ວັນຈັນ, ວັນທີ 02 ທັນວາ 2024
ປັບປຸງລະບຽບແບບແຜນ, ລະບຽບການຕ່າງໆ ແລະ ລະບຽບການຮຽນ-ການສອນ ຢູ່ໂຮງຮຽນ 301
ເວລາອອກຂ່າວ: 2024-11-28 14:37:07 | ຜູ້ຂຽນ : admin2 | ຈຳນວນຄົນເຂົ້າຊົມ: 763 | ຄວາມນິຍົມ: 
ພິທີເປີດປັບປຸງລະບຽບແບບແຜນ, ລະບຽບການຕ່າງໆ ແລະ ລະບຽບການຮຽນ-ການສອນ ປະຈໍາປີ 2024-2025 ຢູ່ໂຮງຮຽນ 301 ໄດ້ຈັດຂຶ້ນໃນ ວັນທີ 25 ພະຈິກ 2024 ນີ້, ໂດຍການເປັນປະທານ ສະຫາຍ ພົນຕີ ພັນແສງ ບຸນພັນ ຮອງຫົວໜ້າກົມໃຫຍ່ເສນາທິການກອງທັບ, ມີຫົວໜ້າກົມໂຮງຮຽນ, ຕາງໜ້າຄະນະກົມ 213, ຄະນະພັກ-ຄະນະອຳນວຍການ, ຄະນະປັບປຸງລະບຽບແບບແຜນ, ອານຸກຳມະການ ແລະ ວິຊາການ, ພະນັກງານ-ນັກຮົບ ພ້ອມດ້ວຍນັກສຶກສາທົ່ວໂຮງຮຽນ 301 ເຂົ້າຮ່ວມ.
ສະຫາຍ ພັນເອກ ພົງສຸລິຍາ ເພັງຄູນ ຮອງຫົວໜ້າກົມໂຮງຮຽນ ໄດ້ກ່າວເປີດພິທີ ການປັບປຸງລະບຽບແບບແຜນ, ລະບຽບການຮຽນ-ການສອນ, ອີງຕາມແຜນການປັບປຸງລະບຽບແບບແຜນ, ລະບຽບການຕ່າງໆ ແລະ ລະບຽບການຮຽນ-ການສອນ ຂອງກະຊວງປ້ອງກັນປະເທດ, ອີງຕາມການຊີ້ນຳຂອງຄະນະກຳມະການປັບປຸງແບບແຜນ ແລະ ການຈັດຕັ້ງຫັດແອບ ປັບປຸງລະບຽບແບບແຜນຂອງໂຮງຮຽນ 301. ໂດຍມີຈຸດປະສົງເພື່ອປັບປຸງແບບແຜນວິທີເຮັດວຽກ, ການປະສານງານ, ການພົວພັນ ຂອງຄະນະພັກ-ຄະນະບັນຊາ ກັບ ອົງການຈັດຕັ້ງທີ່ກ່ຽວຂ້ອງ ແລະ ຈັດຕັ້ງປະຕິບັດບັນດາລະບຽບການຂອງບັນດານັກຮຽນ, ຄູ-ອາຈານ ໃຫ້ມີຄວາມເປັນເອກະພາບ ແລະ ຖືກຕ້ອງຕາມຂໍ້ກຳນົດກົດລະບຽບ, ຖືກຕາມຈຸດປະສົງ, ເປົ້າໝາຍຂອງ ກົມໃຫຍ່ເສນາທິການ ແລະ ກະຊວງປ້ອງກັນປະເທດວາງອອກ.
ໂອກາດນີ້ ສະຫາຍ ພົນຕີ ພັນແສງ ບຸນພັນ ໄດ້ເນັ້ນໜັກໃຫ້ຄະນະພັກ-ຄະນະອຳນວຍການ ເອົາໃຈໃສ່ຊີ້ນຳ-ນຳພາການຄົ້ນຄວ້າປັບປຸງໂຄງການຫຼັກສູດການຮຽນ-ການສອນ ແລະ ບັນດາພະນັກງານ-ນັກຮົບ, ຄູ-ອາຈານ, ນັກສຶກສາພ້ອມກັນເອົາໃຈໃສ່ໃນວຽກງານອົບຮົມ-ຫັດແອບ ເປັນປົກກະຕິ ໃນທຸກໜ້າວຽກກໍ່ຄືການຫັດແອບ ລະບຽບວິໃນ, ແບບແຜນຕ່າງໆ ຄູ-ອາຈານ ຕ້ອງກຳໄດ້ຈັງຫວະບາດກ້າວໃນການປະຕິບັດລະບຽບວິໃນຂອງກອງທັບ ເພື່ອເປັນແບບຢ່າງໃຫ້ແກ່ນັກສຶກສາ ແນໃສ່ປັບປຸງກໍ່ສ້າງກອງທັບ ເປັນກອງທັບປະຕິວັດ ມີລະບຽບວິໃນ ເຂັ້ມງວດ ກ້າວຂຶ້ນເປັນກອງທັບມີແບບແຜນທັນສະໄໝ ໂດຍສະເພາະແມ່ນແຜນການປັບປຸງກໍ່ສ້າງ ໂຮງຮຽນ 301 ໃຫ້ເປັນກົມກອງປອດໃສເຂັ້ນແຂງ, ໜັກແໜ້ນ ເປັນບ່ອນກໍ່ສ້າງກຳລັງສືບຂ່າວ ໃຫ້ແກ່ກອງທັບນັບມື້ມີຄຸນນະພາບ. ໂດຍ: ສຸລິນທອນ ໄຊຍະນາສີ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
