ວັນຈັນ, ວັນທີ 02 ທັນວາ 2024
ຕ້ອນຮັບຄະນະຊ່ຽວຊານແພດໝໍເຫຼົ່າຮົບເສນາຮັກກອງທັບປົດປ່ອຍປະຊາຊົນຈີນ ຂະບວນລົດໄຟສັນຕິພາບ 2024
ເວລາອອກຂ່າວ: 2024-11-14 15:52:38 | ຜູ້ຂຽນ : admin2 | ຈຳນວນຄົນເຂົ້າຊົມ: 913 | ຄວາມນິຍົມ: 
ວັນທີ 14 ພະຈິກ 2024 ນີ້, ຄະນະຊ່ຽວຊານແພດໝໍເຫຼົ່າຮົບເສນາຮັກກອງທັບປົດປ່ອຍປະຊາຊົນຈີນ ໄດ້ເດີນທາງຮອດສະຖານີລົດໄຟນະຄອນຫຼວງວຽງຈັນ ຢ່າງເປັນທາງການ ເພື່ອເຂົ້າຮ່ວມການເຝິກຊ້ອມຮ່ວມກອງທັບ ລາວ-ຈີນ, ພາຍໃຕ້ລະຫັດ: ຂະບວນລົດໄຟສັນຕິພາບ 2024 ເພື່ອຊ່ວຍເຫຼືອມະນຸດສະທຳ ແລະ ການບໍລິການດ້ານການແພດຂອງສອງກອງທັບ ລາວ-ຈີນ, ເຊິ່ງໄດ້ໃຫ້ກຽດຕ້ອນຮັບ ໂດຍ ສະຫາຍ ພົນຈັດຕະວາ ບົວສິງ ອິນທະວົງ ຮອງຫົວໜ້າກົມໃຫຍ່ພະລາທິການກອງທັບ, ມີ ສະຫາຍ ພັນເອກ ພິເສດ ເຈົ້າສົງ ຮອງຫົວໜ້າກົມເສນາຮັກ ກົມຮັບປະກັນພະລາທິການສູນກາງ ກອງທັບປົດປ່ອຍປະຊາຊົນຈີນ, ພ້ອມດ້ວຍຄະນະ ແລະ ບັນດາກົມວິຊາສະເພາະ, ຫ້ອງການ, ພະນັກງານ, ວິຊາການ, ຕະຫຼອດຮອດນ້ອງນ້ອຍເຍົາວະຊົນເຂົ້າຮ່ວມ.
ໂອກາດນີ້, ສະຫາຍ ພົນຈັດຕະວາ ບົວສິງ ອິນທະວົງ ກໍໄດ້ສະແດງຄວາມຍ້ອງຍໍຊົມເຊີຍ ແລະ ກ່າວຄວາມຍິນດີຕ້ອນຮັບອັນອົບອຸ່ນ, ເຊິ່ງເຕັມໄປດ້ວຍໄມຕີຈິດມິດຕະພາບທີ່ດີ, ເຊິ່ງສະແດງເຖິງມູນເຊື້ອຄວາມສາມັກຄີຮັກແພງ ລະຫວ່າງ ສອງຊາດ, ສອງພັກ ແລະ ສອງກອງທັບ, ເວົ້າລວມ, ເວົ້າສະເພາະ ກໍຄື ສອງເຫຼົ່າຮົບເສນາຮັກກອງທັບປະຊາຊົນລາວກັບ ກອງທັບປົດປ່ອຍປະຊາຊົນຈີນ ໃຫ້ນັບມື້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ.
ຈຸດປະສົງການເຝິກຊ້ອມຮ່ວມໃນຄັ້ງນີ້ ກໍ່ເພື່ອຈັດຕັ້ງປະຕິບັດແຜນການລວມໃນການຮ່ວມມືດ້ານການທະຫານ ລະຫວ່າງ ສອງ ກອງທັບລາວ-ຈີນ ໃຫ້ເປັນຮູບປະທຳ, ລົງເລິກຂະຫຍາຍການຮ່ວມມືທາງດ້ານສາທາລະນະສຸກ ລະຫວ່າງ ສອງກອງທັບລາວ-ຈີນ ໃຫ້ປະກົດຜົນເປັນຈິງ, ຍົກລະດັບຄວາມສາມາດ ໃນການຮ່ວມກັນບັນຊາວຽກງານເສນາຮັກ,ພະລາທິການ ແລະ ຮ່ວມກອບກູ້ຊ່ວຍເຫຼືອ ລະຫວ່າງສອງກອງທັບໃຫ້ສູງຂຶ້ນ ແລະ ເພື່ອສ້າງເປັນແບບແຜນສະເພາະໃຫ້ແກ່ການແລກປ່ຽນຮ່ວມມືດ້ານການແພດການທະຫານ ລະຫວ່າງສອງຝ່າຍ, ທັງເປັນການສືບຕໍ່ເສີມຂະຫຍາຍ ໄມຕິຈິດມິດຕະພາບອັນເປັນມູນເຊື້ອຂອງສອງປະເທດ ໃຫ້ແໜ້ນແຟ້ນຍິ່ງໆຂຶ້ນໄປ, ຊຸກຍູ້ການພົວພັນມິດຕະພາບຂອງສອງປະເທດ, ສອງກອງທັບ ໃຫ້ປະກົດຜົນເປັນຈິງ.
ການເຝິກຊ້ອມວຽກງານດັ່ງກ່າວແມ່ນຈະໄດ້ຈັດຂື້ນຢູ່ ສະຖານີລົດໄຟ ເມືອງໂພນໂຮງ ແຂວງວຽງຈັນ ແລະ ບໍລິເວນອ້ອມຂ້າງ, ສ່ວນການບໍລິການດ້ານການແພດແມ່ນຈັດຕັ້ງຢູ່ທີ່ນະຄອນຫຼວງວຽງຈັນ, ເຊິ່ງສະຖານທີ່ຢູ່ໂຮງໝໍສູນກາງ 103 ກອງທັບ, ແຂວງຫຼວງພະບາງ ຢູ່ ໂຮງໝໍບໍລິເວນ 107 ກອງທັບ ແລະ ແຂວງຫຼວງນໍ້າທາ ຢູ່ ໂຮງໝໍທະຫານແຂວງຫຼວງນໍ້າທາ, ເລີ່ມແຕ່ວັນທີ 16-21 ພະຈິກ 2024 ນີ້.
ໂດຍ: ຄໍາປະສົງ ລາດຊະວົງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
