ວັນເສົາ, ວັນທີ 13 ມິຖຸນາ 2026
ຈັດພິທີປູກຕົ້ນໄມ້ສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ປະຈຳປີ 2026
ເວລາອອກຂ່າວ: 2026-06-03 09:11:21 | ຜູ້ຂຽນ : admin1 | ຈຳນວນຄົນເຂົ້າຊົມ: 188 | ຄວາມນິຍົມ: 
ກະຊວງກະສິກຳ ແລະ ສິ່ງ ແວດລ້ອມ ຮ່ວມກັບ ອົງການປົກຄອງນະຄອນຫຼວງວຽງຈັນ ໄດ້ ຈັດພິທີປູກຕົ້ນໄມ້ ເນື່ອງໃນໂອ ກາດວັນປູກຕົ້ນໄມ້ແຫ່ງຊາດ (1 ມິຖຸນາ) ຄົບຮອບ 46 ປີ ວັນເດັກນ້ອຍສາກົນ ແລະ ວັນສິ່ງແວດ ລ້ອມແຫ່ງຊາດ (5 ມິຖຸນາ) ຄົບຮອບ 27 ປີ ຈັດຂຶ້ນວັນທີ 31 ພຶດສະພາ 2026 ທີ່ສວນເຈົ້າອານຸວົງ ບ້ານຊຽງຍືນ ເມືອງຈັນທະບູລີ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ນາຍົກລັດ ຖະມົນຕີ ແຫ່ງ ສປປ ລາວ, ທ່ານ ປອ ລິນຄຳ ດວງສະຫວັນ ລັດຖະມົນຕີກະຊວງກະສິກຳ ແລະ ສິ່ງ ແວດລ້ອມ ທ່ານ ສີລິລາດທົງສິນ ທອງເພັງ ປະທານຄະນະກຳມະ ການປົກຄອງ ນະຄອນຫຼວງວຽງຈັນ ພ້ອມດ້ວຍບັນດາທ່ານລັດ ຖະມົນຕີ, ຮອງລັດຖະມົນຕີ, ຄະ ນະນຳອົງການປົກຄອງນະຄອນ ຫຼວງວຽງຈັນ, ທູຕານຸທູດ, ຄູ່ຮ່ວມພັດທະນາ, ຜູ້ປະກອບການ, ປະຊາຊົນ ແລະ ນ້ອງນ້ອຍເຍົາ ວະຊົນ-ຊາວໜຸ່ມ ເຂົ້າຮ່ວມ.
ໃນພິທີ ທ່ານ ປອ ລິນຄຳ ດວງສະຫວັນ ໄດ້ຕາງໜ້າຄະນະຮັບ ຜິດຊອບ ກ່າວລາຍງານຫຍໍ້ກ່ຽວກັບປະຫວັດຄວາມເປັນມາ ແລະ ຜົນການຈັດຕັ້ງປະຕິບັດງານປູກໄມ້ໃນໄລຍະຜ່ານມາ ພັກ ແລະ ລັດຖະບານ ໄດ້ກຳນົດເອົາວັນທີ 1 ມິຖຸນາ ເປັນວັນປູກຕົ້ນໄມ້ແຫ່ງຊາດ ນັບແຕ່ປີ 1980 ເປັນຕົ້ນມາ ເພື່ອປູກຈິດສຳນຶກໃຫ້ທົ່ວສັງຄົມ ໂດຍສະເພາະແມ່ນອະນຸຊົນ ແລະ ເຍົາວະຊົນ ໃຫ້ເຫັນໄດ້ເຖິງຄວາມສຳຄັນຂອງປ່າໄມ້ ທັງເປັນການປຸກລະດົມທົ່ວປວງຊົນເຂົ້າຮ່ວມໃນການຄຸ້ມຄອງ ປົກປັກຮັກສາ ແລະ ພັດທະນາປ່າໄມ້ໃຫ້ມີຄວາມອຸດົມ ສົມບູນຕາມທິດສີຂຽວ ແລະ ຍືນຍົງ.
ສຳລັບແຜນການໃນປີ 2026 ນີ້ ກະຊວງກະສິກຳ ແລະ ສິ່ງແວດລ້ອມ ໄດ້ສົມທົບກັບອົງ ການປົກຄອງທ້ອງຖິ່ນ ວາງຄາດ ໝາຍເກັບແກ່ນພັນໄມ້ໃຫ້ໄດ້ 121.000 ພັນກວ່າກິໂລ ກ້າເບ້ຍໄມ້ 25,1 ລ້ານກວ່າເບ້ຍ ແລະ ປູກໄມ້ໃນເນື້ອທີ່ 50 ພັນກວ່າເຮັກ ຕາ ໃນທົ່ວປະເທດ ສະເພາະໃນວັນປູກຕົ້ນໄມ້ແຫ່ງຊາດປີນີ້ ທົ່ວປະເທດມີແຜນການຈັດພິທີສ້າງຂະບວນການປູກຕົ້ນໄມ້ ໃນເນື້ອທີ່ປະມານ 7.300 ກວ່າເຮັກຕາ ໂດຍຈະນຳໃຊ້ເບ້ຍໄມ້ທັງ ໝົດ 4.516.000 ກວ່າເບ້ຍ.
ສຳລັບຢູ່ນະຄອນຫຼວງວຽງຈັນ ມີແຜນການຈະປູກໃນເນື້ອທີ່ປະມານ 50 ເຮັກຕາ ຢູ່ຕາມຈຸດຕ່າງໆ ລວມທັງເຂດທີ່ໄດ້ຮັບຜົນກະທົບຈາກໄຟປ່າ ຊະນິດພັນໄມ້ທີ່ນຳພາກັນປູກໃນຄັ້ງນີ້ ປະກອບມີ: ໄມ້ດູ່ ໄມ້ແຕ້ຂ່າ ໄມ້ຍາງ ໄມ້ແຄນ ໄມ້ວິກໄມ້ສັກ ແລະ ໄມ້ກະຖິນເທພາ ລວມທັງໝົດ 80 ພັນກວ່າເບ້ຍ ນອກນີ້ ຢູ່ແຕ່ລະແຂວງ ແລະ ນະຄອນຫຼວງ ຍັງມີແຜນຈັດງານວາງສະແດງເບ້ຍໄມ້ ເພື່ອສົ່ງເສີມການປູກໄມ້ເປັນສິນຄ້າ ແລະ ປົກປັກຮັກສາສິ່ງແວດລ້ອມຕື່ມອີກ ສະເພາະຢູ່ສວນເຈົ້າອະນຸວົງແມ່ນໄດ້ປູກ ຕົ້ນໄມ້ 10 ກວ່າຕົ້ນ ປະກອບມີ ໄມ້ແຕ່ຂ່າ ແລະ ໄມ້ດູ່.
ໂອກາດອັນສະຫງ່າລາສີນີ້, ທ່ານລັດຖະມົນຕີກະຊວງກະສິກຳ ແລະ ສິ່ງແວດລ້ອມ ໄດ້ກ່າວເປີດພິທີປູກຕົ້ນໄມ້ ປະຈຳປີ 2026 ຢ່າງເປັນທາງການ ພ້ອມທັງເນັ້ນເຖິງຄຳຂວັນຂອງວັນປູກຕົ້ນ ໄມ້ແຫ່ງຊາດປີນີ້ ທີ່ວ່າ: “ຮ່ວມແຮງຮ່ວມໃຈຊ່ວຍກັນ ປູກຕົ້ນ ໄມ້ ຢ່າງໜ້ອຍ ໜຶ່ງຕົ້ນ ຕໍ່ຄົນ ຕໍ່ປີ” ແລະ “ຊົມເຊີຍວັນປູກຕົ້ນ ໄມ້ແຫ່ງຊາດ ວັນທີ 1 ມິຖຸນາ 2026 ຄົບຮອບ 46 ປີ ຢ່າງສຸດໃຈ” ເພື່ອເປັນແຮງບັນດານໃຈໃຫ້ທົ່ວສັງຄົມຮ່ວມກັນປ່ຽນ ສປປ ລາວ ໃຫ້ກາຍເປັນພື້ນທີ່ສີຂຽວ ແລະ ມີສິ່ງແວດລ້ອມທີ່ສົມບູນສົດໃສຕະຫຼອດໄປ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
