິງ-ຊາຍ ແລະ ໄດ້ອຳນວຍຄວາມສະດວກໃຫ້ແກ່ແຮງງານຈຳນວນ 806 ຄົນ ໃນການລົງທະບຽນເຂົ້າກອງທຶນປະກັນສັງຄົມແຫ່ງຊາດ.
ໂຄງການ SOLAR II ຈະນຳໃຊ້ ແລະ ຜັນຂະຫຍາຍວິທີການເຫຼົ່ານີ້ຢູ່ 16 ເມືອງ ໃນ 7 ແຂວງພາກເໜືອ ແລະ ພາກກາງ ເພື່ອເຂົ້າເຖິງແຮງງານ ແລະ ຜູ້ຜະລິດຂະໜາດນ້ອຍ ປະມານ 32.000 ຄົນ. ຄາດວ່າຜູ້ໄດ້ຮັບຜົນປະໂຫຍດຢ່າງໜ້ອຍ 50% ເປັນເພດຍິງ ແລະ ເປັນຊົນເຜົ່າ 25%. ໂຄງການດັ່ງກ່າວ, ຈັດຕັ້ງປະຕິບັດໂດຍອົງການແຮງງານສາກົນ ແລະ ອົງການ Oxfam ຮ່ວມກັບລັດຖະບານ, ອົງການຕາງໜ້າຜູ້ອອກແຮງງານ, ອົງ ການຕາງໜ້າຜູ້ໃຊ້ແຮງງານ ແລະ ອົງການຈັດຕັ້ງທາງສັງຄົມ ໂດຍຈະສຸມໃສ່ 4 ຂົງເຂດວຽກ ຄື: ການເຂົ້າເຖິງປະກັນສັງຄົມ, ສະຖານທີ່ເຮັດວຽກທີ່ປອດໄພ ແລະ ມີສຸຂະພາບດີ, ການເປັນຕົວແທນຮ່ວມກັນ, ການປຶກສາຫາລືທາງສັງຄົມ ແລະ ຄວາມສະເໝີພາບລະຫວ່າງ ຍິງ-ຊາຍ ແລະ ການມີສ່ວນຮ່ວມ. ໂຄງ ການ SOLAR II ຈະສ້າງຄວາມ ກ້າວໜ້າໃຫ້ແກ່ສິດທິຂອງຜູ້ ອອກ ແຮງງານ ໂດຍການສ້າງຄວາມເຂັ້ມແຂງດ້ານການໃຫ້ບໍລິການຂັ້ນທ້ອງຖິ່ນ, ການສ້າງຄວາມອາດສາມາດຂອງຜູ້ມີສ່ວນຮ່ວມທີ່ສຳຄັນ ແລະ ສ້າງຄວາມເຂັ້ມແຂງໃຫ້ຊຸມຊົນທ້ອງຖິ່ນ.
ທ່ານ ນາງ ແກ້ວ ຈັນທະວິໄຊ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ກ່າວວ່າ: ສິດທິແຮງງານ ແລະ ການປົກປ້ອງທາງສັງຄົມ ແມ່ນພື້ນຖານທີ່ສຳຄັນສຳລັບວຽກງານທີ່ມີຄຸນຄ່າ ແລະ ເປັນທຳ ກໍຄື ການພັດທະນາແບບຍືນຍົງ. ຜ່ານການຮ່ວມມືຂອງພວກເຮົາກັບຄູ່ຮ່ວມພັດທະນາ ແລະ ຜູ້ມີສ່ວນຮ່ວມຂັ້ນສູນກາງ ແລະ ທ້ອງຖິ່ນ, ພວກເຮົາມີຈຸດປະສົງເພື່ອສ້າງຄວາມເຂັ້ມແຂງໃນການໃຫ້ບໍລິ ການ ແລະ ຂະຫຍາຍການເຂົ້າເຖິງການປົກປ້ອງສັງຄົມ ໂດຍສະເພາະແມ່ນຜູ້ອອກແຮງງານໃນລະບົບຕ່ອງໂສ້ມູນຄ່າກະສິກຳ ແລະ ປ່າໄມ້. SOLAR II ເປັນສ່ວນໜຶ່ງຂອງແຜນງານການຮ່ວມມືລະຫວ່າງທີມເອີຣົບ ແລະ ສປປ ລາວ ເພື່ອເພີ່ມທະວີການຄ້າ, ການລົງທຶນ ແລະ ການເຊື່ອມໂຍງແບບຍືນຍົງ ແລະ ຮອບດ້ານໃນຂະແໜງກະສິກຳ ແລະ ປ່າໄມ້ (TICAF) ແລະ ຍຸດທະສາດ Global Gateway ຂອງສະຫະພາບເອີຣົບ.
ທ່ານ ມາກ ກາລາເຮີ ເອກອັກຄະລັດຖະທູດ ສະຫະພາບເອີຣົບ ປະຈຳ ສປປ ລາວ ໄດ້ກ່າວວ່າ: ຜ່ານຍຸດທະສາດ Global Gateway ແລະ ແຜນງານຫຼັກຂອງພວກເຮົາ TICAF, ສະຫະພາບເອີຣົບ ກຳລັງສະໜັບສະໜູນ ສປປ ລາວ ເພື່ອສ້າງໂອກາດໃຫ້ຫຼາຍຂຶ້ນສຳລັບຜູ້ທີ່ເຮັດວຽກໃນຂະແໜງກາເຟ, ຊາ ແລະ ປ່າໄມ້. SOLAR II ຈະເສີມສ້າງລະບົບຕ່ອງໂສ້ມູນຄ່າການລົງທຶນໂດຍການພັດທະນາຊັບພະຍາກອນມະນຸດທີ່ຍືນຍົງ, ຊ່ວຍໃຫ້ຜູ້ອອກ ແຮງງານ ມີຄວາມປອດໄພຂຶ້ນ, ໄດ້ຮັບການປົກປ້ອງ ແລະ ມີຄວາມພ້ອມໃນການຮັບມືກັບສິ່ງທ້າທາຍຕ່າງໆໄດ້ດີກວ່າ.
ທ່ານ ລາສ ໂຢຮັນເຊນ ຮອງຜູ້ອຳນວຍການອົງການແຮງງານສາກົນປະຈຳ ລາວ ໄດ້ເນັ້ນເຖິງຄວາມສຳຄັນຂອງການຜັນ ຂະຫຍາຍຜົນສຳເລັດຂອງໂຄງ ການໃນໄລຍະທຳອິດ ຄື: SOLAR I ໄດ້ສະແດງໃຫ້ເຫັນເຖິງຄວາມສຳຄັນຂອງການເຮັດວຽກຢ່າງໃກ້ຊິດຕິດແທດກັບສະຖາບັນຂັ້ນທ້ອງຖິ່ນ ແລະ ການສ້າງຄວາມອາດສາມາດໃນຂັ້ນຮາກຖານ. ສ່ວນ SOLAR II ຈະສືບຕໍ່ຈາກບົດຮຽນເຫຼົ່ານີ້ ເພື່ອປັບປຸງການເຂົ້າເຖິງຂໍ້ມູນຂ່າວສານ-ການບໍລິການ ແລະ ເຮັດໃຫ້ຜູ້ອອກແຮງງານຫຼາຍຄົນໄດ້ຮັບຜົນປະໂຫຍດຈາກສິດທິຂອງເຂົາ ເຈົ້າ ໃນບ່ອນເຮັດວຽກ ແລະ ຈາກລະບົບການປົກປ້ອງສັງຄົມ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
