ວັນເສົາ, ວັນທີ 13 ມິຖຸນາ 2026
ປ່າໄມ້ ມີຄວາມສຳຄັນ ຕໍ່ການພັດທະນາ ເສດຖະກິດ-ສັງຄົມແຫ່ງຊາດ
ເວລາອອກຂ່າວ: 2026-05-28 10:23:42 | ຜູ້ຂຽນ : admin3 | ຈຳນວນຄົນເຂົ້າຊົມ: 348 | ຄວາມນິຍົມ: 
ຊັບພະກອນປ່າໄມ້ ມີຄວາມສຳຄັນທີ່ສຸດ ຕໍ່ການພັດທະນາ ເສດຖະກິດ-ສັງຄົມ ແຫ່ງຊາດ ໂດຍທາງກົງ ແລະ ທາງອ້ອມ, ໃນການປົກປັກຮັກສາດິນ, ແຫຼ່ງນໍ້າ ແລະ ຊີວະນາໆພັນ ໃຫ້ມີຄວາມອຸດົມສົມບູນ, ພ້ອມທັງຫຼຸດຜ່ອນຜົນກະທົບຂອງການປ່ຽນ
ແປງດິນຟ້າອາກາດ ເຊິ່ງບົດບາດດັ່ງກ່າວ, ມະນຸດເຮົາບໍ່ສາມາດຈະເຮັດແທນໄດ້.
ທ່ານ ລິນຄຳ ດວງສະຫວັນ ລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ ໄດ້ໃຫ້ຮູ້ໃນໂອກາດຖະແຫຼ່ງຂ່າວ ໃນວັນທີ 25 ພຶດສະພາ 2026 ວ່າ: ປ່າໄມ້ ປະກອບສ່ວນຢ່າງຫຼວງຫຼາຍ ຕໍ່ການພັດທະນາຂະແໜງການກະສິກຳ ແລະ ສິ່ງແວດລ້ອມ ຕິດພັນກັບອຸດສາຫະກຳ ແລະ ການບໍລິການ ແລະ ການພັດທະນາພື້ນຖານໂຄງລ່າງເຊັ່ນ: ເຂື່ອນໄຟຟ້ານ້ຳຕົກ, ອ່າງເກັບນ້ຳ ເພື່ອການຜະລິດກະສິກຳ, ການຜະລິດເປັນສິນຄ້າ, ການຄົມມະນາຄົມ, ການຂຸດຄົ້ນຊັບພະຍາກອນປ່າໄມ້ ແລະ ເຄື່ອງປ່າຂອງດົງແບບຍືນຍົງ ເຊິ່ງໄດ້ປະກອບສ່ວນສຳຄັນຕໍ່ການປັບປຸງຊີວິດການເປັນຢູ່ຂອງປະຊາຊົນຕິດພັນກັບການພັດທະນາຊົນນະບົດ ແກ້ໄຂຄວາມທຸກຍາກຂອງປະຊາຊົນບັນດາເຜົ່າ, ດັ່ງທີ່ ປະທານ ໄກສອນ ພົມວິຫານ ຜູ້ນຳທີ່ແສນ ເຄົາລົບຮັກ ໄດ້ກ່າວໄວ້ວ່າ “ປ່າໄມ້ ຄືຄຳຂຽວຂອງຊາດ”.
ຕະຫຼອດໄລຍະເວລາກວ່າ 46 ປີ ຜ່ານມາ, ພັກ ແລະ ລັດຖະບານ ຍາມໃດກໍມີຄວາມເປັນຫ່ວງເປັນໃຍ ຕໍ່ວຽກງານຄຸ້ມຄອງປ່າໄມ້ ໂດຍໄດ້ກຳນົດນະໂຍ
ບາຍ, ກົດໝາຍ, ມະຕິ, ຄຳສັ່ງ ແລະ ນິຕິກຳຕ່າງໆ ທີ່ກ່ຽວຂ້ອງໃນການຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ປ່າໄມ້ ແລະ ທີ່ດິນປ່າໄມ້ ໃຫ້ແທດເໝາະກັບແຜນພັດທະນາເສດຖະກິດ-ສັງຄົມໃນແຕ່ລະໄລຍະ. ເຖິງຢ່າງໃດກໍຕາມ, ການປົກປັກຮັກສາປ່າໄມ້ ຍັງມີສິ່ງທ້າທາຍ ແລະ ຜົນກະທົບທັງທາງກົງ ແລະ ທາງອ້ອມ ຕໍ່ປ່າໄມ້ ແລະ ທີ່ດິນປ່າໄມ້ ໂດຍສະເພາະການຖາງປ່າ ແລະ ຈຸດປ່າທີ່ມີທ່າອ່ຽງເພີ່ມຂຶ້ນໃນແຕ່ລະປີ ລວມທັງການບຸກ ລຸກ, ຈັບຈອງ, ຊື້-ຂາຍ ພື້ນທີ່ດິນ 3 ປະເພດປ່າ. ຜ່ານມາ ກະຊວງກະສິກຳ ແລະ ສິ່ງແວດລ້ອມ ໄດ້ປະສານສົມທົບກັບກະຊວງ ແລະ ອົງການປົກຄອງທ້ອງຖິ່ນ ທີ່ກ່ຽວຂ້ອງຄົ້ນຄວ້າກຳນົດນະໂຍບາຍ ຊອກຫາວິທີໃນການແກ້ໄຂບັນຫາດັ່ງກ່າວ, ໄປຄຽງຄູ່ກັບການປັບປຸງຊີວິດການເປັນຢູ່ປະຊາຊົນ ທີ່ອາໄສຢູ່ໃນເຂດປ່າໄມ້ ດ້ວຍການຮັບຮູ້ສິດນຳໃຊ້ທີ່ດິນ, ຂຶ້ນທະບຽນອອກໃບຕາດິນ, ຂຶ້ນທະບຽນອອກໃບຢັ້ງຢືນການນຳໃຊ້ທີ່ດິນປ່າໄມ້, ເຮັດສັນຍາການຄຸ້ມຄອງ ແລະ ປົກປັກຮັກສາປ່າໄມ້ ແລະ ທີ່ດິນປ່າໄມ້ ຕາມຄຳສັ່ງສະບັບເລກທີ 20/ນຍ ເພື່ອສົ່ງເສີມການຜະລິດ ແລະ ສ້າງເສດຖະກິດຄອບຄົວ ຮູບແບບຕ່າງໆ ທີ່ເໝາະສົມ ຕາມທ່າແຮງຂອງແຕ່ລະທ້ອງຖິ່ນ.
ໂດຍ: ກິດຕາ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
