POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນສຸກ, ວັນທີ 05 ທັນວາ 2025

ເມື່ອປະເທດຊາດມີຄວາມສະຫງົບປອດໄພ, ກົມກອງກໍ່ໄດ້ຮັບການພັດທະນາຢ່າງຕໍ່ເນື່ອງ
ເວລາອອກຂ່າວ: 2025-11-12 10:55:36 | ຜູ້ຂຽນ : admin2 | ຈຳນວນຄົນເຂົ້າຊົມ: 833 | ຄວາມນິຍົມ:

ເນື່ອງໃນໂອກາດ ກະກຽມສະເຫຼີມສະຫຼອງ ວັນສະຖາປະນາ ສປປ ລາວ ຄົບ ຮອບ 50 ປີ ແລະ ວັນເກີດຂອງປະທານ ໄກສອນ ພົມວິຫານ ຄົບຮອບ 105 ປີ ທີ່ຈະມາເຖິງນີ້ ໃຫ້ເຕັມໄປດ້ວຍເນື້ອໃນຄວາມໝາຍຢ່າງເລິກເຊິ່ງນັ້ນ, ສະຫາຍ ພັນເອກ ບຸນເລີດ ບຸບຜາວັນ ຫົວໜ້າການທະຫານ ກອງບັນຊາການທະ ຫານແຂວງຄໍາມ່ວນ ໃຫ້ສຳພາດວ່າ: ໃນນາມການຈັດຕັ້ງ ກໍຄື ສ່ວນຕົວມີຄວາມຮູ້ສຶກພາກພູມໃຈ ແລະ ເອກອ້າງທະນົງໃຈເປັນຢ່າງຍິ່ງ ທີ່ເຫັນວ່າ: ປະເທດຊາດຂອງພວກເຮົາ ນັບແຕ່ມື້ໄດ້ຮັບການປົດປ່ອຍ ໃນວັນທີ 2 ທັນວາ ປີ 1975 ມາເຖິງປັດຈຸບັນ ກໍຄື ປີ 2025 ມີອາຍຸ ຄົບຮອບ 50 ປີພໍດີ, ເຊິ່ງຕະຫຼອດໄລຍະທີ່ຜ່ານມາ ພັກໄດ້ນຳພາປວງຊົນລາວທັງຊາດ ໂດຍປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມຈະເລີນກ້າວໜ້າ ໃນຫຼາຍດ້ານ, ເຊິ່ງສະແດງໃຫ້ເຫັນວ່າ: ປະເທດຊາດຂອງພວກເຮົາໄດ້ມີຄວາມສະຫງົບ ແລະ ປອດໄພ, ໃນນີ້ ເວົ້່າສະເພາະແມ່ນກຳລັງປ້ອງກັນຊາດ ກໍ່ຄືກອງບັນຊາການທະຫານແຂວງຄຳມ່ວນ ກໍ່ໄດ້ມີການພັດທະນາເຕີບໃຫຍ່ເຂັ້ມແຂງຂຶ້ນເປັນກ້າວໆ ນັບທັງດ້ານປະລິມານ ແລະ ຄຸນນະພາບ. ດັ່ງນັ້ນ, ເພື່ອສືບຕໍ່ພາລະກິດດັ່ງກ່າວ, ໃນໄລຍະຜ່ານມາ ຄະນະພັກ-ຄະນະບັນຊາ ກອງບັນຊາ ການທະຫານແຂວງຄໍາມ່ວນ ໄດ້ເອົາໃຈໃສ່ນໍາພາ-ຊີ້ນໍາ ກໍາລັງປະກອບອາວຸດປ້ອງກັນຊາດ ໃນທົ່ວແຂວງຄໍາມ່ວນ ຈັດຕັ້ງປະຕິບັດໜ້າທີ່ການເມືອງຂອງຕົນ ບົນພື້ນຖານປິ່ນອ້ອມ 4 ໜ້າທີ່ໃຫຍ່ 26 ແຜນງານ ທີ່ກະຊວງປ້ອງກັນປະເທດວາງອອກ, ສາມາດຍາດໄດ້ຜົນງານຫຼາຍດ້ານ, ເຊິ່ງສະແດງອອກ ວຽກງານເຮັດໃຫ້ສະພາບມີຄວາມສະຫງົບ ໄດ້ຫັນເອົາພະນັກງານຫຼັກແຫຼ່ງ ລົງກໍ່ສ້າງຮາກຖານການເມືອງ-ພັດທະນາຊົນນະບົດຮອບດ້ານ ໂດຍສຸມໃສ່ການກໍ່ສ້າງທ່າສະໜາມສົງຄາມປະຊາຊົນ 3 ຂັ້ນ, ຜ່ານການຈັດຕັ້ງປະຕິບັດ ພື້ນຖານປ້ອງກັນຊາດ ໄດ້ຮັບການປັບປຸງ-ກໍ່ສ້າງ ມີການຂະຫຍາຍຕົວເພີ່ມຂຶ້ນ ຢ່າງຕໍ່ເນື່ອງ, ໃນນີ້ ສ້າງບ້ານ ແລະ ຄອບຄົວ ປ້ອງກັນຊາດ ເຂັ້ມແຂງ ໄດ້ 12 ບ້ານ, ມີ 1.608 ຄອບຄົວ, ມາຮອດປັດຈຸບັນ ມີບ້ານ ແລະ ຄອບຄົວ ປ້ອງກັນຊາດ ທັງໝົດ 74 ບ້ານ, ມີ 14.453 ຄອບຄົວ, ກຸ່ມບ້ານສູ້ຮົບຕິດລຽນ ມີ 4 ກຸ່ມບ້ານ ແລະ ທ່າສະໜາມສູ້ຮົບຈັ້ງທ່າ ປ້ອງກັນຕົວເມືອງ ມີ 1 ເມືອງ; ພ້ອມນັ້ນ ໄດ້ປະກອບສ່ວນອັນສໍາຄັນ ເຂົ້າໃນການປັບປຸງລະບົບການເມືອງຢູ່ຮາກຖານ ໃຫ້ເຂັ້ມແຂງໜັກແໜ້ນ ດ້ວຍການຫັນເອົານາຍທະຫານ ເຮັດໜ້າທີ່ໃນການຈັດຕັ້ງພັກ ແລະ ອົງການປົກຄອງບ້ານ ຈໍານວນໜຶ່ງ, ເຮັດໃຫ້ຮາກຖານມີຄວາມສະຫງົບ ແລະ ໄດ້ຮັບການພັດທະນາ ທາງດ້ານເສດ ຖະກິດ-ສັງຄົມ ດີຂຶ້ນເປັນກ້າວໆ; ໄດ້ເອົາໃຈໃສ່ເປັນກໍາລັງຫຼັກແຫຼ່ງ ໃນການຕ້ານ, ສະກັດກັ້ນ ແລະ ແກ້ໄຂໜໍ່ແໜງຄວາມບໍ່ສະຫງົບ ທີ່ເກີດຂຶ້ນ ໄດ້ທັນເວລາ, ສາມາດຢຶດວັດຖຸ ແລະ ສິ່ງຜິດກົດໝາຍ ໄດ້ຈໍານວນບໍ່ໜ້ອຍ, ໃນນັ້ນ ອັນພົ້ນເດັ່ນ ສາມາດຢຶດຢາບ້າ ໄດ້ 2.400.000 ເມັດ ແລະ ຢຶດເຮືອລັກລອບດູດແຮ່-ຊາຍ ຕາມຊາຍແດນລາວ-ໄທ ໄດ້ 1 ລຳ, ໄດ້ເອົາໃຈໃສ່ປະຕິບັດ ດຳລັດເລກທີ 111 ຂອງລັດຖະບານ ໃນການຄຸ້ມຄອງ, ປົກປັກຮັກສາ ແລະ ພັດທະນາເຂດ ຍຸດທະສາດປ້ອງກັນຊາດ, ນອກຈາກນີ້ ຍັງໄດ້ຊີ້ນໍາກໍາລັງປ້ອງເປົ້າໝາຍຍຸດສາດສໍາຄັນ ດ້ວຍຄວາມຮັບຜິດຊອບສູງ, ສາມາດ ຮັບປະກັນ ເຮັດໃຫ້ຂອບເຂດທົ່ວແຂວງ ມີຄວາມສະຫງົບປອດໄພ 100%. ວຽກງານປັບປຸງ-ກໍ່ສ້າງກຳລັງ ເວລາໃດ ກໍ່ຖືເອົາວຽກສຶກສາອົບຮົມການເມືອງ-ນໍາພາແນວຄິດ ເປັນກົກ ດ້ວຍການຈັດຕັ້ງເຜີຍແຜ່ເຊື່ອມຊຶມ ແນວທາງນະໂຍບາຍຂອງພັກ, ບັນດາມະຕິ, ຄໍາ ສັ່ງ, ລະບຽບກົດໝາຍຂອງລັດ, ຂອງກອງທັບ, ພ້ອມທັງປາຖະກະຖາ ປະຫວັດມູນເຊື້ອ ວັນສໍາຄັນຕ່າງໆ ຢ່າງຕໍ່ເນື່ອງ, ເຮັດໃຫ້ນາຍ ແລະ ພົນທະຫານ ໃນທົ່ວແຂວງຄໍາມ່ວນ ມີທັດສະນະຫຼັກໝັ້ນ, ຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິບັດ; ບົນພື້ນຖານນັ້ນ ໄດ້ສຸມໃສ່ການປັບປຸງກໍ່ສ້າງພັກ, ພະນັກງານ ແລະ ອົງການຈັດຕັ້ງມະຫາຊົນ ໃຫ້ປອດໃສ ເຂັ້ມແຂງ ໜັກແໜ້ນ, ສາມາດເປັນແກນນໍາໃນລະບົບການເມືອງ. ພ້ອມນັ້ນ ໄດ້ເອົາໃຈໃສ່ ປະຕິບັດລະບອບນະໂຍບາຍ ຕໍ່ນາຍ ແລະ ພົນທະຫານ ສອດ ຄ່ອງກັບແນວທາງນະໂຍບາຍລວມ ຂອງພັກ, ລັດ ແລະ ກອງທັບ ເຮັດໃຫ້ນາຍ ແລະ ພົນທະ ຫານ ມີຄວາມຫ້າວຫັນຕໍ່ໜ້າທີ່ວຽກງານ; ເອົາໃຈໃສ່ອົບຮົມ-ຫັດແອບ ການທະຫານ ແລະ ວິຊາສະເພາະຕ່າງໆ, ສ້າງຄວາມຊໍານິຊໍານານ ດ້ານສິນລະປະຍຸດ-ຍຸດທະວິທີ ແລະ ຍົກສູງຂີດ ຄວາມສາມາດ ໃນການກຽມພ້ອມສູ້ຮົບ ໃນທຸກພາວະ, ຕິດພັນກັບການປະຕິບັດ ລະບຽບ ແບບແຜນ, ຂໍ້ກໍານົດຂອງກອງທັບ ແລະ ຂອງກົມກອງ ໄດ້ເປັນຢ່າງດີ. ວຽກງານພະລາທິການ-ເຕັກນິກ ໂດຍພື້ນຖານ ແມ່ນສາມາດຮັບປະກັນດ້ານ ລະບອບອັດຕາ ເປັນຕົ້ນ ເງິນເດືອນ, ເຂົ້າກິນ ແລະ ເຄື່ອງນຸ່ງຮົ່ມ ຕາມນະໂຍບາຍທີ່ຂັ້ນເທິງກຳນົດ ແລະ ສະໜອງໃຫ້, ໃນນີ້ ໄດ້ເອົາໃຈໃສ່ຄຸ້ມຄອງ ແລະ ນໍາໃຊ້ງົບປະມານການເງິນ ຕາມທິດ ປະຢັດ-ມັດທະຍັດ ແລະ ຕ້ານການໃຊ້ຈ່າຍຟູມເຟືອຍ; ພ້ອມນັ້ນ ໄດ້ຊີ້ນໍາບັນດາກົມກອງ ເປັນ ເຈົ້າການ ແກ້ໄຂຊີວິດການເປັນຢູ່ ຂອງນາຍ ແລະ ພົນທະຫານ ດ້ວຍການປະຕິບັດຄໍາຂວັນ 4 ປູກ 4 ລ້ຽງ ແລະ ຊອກແຫຼ່ງລາຍຮັບເຂົ້າກົມກອງ ໄດ້ຈໍານວນໜຶ່ງ; ເອົາໃຈໃສ່ຮັບປະກັນດ້ານພາ ຫະນະ-ເຕັກນິກ, ອາວຸດຍຸດໂທປະກອນ ຢູ່ໃນສະພາບກຽມພ້ອມສູ້ຮົບ ຕະຫຼອດ 24 ຊົ່ວໂມງ. ນອກນັ້ນວຽກງານພົວພັນ ແລະ ຮ່ວມມືກັບຕ່າງປະເທດແມ່ນໄດ້ເອົາໃຈໃສ່ຈັດຕັ້ງປະຕິບັດແນວທາງການຕ່າງປະເທດຂອງພັກ ຢ່າງຖືກຕ້ອງ ໃນການຮ່ວມມືກັບປະເທດ ເພື່ອນມິດຍຸດທະສາດ ແລະ ປະເທດໃກ້ຄຽງ. ໂອກາດນີ້, ສະຫາຍ ພັນເອກ ບຸນເລີດ ບຸບຜາວັນ ຕາງໜ້າໃຫ້ຄະນະພັກ-ຄະນະກອງບັນຊາການ ທະຫານແຂວງຄໍາມ່ວນ ຂໍສະແດງຄວາມຮູ້ບຸນຄຸນອັນລົ້ນເຫຼືອ ແລະ ອວຍພອນໄຊອັນປະເສີດມາຍັງການນໍາ ແລະ ອາດີດການນໍາ ພັກ-ລັດ ແຕ່ລະຮຸ້ນ ຈົ່ງມີສຸຂະພາບເຂັ້ມແຂງ, ມີພະລານາໄມສົມບູນ, ສືບຕໍ່ນໍາພາປະເທດຊາດ ກ້າວຂຶ້ນສູ້ສັງຄົມນິຍົມຢ່າງບໍ່ຢຸດຢັ້ງ, ອວຍພອນຄະນະນໍາກະຊວງປ້ອງກັນປະເທດ ຈົ່ງມີສຸຂະພາບເຂັ້ມແຂງ ສືບຕໍ່ຊີ້ນໍາກອງທັບ ໃຫ້ມີຄວາມເຂັ້ມແຂງ ໜັກແໜ້ນ, ເປັນກອງທັບປະຕິວັດ ທີ່ມີແບບແຜນທັນສະໄໝ, ໄປພ້ອມກັນນີ້ ຂໍອວຍພອນແດ່ພະນັກງານປະຕິວັດ-ອາວຸໂສບຳນານ, ນາຍ ແລະ ພົນທະຫານ ໃນທົ່ວແຂວງຄໍາມ່ວນ ຈົ່ງມີສຸຂະພາບເຂັ້ມແຂງ, ສໍາເລັດທຸກໜ້າທີ່ ແລະ ສືບຕໍ່ສ້າງຂະບວນການ-ສ້າງຜົນງານ ຂໍ່ານັບຮັບຕ້ອນວັນສໍາຄັນຂອງຊາດ, ຂອງພັກໂດຍສະເພາະຂໍ່ານັບຮັບຕ້ອນວັນສະຖາປະນາ ສປປ ລາວ ຄົບຮອບ 50 ປີ, ວັນເກີດ ປະທານ ໄກສອນ ພົມວິຫານ ຄົບຮອບ 105 ປີ ແລະ ກອງ ປະຊຸມໃຫຍ່ ຄັ້ງທີ XII ຂອງພັກ ໃຫ້ມີບັນຍາກາດຟົດຟື້ນມ່ວນຊື່ນ ແລະ ເປັນຂະບວນການກວ້າງຂວາງ.

news to day and hot news