POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນອາທິດ, ວັນທີ 22 ມິຖຸນາ 2025

ນຳໃຊ້ເນື້ອທີ່ດິນເປົ່າວ່າງຄ້າຍຄູເປັນເຂດສ້າງພະລາທິການກັບທີ່
ເວລາອອກຂ່າວ: 2025-05-19 09:02:44 | ຜູ້ຂຽນ : admin1 | ຈຳນວນຄົນເຂົ້າຊົມ: 1398 | ຄວາມນິຍົມ:

ເມື່ອເວົ້າເຖິງການສ້າງພະ ລາທິການກັບທີ່ແລ້ວ ເປັນເປົ້າໝາຍແຂ່ງຂັນກັນຂອງບັນດາກົມກອງທັງກຳລັງຫຼວງ ແລະ ກຳລັງທ້ອງຖິ່ນ ໃນທົ່ວກອງທັບ ດ້ວຍສາເຫດທີ່ວ່າ ພະນັກງານ-ນັກຮົບ ໃນກອງທັບປະຊາຊົນລາວ ແມ່ນມີມູນເຊື້ອດຸໝັ່ນໃນການອອກແຮງງານ, ເພີ່ມພູນຜະລິດຜົນມາແຕ່ດົນນານແລ້ວ. ໃນຊຸມປີຜ່ານມານີ້, ຫຼາຍກົມກອງໃນທົ່ວກອງທັບ ກໍໄດ້ຖືເອົາທິດນຳ 4 ປູກ 4 ລ້ຽງ ຂອງກົມ ໃຫຍ່ພະລາທິການກອງທັບວາງ ອອກ ເປັນບັນທັດຖານໃນການແກ້ໄຂຊີວິດການເປັນຢູ່ຂອງພະນັກງານ-ນັກຮົບໃຫ້ອີ່ມ ໜຳສຳລານຂຶ້ນເທື່ອລະກ້າວ ໂດຍການແຂ່ງຂັນກັນເພີ່ມພູນຜະລິດຜົນ, ຜະລິດສະບຽງອາ ຫານສະໜອງໃຫ້ເຮືອນຄົວລວມ ແລະ ຂາຍອອກສູ່ທ້ອງຕະຫຼາດໃຫ້ນັບມື້ຫຼາຍຂຶ້ນ. ໃນນີ້, ຄະນະພັກ-ຄະນະບັນຊາ ຫ້ອງພະລາທິການ ວິທະຍາຄານເຕັກນິກການທະຫານ ກໍໄດ້ຫັນເອົາເນື້ອທີ່ດິນເປົ່າວ່າງຂອງຄ້າຍຄູ ສ້າງເປັນເຂດທຳການຜະລິດ ເພື່ອສ້າງພະລາທິການກັບທີ່ ໂດຍໄດ້ເອົາໃຈໃສ່ປຸກລະດົມຊຸກຍູ້ພະນັກງານ-ນັກຮົບ ສ້າງເສດຖະກິດແກ້ໄຂຊີວິດການເປັນຢູ່ ດ້ວຍການຂຸດຄົ້ນທ່າແຮງບົ່ມຊ້ອນ, ເງື່ອນໄຂຄວາມອາດສາມາດຂອງກົມກອງທີ່ມີຢູ່ເຂົ້າໃນການປູກຝັງ-ລ້ຽງສັດ ທຳການຜະລິດໃຫ້ໄດ້ຫຼາຍ ກາຍເປັນສິນຄ້າສົ່ງອອກ ແລະ ສ້າງລາຍຮັບໃຫ້ແກ່ກົມກອງ. ສະຫາຍ ພັນເອກ ວົງນະຄອນ ພົມມະຈັກ ຫົວໜ້າຫ້ອງພະລາທິ ການ ວິທະຍາຄານເຕັກນິກການທະຫານ ໄດ້ໃຫ້ຮູ້ວ່າ: ໂດຍເສີມຂະຫຍາຍມູນເຊື້ອດຸໝັ່ນຂະຫຍັນພຽນໃນການອອກແຮງງານເພີ່ມພູມຜະລິດຜົນ, ປູກຝັງ-ລ້ຽງສັດ, ເຮັດໃຫ້ຄ້າຍຄູເປັນພື້ນທີ່ສີຂຽວຕາມຂໍ້ແຂ່ງຂັນ “ຮັກຊາດ ແລະ ພັດທະນາ” ກໍຄື ປະຕິບັດຕາມຄຳຂວັນ 4 ປູກ 4 ລ້ຽງ ຂອງກົມໃຫຍ່ພະລາທິການກອງທັບໃຫ້ປະກົດຜົນເປັນຈິງນັ້ນ, ຍາມໃດຄະນະພັກ-ຄະນະບັນຊາຫ້ອງພະລາທິການ ກໍໄດ້ເອົາໃຈໃສ່ຊີ້ນຳພະນັກງານ-ນັກຮົບໃນກົມກອງໃຫ້ກຳແໜ້ນ 3 ຫຼັກການທາງດ້ານວຽກງານເສດຖະກິດເປັນເຈົ້າຕົນເອງ ເປັນຕົ້ນມີຄວາມໝັ້ນຄົງ, ມີຄຸນນະພາບ, ມີຜົນກຳໄລ ແລະ 4 ທັດສະນະຂອງກົມໃຫຍ່ພະລາທິການທີ່ວ່າ ທັດສະນະຮັບໃຊ້, ທັດສະນະອອກແຮງງານ, ທັດສະນະປະ ຢັດ ແລະ ທັດສະນະປະດິດສ້າງ ເຊິ່ງພະນັກງານ-ນັກຮົບພາຍໃນກົມກອງ ກໍໄດ້ມີຄວາມຈູບຈ້າວຫ້າວຫັນ, ມີຈິດໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ພ້ອມກັນນັ້ນ, ກໍໄດ້ວາງທິດທາງແຜນການ, ຄາດໝາຍໃນແຕ່ລະໄລຍະ, ຊອກຫາວິທີການສ້າງເນື້ອທີ່ດິນເປົ່າວ່າງຂອງກົມກອງໃຫ້ກາຍເປັນພື້ນທີ່ປົກຄຸມໄປດ້ວຍສີຂຽວ ໂດຍການປູກພືດຜັກລົ້ມລຸກຊະນິດຕ່າງໆຕາມລະດູການ ເພື່ອໃຫ້ແຕ່ລະພະແນກໄດ້ແຂ່ງຂັນກັນເຮັດສວນປູກພືດຜັກ ຕາມພື້ນທີ່ເປົ່າວ່າງຂອງກົມກອງ ສະໜອງເຂົ້າເຮືອນຄົວລວມ ແລະ ສົ່ງອອກຂາຍຕາມທ້ອງຕະຫຼາດເປັນປະຈຳ. ນອກຈາກນັ້ນ, ຍັງໄດ້ຊຸກຍູ້ຂະບວນການປູກຝັງໃນກອງພັນນັກສຶກສາ ໂດຍສະ ເລ່ຍແລ້ວໃນແຕ່ລະປີນັກສຶກສາ ຜູ້ໜຶ່ງສາມາດສະໜອງພືດຜັກໄດ້ 120 ກິໂລຕໍ່ຄົນຕໍ່ປີ, ເຂດລ້ຽງສັດປະກອບມີສະຖານທີ່ລ້ຽງໝູ, ປາ, ສັດປີກ ແລະ ຂາຍນ້ຳດື່ມທີ່ຜະລິດເອງພາຍໃນກົມກອງ. ໃນປີ 2024 ຜ່ານມາ, ຫ້ອງພະລາທິການໄດ້ປ່ອຍປາ ລ້ຽງ 1.320 ກິໂລ, ໝູ 52 ໂຕ, ສັດປີກ 1.689 ໂຕ, ສາມາດສ້າງລາຍຮັບຈາກວຽກງານກະສິກຳປູກຝັງ-ລ້ຽງສັດ ກໍຄື ການສ້າງພະລາທິການກັບທີ່ໄດ້ເຖິງ 182.663.000 ກີບ, ລາຍຮັບຈຳນວນດັ່ງກ່າວແມ່ນເຂົ້າຄັງລວມຂອງວິທະຍາຄານເຕັກນິກການທະຫານ 100%. ໃນປັດຈຸບັນ, ຫ້ອງພະລາທິການ ຍັງສືບຕໍ່ລ້ຽງໝູພັນຊີ້ນ 17 ໂຕ, ນົກກະທາ 3.500 ໂຕ, ເປັດ 60 ໂຕ, ປາປະສົມ 1.320 ກິໂລ. ນອກຈາກນີ້, ຍັງໄດ້ທົດລອງປູກດອກດາວເຮືອງ ຈຳນວນ 3.500 ຕົ້ນ, ເຖິງແມ່ນວ່າປີນີ້ເປັນປີທຳອິດໃນການທົດລອງ ປູກກໍຕາມ ແຕ່ປັດຈຸບັນແມ່ນສາມາດເກັບກ່ຽວ ຂາຍສົ່ງ-ຂາຍຍ່ອຍຕາມທ້ອງຕະຫຼາດ ໄດ້ແລ້ວ 350 ກິໂລ ເປັນເງິນ 3.000.000-4.000.000 ກີບ. ສະຫາຍ ພັນເອກ ວົງນະຄອນ ພົມມະຈັກ ຍັງໃຫ້ຮູ້ຕື່ມວ່າ: ຍ້ອນການສ້າງພະລາທິການກັບທີ່ຢູ່ກົມກອງຂອງຕົນໄດ້ຮັບຜົນດີ ສາມາດແກ້ໄຂຊີວິດການເປັນຢູ່ຂອງພະນັກງານ-ນັກຮົບ, ນັກສຶກສາ ແລະ ຮັບໃຊ້ວຽກງານບໍລິຫານຂອງກົມກອງໄດ້ດີພໍສົມຄວນ. ເມື່ອທຽບໃສ່ຄວາມຕ້ອງການຂອງຜູ້ບໍລິໂພກທັງພາຍໃນກົມກອງ ກໍຄື ຕາມທ້ອງຕະຫຼາດແລ້ວເຫັນວ່າຍັງບໍ່ທັນພຽງພໍ. ສະນັ້ນ, ໃນຕໍ່ໜ້ານີ້ຈະສືບຕໍ່ສ້າງເຮືອນຮົ່ມ ເພື່ອປູກພືດຜັກລວມຕາມລະດູການ, ປູກຂ່າຕາມເນື້ອທີ່ເປົ່າວ່າງ, ຂະຫຍາຍສະຖານທີ່ລ້ຽງກົບ ໂດຍການເພາະພັນລູກກົບເອົາເອງ ນອກ ຈາກນັ້ນ, ຍັງມີແຜນການລ້ຽງໄກ່ພັນໄຂ່ ແລະ ຂະຫຍາຍພື້ນທີ່ປູກດອກດາວເຮືອງຕາມຂອບເຂດດິນເປົ່າວ່າງ ທັງນີ້, ກໍເພື່ອຕອບສະໜອງຊີ້ນ, ປາ, ພືດຜັກເຂົ້າເຮືອນຄົວລວມ ກໍຄື ຂາຍໃຫ້ພະນັກງານ-ນັກຮົບພາຍໃນກົມກອງ ແລະ ຂາຍສົ່ງອອກຕາມທ້ອງຕະຫຼາດ. ການດຳເນີນວຽກງານເພີ່ມ ພູນຜະລິດກະສິກຳ ຢູ່ ວຕກ ບໍ່ ພຽງແຕ່ເປັນການແກ້ໄຂຊີວິດການເປັນຢູ່ຂອງນາຍ ແລະ ພົນ ທະຫານໃຫ້ດີຂຶ້ນເທົ່ານັ້ນ, ຍັງເປັນການຊ່ວຍເຝິກຝົນໃຫ້ນັກສຶກສາມີແນວຄິດດຸໝັ່ນຂະຫຍັນພຽນ, ມີຄວາມອົດທົນ, ບໍ່ໄດ້ເອື່ອຍອີງໃສ່ແຕ່ເງິນເດືອນ ແລະ ທຶນຮອນຂອງຄອບຄົວສົ່ງໃຫ້, ຜົນສຳເລັດຍິ່ງໃຫຍ່ໄປກວ່ານັ້ນ ແມ່ນເປັນການສ້າງພະລາທິການກັບທີ່ ເພື່ອພັດທະນາກົມກອງ ຕາມທິດເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ. ໂດຍ: ເພັດນາລີ

news to day and hot news