ວັນຈັນ, ວັນທີ 11 ພຶດສະພາ 2026
ໂຮງຮຽນການທະຫານທ້ອງຖິ່ນ ແຂວງສາລະວັນ ປິດບັ້ນອົບຮົມ-ຫັດແອບໃຫ້ທະຫານໃໝ່
ເວລາອອກຂ່າວ: 2026-05-07 09:27:26 | ຜູ້ຂຽນ : admin1 | ຈຳນວນຄົນເຂົ້າຊົມ: 72 | ຄວາມນິຍົມ: 
ໃນທ້າຍເດືອນເມສາຜ່ານມາ, ໂຮງຮຽນການທະຫານທ້ອງຖິ່ນ ແຂວງສາລະວັນ ໄດ້ຈັດພິທີປິດບັ້ນ ອົບຮົມ-ຫັດແອບ ການທະຫານ, ການເມືອງ ຂັ້ນພື້ນຖານ ໃຫ້ທະຫານໃໝ່ ຊຸດທີ XII ລະບົບ 3 ເດືອນ, ໂດຍການເປັນປະທານຂອງສະຫາຍ ພັນເອກ ສຸດໃຈ ແສນຄຳບົວທອນ ຫົວໜ້າການທະຫານ ກອງບັນຊາການທະຫານແຂວງສາລະວັນ, ມີຄະນະພັກ-ຄະນະບັນຊາ ກອງບັນຊາການທະຫານແຂວງ, ຄະນະອຳນວຍການໂຮງຮຽນ, ຄູ-ອາຈານ ພ້ອມດ້ວຍແຂກຖືກເຊີນ ຈາກກົມກອງອ້ອມຂ້າງ ຕະ ຫຼອດຮອດທະຫານໃໝ່ ເຂົ້າຮ່ວມ.
ໃນພິທີ ສະຫາຍ ພັນໂທ ຄຳພຽນ ໄຊຍະວົງ ຮອງຫົວໜ້າການທະຫານ ໂຮງຮຽນການທະຫານທ້ອງຖິ່ນແຂວງສາລະວັນ ໄດ້ຜ່ານບົດສະຫຼຸບບັ້ນອົບຮົມ-ຫັດແອບ ໃຫ້ທະຫານໃໝ່ ຊຸດທີ XII, ເຊິ່ງໄດ້ຍົກໃຫ້ເຫັນ ຂໍ້ສະດວກ ແລະ ຂໍ້ຫຍຸ້ງຍາກ ຕະຫຼອດໄລຍະການອົບຮົມ 3 ເດືອນຜ່ານມາ, ໂດຍໄດ້ຮັບການຊີ້ນຳຢ່າງໃກ້ຊິດຕິດແທດ ຈາກຄະນະພັກ-ຄະນະບັນຊາ ກອງບັນຊາການທະຫານແຂວງສາລະວັນ ແລະ ຄະນະຮັບຜິດຊອບທີ່ກ່ຽວຂ້ອງ ຢ່າງເປັນປົກກະຕິ, ຄະນະພັກ-ຄະນະອຳນວຍການໂຮງຮຽນ ໄດ້ເອົາໃຈໃສ່ຊີ້ນຳບັນດາຄູ-ອາຈານ
ປະຕິບັດຫຼັກສູດ ແລະ ວຽກງານຮັບປະກັນຕ່າງໆ ໃຫ້ແກ່ການຮຽນ-ການສອນ, ປະຕິບັດຂໍ້ກຳນົດ, ກົດລະບຽບຂອງກອງທັບ ແລະ ການຄຸ້ມຄອງນັກຮຽນ ຢ່າງ
ເຂັ້ມງວດ, ພະນັກງານຄູ-ອາຈານ ມີຄວາມຮັບຜິດຊອບສູງຕໍ່ການກະກຽມເນື້ອໃນເອກະສານ ຫຼັກ ສູດການຮຽນ-ການສອນ ຖືກ ຕ້ອງຕາມຫຼັກການ, ບົດຮຽນແຕ່ລະວິຊາ ສາມາດຮັບປະກັນໃຫ້ນັກຮຽນເກັບກຳເນື້ອໃນໄດ້ເປັນຢ່າງດີ. ຜ່ານການຈັດຕັ້ງອົບຮົມ-ຫັດແອບ ຜົນການສອບເສັງແຕ່ລະວິຊາ ສາມາດຕີລາຄາຜົນໄດ້ຮັບລວມ ຄື: ປະເພດ ເກັ່ງມີ 15 ສະຫາຍ, ກາງ 70 ສະຫາຍ ແລະ ລະດັບຄາດໝາຍ 30 ສະຫາຍ. ຈາກນັ້ນ, ສະຫາຍ ພັນຕີ ສີຟອງ ອິນທະວົງສັກ ຮອງຫົວໜ້າພະແນກກຳລັງພົນ ກອງບັນຊາການທະຫານແຂວງ ໄດ້ຜ່ານຂໍ້ຕົກລົງ ເລື່ອນຊັ້ນໃຫ້ທະຫານໃໝ່ ຈາກພົນທະຫານ ຊັ້ນ II ເປັນພົນທະຫານຊັ້ນ I ແລະ ຜ່ານຂໍ້ຕົກລົງ ສັບຊ້ອນບ່ອນປະຈຳການ ໃຫ້ແກ່ທະຫານໃໝ່ ຕື່ມອີກ. ໃນພິທີຍັງໄດ້ມອບໃບຢັ້ງຢືນ ໃຫ້ແກ່ທະຫານໃໝ່ ທີ່ສຳເລັດການອົບຮົມ-ຫັດແອບໃນຄັ້ງນີ້, ໃຫ້ກຽດມອບໂດຍ ສະຫາຍ ພັນໂທ ບຸນທັນ ໄຊຍະສານ ຫົວໜ້າການທະຫານໂຮງຮຽນການທະຫານທ້ອງຖິ່ນແຂວງສາລະວັນ.
ໂອກາດນີ້, ສະຫາຍ ພັນເອກ ສຸດໃຈ ແສນຄຳບົວທອນ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດ ໃນການຈັດຕັ້ງປະຕິບັດການຮຽນ-ການສອນຂອງບັນດາຄູ-ອາຈານ ກໍຄື ຄະນະຮັບຜິດຊອບທຸກຂັ້ນ ທີ່ໄດ້ສຸມຄວາມຮູ້ຄວາມສາມາດຂອງຕົນ ຖ່າຍທອດໃຫ້ແກ່ນັກຮຽນ ກໍຄື ນັກອົບຮົມທະຫານໃໝ່ ພ້ອມທັງໄດ້ເນັ້ນໜັກໃຫ້ ບັນດາສະຫາຍທີ່ສຳເລັດການອົບຮົມ ໃນຊຸດນີ້ ຈົ່ງນຳເອົາຄວາມຮູ້, ບົດຮຽນທີ່ຄູ-ອາຈານຖ່າຍທອດໃຫ້ ໄປໝູນໃຊ້ຢູ່ໃນກົມກອງຂອງຕົນ ໃຫ້ເກີດປະໂຫຍດສູງສຸດ ເພື່ອເຮັດສຳເລັດໜ້າທີ່ການເມືອງ ຕາມການມອບໝາຍຂອງຂັ້ນເທິງ.
ໂດຍ: ສຸກັນ ວົງສະຫວັດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
