ວັນອັງຄານ, ວັນທີ 18 ສິງຫາ 2026
ໂຮງຮຽນເຫຼົ່າຮົບກົດລັບ 307 ສະຫຼຸບວຽກງານ ປກຊ-ປກສ ກັບ ບ້ານລາດຄວາຍ
ເວລາອອກຂ່າວ: 2026-08-05 09:02:53 | ຜູ້ຂຽນ : admin1 | ຈຳນວນຄົນເຂົ້າຊົມ: 168 | ຄວາມນິຍົມ: 
ກອງປະຊຸມສະຫຼຸບວຽກງານປ້ອງກັນຊາດ-ປ້ອງກັນຄວາມສະຫງົບ ລະຫວ່າງໂຮງຮຽນເຫຼົ່າຮົບກົດລັບ 307 ກັບ ບ້ານລາດຄວາຍ ເມືອງໄຊທານີນະ ຄອນຫຼວງວຽງຈັນ ປະຈຳປີ 2025 ແລະ ວາງທິດທາງແຜນ ການປະຈຳປີ 2026 ໄດ້ຈັດຂຶ້ນ ໃນບໍ່ດົນຜ່ານມາ, ເຂົ້າຮ່ວມມີ ສະຫາຍ ພັນເອກ ສີເຟືອງ ແກ້ວບົວພອນ ຫົວໜ້າການເມືອງ ໂຮງ ຮຽນເຫຼົ່າຮົບກົດລັບ 307, ສະ ຫາຍ ພັນເອກ ບຸນສະຫຼອງ ວິໄລຫານ ຫົວໜ້າການທະຫານໂຮງ ຮຽນເຫຼົ່າຮົບກົດລັບ 307, ສະ ຫາຍ ຂັນໄຊ ແກ້ວພັນຄຳ ຄະນະພັກຮາກຖານ ຕາແສງທ່າງ່ອນ ນາຍບ້ານ ບ້ານ ລາດຄວາຍ, ຂະ ແໜງການທີ່ກ່ຽວຂ້ອງ, ກຳລັງ ປກຊ-ປກສ ບ້ານລາດຄວາຍເຂົ້າຮ່ວມ.
ໃນກອງປະຊຸມທັງສອງຝ່າຍໄດ້ຜັດປ່ຽນກັນສະຫຼຸບການ ເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະຫງົບ ປະຈຳປີ 2025 ແລະ ວາງທິດທາງແຜນການປະຈຳປີ 2026 ເຫັນວ່າ: ໃນໄລຍະ 1 ປີຜ່ານມາ ໂຮງຮຽນເຫຼົ່າຮົບກົດລັບ 307 ກັບ ບ້ານລາດຄວາຍ ໄດ້ມີການປະສານສົມທົບແໜ້ນຂົງເຂດວຽກງານ ປກຊ-ປກສ ແລະ ວຽກງານອື່ນໆທີ່ປິ່ນອ້ອມ; ເຊິ່ງບ້ານລາດຄວາມ ເປັນບ້ານຮາກຖານໜຶ່ງທີ່ໂຮງຮຽນເຫຼົ່າຮົບກົດລັບ 307 ຮັບຜິດຊອບໃນວຽກງານກໍ່ສ້າງຮາກຖານການເມືອງ; ຍາມໃດທັງສອງພາກສ່ວນກໍມີການປະສານກັນຢ່າງກົມກຽວໃນການແລກປ່ຽນຂໍ້ມູນຂ່າວສານຮັບປະກັນເຮັດໃຫ້ສະພາບມີຄວາມສະຫງົບໂດຍພື້ນຖານ, ພະນັກງານ-ນັກຮົບ ແລະ ພໍ່ແມ່ປະຊາຊົນ ມີແນວຄິດອຸ່ນອຽນທຸ່ນ ທ່ຽງ, ເຊື່ອໝັ້ນຕໍ່ການນຳພາຂອງພັກ-ລັດ, ມີຄວາມສາມັກຄີເປັນປຶກແຜ່ນ, ມີສະຕິກຽມພ້ອມສູ້ຮົບ ແລະ ມີຄວາມຫ້າວຫັນຕໍ່ໜ້າທີ່ວຽກງານທີ່ການຈັດຕັ້ງຂັ້ນເທິງມອບໝາຍໃຫ້, ປະຊາຊົນໄດ້ເຄື່ອນໄຫວທຳມາຫາກິນຖືກຕ້ອງຕາມກົດໝາຍ, ເປັນເຈົ້າການໃນການປົກປັກຮັກສາ ແລະ ສ້າງສາພັດທະນາທ້ອງຖິ່ນບ້ານຂອງຕົນໄດ້ເປັນຢ່າງດີ.
ວຽກງານຮັບປະກັນເຮັດໃຫ້ສະພາບມີຄວາມສະຫງົບ ທັງສອງຝ່າຍໄດ້ມີການປະສານສົມທົບກັນໃນການແກ້ໄຂປະກົດການຫຍໍ້ທໍ້ທີ່ເກີດຂຶ້ນເປັນຕົ້ນແມ່ນໄດ້ຈັບກຸມບຸກຄົນທີ່ເຄື່ອນໄຫວລັກຊັບພົນລະເມືອງໄດ້ 16 ຄັ້ງ, ແກ້ໄຂຄະດີມົ້ວສຸມຢາເສບຕິດ 6 ຄັ້ງ, ອາລະວາດຕີກັນ 7 ຄັ້ງ, ແກ້ໄຂອຸບັດຕິເຫດໄດ້ 17 ຄັ້ງ, ພ້ອມນັ້ນຍັງໄດ້ເປັນເຈົ້າການປ້ອງກັນເວນຍາມ-ກວດກາລາດຕະເວນໃນວັນສຳຄັນຕ່າງໆຂອງຊາດ, ຂອງພັກ ແລະ ຂອງກອງທັບ ໄດ້ 37 ຄັ້ງ, ປ້ອງກັນງານບຸນປະເພນີໄດ້ 3 ຄັ້ງ, ໄດ້ສົມທົບກຳລັງກັບ ປກສ ເມືອງ-ປກສ ຕາແສງ ທ່າງ່ອນ ລົງຕິດຕາມເປົ້າໝາຍຄ້າຂາຍຢາເສບຕິດໄດ້ 4 ຄັ້ງ ກັກຕົວໄດ້ 4 ຄົນ, ຍິງ 1 ຄົນ ສາມາດຍຶດຢາບ້າໄດ້ 221 ເມັດ ມອບໃຫ້ ປກສ ເມືອງໄຊທານີ ດຳເນີນຄະດີຕາມກົດໝາຍ, ລົງກວດກາການມົ້ວສຸມຂອງກຸ່ມໄວໜຸ່ມທີ່ຕົ້ມນ້ຳກະທ່ອມໄດ້ 19 ຄັ້ງ ແລະ ສຶກສາອົບຮົມຢູ່ຂັ້ນບ້ານ.
ໂອກາດດຽວກັນນີ້, ທັງສອງຝ່າຍຍັງໄດ້ປະກອບຄຳຄິດຄຳເຫັນເພື່ອແລກປ່ຽນຖອດຖອນບົດຮຽນ ເຊິ່ງກັນ ແລະ ກັນໃນຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ ພ້ອມກັນແກ້ໄຂບັນຫາທີ່ຍັງຄົງຄ້າງ ແລະ ສືບຕໍ່ວາງຄາດໝາຍສູ້ຊົນໃນຕໍ່ໜ້າເພື່ອສ້າງໃຫ້ບ້ານລາດຄວາຍ ມີຄວາມສະຫງົບປອດໄພ 100%. ພ້ອມດຽວກັນນີ້, ອຳນາດການປົກຄອງບ້ານລາດ ຄວາຍ ຍັງໄດ້ມອບອຸປະກອນກິລາຈຳນວນໜຶ່ງໃຫ້ໂຮງຮຽນເຫຼົ່າຮົບກົດລັບ 307 ແລະ ຮ່ວມກັນສ້າງຂະບວນການບານເຕະມິດຕະພາບເພື່ອເປັນການຮັດແໜ້ນຄວາມສາມັກຄີໃຫ້ແໜ້ນແຟ້ນກວ່າເກົ່າ.
ໂດຍ: ແກ່ນຕາ ສີລິລາດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
