ວັນເສົາ, ວັນທີ 24 ມັງກອນ 2026
ເງິນສຳຄັນ ແຕ່ການສຶກສາກໍຈຳເປັນ ເພາະການສຶກສາສ້າງຄົນ-ຄົນສ້າງຊາດ
ເວລາອອກຂ່າວ: 2025-07-09 09:49:57 | ຜູ້ຂຽນ : admin1 | ຈຳນວນຄົນເຂົ້າຊົມ: 2160 | ຄວາມນິຍົມ: 
ການສຶກສາ ຍັງມີຄວາມສຳ ຄັນ ແລະ ຈຳເປັນຢູ່ ໃນຍຸກທີ່ສະພາບການບ້ານເມືອງພວມປະ ສົບບັນຫາວິກິດທາງດ້ານເສດ ຖະກິດ-ການເງິນ ອັນມີຜົນກະທົບຢ່າງໃຫຍ່ຫຼວງຕໍ່ຊີວິດການເປັນຢູ່ຂອງປະຊາຊົນບັນດາເຜົ່າໃນທົ່ວປະເທດ, ແຕ່ເພື່ອອະນາຄົດອັນສົດໃສຂອງຊາດ, ຂອງລູກຫຼານພໍ່ແມ່ ກໍຄືຜູ້ປົກຄອງຕ້ອງໄດ້ສະຫຼະ ແລະ ທຸ່ມເທຊັບສິນ ເພື່ອສົ່ງເສີມລູກຫຼານໄດ້ເຂົ້າຮຽນ ນີ້ຄືເປົ້າໝາຍ, ຄວາມຮັກ, ຄວາມຫ່ວງໃຍ ແລະ ຄວາມຫວັງ ຂອງພໍ່ແມ່ທີ່ມີຕໍ່ລູກຫຼານ ທີ່ຈະເປັນຄົນດີ, ມີວິຊາຄວາມຮູ້ ກາຍເປັນທຶນຮອນອັນປະເສີດຂອງຊາດໃນອະນາຄົດ.
ສະຫາຍ ພັນໂທ ຄຳພົດ ສີປະໄພ ຫົວໜ້າພະແນກຮາກຖານ ກົມກໍ່ສ້າງຮາກຖານການເມືອງ ກົມໃຫຍ່ການເມືອງກອງທັບ ໃຫ້ຮູ້ວ່າ: ການສຶກສາເປັນຮາກເຫງົ້າ ແລະ ເປັນກົກໃນການສ້າງ ຄົນໃຫ້ເປັນຊັບພະຍາກອນອັນປະເສີດຂອງຊາດ ເພາະການສຶກສາສ້າງຄົນ-ຄົນສ້າງຊາດ ແຕ່ສິ່ງທີ່ໜ້າເປັນຫ່ວງຄື: ຈຳນວນນັກຮຽນໃນແຕ່ລະຊັ້ນ, ແຕ່ລະຂັ້ນມີທ່າອ່ຽງຫຼຸດລົງ ໂດຍສະເພາະໃນຂັ້ນມັດທະຍົມ, ວິທະຍາໄລ, ມະຫາວິທະຍາໄລ ສາເຫດຍ້ອນວ່າ ສະພາບການບ້ານເມືອງຂອງພວກເຮົາ ເກີດວິກິດທາງດ້ານເສດຖະກິດ-ການເງິນ, ນັກ ຮຽນ-ນັກສຶກສາຈຳນວນບໍ່ໜ້ອຍປະລະການຮຽນ ແລ້ວຫັນໄປອອກແຮງງານຢູ່ຕ່າງປະເທດ ເພື່ອເອົາຊີວິດຢູ່ລອດວິກິດ ແລະ ຜູ້ປົກຄອງສ່ວນໜຶ່ງ ຄິດວ່າ ຈະຮຽນໄປເພື່ອຫຍັງ? ຮຽນຈົບມາ ກໍບໍ່ມີວຽກຮອງຮັບ, ເສຍເງິນ ເສຍເວລາລ້າໆ, ຮຽນແຕ່ພໍອ່ານອອກຂຽນເປັນ ແລ້ວອອກໄປຊອກເງິນດີກວ່າ ເພາະສຸດທ້າຍແລ້ວ ເປົ້າໝາຍນັ້ນ ກໍຄືເງິນ. ນີ້ຈຶ່ງເປັນສາເຫດຫຼັກທີ່ເຮັດໃຫ້ເກີດບັນຫາຂາດແຄນຄູສອນຢູ່ເຂດຫ່າງໄກສອກຫຼີກ, ຄູກໍບໍ່ຢາກສອນ, ນັກຮຽນກໍບໍ່ຢາກຮຽນ. ສະນັ້ນ, ຕໍ່ບັນຫາດັ່ງກ່າວ ລັດຖະບານ ໄດ້ສືບຕໍ່ສຸມໃສ່ແກ້ໄຂສະພາບຂາດຄູສອນ ໂດຍສຸມໃສ່ປະຕິບັດຕາມນະໂຍບາຍ ແລະ ມາດຕະການທີ່ລັດຖະບານໄດ້ກຳນົດໃນມະຕິ 09/ລບ ເປັນຕົ້ນ: ເພີ່ມເງິນເບ້ຍລ້ຽງໃຫ້ນັກສຶກສາທີ່ຮຽນສາຍຄູ, ກຳນົດໂກຕາຄູ ສອນໃຫ້ສອດຄ່ອງກັບແຜນກໍ່ ສ້າງຄູ, ຫັນຄູອາສາສະໝັກເຂົ້າເປັນລັດຖະກອນຄູ ແລະ ທົດແທນ ຄູທີ່ສູນເສຍດ້ວຍຮູບການຕ່າງໆ, ປະຕິບັດນະໂຍບາຍໃຫ້ພະນັກ ງານບຳນານທີ່ຍັງແຂງແຮງ ແລະ ກຳລັງທະຫານຊາຍແດນ ຊ່ວຍສິດສອນໃນໂຮງຮຽນທີ່ຂາດຄູສອນ, ປະຕິບັດນະໂຍບາຍເອົາຄູອາສາສະໝັກບັນຈຸເຂົ້າເປັນທະຫານພັນທະ ແຕ່ປະຕິບັດໜ້າທີ່ຄູສອນ.
ສະຫາຍ ຍັງໃຫ້ຮູ້ຕື່ມອີກວ່າ: ໃນປັດຈຸບັນ, ກະຊວງປ້ອງກັນປະເທດ ຮ່ວມກັບກະຊວງສຶກສາທິການ ແລະ ກິລາ ໄດ້ຈັດເຝິກ ອົບຮົບວິຊາຄູຊັ້ນປະຖົມສຶກສາໃຫ້ແກ່ພະນັກງານ-ນັກຮົບ ຊຸດທີ II ຢູ່ທີ່ວິທະຍາໄລຄູຫຼວງພະບາງ ໂດຍໄດ້ຄັດເລືອກເອົານາຍ ແລະ ພົນທະຫານຜູ້ທີ່ມີເງື່ອນໄຂມາຈາກ ກອງບັນຊາການທະຫານແຂວງຫຼວງພະບາງ, ອຸດົມໄຊ, ຜົ້ງສາລີ, ບໍ່ແກ້ວ, ຫຼວງນ້ຳທາ ແລະ ແຂວງໄຊຍະບູລີ ເຊິ່ງໃນ ກ່ອນໜ້ານັ້ນ, ໄດ້ສຳເລັດການ ເຝິກອົບຮົມ ຊຸດທີ I ຢູ່ທີ່ວິທະຍາ ໄລຄູສະຫວັນນະເຂດ ເຊິ່ງມີນັກ ເຝິກອົບຮົມທັງໝົດ 86 ສະຫາຍ ແລະ ຖືກບັນຈຸເຂົ້າຊ່ວຍສອນແລ້ວ ຈຳນວນໜຶ່ງ ແລະ ຄາດກະວ່າ ໃນຕໍ່ໜ້ານີ້, ຈະເປີດເຝິກອົບຮົມວິຊາຄູ ຊຸດທີ III ຢູ່ທີ່ ວິທະຍາໄລຄູຄັງໄຂ ໂດຍຈະໄດ້ຄັດເລືອກເອົາບັນດານາຍ ແລະ ພົນທະຫານຜູ້ ທີ່ມີເງື່ອນໄຂມາຈາກກອງບັນຊາ ການທະຫານແຂວງວຽງຈັນ, ຊຽງຂວາງ, ໄຊສົມບູນ ແລະ ແຂວງຫົວພັນ ເຂົ້າຮ່ວມເຝິກອົບຮົມ.
ໂດຍ: ຈິດ ເພັດພູທອງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
