POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນເສົາ, ວັນທີ 18 ເມສາ 2026

ສະຫະພັນບານເຕະແຫ່ງຊາດລາວ ໄດ້ຮັບລາງວັນລະດັບໜຶ່ງດາວ ພາຍໃຕ້ໂຄງການ AFC Elite Youth ຂອງທະວີບອາຊີ
ເວລາອອກຂ່າວ: 2026-04-08 09:41:55 | ຜູ້ຂຽນ : admin1 | ຈຳນວນຄົນເຂົ້າຊົມ: 214 | ຄວາມນິຍົມ:

ສະຫະພັນບານເຕະອາຊີ (AFC) ໄດ້ປະກາດມອບລາງວັນລະດັບໜຶ່ງດາວ ພາຍໃຕ້ໂຄງການ AFC Elite Youth ຫຼື ໂຄງການພັດທະນານັກເຕະເຍົາ ວະຊົນ-ໄວໜຸ່ມລະດັບສູງຂອງທະວີບອາຊີ ໃຫ້ແກ່ສະຫະພັນບານເຕະແຫ່ງຊາດລາວ, ໂດຍລາງວັນດັ່ງກ່າວໄດ້ຮັບພາຍຫຼັງທີ່ AFC ໄດ້ສົ່ງຕົວແທນທີ່ເປັນຊ່ຽວຊານດ້ານກິລາບານເຕະເຍົາວະຊົນ ມາສຳຫຼວດ ແລະ ປະເມີນຜົນງານຢູ່ ສປປ ລາວ ໃນການພັດທະນານັກກິລາເບົາວະຊົນ ລະຫວ່າງ ວັນທີ 6-8 ມີນາ 2026. ອີງຕາມແຜນຍຸດທະສາດຂອງ ສຕລ ວ່າດ້ວຍແຜນພັດທະນາບານເຕະເຍົາວະຊົນທີ່ໄດ້ປະກາດໃນປີ 2023, ເຊິ່ງໃນໄລຍະ 2 ປີຜ່ານມາ (2024-2025) ຜົນງານທີ່ພົ້ນເດັ່ນແມ່ນການສ້າງການແຂ່ງຂັນລີກເຍົາວະຊົນຂຶ້ນໃນ ປີ 2024 ພ້ອມທັງໂຄງການ Champa-Champi Elite, ໂດຍໄດ້ຮັບການສະໜັບສະໜູນຈາກໂຄງການພັດທະນາຄວາມສາມາດຂອງ FIFA (FIFA Talent Development Scheme) ຫຼື ເອີ້ນສັ້ນວ່າ: FIFA TDS. ສູນ Champa-Champi Elite ໄດ້ກາຍເປັນສູນກາງທີ່ສຳຄັນສຳລັບການເຝິກອົບຮົມ ແລະ ພັດທະນານັກກິລາບານເຕະ ແລະ ການແຂ່ງຂັນລະດັບຮາກຖານທີ່ກຳລັງດຳເນີນຢູ່ ແມ່ນຈັດຂຶ້ນສຳລັບນັກກິລາອາຍຸລະຫວ່າງ 7-16 ປີ ເພື່ອສ້າງໂອກາດ ແລະ ປະສົບການຕົວຈິງໃຫ້ນ້ອງນັກກິລາໄດ້ສະແດງຄວາມສາມາດ ແລະ ເຂົ້າໃຈກະຕິກາການແຂ່ງຂັນບານເຕະຢ່າງເລິກເຊິ່ງ. ນອກເໜືອຈາກການສ້າງເງື່ອນໄຂໃຫ້ນັກກິລາ, ລະບົບດັ່ງກ່າວຍັງຊ່ວຍໃຫ້ຄູເຝິກບານເຕະ ສາມາດພັດທະນາທັກສະຂອງເຂົາເຈົ້າຜ່ານວິທີການເຝິກ ອົບຮົມທີ່ທັນສະໄໝ, ເສີມຂະຫຍາຍຄວາມເຂົ້າໃຈກ່ຽວກັບເກມ ແລະ ອະນຸຍາດໃຫ້ເຂົາເຈົ້າສ້າງວິທີການເຮັດວຽກຂອງຕົນເອງພາຍໃນຂອບການເຮັດວຽກທີ່ສອດຄ່ອງກັບວິໄສທັດໄລຍະຍາວຂອງ ສຕລ. ຜູ້ຊ່ຽວຊານຈາກ AFC ໄດ້ຊົມເຊີຍວຽກງານການພັດທະນາພື້ນຖານໂຄງລ່າງ, ໂດຍສະເພາະສູນເຝິກອົບຮົມກິລາບານເຕະ ຢູ່ຫຼັກ 16 ຫຼື ຮູ້ຈັກໃນນາມ ສູນເຝິກບານເຕະ ຈຳປີ-ຈຳປາ, ເຊິ່ງສະໜອງສະພາບແວດລ້ອມແບບມືອາຊີບສຳລັບນັກກິລາບານເຕະເຍົາວະຊົນ-ໄວໜຸ່ມ ທັງຍິງ ແລະ ຊາຍ. ສູນດັ່ງກ່າວ ປະກອບມີສະໜາມກິລາຂະໜາດມາດຕະຖານ 2 ສະໜາມ, ສະໜາມນ້ອຍ 2 ສະໜາມ, ສູນອອກກຳລັງກາຍ ແລະ ຫໍພັກນັກກິລາ ທີ່ສາມາດຮອງຮັບນັກກິລາໄດ້ພ້ອມກັນບໍ່ຕ່ຳກວ່າ 120 ຄົນ. ເນື່ອງໃນໂອກາດອັນດີທີ່ໄດ້ຮັບການຍົກລະດັບຈາກ AFC, ທ່ານ ວິເພັດ ສີຫາຈັກ, ປະທານ ສຕລ ໄດ້ກ່າວວ່າ: “ ໃນນາມ ສຕລ, ພວກເຮົາຮູ້ສຶກເປັນກຽດຢ່າງຍິ່ງທີ່ໄດ້ຮັບການຍອມຮັບ ພາຍໃຕ້ໂຄງການ AFC Elite Youth, ເຊິ່ງສະທ້ອນໃຫ້ເຫັນເຖິງຄວາມມຸ່ງໝັ້ນຂອງພວກເຮົາໃນການເສີມສ້າງພື້ນຖານໂຄງລ່າງການພັດທະນາຊາວໜຸ່ມຂອງພວກເຮົາ ແລະ ສ້າງເສັ້ນທາງທີ່ຍືນຍົງສຳລັບນັກກິລາໄວໜຸ່ມ. ນີ້ແມ່ນບາດກ້າວທີ່ສຳຄັນສຳລັບ ສຕລ ແລະ ຈະກະຕຸ້ນພວກເຮົາໃຫ້ປັບປຸງໂຄງການດ້ານວິຊາການ, ມາດຕະຖານການເຝິກສອນ, ແລະ ກິດຈະກຳບານເຕະລະດັບຮາກຖານຂອງພວກເຮົາໃຫ້ສູງຍິ່ງໆຂຶ້ນໄປ. ພວກເຮົາຍັງຄົງມຸ່ງໝັ້ນທີ່ຈະເຮັດວຽກຢ່າງໃກ້ຊິດກັບ AFC ເພື່ອເສີມຂະຫຍາຍລະບົບບານເຕະຊາວໜຸ່ມຂອງພວກເຮົາ ແລະ ສ້າງໂອກາດໃຫ້ນັກກິລາລາວໄດ້ກ້າວໄປສູ່ລະດັບພາກພື້ນ ແລະ ສາກົນ ໃນອະນາຄົດ.” ການແຂ່ງຂັນ ບານເຕະເຍົາວະຊົນ ສຕລ ປະຈຳປີ 2026 ແມ່ນແຂ່ງຂັນທຸກໆວັນເສົາ ແລະ ວັນອາທິດ ແຂ່ງຂັນຢູ່ທີ່ສະໜາມກິລາສູນເຝິກ ຈຳປີ-ຈຳປາ ສະໜາມກິລາແຫ່ງຊາດຫຼັກ 16 ເຊິ່ງບັນຍາກາດແຂ່ງຂັນໃນແຕ່ລະອາທິດເຕັມໄປດ້ວຍຄວາມຟົດຟື້ນມ່ວນຊື່ນ. ປັດຈຸບັນ ສູນເຝິກບານເຕະ ຈຳປີ-ຈຳປາ ມີທັງໝົດ ແຫ່ງຄື: ສະໜາມກິລາແຫ່ງຊາດ ຫຼັກ 16, ສະຫະພັນບານເຕະແຫ່ງຊາດລາວ ບ້ານຫ້ວຍຫົງ, ແຂວງຈຳປາສັກ, ແຂວງຫຼວງນ້ຳທາ, ແຂວງຄຳມ່ວນ ແລະ ແຂວງສາລະວັນ.

news to day and hot news