ວັນອາທິດ, ວັນທີ 27 ເມສາ 2025
ກົມກົດລັບ ມອບຈັກລະຫັດໃໝ່ ໃຫ້ກອງບັນຊາການທະຫານແຂວງຄຳມ່ວນ
ເວລາອອກຂ່າວ: 2025-03-21 09:06:45 | ຜູ້ຂຽນ : admin3 | ຈຳນວນຄົນເຂົ້າຊົມ: 1111 | ຄວາມນິຍົມ: 
ວັນທີ 17 ມີນາ 2025 ນີ້, ກົມກົດລັບ ກົມໃຫຍ່ເສນາທິການກອງທັບ ໄດ້ມອບຈັກລະຫັດໃໝ່ ໃຫ້ກອງບັນຊາການທະຫານແຂວງຄຳມ່ວນ, ໂດຍການກ່າວມອບຂອງ ສະຫາຍ ພັນໂທ ສະຫວາດ ແສງອຳນວຍ ຮອງຫົວໜ້າການທະຫານ ສູນເຕັກນິກລະຫັດກົດລັບ ກົມໃຫຍ່ເສນາທິການກອງທັບ ແລະ ກ່າວຮັບໂດຍ ສະຫາຍ ພັນໂທ ໄຊປັນຍາ ເພັດອຸດົມ ຮອງຫົວໜ້າຫ້ອງເສນາທິການ ກອງບັນຊາການທະຫານແຂວງຄຳມ່ວນ, ມີຄະນະພັກ-ຄະນະບັນຊາ, ພະແນກການທີ່ກ່ຽວຂ້ອງ ແລະ ພະນັກງານ-ນັກຮົບ ຜູ້ທີ່ເຮັດວຽກງານວິຊາສະເພາະກົດລັບເຂົ້າຮ່ວມ.
ສະຫາຍ ພັນຕີ ສັນຕິສຸກ ພັນທະວົງ ຊ່ວຍວຽກພະແນກຈັດຕັ້ງ ກົມກົດລັບ ໄດ້ຜ່ານຂໍ້ຕົກລົງຂອງກົມກົດລັບ ກົມໃຫຍ່ເສນາທິການກອງທັບ ວ່າດ້ວຍການປະກອບຈັກລະຫັດ MFAX ຈຳນວນ 1 ຊຸດ ແລະ ຈັກລະຫັດ APHONE-16 ຈຳນວນ 3 ເຄື່ອງ ພ້ອມດ້ວຍປຶ້ມຄູ່ມືນຳໃຊ້ຈັກລະຫັດ MFAX-2022 ຮ່ວມກັບ APONE-16 ອີກຈຳນວນ 4 ຫົວ ພ້ອມທັງຜ່ານຂໍ້ຕົກລົງຂອງກົມກົດລັບ ວ່າດ້ວຍການປ່ຽນຖ່າຍອຸປະກອນຈັກດັ່ງກ່າວ ໃຫ້ບາງກົມກອງທີ່ຂຶ້ນກັບກອງບັນຊາການທະຫານແຂວງຄຳມ່ວນຕື່ມອີກ.
ໂອກາດດັ່ງກ່າວ, ສະຫາຍ ພັນໂທ ສະຫວາດ ແສງອຳ ໄດ້ຍົກໃຫ້ເຫັນເຖິງຄວາມໝາຍ, ຄວາມສຳຄັນ, ຄວາມທັນສະໄໝ, ຄວາມວ່ອງໄວ ແລະ ຄວາມຖືກຕ້ອງຊັດເຈນຂອງເຄື່ອງຈັກດັ່ງກ່າວທີ່ໃຊ້ເຂົ້າໃນວຽກງານກົດລັບຂອງກອງທັບ ເຊິ່ງເຄື່ອງນີ້ແມ່ນປ້ອງກັນຂໍ້ມູນໄດ້ດີ ແລະ ມີຄວາມປອດໄພສູງຕໍ່ໜ້າທີ່ວຽກງານ, ຕໍ່ເອກະສານສຳຄັນຕ່າງໆ ໂດຍສະເພາະແມ່ນພະແນກກົດລັບ ກອງບັນຊາການທະຫານແຂວງຄຳມ່ວນ ໃຫ້ມີຄວາມວ່ອງໄວທ່ວງທັນກັບເວລາ ພ້ອມທັງໄດ້ເນັ້ນໜັກໃຫ້ພະແນກກົດລັບ ກໍຄືພະນັກງານ-ນັກຮົບ ທີ່ເຮັດວຽກງານວິຊາສະເພາະກົດລັບ ຈົ່ງນຳເອົາເຄື່ອງຈັກດັ່ງກ່າວໄປໝູນໃຊ້ເຂົ້າໃນໜ້າທີ່ວຽກງານໃຫ້ມີຜົນປະໂຫຍດສູງສຸດ.
ຈາກນັ້ນ, ທັງສອງຝ່າຍ ກໍໄດ້ເຊັນບົດບັນທຶກມອບ-ຮັບ ເຄື່ອງດັ່ງກ່າວຢ່າງເປັນທາງການ ໂດຍມີຄະນະພັກ-ຄະນະບັນຊາພະແນກການທີ່ກ່ຽວຂ້ອງ ແລະ ພະນັກງານ-ນັກຮົບ ທີ່ເຮັດໜ້າທີ່ວິຊາສະເພາະກົດລັບຮ່ວມເປັນສັກຂີພະຍານ.
ໂດຍ: ລາກີ ພົມມີສິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
