ວັນພຸດ, ວັນທີ 16 ກັນຍາ 2026
ຮຽນການເມືອງ ເພື່ອຮູ້ແນວທາງຂອງພັກ, ຈຳແນກໄດ້ມິດ ແລະ ສັດຕູຢ່າງຈະແຈ້ງ
ເວລາອອກຂ່າວ: 2026-09-03 09:11:41 | ຜູ້ຂຽນ : admin1 | ຈຳນວນຄົນເຂົ້າຊົມ: 148 | ຄວາມນິຍົມ: 
ທ່າມກາງຍຸກສະໄໝທີ່ ໂລກກຳລັງປ່ຽນແປງໄປຢ່າງໄວວາ, ຂໍ້ມູນຂ່າວ ສານຫຼັ່ງໄຫຼເຂົ້າມາທຸກທິດທຸກທາງ ຜ່ານໜ້າຈໍໂທລະສັບມືຖື ຂອງພວກເຮົາໃນທຸກໆວິນາທີ ກະແສຟອງອັນຂ້ຽວຂາດນີ້, ບາງຄັ້ງຄວາມຈິງ ແລະ ຄວາມເທັດອາດຖືກປົນເປກັນຈົນແຍກບໍ່ອອກ. ສຳລັບພະນັກງານ-ນັກຮົບ ຄົນຮຸ່ນໜຸ່ມຜູ້ເປັນກຳລັງແກ່ນສານ, ເປັນຮົ້ວ ແລະ ເປັນອະນາຄົດຂອງປະເທດຊາດ ການຮຽນການເມືອງ ຈຶ່ງບໍ່ແມ່ນເລື່ອງໄກຕົວ ຫຼື ເປັນພຽງວິຊາຮຽນທີ່ໜ້າເບື່ອອີກຕໍ່ໄປ ແຕ່ມັນຄື “ເຂັມທິດນຳທາງ” ເພື່ອເຮັດໃຫ້ພວກເຮົາຮູ້ແນວທາງຂອງພັກ ຄື “ເກາະປ້ອງກັນຜິດ” ທາງດ້ານແນວຄິດ ແລະ ເປັນອາວຸດທາງປັນຍາທີ່ແຫຼມຄົມທີ່ສຸດ ທີ່ຄົນຮຸ່ນໜຸ່ມພວກເຮົາຕ້ອງມີໄວ້ທາງດ້ານສະຕິປັນຍາ.
ການຮຽນການເມືອງ ບໍ່ແມ່ນການທ່ອງຈຳຕຳລາໃຫ້ໄດ້ຄະແນນດີ, ແຕ່ແມ່ນການຫຼໍ່ຫຼອມຈິດໃຈໃຫ້ມີອຸດົມຄະຕິທີ່ໜັກແໜ້ນ. ຊາວໜຸ່ມທຸກຄົນ, ບໍ່ວ່າຈະ
ເປັນນັກສຶກສາ, ພະນັກງານ-ນັກຮົບ ເມື່ອໃດທີ່ພວກເຮົາໄດ້ຮັບການອົບຮົມດ້ານການເມືອງຢ່າງເລິກເຊິ່ງ, ສະຕິປັນຍາກໍຈະສະ ຫວ່າງສະໄຫວຂຶ້ນ. ຊ່ວຍໃຫ້ພວກເຮົາເກີດມີ “ສະຕິຕື່ນຕົວທາງການເມືອງ” ທີ່ສູງສົ່ງ, ສາມາດເບິ່ງເຫັນບັນຫາ ແລະ ຈຳແນກໄດ້ຢ່າງຈະແຈ້ງ, ເດັດຂາດວ່າ “ໃຜແມ່ນມິດແທ້” ທີ່ຮັກແພງ ແລະ “ໃຜແມ່ນສັດຕູ” ທີ່ແຝງຕົວເຂົ້າມາມ້າງເພທຳລາຍ.
ໃນປັດຈຸບັນ, ກົນອຸບາຍຂອງອິດທິກໍາລັງປໍລະປັກ ບໍ່ໄດ້ມາໃນຮູບແບບຂອງສົງຄາມທີ່ໃຊ້ລະເບີດ ແລະ ລູກປືນສະເໝີໄປ, ແຕ່ພວກເຂົາມັກຈະໃຊ້ “ສົງຄາມຈິດຕະສາດ” ຜ່ານສື່ສັງຄົມອອນລາຍ, ຄ່ອຍໆປ້ອນຂໍ້ມູນບິດເບືອນ, ສ້າງຄວາມປັ່ນປ່ວນ ແລະ ຍຸຍົງໃຫ້ຊາວໜຸ່ມຫຼົງທິດທາງເຮັດໃຫ້ກຳລັງປະກອບອາວຸດເກີດຄວາມຫວັ່ນໄຫວຄອນແຄນ. ຖ້າພວກເຮົາຂາດສະຕິ, ຂາດການຮຽນຮູ້ທິດສະດີການເມືອງ ກໍອາດຈະຕົກເປັນເຄື່ອງມືຂອງພວກເຂົາໂດຍບໍ່ຮູ້ຕົວ. ສະນັ້ນ, ການມີສະຕິລະວັງຕົວ, ຮູ້ເທົ່າທັນເຫດການ ແລະ ສາມາດແຍກແຍະມິດ ແລະ ສັດຕູໄດ້ຢ່າງຖືກຕ້ອງ ຈຶ່ງເປັນຄຸນສົມບັດໜຶ່ງທີ່ສຳຄັນທີ່ສຸດ ພະນັກງານ-ນັກຮົບ ຄົນຮຸ່ນໃໝ່ ທີ່ຈະມາປົກປັກຮັກສາໝາກຜົນຂອງການປະຕິວັດທີ່ບັນພະບຸລຸດໄດ້ເອົາເລືອດເນື້ອແລກມາ.
ສິ່ງທີ່ພິເສດ ແລະ ສັກສິດທີ່ສຸດ, ການຮຽນການເມືອງແມ່ນການຮັດແໜ້ນຄວາມເຊື່ອໝັ້ນ ໃຫ້ກາຍເປັນຄວາມຈົງຮັກພັກດີຕໍ່ອຸດົມການສັງຄົມນິຍົມຢ່າງຕາຍໃຈ. ນີ້ບໍ່ແມ່ນຄວາມເຊື່ອທີ່ງົມງວາຍ, ແຕ່ເປັນຄວາມເຊື່ອທີ່ຕັ້ງຢູ່ບົນພື້ນຖານວິທະຍາສາດ ແລະ ຄວາມຈິງຂອງປະຫວັດສາດຊາດລາວ. ພວກເຮົາມີຄວາມພາກພູມໃຈທີ່ໄດ້ເກີດມາໃຕ້ຮົ່ມທຸງສີແດງທີ່ມີຮູບຄ້ອນ-ກ່ຽວ ແລະ ທຸງວົງເດືອນອັນສະຫງ່າລາສີ. ບໍ່ວ່າສະພາບການໂລກຈະຜັນແປໄປແນວໃດ, ບໍ່ວ່າເສັ້ນທາງໃນຕໍ່ໜ້າຈະມີອຸປະສັກ ແລະ ຄວາມຫຍຸ້ງຍາກປານໃດ, ຈິດໃຈທີ່ຢຶດໝັ້ນຕໍ່ເສັ້ນທາງສັງຄົມນິຍົມຈະຍັງຄົງຫຼໍ່ຫຼອມເປັນເນື້ອດຽວກັນກັບສາຍເລືອດ ແລະ ລົມຫາຍໃຈຂອງພວກເຮົາ.
ສະນັ້ນ, ພະນັກງານ-ນັກຮົບ ຄົນຮຸ່ນໜຸ່ມ ຈົ່ງພ້ອມກັນຕັ້ງໜ້າຮ່ຳຮຽນການເມືອງ, ເຝິກຝົນຫຼໍ່ຫຼອມຄຸນສົມບັດສິນທຳປະຕິວັດໃຫ້ກາຍເປັນເນື້ອໃນຈິດໃຈເພື່ອເຮັດໃຫ້ພວກເຮົາ ກ້າວເດີນໄປຂ້າງໜ້າພາຍໃຕ້ການນຳພາຂອງພັກດ້ວຍຄວາມທຸ່ນທ່ຽງ, ສະຫງ່າຜ່າເຜີຍ ແລະ ເຊື່ອໝັ້ນຢ່າງເດັດດ່ຽວວ່າ: ເສັ້ນທາງສັງຄົມນິຍົມ ຄືເສັ້ນທາງດຽວ ທີ່ຈະນຳພາປະເທດຊາດ ໄປສູ່ຄວາມມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ ແລະ ສັງຄົມມີຄວາມຍຸຕິທຳ ສີວິໄລ ຢ່າງແທ້ຈິງ.
ໂດຍ: ໄພລິນ ບຸນຍັງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
