ວັນອາທິດ, ວັນທີ 09 ສິງຫາ 2026
ກວາດລ້າງສະແກມເມີຂ້າມຊາດ ພ້ອມກັນ 6 ຈຸດ ໃນນະຄອນຫຼວງວຽງຈັນ ກັກຕົວ 63 ຄົນ ພ້ອມຂອງກາງຫຼາຍລາຍການ
ເວລາອອກຂ່າວ: 2026-08-04 10:14:15 | ຜູ້ຂຽນ : admin3 | ຈຳນວນຄົນເຂົ້າຊົມ: 182 | ຄວາມນິຍົມ: 
ວັນທີ 1 ສິງຫາ 2026 ທີ່ຜ່ານມານີ້; ເຈົ້າໜ້າທີ່ຄະນະສະເພາະກິດ ກະຊວງປ້ອງກັນຄວາມສະຫງົບ ໄດ້ເປີດປະຕິບັດການຄັ້ງໃຫຍ່ເຂົ້າກວດຄົ້ນ ແລະ ກວາດລ້າງກຸ່ມແກ້ງເປົ້າໝາຍສໍ້ໂກງທາງໂທລະຄົມ ຫຼື ສະແກມເມີ ພ້ອມກັນເຖິງ 6 ຈຸດ ໃນເຂດນະຄອນຫຼວງວຽງຈັນ; ສາມາດກັກຕົວຜູ້ຖືກສົງໄສໄດ້ທັງໝົດ 63 ຄົນ ຍິງ 3 ຄົນ ແລະ ຢຶດຂອງກາງໄດ້ຈຳນວນຫຼວງຫຼາຍ. ໃນຈຳນວນຜູ້ຖືກກັກຕົວທັງໝົດ ປະກອບມີສັນຊາດຈີນ ຈຳນວນ 57 ຄົນ, ຍິງ 2 ຄົນ, ລາວ 4 ຄົນ, ຍິງ 1 ຄົນ, ກຳປູເຈຍ 1 ຄົນ ແລະ ຄົນໄທ 1 ຄົນ.
ຈາກການລົງພື້ນທີ່ຂອງເຈົ້າໜ້າທີ່ໃນ 2 ເມືອງໃຫຍ່ ຄື: ເມືອງສີໂຄດຕະບອງ ແລະ ເມືອງຫາດຊາຍຟອງ ສາມາດກວາດລ້າງແກ້ງສະແກມເມີ ໄດ້ທັງໝົດ 6 ຈຸດຄື: ຈຸດທີ 1 (ບ້ານໃໝ່, ເມືອງສິໂຄດຕະບອງ): ເຂົ້າກວດຄົ້ນເຮືອນເຊົ່າ 2 ຊັ້ນ ຈຳນວນ 3 ຫຼັງຕິດກັນ ເຊິ່ງເປັນເຮືອນຂອງທ້າວ ສຸກສະເຫຼີມ ສອນພານິດ ອາຊີບນັກທຸລະກິດ, ປັດຈຸບັນຢູ່ບ້ານ ນາຊາຍທອງໃຕ້ ເມືອງນາຊາຍທອງ, ນະຄອນຫຼວງວຽງຈັນ; ພົບເຫັນເຮືອນຫຼັງ 1 ຖຶກນຳໃຊ້ບ່ອນພັກເຊົາ ແລະ ອີກຫຼັງຈຳນວນ 2 ຖືກດັດແປງເປັນຫ້ອງການສູນສໍ້ໂກງທາງໂທລະຄົມ ຫຼື ສະແກມເມີ. ໃນເວລາເຈົ້າໜ້າທີ່ເຂົ້າກວດຄົ້ນພົບເຫັນພຽງແຕ່ພະນັກງານແມ່ບ້ານ ແລະ ພະນັກງານອານະໄມ ຈຳນວນ 4 ຄົນ, ຍິງ 1 ຄົນ, ສັນຊາດລາວ 3 ຄົນ, ຍິງ 1 ຄົນ, ສັນຊາດ ໄທ 1 ຄົນ. ຜ່ານການກວດຄົ້ນສະຖານທີ່, ພົບເຄື່ອງຂອງທີ່ນຳໃຊ້ເຂົ້າໃນການກະທຳຜິດມີຄື: ໂທລະສັບ ຈຳນວນ 3.172 ໜ່ວຍ, ຄອມພິວເຕີຕັ້ງໂຕະ ຈຳນວນ 97 ໜ່ວຍ, ຄອມພິວເຕີໂນດບຸກ ຈຳນວນ 2 ໜ່ວຍ, ໜັງສືຜ່ານແດນ ຈຳ 2 ຫົວ, ລົດເກັງ ເກຍລີໂອ ສີຂາວ ບໍ່ມີປ້າຍ ຈຳນວນ 1 ຄັນ, ລົດຕູ້ (ບໍ່ມີປ້າຍ) ຈຳນວນ 1 ຄັນ, ລົດຈັກ ຮອນດາສະກຸບປີ້ ສີດຳ ເລກທະບຽນ ຍອ 4916 ກຳແພງນະຄອນ ຈຳນວນ 1 ຄັນ, ລັດຈັກໄຟຟ້າ ຈຳ
ນວນ 4 ຄັນ, ລົດຈັກສາມລໍ້ໄຟຟ້າ ຈຳນວນ 1 ຄັນ. ຈຸດທີ 2 (ບ້ານໜອງໄຮ, ເມືອງຫາດຊາຍຟອງ): ເຂົ້າກວດຄົ້ນເຮືອນເຊົ່າເຮືອນ 2 ຊັ້ນ, ເຊິ່ງເປັນເຮືອນຂອງ ນາງ ສົມພັນ ອາຍຸ 40 ປີ, ອາຊີບພະນັກງານ; ພົບຜູ້ຖືກສົງໄສ 24 ຄົນ
ໃນນັ້ນ ສັນຊາດຈີນ ຈຳນວນ 23 ຄົນ ຍິງ 1 ຄົນ, ຄົນລາວ 1 ຄົນ. ເຈົ້າ
ໜ້າທີ່ສາມາດຢຶດ ເຄື່ອງຂອງກາງ ໄດ້ຄື: ຄອມພິວເຕີຕັ້ງໂຕະ ຈຳນວນ 28 ໜ່ວຍ, ຄອມພິວເຕີໂນດບຸກ ຈຳນວນ 1 ໜ່ວຍ, ໂທລະສັບມືຖື ຈຳນວນ 70 ໜ່ວຍ, ເຄື່ອງຮັບສັນຍານອິນເຕີເນັດຜ່ານດາວທຽມ ຈຳນວນ 1 ຊຸດ. ຈຸດທີ 3 (ບ້ານເມືອງວາທ່າ, ເມືອງສີໂຄດຕະບອງ): ກວດຄົ້ນເຮືອນເຊົ່າ 2 ຊັ້ນ ເຊິ່ງເປັນເຮືອນຂອງທ້າວ ບຸນໂຮມ (ພະນັກງານບຳນານ), ສາມາດກັກຕົວຜູ້ຖືກສົງ
ໄສ ໄດ້ຈຳນວນ 2 ຄົນ (ຈີນ 1 ຄົນ, ກຳປູເຈຍ 1 ຄົນ) ພ້ອມໂທລະສັບມືຖື: 5 ໜ່ວຍ, ຄອມພິວເຕີໂນດບຸກ 3 ໜ່ວຍ, ແລະ ໄອແພັດ 1 ໜ່ວຍ. ຈຸດທີ 4 ແລະ 5 (ໂຮງແຮມຢຸນນານ ບ້ານອຸບມຸງ ແລະ ຕະຫຼາດຊັງຈ້ຽນ ບ້ານວັດໄຕນ້ອຍ ເມືອງ ສີໂຄດຕະບອງ): ເຈົ້າໜ້າທີ່ໄດ້ເຂົ້າກວດກາຫ້ອງພັກໂຮງແຮມ ເບີ 8627 ແລະ ພື້ນທີ່ໃນຕະຫຼາດ ກັກຕົວຄົນຈີນ ໄດ້ 9 ຄົນ, ຍິງ 2 ຄົນ, ພ້ອມຢຶດໂທລະສັບ 11 ໜ່ວຍ, ໜັງສືຜ່ານແດນຈຳນວນ 1 ຫົວ, ລົດໃຫຍ່ 2 ຄັນຄື: ລົດຣີໂວ້ ສີດຳ ໝາຍເລກທະບຽນ ຂກ 5526 ນະຄອນຫຼວງວຽງຈັນ, ລົດເບ້ນ
ສີດຳ ໝາຍເລກທະບຽນ AFC168. ຈຸດທີ 6 (ບ້ານສາລະຄຳໃຕ້, ເມືອງຫາດຊາຍຟອງ): ເຂົ້າກວດຄົ້ນເຮືອນເຊົ່າ ວິນລ່າຊັ້ນ 1, ເຊິ່ງເປັນເຮືອນຂອງ ນາງ ເເກ້ວເເກ່ນໃຈ ຂີນພົມມະວົງ, ອາຊີບຄ້າ-ຂາຍ, ປັດຈຸບັນຢູ່ບ້ານສົມຫວັງ ເມືອງຫາດຊາຍຟອງ ນະຄອນຫຼວງວຽງຈັນ, ສາມາດກັກຕົວຜູ້ຖືກສົງໄສສັນຊາດຈີນໄດ້ຈຳນວນ 24 ຄົນ, ຢຶດຄອມພິວເຕີໂນດບຸກ 5 ໜ່ວຍ, ຄອມພິວເຕີຕັ້ງໂຕະ 83 ໜ່ວຍ, ໂທລະສັບ 85 ໜ່ວຍ, ໄອເເພັດ 1 ໜ່ວຍ, ເຄື່ອງຮັບສັນຍານອິນເຕີເນັດຜ່ານດາວທຽນ ຈຳນວນ 2 ຊຸດ.
ເຈົ້າໜ້າທີ່ ປກສ ເປີດເຜີຍວ່າ ເປົ້າໝາຍການຫຼອກລວງຂອງກຸ່ມແກ້ງນີ້ແມ່ນເນັ້ນໃສ່ພົນລະເມືອງຈີນດ້ວຍກັນ. ປັດຈຸບັນ, ເຈົ້າໜ້າທີ່ກຳລັງເລັ່ງສືບສວນ-ສອບສວນຂະຫຍາຍຜົນເພື່ອຊອກຫາຜູ້ຮ່ວມຂະບວນການເພີ່ມເຕີມ. ສຳລັບຜູ້ຕ້ອງສົງໄສສັນຊາດຈີນທັງ 57 ຄົນ, ຫຼັງຈາກເຈົ້າໜ້າທີ່ລາວສອບສວນເອົາຄຳໃຫ້ການເປັນທີ່ຮຽບຮ້ອຍແລ້ວ ຈະມີການປະສານສົມທົບກັບສະຖານເອກອັກຄະລັດຖະທູດ ສປ ຈີນ ແລະ ກົມກວດກາຄົນເຂົ້າ-ອອກເມືອງ ເພື່ອສົ່ງຕົວໃຫ້ຕຳຫຼວດ ສປ ຈີນ ນຳໄປດຳເນີນຄະດີຕໍ່ຢູ່ປະເທດຈີນ; ລວມເຖິງຜູ້ຕ້ອງຫາສັນຊາດກຳປູເຈຍກໍຈະຖືກສົ່ງຕົວເຊັ່ນກັນ.
ນອກຈາກນີ້, ທາງການລາວຈະບັງຄັບໃຊ້ກົດໝາຍວ່າດ້ວຍການເຂົ້າ-ອອກ ແລະ ການຄຸ້ມຄອງຄົນຕ່າງປະເທດ ຢູ່ ສປປ ລາວ ຢ່າງເດັດຂາດ ໂດຍຂຶ້ນບັນຊີ ແລະ ບໍ່ອະນຸຍາດໃຫ້ບຸກຄົນກຸ່ມນີ້ເດີນທາງເຂົ້າ ສປປ ລາວ ອີກຢ່າງເດັດຂາດ ຍ້ອນມີພຶດຕິກຳເຂົ້າມາເຄື່ອນໄຫວກະທຳຜິດຮ້າຍແຮງ ທີ່ສົ່ງຜົນກະທົບຕໍ່ຄວາມສະຫງົບຮຽບຮ້ອຍຂອງສັງຄົມຢູ່ ສປປ ລາວ.
ຂ່າວ: ບ່າວດອນຂຽວ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
