ວັນອັງຄານ, ວັນທີ 21 ກໍລະກົດ 2026
ມູນເຊື້ອການກຳເນີດເຕີບໃຫຍ່ຂະຫຍາຍຕົວ ລວມທັງຜົນງານ ແລະ ໄຊຊະນະ ຂອງກອງພັນທະຫານຮາບ 409 ວີລະຊົນ
ເວລາອອກຂ່າວ: 2026-06-17 09:09:23 | ຜູ້ຂຽນ : admin1 | ຈຳນວນຄົນເຂົ້າຊົມ: 1000 | ຄວາມນິຍົມ: 
ກອງພັນ 409 ເປັນກອງພັນທະຫານຮາບ ຂຶ້ນກັບກອງພົນທີ 2, ມີພາລະບົດບາດເປັນກຳລັງເຄື່ອນທີ່ໄວຂອງກອງພົນ, ເຮັດໜ້າທີ່ກຽມພ້ອມສູ້ຮົບ ຕອບຕ້ານທຸກກົນອຸບາຍຂອງກຸ່ມຄົນບໍ່ຫວັງດີ ແລະ ກອບກູ້ໄພພິບັດທີ່ອາດຈະເກີດຂຶ້ນ ທັງເຮັດໜ້າທີ່ກໍ່ສ້າງຮາກຖານການເມືອງ ຕາມການມອບໝາຍຂອງຂັ້ນເທິງ ເພື່ອເຮັດໃຫ້ທ້ອງຖິ່ນມີຄວາມສະຫງົບປອດໄພ. ກອງພັນດັ່ງກ່າວ ແມ່ນກົມກອງໜຶ່ງທີ່ມີບົດບາດສຳຄັນ ໃນພາລະກຳປະຫວັດສາດ ແຫ່ງການປະຕິວັດຕໍ່ສູ້ປົດປ່ອຍຊາດ ກໍຄືໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.
ອີງຕາມຄວາມຮຽກຮ້ອງຕ້ອງການ ເພື່ອສ້າງກຳລັງປະ ກອບອາວຸດລຸກຮືຂຶ້ນຕໍ່ສູ້ຕ້ານກັບຈັກກະພັດລ່າເມືອງຂຶ້ນແບບໃໝ່ຜູ້ຮຸກຮານ, ກອງພັນທະຫານຮາບ 409 ໄດ້ຮັບການສ້າງຕັ້ງຂຶ້ນໃນວັນທີ 15 ມິຖຸນາ 1961 ຢູ່ ເມືອງລອງ ແຂວງຫຼວງນ້ຳທາ, ພາຍໃຕ້ການຊີ້ນຳ-ບັນຊາໂດຍສູນກາງທະຫານເຂດ II ພາກເໜືອ, ເຊິ່ງໄດ້ທ້ອນໂຮມເອົາບັນ ດາກອງຮ້ອຍເອກະລາດຂອງ ກຳລັງທ້ອງຖິ່ນເຂດແຂວງພາກ ເໜືອເຂົ້າມາເປັນກຳລັງຂອງກົມກອງ, ໂຄງປະກອບການຈັດຕັ້ງໃນເບື້ອງຕົ້ນ ປະກອບມີ 2 ກອງ ຮ້ອຍທະຫານຮາບ, 1 ກອງຮ້ອຍຕີພິເສດ, 1 ກອງກຳລັງໄຟແບກຫາບ, 1 ໝວດສື່ສານ, 1 ໝູ່ສືບຂ່າວ, 1 ໝູ່ເຄມີ, 1 ໝູ່ຜ່າຕັດ, ມີຈຳນວນພົນທັງໝົດ 400 ສະ ຫາຍ.
ນັບແຕ່ມື້ໄດ້ຮັບການສ້າງຕັ້ງຂຶ້ນກົມກອງກໍໄດ້ຄຽງບ່າຄຽງໄຫຼ່ກັບບັນດາກົມກອງເພື່ອນ ປະ ກອບສ່ວນຢ່າງຕັ້ງຫນ້າ ເຂົ້າໃນພາລະກິດປະຕິວັດ ທີ່ລະອິດລະອ້ຽວ, ຂ້ຽວຂາດ ແລະ ເຕັມໄປດ້ວຍຄວາມເສຍສະຫຼະເລືອດເນື້ອ ຂອງພະນັກງານ-ນົກຮົບ ໃນແຕ່ ລະໄລຍະຂອງການປະຕິວັດ, ກົມກອງໄດ້ເຂົ້າຮ່ວມເຄື່ອນໄຫວສູ້ຮົບຢູ່ບັນດາແຂວງພາກເໜືອຂອງລາວ ເຊັ່ນ: ແຂວງຫຼວງພະ ບາງ, ແຂວງອຸດົມໄຊ ແລະ ແຂວງຫຼວງນ້ຳທາ. ໄລຍະນີ້ແມ່ນ ໄລຍະຕໍ່ສູ້ປົດປ່ອຍປະເທດຊາດ ອອກຈາກການປົກຄອງຂອງລັດຖະບານຫຸ້ນວຽງຈັນ ເຊິ່ງເປັນລູກແຫຼ້ງຕີນມືຂອງພວກຈັກ ກະພັດອາເມຣິກາ, ກອງພັນ ໄດ້ເຂົ້າຮ່ວມຫຼາຍບັ້ນຮົບ, ບັ້ນຕີທີ່ສຳຄັນ, ມີຄວາມໝາຍຕັດສິນທາງດ້ານຍຸດທະວິທີ-ຍຸດທະບັ້ນ ຮົບ, ເປັນຕົ້ນແມ່ນໄດ້ເຂົ້າຮ່ວມ ບັ້ນຮົບຕໍ່ສູ້ຈັ່ງທ່າຢູ່ປ້ອມກິ່ວ ຂວາງ ເມືອງງອຍ ແຂວງຫຼວງພະບາງ ຄັ້ງວັນທີ 3-4 ຕຸລາ 1966 ສາມາດປັດເຂ່ຍສັດຕູອອກຈາກວົງສູ່ຮົບໄດ້ 135 ຕົນ, ຂ້າຕາຍ 37 ຄົນ, ບາດເຈັບ 67 ຄົນ, ຈັບໄດ້ 12 ຄົນ, ຢຶດອາວຸດປືນຊະນິດຕ່າງໆໄດ້ 200 ກະບອກ, ໂທລະເລກ 1 ເຄື່ອງ, ໂຟນີ 5 ໜ່ວຍ, ເຄື່ອງສັນຍານຍົນ 2 ຊຸດ, ງ້າວ 2 ດວງ ແລະ ເຄື່ອງວັດຖຸອຸປະກອນຕ່າງໆປະມານ 3 ໂຕນ ແລະ ເຂົ້າຮ່ວມອີກຫຼາຍບັ້ນຮົບ-ບັ້ນຕີທີ່ສຳຄັນ ສາມາດຍາດໄດ້ໄຊຊະນະເປັນກ້າວໆມາ, ຈົນກ້າວໄປສູ່ການປົດປ່ອຍປະເທດຊາດໄດ້ຢ່າງສົມບູນໃນປີ 1975.
ພາຍຫຼັງປະເທດຊາດໄດ້ຮັບການປົດປ່ອຍຢ່າງສົມບູນ, ແຕ່ຢູ່ບາງທ້ອງຖິ່ນ ຍັງມີລູກແຫຼ້ງຕີນມືຂອງພວກເຂົາທີ່ຫຼົງເຫຼືອຢູ່ ເຄື່ອນໄຫວຕໍ່ຕ້ານ, ກໍ່ຄວາມບໍ່ສະຫງົບ ສະນັ້ນ, ກອງພັນ 409 ຈຶ່ງໄດ້ຮັບມອບໝາຍ ໃຫ້ສືບຕໍ່ເຮັດໜ້າທີ່ລົງກໍ່ສ້າງຮາກຖານ ແລະ ເຄື່ອນໄຫວສູ້ຮົບ ກວາດລ້າງພວກປະຕິການພັດຖິ່ນ ຢູ່ຂອບເຂດສາລາພູຄູນ, ພູກອງເຂົ້າ, ນ້ຳຈັດ, ພູລາວພໍ້ ເມືອງຊຽງເງິນ ແຂວງຫຼວງພະບາງ ແລະ ຢູ່ຜາສິ່ງແປນ, ປາກຕຸງ, ປາກຮາງ.
ຕົ້ນປີ 1979 ກົມກອງ ໄດ້ກັບຄືນມາປັບປຸງກຳລັງ ຢູ່ບ້ານນາພັນຫຼວງ ເມືອງ ແລະ ແຂວງ ຫຼວງພະບາງ, ອີງຕາມຄວາມຮຽກຮ້ອງຕ້ອງການຂອງສະພາບການ ເພື່ອປັບປຸງກຳລັງຫຼວງໃຫ້ມີຄວາມເຕີບໃຫຍ່-ເຂັ້ມແຂງ, ກອງພັນ 409 ໄດ້ຖືກປະກາດໃຫ້ຂຶ້ນກັບກອງພັນໃຫຍ່ 205 ປະກອບມີກອງພັນນ້ອຍຄື: ກອງ ພັນ 409, ກອງພັນ 406, ກອງ ພັນ 404 ຢູ່ພາຍໃຕ້ການຊີ້ນຳຂອງ ສູນກາງກອງບັນຊາການເຂດເໜືອ ຫຼັງຈາກນັ້ນ, ກອງພັນ 409 ໄດ້ຍົກຍ້າຍກຳລັງຂ້າມຂອງໄປແຂວງ ໄຊຍະບູລີ, ກົມກອງໄດ້ຕັ້ງທັບຢູ່ປາກນ້ຳຕວນ ເມືອງ ແລະ ແຂວງໄຊຍະບູລີ.
ປີ 1981 ໂດຍຕອບສະໜອງຕາມໜ້າທີ່ການເມືອງຂອງພັກ, ເພື່ອສ້າງໃຫ້ກອງທັບມີການເຕີບໃຫຍ່ເຂັ້ມແຂງ ແລະ ຂະຫຍາຍຕົວຢ່າງບໍ່ຢຸດຢັ້ງ, ກອງພົນທະຫານຮາບທີ 2 ໄດ້ຖືກປະກາດສ້າງຕັ້ງຂຶ້ນ ໃນນັ້ນ, ກອງພັນ 409 ກໍແມ່ນກົມກອງຫນຶ່ງ ທີ່ໃຫ້ຂຶ້ນກັບກອງພົນ, ໄລຍະປີແຕ່ 1982-1983 ໂດຍໄດ້ຮັບການມອບໝາຍຈາກຄະນະພັກ-ຄະນະບັນຊາ ກອງພົນທີ 2 ໃຫ້ກອງພັນ 409 ອອກເຄື່ອນໄຫວສູ້ຮົບ ໂດຍໄດ້ເຂົ້າຮ່ວມບັ້ນຮົບນ້ຳລອບ ກວາດລ້າງພວກປະຕິການພັດຖິ່ນ, ຕີສັດຕູ 1 ຄັ້ງ, ຂ້າສັດຕູຕາຍ 32 ຄົນ, ບາດເຈັບ 56 ຄົນ, ຍຶດປືນໄດ້ 38 ກະບອກ, ດາບ 30 ດວງ, ຈັກຫຍິບ 10 ເຄື່ອງ, ພິມດີດ 2 ເຄື່ອງ, ເທັບ ແລະ ວິທະຍຸ 32 ເຄື່ອງ, ກ້ອງຖ່າຍຮູບ 5 ເຄື່ອງ ແລະ ສັດລ້ຽງຈຳນວນໜຶ່ງ, ເຂົ້າຮ່ວມບັ້ນຮົບ 3 ໝູ່ບ້ານ (ເມືອງທົ່ງ) ເມືອງປາກລາຍ ແຂວງໄຊຍະບູລີໃນປີ 1984-1985, ຕີສັດຕູທັງຫມົດ 20 ຄັ້ງ, ຂ້າສັດຕູຕາຍ 30 ຄົນ, ບາດເຈັບ 20 ຄົນ, ເຂົ້າຮ່ວມບັ້ນຮົບຕອບຕ້ານການບຽດຍຶດດິນແດນຂອງພວກປະຕິການ ຢູ່ຕາແສງ ນາບໍ່ນ້ອຍ ເມືອງບໍ່ແຕນ ແຂວງໄຊຍະບູລີ, ຕີສັດຕູ 100 ຄັ້ງ, ຂ້າສັດຕູຕາຍ ປະມານ 400 ກວ່າຄົນ, ບາດເຈັບ 1.000 ກວ່າຄົນ, ຢຶດປືນຊະນິດຕ່າງໆໄດ້ 98 ກະບອກ ແລະ ຢຶດລູກປືນໄດ້ຈຳນວນຫຼາຍ. ໃນໄລຍະນີ້ ກອງພັນ ໄດ້ເຄື່ອນຍ້າຍມາຕັ້ງທັບຢູ່ບ້ານດອນ (ເມືອງທົ່ງ) ເມືອງປາກລາຍ, ຫຼັງຈາກນັ້ນ, ກໍໄດ້ຍົກຍ້າຍມາຕັ້ງທັບຢູ່ ບ້ານ ບໍ່ສ້ານ ເມືອງບໍ່ແຕນ.
ປີ 1989 ກອງພັນໄດ້ຍົກ ຍ້າຍຈາກ ບ້ານບໍ່ສ້ານ ເມືອງບໍ່ແຕນ ໄປຕັ້ງທັບຢູ່ບ້ານສຸວັນນະພູມ ເມືອງປາກລາຍ, ມາຮອດປີ 1995 ກອງພັນ ໄດ້ຍົກຍ້າຍມາຕັ້ງຢູ່ບ້ານໂພນໄຊ ເມືອງໄຊຍະບູລີ ຈົນເຖິງປັດຈຸບັນ, ໄລຍະແຕ່ປີ 1991-2002 ກອງພັນໄດ້ຮັບມອບໝາຍໜ້າທີ່ ໃຫ້ເຄື່ອນໄຫວກວາດລ້າງພວກປຸ້ນ ຢູ່ຂອບເຂດເມືອງກາສີ, ເມືອງເຟືອງ, ເມືອງຊະນະຄາມ ແຂວງວຽງຈັນ ໄດ້ສູ້ຮົບກັບສັດຕູຫຼາຍຄັ້ງ ແລະ ຂ້າສັດຕູຕາຍຫຼາຍຄົນ
ໃນປີ 2002 ກອງພັນ ໄດ້ຮັບຄຳສັ່ງໃຫ້ຖອນກຳລັງອອກຈາກ ບັ້ນຮົບກວາດລ້າງພວກປຸ້ນ ຢູ່ນາມອນ ເມືອງກາສີ ກັບຄືນສູ່ທີ່ຕັ້ງເດີມ ຢູ່ບ້ານໂພນໄຊ ເມືອງໄຊຍະບູລີ, ນັບແຕ່ນັ້ນເປັນຕົ້ນມາ, ຄະນະພັກ-ຄະນະບັນຊາກໍໄດ້ເອົາໃຈໃສ່ປັບປຸງກໍ່ສ້າງກຳລັງ, ສັບຊ້ອນການຈັດຕັ້ງຂັ້ນຕ່າງໆ ເພື່ອໃຫ້ແທດເໝາະກັບສະພາບຄວາມເປັນຈິງຂອງກົມກອງ ໂດຍສະເພາະແມ່ນໄດ້ເອົາໃຈໃສ່ປັບປຸງພື້ນຖານໂຄງລ່າງຄ້າຍຄູ, ທີ່ຢູ່ອາໄສ, ບ່ອນທຳການເພີ່ມພູນຜະລິດຜົນຂອງກົມກອງ ເພື່ອຮັບປະກັນໃຫ້ແກ່ຊີວິດການເປັນຢູ່ຂອງພະນັກງານ-ນັກ ຮົບ ທັງໄດ້ເອົາໃຈໃສ່ສຶກສາອົບຮົມ ເຮັດໃຫ້ພະນັກງານ-ນັກຮົບ ມີຄວາມໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ, ສືບຕໍ່ປະຕິບັດພາ ລະບົດບາດໜ້າທີ່ການເມືອງຂອງ ກົມກອງ ທີ່ພັກ-ລັດ ແລະ ການ ຈັດຕັ້ງຂັ້ນເທິງມອບໝາຍໃຫ້ ໄດ້ຮັບຜົນສຳເລັດຕະຫຼອດມາ.
ຕະຫຼອດໄລຍະເວລາ 65 ປີຜ່ານມາ ກົມກອງທັງເຮັດໜ້າທີ່ສູ້ຮົບ ທັງປັບປຸງກໍ່ສ້າງກຳລັງທາງດ້ານການຈັດຕັ້ງໃຫ້ມີຄວາມໜັກແໜ້ນເຂັ້ມແຂງ, ກົມກອງໄດ້ຜ່ານຜ່າອຸປະສັກ, ຄວາມຫຍຸ້ງ ຍາກນາໆ ປະການທີ່ເຕັມໄປດ້ວຍຄວາມເສຍສະຫຼະອັນສູງສົ່ງ ຂອງບັນດາສະຫາຍພະນັກງານ-ນັກຮົບ, ທີ່ຕັ້ງຂອງກົມກອງບໍ່ຄົງທີ່, ມີການເຄື່ອນຍ້າຍໄປມາ ເພື່ອໃຫ້ແທດເໝາະກັບສະພາບການໃນແຕ່ລະໄລຍະຂອງການປະຕິວັດ, ແຕ່ຄະນະພັກ-ຄະນະບັນຊາແຕ່ລະຮຸ່ນ ກໍໄດ້ນຳພາເຮັດສຳເລັດໜ້າທີ່ການເມືອງຂອງຕົນ ແລະ ຍາດໄດ້ຜົນງານ, ໄຊຊະນະອັນໃຫຍ່ຫຼວງ ປະກອບສ່ວນເຂົ້າໃນໄຊຊະນະລວມຂອງຊາດ.
ຜ່ານການເຄື່ອນໄຫວສູ້ຮົບໃນໄລຍະຕໍ່ສູ້ປົດປ່ອຍຊາດ ກໍຄືການປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດ ທະນາປະເທດຊາດຕະຫຼອດໄລ ຍະ 65 ປີຜ່ານມາ ຂອງກອງພັນ 409, ສາມາດຍາດໄດ້ຜົນງານ ດັ່ງນີ້: ໄດ້ເຄື່ອນໄຫວສູ້ຮົບທັງ ນ້ອຍ ແລະ ໃຫຍ່ ຈຳນວນ 25.815 ຄັ້ງ, ຂ້າສັດຕູຕາຍ 47.861 ຄົນ, ປັດເຂ່ຍສັດຕູອອກຈາກວົງສູ້ຮົບ 19.486 ຄົນ, ຈັບເປັນສະເລີຍເສິກໄດ້ 35 ຄົນ, ສັດຕູໄດ້ຮັບບາດເຈັບ 9.486 ຄົນ, ຢຶດອາວຸດຊະນິດຕ່າງໆໄດ້ 12.865 ກະບອກ, ທຳລາຍລົດຊະນິດຕ່າງໆໄດ້ 48 ຄັນ, ຍິງຍົນຕົກ 3 ລຳ ແລະ ຢຶດເຄື່ອງສິນເສິກ ໄດ້ຈຳນວນໜຶ່ງ.
ເພື່ອຕອບສະໜອງຜົນງານຄຸນງາມຄວາມດີຂອງ ກົມກອງ ກໍຄື ພະນັກ ງານ-ນັກຮົບກອງພັນ 409 ທີ່ຍາດມາໄດ້ໃນໄລຍະຜ່ານມາ, ປະເທດຊາດ ໄດ້ມອບນາມມະຍົດຕ່າງໆ ໃຫ້ບຸກຄົນ ແລະ ລວມໝູ່ຄື: ກອງພັນ 409 ໄດ້ຮັບນາມມະຍົດເປັນກົມກອງວິລະຊົນ 2 ຄັ້ງຄື: ຄັ້ງທີ I ໃນປີ 1979 ໄລຍະຕໍ່ສູ້ປົດປ່ອຍຊາດຕ້ານຈັກກະພັດຜູ້ຮຸກຮານ ແລະ ຄັ້ງທີ II ໃນປີ 1988 ໄລຍະປົກ ປັກຮັກສາ ແລະ ສ້າງສາພັດທະ ນາປະເທດຊາດ ໃນບັ້ນຮົບຕອບຕ້ານການບຸກຕີບຽດຢຶດຂອງພວກປະຕິການຢູ່ຕາແສງ ນາບໍ່ນ້ອຍ ເມືອງບໍ່ແຕນແຂວງໄຊຍະບູລີ, ພະນັກງານ-ນັກຮົບ ໄດ້ຮັບຫຼຽນໄຊອິດສະຫຼະຊັ້ນ I, II, III ຈຳນວນ 17 ໜ່ວຍ, ຫຼຽນໄຊແຮງງານຊັ້ນ I, II, III ຈຳນວນ 27 ໜ່ວຍ, ຫຼຽນໄຊພິລະອາດຫານຊັ້ນ I, II, III ຈຳນວນ 46 ໜ່ວຍ, ຫຼຽນກາຕໍ່ຕ້ານອາເມລິກາ 10 ໜ່ວຍ, ຫຼຽນກາ 46 ໜ່ວຍ ແລະ ຍັງມີອີກຫຼາຍສະຫາຍໄດ້ຮັບການຍ້ອງຍໍປະເພດຕ່າງໆຢ່າງສົມກຽດ.
ປະຫວັດການກຳເນີດ, ເຕີບໃຫຍ່ຂະຫຍາຍຕົວ ແລະ ຜົນງານໄຊຊະນະອັນໃຫຍ່ຫຼວງ ທີ່ກອງ ພັນ 409 ຍາດມາໄດ້ຈາກພຶດຕິກຳຕົວຈິງ ໃນພາລະກິດປະຕິວັດຕໍ່ສູ້ປົດປ່ອຍຊາດ, ຍາດເອົາຄວາມເປັນເອກະລາດແຫ່ງຊາດ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດນັ້ນ, ໄດ້ເປັນບົດຮຽນອັນລ້ຳຄ່າ ທີ່ສຸດ ໃຫ້ແກ່ພະນັກງານ-ນັກ ຮົບຮຸ່ນສືບທອດເວົ້າລວມ, ເວົ້າ ສະເພາະແມ່ນພະນັກງານ-ນັກຮົບຂອງກອງພັນ 409 ໃນປັດ ຈຸບັນ ໄດ້ສຶກສາຮຽນຮູ້ ແລະ ໝູນໃຊ້ເຂົ້າໃນວຽກງານຕົວຈິງຂອງຕົນ ຢ່າງປະດິດສ້າງ ເພື່ອພ້ອມກັນສືບຕໍ່ປັບປຸງກໍ່ສ້າງກົມກອງ ປະກອບສ່ວນເຂົ້າໃນການສ້າງກອງທັບໃຫ້ກາຍເປັນກອງທັບປະຕິວັດ, ມີລະບຽບແບບແຜນທັນສະໄໝ.
ຮຽບຮຽງໂດຍ: ນາງ ຍ້ອມເພັດ ວິໄລພັນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
