POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນຈັນ, ວັນທີ 12 ຕຸລາ 2026

ນຳພາອ້າຍນ້ອງທະຫານຊ່ວຍເຫຼືອປະຊາຊົນທີ່ຖືກຜົນກະທົບຈາກໄພນ້ຳຖ້ວມ
ເວລາອອກຂ່າວ: 2026-09-07 09:54:46 | ຜູ້ຂຽນ : admin1 | ຈຳນວນຄົນເຂົ້າຊົມ: 145 | ຄວາມນິຍົມ:

ເນື່ອງຈາກຝົນຕົກຕິດຕໍ່ກັນຫຼາຍຊົ່ວໂມງ ເຮັດໃຫ້ນ້ຳກໍ, ນ້ຳມາວ ໄດ້ເພີ່ມຂຶ້ນສູງກາຍຂິດອັນຕະລາຍ ແລະ ໄດ້ໄຫຼຖ້ວມເຂົ້າບ້ານເຮືອນຂອງປະຊາຊົນທີ່ຢູ່ເຂດຕ່ຳ, ໄຮ່ນາ, ຮົ້ວສວນ, ເສັ້ນທາງ, ເສົ້າໄຟຟ້າລົ້ມ ເຊິ່ງໄດ້ຮັບຜົນເສຍຫາຍຈຳນວນຫຼາຍ, ມາຮອດປັດຈຸບັນສະພາບຝົນຍັງບໍ່ມີທີທ່າຈະຢຸດຕົກ ສົ່ງຜົນເຮັດໃຫ້ນ້ຳຖ້ວມເປັນວົງກວ້າງ. ປັດຈຸບັນ, ການນຳແຂວງອຸດົມໄຊ, ຄະນະນຳກອງ ບັນຊາການທະຫານແຂວງ, ກອງບັນຊາການປ້ອງກັນຄວາມສະຫງົບແຂວງ, ຄະນະນຳເມືອງ, ຕາແສງ ແລະ ບ້ານ ໄດ້ພ້ອມກັນຊ່ວຍເຫຼືອຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມຢູ່ເທດສະບານເມືອງໄຊ, ເມືອງຫຼາ ແລະ ເມືອງນາໝໍ້. ສະຫາຍ ພົນຈັດຕະວາ ຕຸ້ຍ ພົມມີໄຊ ກຳມະການຄະນະປະຈຳພັກແຂວງ, ຫົວໜ້າການເມືອງ ກອງບັນຊາການທະຫານແຂວງອຸດົມໄຊ ໄດ້ໃຫ້ສຳພາດໃນວັນທີ 30 ສິງຫາ 2026 ນີ້ວ່າ: ໂດຍໄດ້ຮັບການມອບໝາຍຈາກຄະນະກຳມະການປ້ອງກັນໄພພິບັດຂັ້ນແຂວງ ໃຫ້ຂ້າພະເຈົ້າພ້ອມດ້ວຍຄະນະບັນຊາກອງບັນຊາການທະຫານແຂວງອຸດົມໄຊ ໄດ້ນຳພາກຳລັງອ້າຍນ້ອງທະຫານ ລົງຊ່ວຍປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ ນັບແຕ່ເວລາ 5:00 ໂມງເຊົ້າຂອງວັນທີ 30 ສິງຫາຜ່ານມາ, ຢູ່ຈຸດຂອບເຂດບ້ານບໍ ເມືອງໄຊ ແຂວງອຸດົມໄຊ ເຊິ່ງເປັນຈຸດທີ່ໄດ້ສົ່ງຜົນເສຍຈາກນ້ຳຖ້ວມດັ່ງກ່າວ ເປັນຕົ້ນແມ່ນໄຮ່, ນາ, ຮົ່ວສວນ, ໜອງປາ, ພາຫະນະ, ຊັບສິນໄດ້ຮັບຜົນເສຍຫາຍສົມຄວນ. ມາຮອດປັດຈຸບັນ, ກຳລັງກອງບັນຊາການທະຫານແຂວງອຸດົມໄຊພວກເຮົາໄດ້ສຸມໃສ່ເລັ່ງ ຊ່ວຍເຫຼືອພໍ່ແມ່ປະຊາຊົນຢູ່ຂອບເຂດທີ່ໄດ້ຮັບຜົນກະທົບຈາກໄພນ້ຳຖ້ວມດ້ວຍຄວາມເຄັງຮ້ອນ ແລະ ສຳລັບປະຊາຊົນ ທີ່ອາໄສຢູ່ເຂດຕອນໃຕ້ຂອງນ້ຳກໍ ໃຫ້ມີ ສະຕິກະກຽມມ້ຽນມັດ, ຍົກຍ້າຍວັດຖຸ, ສິ່ງຂອງທີ່ຈຳເປັນ, ສັດລ້ຽງ ໄປໄວ້ບ່ອນທີ່ສູງ-ປອດໄພ, ພ້ອມທັງໃຫ້ຕິດຕາມການລາຍງານສະພາບດີນຟ້າອາກາດ ແລະ ລະດັບນ້ຳຈາກພະແນກກະສິກຳ ແລະ ສິ່ງແວດລ້ອມແຂວງເປັນແຕ່ລະໄລຍະ. ສະຫາຍ ພົນຈັດຕະວາ ຕຸ້ຍ ພົມມີໄຊ ຍັງກ່າວຕື່ມອີກວ່າ: ສຳລັບກຳລັງອ້າຍນ້ອງທະຫານທີ່ພວກເຮົາໄດ້ມາຊ່ວຍເຫຼືອພໍ່ແມ່ປະຊາຊົນໃນຄັ້ງນີ້ມີຈຳນວນ 226 ສະຫາຍ ພ້ອມດ້ວຍພາຫະນະລົດໃຫຍ່ຂົນສົ່ງ ຈຳນວນ 6 ຄັນ ເຄື່ອນໄຫວຊ່ວຍເຫຼືອພໍ່ແມ່ປະຊາຊົນ ທີ່ຖືກຜົນກະທົບຈາກໄພພິບັດນ້ຳຖ້ວມຢູ່ແຕ່ລະຈຸດຂອບເຂດເທດສະບານ ເມືອງໄຊ, ເມືອງຫຼາ ແລະ ເມືອງນາໝໍ້ ເບື້ອງຕົ້ນຊ່ວຍປະຊາຊົນໃນການປັດກວາດເສດຂີ້ເຫຍື້ອ, ອານາໄມເຮືອນຊານ, ສຳນັກງານອົງ ການ, ມ້ຽນມັດເຄື່ອງຂອງມີຄ່າ, ສັດລ້ຽງ ແລະ ສ້ອມແປງສານຸປະໂພກຕ່າງໆບ່ອນທີ່ໄດ້ຮັບຜົນກະທົບຈາກໄພນ້ຳຖ້ວມ ໃຫ້ກັບຄືນສູ່ສະພາບປົກກະຕິໂດຍໄວ ແລະ ທັງປຸກລະດົມທາງດ້ານແນວຄິດຈິດໃຈຂອງພໍ່ແມ່ປະຊາຊົນຜູ້ທີ່ຖືກຜົນກະທົບຈາກເຫດການດັ່ງກ່າວ ເຊິ່ງຍາມໃດການຈັດຕັ້ງພັກ-ລັດ, ການນຳແຂວງກໍ່ໃຫ້ຄວາມເປັນຫວງເປັນໄຍເວົ້າສະເພາະແມ່ນກຳລັງປະກອບອາວຸດທ້ອງຖິ່ນທະຫານແຂວງອຸດົມໄຊພວກເຮົາໄດ້ໃຫ້ການຊ່ວຍເຫຼືອທາງດ້ານແຮງງານ, ຊຸກຍູ້ກຳລັງໃຈຕໍ່ຜູ້ປະສົບໄພ ແລະ ອີກຢ່າງໜຶ່ງທັງເປັນການສ້າງຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນເມື່ອເກີດໄພພິບັດທາງທຳມະຊາດກຳລັງທະຫານທ້ອງຖິ່ນພວກເຮົາກໍ່ຈະບໍ່ປະປ່ອຍໃຫ້ປະຊາຊົນປະສົບໄພຢູ່ຜູ້ດຽວ ດັ່ງຄຳເວົ້າທີ່ວ່າ: ກອງທັບ ກັບປະຊາຊົນ ຄື “ ປາກັບນ້ຳ” ບໍ່ສາມາດຕັດແຍກອອກຈາກກັນໄດ້. ໂດຍ: ວັນໄຊ ໄຊສະຫວັດ ຂໍ້ມູນ: ທະຫານແຂວງອຸດົມໄຊ

news to day and hot news