ວັນຈັນ, ວັນທີ 02 ທັນວາ 2024
ພະແນກຊາວໜຸ່ມ ວຕກ ສະຫຼຸບວຽກງານຮອບດ້ານ ປະຈຳປີ 2024
ເວລາອອກຂ່າວ: 2024-11-28 14:34:19 | ຜູ້ຂຽນ : admin2 | ຈຳນວນຄົນເຂົ້າຊົມ: 791 | ຄວາມນິຍົມ: 
ວັນທີ 27 ພະຈິກ 2024 ນີ້, ພະແນກຊາວໜຸ່ມ ວິທະຍາຄານເຕັກນິກ ການທະຫານ ໄດ້ສະຫຼຸບວຽກງານຮອບດ້ານ ປະຈຳປີ 2024 ແລະ ວາງທິດທາງແຜນການ ປີ 2025. ໂດຍການເປັນປະທານຂອງ ສະຫາຍ ພົນຈັດຕະວາ ແສງຍືນ ລັດສະໝີ ຫົວໜ້າການເມືອງ ວິທະຍາຄານເຕັກນິກການທະຫານ, ມີຄະນະພັກ-ຄະນະອຳນວຍການ, ບັນດາສະຫາຍຄະນະບັນຊາແຕ່ລະຫົວໜ່ວຍກົມກອງ, ຕາງໜ້າພະແນກສະຫະພັນແມ່ຍິງຕະຫຼອດຮອດສະມາຊິກຊາວໜຸ່ມທົ່ວ ວຕກ ເຂົ້າຮ່ວມ.
ສະຫາຍ ພັນໂທ ຄໍາມະນີໄຊ ໂອໄລຈິດ ຫົວໜ້າພະແນກຊາວໜຸ່ມ ວິທະຍາຄານເຕັກນິກການທະຫານ ໄດ້ຜ່ານບົດສະຫຼຸບໃນໄລຍະ 1 ປີຜ່ານມາ. ຍົກໃຫ້ເຫັນຜົນງານພົ້ນເດັ່ນຫຼາຍດ້ານ ໂດຍຖືເອົາວຽກງານສຶກສາອົບຮົມການເມືອງ-ນຳພາແນວຄິດເປັນກົກ, ຍຶດໝັ້ນແນວທາງປ່ຽນແປງໃໝ່ຂອງພັກ ໃນນັ້ນໄດ້ສົມທົບກັບຄະນະຊາວໜຸ່ມຂັ້ນຕ່າງ ດຳເນີນຊີວິດການເມືອງພາຍໃນຂັ້ນຂອງຕົນເປັນສຳຄັນ, ປຸກລະດົມຊາວໜຸ່ມພາຍໃນກົມກອງເຂົ້າຮ່ວມເຊື່ອມຊຶມເອກະສານ, ມະຕິຄຳສັ່ງຕ່າງໆ ທີ່ຂັ້ນເທິງວາງອອກ ເພື່ອແນໃສ່ເຮັດໃຫ້ຖັນແຖວສະມາຊິກຊາວໜຸ່ມ ທົ່ວ ວຕກ ມີຄຸນທາດການເມືອງຫນັກແໜ້ນ, ມີນໍ້າໃຈຮັກຊາດ ຮັກລະບອບໃຫມ່, ເຝິກຝົນຫຼໍ່ຫຼອມຕົນເອງທາງດ້ານຄຸນສົມບັດ, ສິນທຳປະຕິວັດ ເຊື່ອມຊຶມ ກຳແໜ້ນຕໍ່ແນວທາງແຜນນະໂຍບາຍ, ມະຕິຄຳສັ່ງ, ກົດລະບຽບຂອງພັກ-ລັດ, ກົມກອງວາງອອກ. ສຳລັບວຽກງານປັບປຸງ ການຈັດຕັ້ງຊາວໜຸ່ມແມ່ນໄດ້ເອົາໃຈໃສ່ປັບປຸງທຸກຫົວໜ່ວຍທີ່ຢູ່ໃນຄວາມຮັບຜິດຊອບຂອງຕົນ ໃຫ້ແທດເໝາະກັບສະພາບແວດລ້ອມຂອງກົມກອງ ແລະ ໜ້າທີ່ການເມືອງໃນໄລຍະໃໝ່. ວຽກງານປ້ອງກັນຊາດ-ປ້ອງກັນຄວາມສະຫງົບແມ່ນເຕົ້າໂຮມກຳລັງຊາວໜຸ່ມ-ໄວໜຸ່ມຢູ່ກົມກອງຮາກຖານເປັນກຳລັງປະຈັນບານ ກຽມພ້ອມສູ້ຮົບ, ສຸມໃສ່ອົບຮົມຫັດແອບວິຊາສະເພາະເຕັກນິກ, ເຝິກຝົນຮ່ຳຮຽນສິລະປະຍຸດ-ຍຸດທະວິທີ, ປະຕິບັດຍິງລູກປືນແທ້, ປ້ອງກັນເວນຍາມກອງປະຊຸມສຸດຍອດອາຊຽນ ຄັ້ງທີ 44-45 ທີ່ ສປປ ລາວ ເຮົາເປັນເຈົ້າພາບ ເຮັດໃຫ້ສະພາບພາຍໃນກົມກອງມີຄວາມສະຫງົບປອດໄພ 100%. ພ້ອມທັງປຸກລະດົມຊາວຫນຸ່ມເຂົ້າຮ່ວມຂະບວນການແຂ່ງຂັນກິລາພາຍໃນກົມກອງກໍຄືກົມກອງແຮກສ່ຽວ 4 ວິທະຍາຄານ 3 ຄັ້ງ, ເຂົ້າຮ່ວມກິດຈະກຳຖາມຕອບຄວາມຮູ້ຮອບຕົວຢູ່ຫ້ອງການຊາວໜຸ່ມກະຊວງປ້ອງກັນປະເທດຈັດຂຶ້ນ 1 ຄັ້ງ. ເຂົ້າຮ່ວມການແຂ່ງຂັນສິລະປະ-ວັນນະຄະດີສະໝັກຫຼີ້ນຮ່ວມກັບ 4 ວິທະຍາຄານ ແລະ ສະແດງຮັບໃຊ້ວັນສໍາຄັນຕ່າງໆພາຍໃນກົມກອງຈໍານວນ 4 ຄັ້ງ. ຈາກຜົນງານດັ່ງກ່າວ ຂັ້ນພະແນກໄດ້ສະເຫນີເປັນພະແນກນຳໜ້າ 4 ບຸກ, ຂັ້ນຄະນະບໍລິຫານງານນຳໜ້າ 4 ບຸກ 3 ໜ່ວຍ, ໜ່ວຍຊາວໜຸ່ມ 4 ບຸກ 15 ໜ່ວຍ, ໜ່ວຍຊາວໜຸ່ມແຂງ ມີ 2 ໜ່ວຍ ແລະ ຊາວໜຸ່ມນໍາໜ້າ 4 ບຸກ ມີ 180 ສະຫາຍ, ຊາວໜຸ່ມແຂງ 235 ສະຫາຍ, ຊາວໜຸ່ມກາງ 86 ສະຫາຍ.
ສະຫາຍ ພົນຈັດຕະວາ ແສງຍືນ ລັດສະໝີ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໄຊຊະນະ ທີ່ທາງພະແນກຊາວໜຸ່ມ ວຕກ ຍາດມາໄດ້ໃນ 1 ປີຜ່ານມາ ພ້ອມທັງຮຽກຮ້ອງໃຫ້ບັນດາຫົວໜ່ວຍກົມກອງຕະຫຼອດຮອດສະມາຊິກຊາວໜຸ່ມທົ່ວວິທະຍາຄານເຕັກນິກ ຖືເອົາວຽກງານສຶກສາອົບຮົມການເມືອງ-ນໍາພາແນວຄິດເປັນກົກສອດຫ້ອຍເຂົ້າໃນທຸກຂົງເຂດວຽກງານຂອງຊາວໜຸ່ມ, ເຊື່ອໝັ້ນຕໍ່ການນໍາພາຂອງພັກ, ມີສະຕິລະວັງຕົວສູງຕໍ່ກົນອຸບາຍຫັນປ່ຽນໂດຍສັນຕິຂອງສັດຕູ ເລືອກເຟັ້ນໃນການເສບຂ່າວສື່ສັງຄົມອອນລາຍ, ຈຳແນກມິດສັດຕູຢ່າງຈະແຈ້ງ, ຈັດຕັ້ງເຄື່ອນໄຫວຂະບວນການໃຫ້ຟົດຟື້ນແຂງແຮງ ໂດຍສະເພາະແມ່ນຂໍ້ແຂ່ງຂັນ 4 ບຸກ ແລະ ພ້ອມກັນເຮັດລໍາເລັດໜ້າທີ່ທີ່ຂັ້ນເທິງມອບໝາຍໃຫ້.
ໂດຍ ເພັດນາລີ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
