ວັນຈັນ, ວັນທີ 18 ພຶດສະພາ 2026
FIFA ບໍ່ອະນຸຍາດໃຫ້ ທີມຊາດອີຣານ ຍ້າຍໄປແຂ່ງຂັນ ຢູ່ເເມັກຊິກ ໃນເຕະບານໂລກ 2026
ເວລາອອກຂ່າວ: 2026-03-23 09:43:13 | ຜູ້ຂຽນ : admin3 | ຈຳນວນຄົນເຂົ້າຊົມ: 186 | ຄວາມນິຍົມ: 
ເມື່ອບໍ່ດົນມານີ້ ອາໝັດ ດອນຢາມາລີ ລັດຖະມົນຕີກະຊວງກິລາ ແລະ ໄວໜຸ່ມຂອງອີຣານ ໄດ້ກ່າວວ່າ: ທີມຊາດອີຣານ ຈະຖອນຕົວຮ່ວມການແຂ່ງຂັນເຕະບານຊາຍ ຊີງແຊັມໂລກ 2026 ທີ່ສະຫະລັດ ອາເມຣິກາ, ການາດາ ແລະ ເມັກຊິກ ເປັນເຈົ້າພາບ ໃນກາງປີນີ້ ເນື່ອງຈາກກັງວົນຄວາມບໍ່ປອດໄພ ຍ້ອນສະຖານະການສົງຄາມທີ່ເກີດຂຶ້ນໃນຕາເວັນອອກກາງໃນປັດຈຸບັນ.
ຢ່າງໃດກໍຕາມ ອີຣານ ຍັງຫາວິທີເຈລະຈາຕໍ່ລອງກັບ ສະຫະພັນບານເຕະນາໆຊາດ FIFA (ຟີຟ້າ) ເພື່ອໃຫ້ໄດ້ແຂ່ງຂັນດ້ວຍຄວາມປອດໄພ ໂດຍສະເໜີຟີຟ້າ ຂໍຍ້າຍນັດແຂ່ງຂັນຂອງຕົນຈາກຢູ່ ອາເມຣິກາ ໄປເຕະຢູ່ ເມັກຊິກ ແຕ່ ຟີຟ້າ ບໍ່ອະນຸຍາດ.
ຕາມກຳນົດຕາຕະລາງແຂ່ງຂັນໃນທ້າຍປີ 2025 ຜ່ານມາ, ບານໂລກ 2026 ອີຣານ ຈັບສະຫຼາກຢູ່ກຸ່ມ G ຮ່ວມກັບ ທີມຊາດແບນຊິກ, ເອຢິບ ແລະ ນູແວນ ເຊລັງ ໂດຍທັງສາມນັດໃນກຸ່ມນີ້ ແມ່ນແຂ່ງທີ່ ລັອສ ແອັງເຈວລິສ ແລະ ຊີແອັດເທິນ ສະຫະລັດ ອາເມຣິກາ.
ຂະນະນີ້ ເຫຼືອເວລາບໍ່ເຖິງ 100 ວັນ ບານໂລກ 2026 ຈະເປີດສາກ
ຂຶ້ນແລ້ວ ແຕ່ບັນຫາສົງຄາມ ຂໍ້ຂັດແຍ່ງລະຫວ່າງ ອີຣານ ກັບ ສະຫະລັດ ອາເມຣິກາ ແລະ ອິດສະຣາແອນ ຍັງບໍ່ຮູ້ວ່າຈະສິ້ນສຸດມື້ໃດ ແລະ ຈະໃຊ້ເວລາປົວແປງຟື້ນຟູອີກດົນສ່ຳໃດ, ຖ້າ ອີຣານ ຖອນຕົວເທື່ອນີ້ ສະຫະພັນບານເຕະນາໆ
ຊາດ ຈະແກ້ໄຂບັນຫານີ້ແນວໃດ ໂດຍສະເພາະການຫາທີມມາແທນທີ່ອີຣານ, ຖ້າຕາມກົດລະບຽບ ຂໍ້ບັງຄັບ 6,7 ຂອງຟີຟ້າ ທີ່ລະບຸໄວ້ ແມ່ນຈະໃຫ້ສິດກັບທີມ
ທີ່ມີອັນດັບດີຂອງທະວີບຮອງຈາກບັນດາທີມທີ່ຜ່ານການຄັດເລືອກແລ້ວ ເຊິ່ງປັດຈຸບັນແມ່ນ ອີຣັກ ແລະ ສະຫະລັດ ອາຣັບ ເອມີເຣດ (UAE), ໂດຍ ອີຣັກ ກຳລັງຈະເພອັອຟລະດັບທະວີບ, ສ່ວນ UAE ຕົກຮອບເພອັອຟຂອງອາຊີ ແລະ ມີອັນດັບຮອງຈາກອີຣັກ. ກໍລະນີນີ້ ຖ້າ ອີຣັກ ຕົກຮອບເພອັອຟ ໂຄຕ້ານີ້ ອາດເປັນຂອງ UAE ທີ່ມີອັນດັບໂລກສູງສຸດຂອງບັນດາທີມທີ່ຍັງບໍ່ເຂົ້າຮອບສຸດທ້າຍ ຫຼື ຖ້າ ອີຣານ ຖອນຕົວແບບກະທັນຫັນພາຍໃນ 30 ວັນ ກ່ອນການແຂ່ງຂັນ ຟີຟ້າ ອາດເລືອກໃຫ້ກຸ່ມ G ມີພຽງ 3 ທີມ ເພື່ອຫຼີກລ່ຽງບັນຫາການຈັດການດ້ານວີຊ້າ ແລະ ການກຽມພ້ອມວຽກງານອື່ນທີ່ກ່ຽວຂ້ອງ.
ການຖອນຕົວຂອງ ອີຣານ ຕ້ອງແຈ້ງ ແລະ ຢືນຢັນໃຫ້ ຟີຟ້າ ຮັບຮູ້ຢ່າງຊັດເຈນກ່ອນການແຂ່ງຂັນໂດຍໄວບໍ່ດັ່ງນັ້ນຈະຖືກບົດລົງໂທດຕາມກຳນົດ ເປັນຕົ້ນ ຖືກປັບໄໝ 250.000-500.000 ຟຣັງສະວິສ ຂຶ້ນກັບໄລຍະເວລາຖອນຕົວ ຫຼື ຖືກລົງໂທດຫ້າມເຂົ້າຮ່ວມ ບານໂລກ ຄັ້ງຕໍ່ໄປ ສົ່ງຜົນກະທົບໄລຍະຍາວຕໍ່ສະຫະພັນ ແລະ ທີມຊາດ, ນອກຈາກນີ້ ອີຣານ ຈະຖືກຍຶດເງິນກຽມທີມເຂົ້າຮ່ວມຄືນ ຈຳນວນ 1,5 ລ້ານໂດລາສະຫະລັດ ແລະ ພາດໂອກາດໄດ້ຮັບເງິນ 9 ລ້ານໂດລາ ຈາກການຜ່ານຮອບຄັດເລືອກເຂົ້າຮ່ວມຮອບສຸດທ້າຍ.
ສຳລັບ ບານໂລກ 2026 ຮອບສຸດທ້າຍ ເປັນຄັ້ງທຳອິດທີ່ມີ 48 ທີມ ຈະແຂ່ງຂັນວັນທີ 11 ມິຖຸນາ-19 ກໍລະກົດ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
