POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນອັງຄານ, ວັນທີ 21 ກໍລະກົດ 2026

ກໍ່ສ້າງພັກ-ພະນັກງານ ແນວໃດຈຶ່ງໄດ້ຮັບໝາກຜົນ
ເວລາອອກຂ່າວ: 2026-06-17 09:24:55 | ຜູ້ຂຽນ : admin3 | ຈຳນວນຄົນເຂົ້າຊົມ: 1012 | ຄວາມນິຍົມ:

ການກໍ່ສ້າງພັກ-ພະນັກງານ ແມ່ນໜຶ່ງໃນບັນຫາຍຸດທະສາດທີ່ມີຄວາມສຳຄັນພິເສດ ແລະ ເປັນວຽກງານພື້ນຖານທີ່ກຳນົດຄຸນນະພາບ ແລະ ຄວາມສາມາດການນຳພາຂອງພັກ, ຕະຫຼອດໄລຍະການປະຕິວັດຂອງປະເທດຊາດ ພັກປະຊາຊົນປະຕິວັດລາວ ໄດ້ຖືເອົາວຽກງານກໍ່ສ້າງພັກ-ພະນັກງານ ເປັນໃຈກາງຂອງວຽກງານກໍ່ສ້າງລະບອບການເມືອງ ແລະ ເປັນປັດໄຈຕັດສິນຕໍ່ຄວາມສຳເລັດຂອງພາລະກິດປົກປັກຮັກສາ ແລະ ພັດທະນາປະເທດຊາດ. ໃນສະພາບການປັດຈຸບັນ ທີ່ປະເທດກຳລັງສືບຕໍ່ດຳເນີນພາລະກິດປ່ຽນແປງໃໝ່ ແລະ ເຊື່ອມໂຍງເຂົ້າສູ່ພາກພື້ນ ແລະ ສາກົນຢ່າງກວ້າງຂວາງ ໄດ້ສ້າງທັງໂອກາດ ແລະ ສິ່ງທ້າທາຍໃໝ່ໃຫ້ແກ່ວຽກງານກໍ່ສ້າງພັກ, ດັ່ງນັ້ນ ການຕອບຄຳຖາມວ່າ: “ກໍ່ສ້າງພັກ-ພະນັກງານແນວໃດຈຶ່ງໄດ້ຮັບໝາກຜົນ” ຈຶ່ງເປັນບັນຫາທີ່ຄວນໄດ້ຮັບການຄົ້ນຄິດ ແລະ ຈັດຕັ້ງປະຕິບັດຢ່າງຈິງຈັງ. ກ່ອນອື່ນໝົດ, ຕ້ອງຖືເອົາວຽກງານກໍ່ສ້າງພັກທາງດ້ານການເມືອງ-ແນວຄິດ ເປັນບັນຫາຫຼັກ, ພະນັກງານ ແລະ ສະມາຊິກພັກ ຈະສາມາດປະຕິບັດໜ້າທີ່ໄດ້ດີ ກໍຕໍ່ເມື່ອມີຄວາມໜັກແໜ້ນທາງດ້ານການເມືອງ, ມີຄວາມເຊື່ອໝັ້ນຕໍ່ອຸດົມການ ແລະ ເສັ້ນທາງຂອງພັກ, ດັ່ງນັ້ນ ການສຶກສາອົບຮົມທິດສະດີມາກ-ເລນິນ, ແນວຄິດໄກສອນ ພົມວິຫານ, ມະຕິ ແລະ ຄຳສັ່ງຕ່າງໆຂອງພັກ ຕ້ອງເຮັດເປັນປະຈຳ, ຄຽງຄູ່ກັນນັ້ນ ຕ້ອງສ້າງຄວາມສາມາດໃຫ້ພະນັກງານຮູ້ຈັກວິເຄາະ ແລະ ໄຈ້ ແຍກຂໍ້ມູນ ເພື່ອບໍ່ໃຫ້ຕົກເປັນເຫຍື່ອຂອງຂ່າວສານບິດເບືອນ ແລະ ການໂຄສະນາໃສ່ຮ້າຍປ້າຍສີຕໍ່ພັກ. ສຸມໃສ່ການກໍ່ສ້າງພັກທາງດ້ານຄຸນນະທຳ, ຄຸນສົມບັດສິນທຳປະຕິວັດ ເຊິ່ງພະນັກງານທີ່ດີ ບໍ່ພຽງແຕ່ມີຄວາມຮູ້ ແລະ ຄວາມສາມາດເທົ່ານັ້ນ ແຕ່ຕ້ອງມີຄຸນນະທຳ, ຈັນຍາບັນ ແລະ ຄວາມຊື່ສັດບໍສຸດ, ແຕ່ຖ້າຂາດຄຸນນະທຳ ແມ່ນອາດຈະນຳໄປສູ່ການສໍ້ລາດບັງຫຼວງ, ການສວຍໃຊ້ອຳນາດ ແລະ ການເອົາຜົນປະໂຫຍດສ່ວນຕົວເປັນໃຫຍ່, ສະນັ້ນ ອົງການພັກຕ້ອງຖືເອົາການສຶກສາຄຸນສົມບັດສິນທຳປະຕິວັດເປັນວຽກງານປົກກະຕິ ໂດຍຕິດພັນກັບການຍ້ອງຍໍຄົນດີ, ລົງວິໄນຜູ້ກະທຳຜິດ ແລະ ການປູກຝັງຈິດສຳນຶກຮັບໃຊ້ປະຊາຊົນ, ການກໍ່ສ້າງພະນັກງານ ຕ້ອງຖືກມອບໝາຍເປັນວຽກງານກຸນແຈ, ພັກຈະເຂັ້ມແຂງ ຫຼື ບໍ່ ຂຶ້ນກັບຄຸນນະພາບຂອງພະນັກງານ, ດັ່ງນັ້ນ ຕ້ອງມີແຜນການສ້າງ, ບຳລຸງ, ເຝິກອົບຮົມ ແລະ ພັດທະນາພະນັກງານໃນໄລຍະຍາວ ການຄັດເລືອກ ແລະ ແຕ່ງຕັ້ງພະນັກງານ ຕ້ອງຍຶດຫຼັກຄຸນສົມບັດ ແລະ ຄວາມສາມາດເປັນສຳຄັນ, ຕ້ອງຫຼີກເວັ້ນການເລືອກຄົນຕາມຄວາມສຳພັນສ່ວນຕົວ ຫຼື ຕາມກຸ່ມຜົນປະໂຫຍດ. ຕ້ອງສ້າງອົງການພັກໃຫ້ບໍລິສຸດໜັກແໜ້ນ ແຕ່ລະຮາກຖານພັກຕ້ອງປະຕິບັດຫຼັກການລວມສູນປະຊາທິປະໄຕຢ່າງເຄັ່ງຄັດ, ຮັກສາລະບອບປະຊຸມ, ສຳຫຼວດກວດກາ ແລະ ຕຳນິກໍ່ສ້າງ, ການສຳຫຼວດກວດກາ ແລະ ຕຳນິກໍ່ສ້າງ ບໍ່ແມ່ນເປັນການຈັບຜິດ ຫຼື ໂຈມຕີກັນ ແຕ່ແມ່ນການຊ່ວຍກັນຊອກຫາຂໍ້ບົກຜ່ອງ ເພື່ອປັບປຸງແກ້ໄຂໃຫ້ດີຂຶ້ນ, ຖ້າບໍມີການສຳຫຼວດກວດກາ ແລະ ຕຳນິກໍ່ສ້າງ ອົງການນັ້ນຍ່ອມມີຄວາມສ່ຽງຕໍ່ການເກີດພະຍາດອາດຍາສິດ ແລະ ຄວາມເສື່ອມຖອຍ. ຍົກສູງຄຸນນະພາບການກວດກາ ແລະ ການຄຸ້ມຄອງ, ການກວດກາແມ່ນວິທີການສຳຄັນໃນການປ້ອງກັນ ແລະ ແກ້ໄຂການຜິດພາດ, ອົງການພັກທຸກຂັ້ນ ຕ້ອງຖືເອົາການກວດກາເປັນໜ້າທີ່ປົກກະຕິ ໂດຍເນັ້ນໜັກການກວດກາພະນັກງານທີ່ດຳລົງຕຳແໜ່ງນຳພາ, ການຄຸ້ມຄອງດ້ານການເງິນ, ຊັບສິນ ແລະ ການໃຊ້ອຳນາດ, ບ່ອນໃດມີການກວດກາດີ ບ່ອນນັ້ນຈະຫຼຸດຜ່ອນການລະເມີດວິໄນ ແລະ ສ້າງຄວາມເຊື່ອໝັ້ນໃຫ້ແກ່ປະຊາຊົນ. ນອກຈາກນີ້, ການກໍ່ສ້າງພັກ-ພະນັກງານ ໃຫ້ໄດ້ຮັບໝາກຜົນດີນັ້ນ ຍັງຕ້ອງອາໄສການເຂົ້າຮ່ວມຂອງປະຊາຊົນ, ພັກຕ້ອງຍຶດໝັ້ນຫຼັກການ “ປະຊາຊົນເປັນຮາກຖານ” ໂດຍຮັບຟັງຄຳເຫັນ, ຄຳສະເໜີ ແລະ ການຕິຊົມຈາກປະຊາຊົນ, ພະນັກງານທຸກຄົນຕ້ອງລົງຮາກຖານ, ໃກ້ຊິດປະຊາຊົນ, ຮູ້ບັນຫາຕົວຈິງ ແລະ ແກ້ໄຂຄວາມທຸກຍາກຂອງປະຊາຊົນຢ່າງທັນການ, ໃນຍຸກດິຈິຕອນ ພະນັກງານຍັງຈະຕ້ອງໄດ້ພັດທະນາຄວາມຮູ້ໃໝ່ໆ, ຄວາມສາມາດດ້ານເທັກໂນໂລຊີ, ທັກສະການບໍລິຫານ ແລະ ຄວາມສາມາດປັບຕົວໃຫ້ທັນກັບສະພາບການໃໝ່, ຖ້າພະນັກງານຂາດການຮຽນຮູ້ ແລະ ບໍ່ທັນຕໍ່ການປ່ຽນແປງ ຍ່ອມຈະບໍ່ສາມາດນຳພາວຽກງານໃຫ້ບັນລຸຜົນສຳເລັດໄດ້. ການກໍ່ສ້າງພັກ-ພະນັກງານໃຫ້ໄດ້ຮັບໝາກຜົນດີນັ້ນ ຕ້ອງໄດ້ເຮັດຢ່າງຮອບດ້ານ, ຕໍ່ເນື່ອງ ແລະ ເປັນລະບົບ ໂດຍຍຶດໝັ້ນຫຼັກການຂອງພັກ, ຄວບຄູ່ກັບການພັດທະນາຄຸນນະພາບພະນັກງານໃຫ້ຄົບຖ້ວນທັງດ້ານຄຸນສົມບັດສິນທຳ ແລະ ຄວາມສາມາດ ຈຶ່ງຈະສາມາດສ້າງອົງການພັກໃຫ້ເຂັ້ມແຂງ, ບໍລິສຸດໜັກແໜ້ນ ແລະ ສາມາດນຳພາການພັດທະນາປະເທດຊາດໃຫ້ບັນລຸຜົນສຳເລັດຕາມເປົ້າໝາຍທີ່ວາງໄວ້. ໂດຍ: ສົມພອນ ສີສຸມັງ

news to day and hot news