POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນອາທິດ, ວັນທີ 09 ສິງຫາ 2026

ຮຸ່ນອາວຸໂສມອບປະສົບການ, ຮຸ່ນກາງນໍາໄປປະຕິບັດ ແລະ ຮຸ່ນໜຸ່ມ ສືບຕໍ່ພັດທະນາໃຫ້ທັນສະໄໝ
ເວລາອອກຂ່າວ: 2026-07-22 10:33:44 | ຜູ້ຂຽນ : admin2 | ຈຳນວນຄົນເຂົ້າຊົມ: 719 | ຄວາມນິຍົມ:

ການກໍ່ສ້າງພະນັກງານ 3 ຮຸ່ນ ຄື ການສ້າງອະນາຄົດ ຂອງອົງກອນ ເຊິ່ງຮຸ່ນອາວຸໂສເປັນຮາກຖານຂອງປັນຍາ ແລະ ປະສົບການ, ຮຸ່ນກາງເປັນກໍາລັງຫຼັກໃນການຂັບເຄື່ອນວຽກງານ ແລະ ນໍາພາການພັດທະນາ, ສ່ວນຮຸ່ນໜຸ່ມເປັນຄວາມຫວັງ ແລະ ພະລັງໃໝ່ທີ່ຈະສືບຕໍ່ພາລະກິດໃນອະນາຄົດ. ຖ້າທັງ 3 ຮຸ່ນໄດ້ຮ່ວມມືກັນດ້ວຍຄວາມເຄົາລົບ, ໄວ້ວາງໃຈ ແລະ ຮຽນຮູ້ເຊິ່ງກັນ ແລະ ກັນ, ອົງກອນຈະມີທັງຄວາມໝັ້ນຄົງ, ຄວາມຕໍ່ເນື່ອງ ແລະ ຄວາມກ້າວໜ້າ. ປະສົບການຂອງຮຸ່ນອາວຸໂສຈະເປັນແສງນໍາທາງ, ຄວາມສາມາດຂອງຮຸ່ນກາງຈະເປັນກໍາລັງຜັກດັນ, ແລະ ຄວາມຄິດສ້າງສັນ ຂອງຮຸ່ນໜຸ່ມ ຈະເປັນພະລັງໃນການປ່ຽນແປງ. ການລົງທຶນໃນການສ້າງຄົນທັງ 3 ຮຸ່ນ ບໍ່ແມ່ນການລົງທຶນເພື່ອປັດຈຸບັນເທົ່ານັ້ນ, ແຕ່ເປັນການລົງທຶນເພື່ອຄວາມຍືນຍົງ ແລະ ຄວາມຈະເລີນຮຸ່ງເຮືອງ ຂອງອົງກອນ ແລະ ປະເທດຊາດ ມະນຸດ ແມ່ນຊັບພະຍາກອນທີ່ມີຄຸນຄ່າທີ່ສຸດ ຂອງທຸກອົງກອນ ແລະ ທຸກປະເທດ. ການພັດທະນາປະເທດ ຫຼື ການສ້າງຄວາມເຂັ້ມແຂງໃຫ້ແກ່ອົງກອນ ບໍ່ສາມາດອາໄສພຽງແຕ່ບຸກຄົນຮຸ່ນໃດຮຸ່ນໜຶ່ງໄດ້ ແຕ່ຈໍາເປັນຕ້ອງອາໄສການປະສານພະລັງຂອງທຸກຮຸ່ນ. ຄໍາກ່າວທີ່ວ່າ: "ຮຸ່ນອາວຸໂສສ້າງຮາກຖານ, ຮຸ່ນກາງສານຕໍ່, ຮຸ່ນໜຸ່ມສ້າງອະນາຄົດ" ສະທ້ອນໃຫ້ເຫັນຫຼັກການການສືບທອດທີ່ມີຄວາມສໍາຄັນຕໍ່ການກໍ່ສ້າງພະນັກງານ ແລະ ການພັດທະນາຊາດຢ່າງຍືນຍົງ. ທຸກຮຸ່ນມີຈຸດເດັ່ນ ແລະ ບົດບາດທີ່ແຕກຕ່າງກັນ. ຮຸ່ນອາວຸໂສເປັນຜູ້ບຸກເບີກ ແລະ ສະສົມປະສົບການ, ຮຸ່ນກາງເປັນກໍາລັງຫຼັກໃນການຂັບເຄື່ອນວຽກງານ, ສ່ວນຮຸ່ນໜຸ່ມເປັນພະລັງແຫ່ງການສ້າງສັນ ແລະ ນະວັດຕະກໍາ. ເມື່ອທັງ 3 ຮຸ່ນ ຮ່ວມມືກັນ ຈະເຮັດໃຫ້ການນໍາພາ ແລະ ການພັດທະນາດໍາເນີນໄປຢ່າງມີປະສິດທິຜົນ. ຮຸ່ນອາວຸໂສ: ເປັນຜູ້ທີ່ຜ່ານປະສົບການອັນຍາວນານ ມີຄວາມຮູ້ທັງດ້ານວິຊາການ ແລະ ການປະຕິບັດ. ພວກເຂົາເຈົ້າໄດ້ວາງຮາກຖານຂອງອົງກອນດ້ວຍຄວາມສະຫຼະ ຄວາມອົດທົນ ແລະ ຄວາມຮັບຜິດຊອບ ມີປະສົບການເປັນບົດຮຽນອັນລໍ້າຄ່າທີ່ຮຸ່ນຕໍ່ມາສາມາດນໍາໄປປັບໃຊ້ໄດ້ ເຊິ່ງຮາກຖານທີ່ແຂງແຮງບໍ່ແມ່ນພຽງສິ່ງກໍ່ສ້າງ ຫຼື ລະບົບການບໍລິຫານ ແຕ່ຍັງລວມເຖິງຄຸນຄ່າ, ຈັນຍາບັນ, ວິໄນ ແລະ ອຸດົມການໃນການຮັບໃຊ້ສ່ວນລວມ. ຮຸ່ນອາວຸໂສຈຶ່ງມີພາລະກິດສໍາຄັນໃນການຖ່າຍທອດຄຸນຄ່າເຫຼົ່ານີ້ ໃຫ້ແກ່ຄົນຮຸ່ນຫຼັງ. ຮຸ່ນກາງ: ແມ່ນກໍາລັງຫຼັກ ຂອງອົງກອນ ເປັນກຸ່ມທີ່ນໍາເອົາປະສົບການຈາກຮຸ່ນອາວຸໂສມາ ມາປະຍຸກໃຊ້ໃນສະພາບການໃໝ່ ພ້ອມທັງ ບໍລິຫານ ແລະ ຂັບເຄື່ອນວຽກງານໃຫ້ບັນລຸເປົ້າໝາຍ ເປັນຂົວເຊື່ອມລະຫວ່າງ ຮຸ່ນອາວຸໂສ ແລະ ຮຸ່ນໜຸ່ມ. ພວກເຂົາບໍ່ພຽງແຕ່ຮັບຄວາມຮູ້ຈາກຮຸ່ນກ່ອນ ແຕ່ຍັງຕ້ອງເປັນຄູເຝິກ ແລະ ຜູ້ແນະນໍາໃຫ້ແກ່ຮຸ່ນໜຸ່ມ. ຄວາມສໍາເລັດ ຂອງອົງກອນໃນປັດຈຸບັນສ່ວນຫຼາຍຂຶ້ນກັບຄວາມສາມາດ ແລະ ວິໄສທັດຂອງຮຸ່ນກາງ. ຮຸ່ນໜຸ່ມ: ເປັນກໍາລັງສໍາຄັນ ຂອງອະນາຄົດ ມີຄວາມກ້າຄິດ, ກ້າເຮັດ, ກ້າປ່ຽນແປງ ແລະ ມີຄວາມສາມາດນໍາເຕັກໂນໂລຊີໃໝ່ມານໍາໃຊ້. ໃນຍຸກຂອງການປ່ຽນແປງຢ່າງໄວວາ ຮຸ່ນໜຸ່ມເປັນຜູ້ມີບົດບາດໃນການສ້າງນະວັດຕະກໍາ ແລະ ຄວາມຄິດໃໝ່ໆ ເພື່ອພັດທະນາອົງກອນ. ແນວໃດກໍຕາມ ຮຸ່ນໜຸ່ມຈະເຕີບໂຕເປັນຜູ້ນໍາທີ່ດີໄດ້ ຕ້ອງອາໄສການຖ່າຍທອດຄວາມຮູ້, ການຊີ້ນໍາ ແລະ ການສ້າງໂອກາດຈາກຮຸ່ນອາວຸໂສ ແລະ ຮຸ່ນກາງ. ການພັດທະນາຄົນຮຸ່ນໜຸ່ມ ຈຶ່ງເປັນການລົງທຶນເພື່ອອະນາຄົດ. ການພັດທະນາຈະເກີດຜົນຢ່າງແທ້ຈິງ ເມື່ອທັງສາມຮຸ່ນຮ່ວມມືກັນ. ຮຸ່ນອາວຸໂສມອບປະສົບການ, ຮຸ່ນກາງນໍາໄປປະຕິບັດ ແລະ ຮຸ່ນໜຸ່ມສືບຕໍ່ພັດທະນາໃຫ້ທັນສະໄໝ. ການສືບທອດໃນລັກສະນະນີ້ຈະຊ່ວຍໃຫ້ອົງກອນບໍ່ຂາດຊ່ວງ ແລະ ສາມາດປັບຕົວຕໍ່ການປ່ຽນແປງໄດ້. ການກໍ່ສ້າງພະນັກງານ 3 ຮຸ່ນ ຈຶ່ງບໍ່ແມ່ນພຽງການຈັດສັນຕໍາແໜ່ງ ແຕ່ເປັນການສ້າງລະບົບການຖ່າຍທອດຄວາມຮູ້, ການພັດທະນາຄວາມສາມາດ ແລະ ການສ້າງຈິດໃຈແຫ່ງຄວາມຮັບຜິດຊອບຕໍ່ອົງກອນ ແລະ ສັງຄົມ. ໂດຍ: ໂຊເລ້ ບຸນເຮືອງ

news to day and hot news