ວັນສຸກ, ວັນທີ 16 ຕຸລາ 2026
ຫຼວງພະບາງ ກຳນົດ 8 ເມືອງ ປະຕິບັດວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ
ເວລາອອກຂ່າວ: 2026-10-01 09:43:28 | ຜູ້ຂຽນ : admin1 | ຈຳນວນຄົນເຂົ້າຊົມ: 181 | ຄວາມນິຍົມ: 
ວັນທີ 28 ກັນຍາ 2026 ຜ່ານມານີ້, ຢູ່ທີ່ສະໂມສອນນະຄອນ-ຫຼວງພະບາງ ແຂວງຫຼວງ ພະບາງ ໄດ້ຈັດກອງປະຊຸມຄົ້ນ ຄວ້າໂຄງການບຸລິມະສິດ ເພື່ອຈັດຕັ້ງປະຕິບັດວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກພາຍໃນແຂວງຫຼວງພະບາງ, ມີ ທ່ານ ຄຳເພັດ ສີລາທອງນິດ ຫົວໜ້າພະແນກການເງິນແຂວງ, ທ່ານ ຢີ່ ຢ່າງ ຮອງຫົວໜ້າພະແນກ ກະ ສິກຳ ແລະ ສິ່ງແວດລ້ອມແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ຄຳເພັດ ສີລາທອງນິດ ໄດ້ຍົກໃຫ້ເຫັນວຽກງານຈຸດສຸມ ແລະ ແຜນງານທີ່ສຳຄັນ ໃນການຈັດຕັ້ງປະຕິບັດວາລະແຫ່ງຊາດ ເຊິ່ງປະກອບມີ 5 ວຽກຈຸດສຸມ ແລະ 12 ແຜນງານ, ໂດຍມອບໃຫ້ພະແນກການ, ຂະແໜງການທີ່ກ່ຽວຂ້ອງຂອງແຂວງ ແລະ ບັນດາເມືອງ ຄົ້ນຄວ້າກຳນົດໂຄງການບຸລິມະສິດ ໃສ່ແຕ່ລະແຜນງານ ແລະ ວຽກຈຸດສຸມໃຫ້ ມີຄວາມເປັນເອກະພາບ ໃນການ ຈັດຕັ້ງປະຕິບັດຢູ່ 8 ເມືອງເປົ້າໝາຍ ຄື: ເມືອງໂພນທອງ, ເມືອງວຽງຄຳ, ເມືອງງອຍ, ເມືອງ ໂພນໄຊ, ເມືອງປາກແຊງ, ເມືອງປາກອູ, ເມືອງຈອມເພັດ ແລະ ເມືອງພູຄູນ ລວມມີ 111 ບ້ານເປົ້າໝາຍ, ຄອບຄົວເປົ້າໝາຍ 10.927 ຄອບຄົວ, ເຊິ່ງໜ້າວຽກຈຸດສຸມ ແລະ ແຜນງານໂຄງການ ຈະເລັ່ງໃສ່ສ້າງອາຊີບ ແລະ ແຫຼ່ງລາຍຮັບ, ຈັດສັນພູມລຳເນົາຂອງປະຊາຊົນໃຫ້ມີຄວາມໝັ້ນຄົງ ແລະ ຍືນຍົງ, ພັດ ທະນາພື້ນຖານໂຄງລ່າງ ແລະ ສິ່ງອຳນວຍຄວາມສະດວກຢູ່ເຂດຊົນນະບົດ, ສ້າງຄວາມເຂັ້ມແຂງໃຫ້ຄະນະກຳມະການປົກຄອງຕາແສງ, ການຈັດຕັ້ງບ້ານ ແລະ ຊາວຊົນນະບົດ, ຂົນຂວາຍ ແລະ ຍາດແຍ່ງການລົງທຶນເຂົ້າໃສ່ການພັດທະນາຢູ່ຊົນນະບົດ, ສ້າງ ແລະ ປັບປຸງນິຕິກຳ, ກົນໄກໃນການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກໃຫ້ມີປະສິດທິຜົນ. ຈາກນັ້ນ ໄດ້ຈັດແບ່ງກຸ່ມເພື່ອພ້ອມກັນຄົ້ນຄວ້າ, ປະກອບຄຳເຫັນໃສ່ແຜນງານໂຄງການ.
ທ່ານ ຢີ່ ຢ່າງ ໄດ້ຮຽກຮ້ອງໃຫ້ບັນດາພະແນກການຂັ້ນແຂວງ ແລະ ຫ້ອງການທີ່ກ່ຽວຂ້ອງຂັ້ນເມືອງ ສືບຕໍ່ຄົ້ນຄວ້າບັນດາໂຄງການບຸລິມະສິດ ເພື່ອຈັດຕັ້ງປະຕິບັດວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກແຕ່ປີ 2027-2030 ໃຫ້ລະອຽດຊັດເຈນ ສາມາດຈັດຕັ້ງປະຕິບັດໃຫ້ສຳເລັດຕາມແຜນການທີ່ວາງໄວ້.
ໂດຍ: ທອງດາ ທີບພະວົງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
