ວັນຈັນ, ວັນທີ 02 ທັນວາ 2024
ກອງປະຊຸມຜູ້ແທນແມ່ຍິງ ທົ່ວຫ້ອງວ່າການກະຊວງປ້ອງກັນປະເທດ ຄັ້ງທີ IX
ເວລາອອກຂ່າວ: 2024-11-14 15:43:42 | ຜູ້ຂຽນ : admin2 | ຈຳນວນຄົນເຂົ້າຊົມ: 955 | ຄວາມນິຍົມ: 
ໃນວັນທີ 14 ພະຈິກ 2024 ນີ້, ພະແນກສະຫະພັນແມ່ຍິງ ຫ້ອງວ່າການກະຊວງປ້ອງກັນປະເທດ ໄດ້ດໍາເນີນກອງປະຊຸມຜູ້ແທນແມ່ຍິງ ຄັ້ງທີ XI, ໂດຍການເປັນປະທານຂອງ ສະຫາຍ ພົນຈັດຕະວາ ທະນູກອນ ສຸລິຍະແສງ ຮອງຫົວໜ້າຫ້ອງວ່າການ ກະຊວງປ້ອງກັນປະເທດ, ມີສະຫາຍ ພັນໂທ ນາງ ປາ ວົງສະແຫວງ ຮອງຫົວໜ້າຫ້ອງການສະຫະພັນແມ່ຍິງກອງທັບ, ມີບັນດາແມ່ປ້ານ້າອາ-ພະນັກງານອາວຸໂສບຳນານ, ຄອບຄົວການນຳ, ຄະນະພັກ-ຄະນະບັນຊາກົມ, ຫ້ອງການ, ກອງ, ບໍລິສັດ-ລັດວິສາຫະກິດ, ຄະນະນໍາສະຫະພັນແມ່ຍິງ ພ້ອມດ້ວຍສະມາຊິກແມ່ຍິງ ແລະ ແຂກຖືກເຊີນ ເຂົ້າຮ່ວມ.
ສະຫາຍ ພັນໂທ ນາງ ບົວລີ ສິດທິວົງ ຫົວໜ້າພະແນກສະຫະພັນແມ່ຍິງ ຫ້ອງວ່າການກະຊວງປ້ອງກັນປະເທດ ໄດ້ສະຫຼຸບຕີລາຄາຄືນການຈັດຕັ້ງປະຕິບັດມະຕິກອງປະຊຸມຜູ້ແທນແມ່ຍິງທົ່ວ ຫ້ອງວ່າການກະຊວງປ້ອງກັນປະທດ ຄັ້ງທີ VIII ໃນໄລຍະ 5 ປີຜ່ານມາ (2020-2024) ແລະ ຜ່ານທິດທາງແຜນການໃນຊຸມປີຕໍ່ໜ້າ, ເຊິ່ງໄດ້ຍົກໃຫ້ເຫັນຜົນງານດ້ານດີ, ຂໍ້ຄົງຄ້າງ, ບົດຮຽນທີ່ຖອດຖອນໄດ້, ຕະຫຼອດໄລຍະ 5 ປີຜ່ານມາ, ຄະນະນໍາສະຫະພັນແມ່ຍິງແຕ່ລະຂັ້ນ ຕະຫຼອດຮອດສະມາຊິກແມ່ຍິງແຕ່ລະສະຫາຍ ໄດ້ຕັ້ງໜ້າຜັນຂະຫຍາຍມະຕິກອງປະຊຸມຜູ້ແທນແມ່ຍິງ ຕິດພັນກັບ ແຜນພັດທະນາແມ່ຍິງຫ້ອງວ່າການກະຊວງປ້ອງກັນປະເທດ 10 ແຜນງານ 33 ໂຄງການ, ໂດຍໄດ້ຫັນເປັນແຜນງານອັນລະອຽດ ສອດຄ່ອງກັບເງື່ອນໄຂ ແລະ ສະພາບຄວາມເປັນຈິງຂອງແຕ່ລະກົມກອງ, ສາມາດຍາດໄດ້ຜົນສໍາເລັດໃນຫຼາຍດ້ານ ໂດຍສະເພາະ ຄະນະນໍາສະຫະພັນແມ່ຍິງແຕ່ລະຂັ້ນ ໄດ້ຖືສຳຄັນວຽກງານສຶກສາອົບຮົມການເມືອງ-ນໍາພາແນວຄິດ ໃຫ້ສະມາຊິກແມ່ຍິງດ້ວຍຫຼາຍຮູບການທີ່ສອດຄ່ອງ, ໄດ້ຈັດຕັ້ງເຜີຍແຜ່ເຊື່ອມຊຶມຂໍ້ກຳນົດ, ກົດລະບຽບຂອງສະຫະພັນແມ່ຍິງ, ເຂົ້າຮ່ວມຮັບຟັງການເຜີຍແຜ່ເຊື່ອມຊຶມມະຕິ, ຄໍາສັ່ງ ແລະ ເອກະສານສໍາຄັນຕ່າງໆ, ຮັບຟັງປາຖະກະຖາວັນສໍາຄັນຂອງຊາດ, ຂອງພັກ, ຂອງກອງທັບ, ຂອງແມ່ຍິງ ແລະ ເຂົ້າຮ່ວມຂະບວນການຕ່າງໆ ເຊັ່ນ: ຂະບວນການຍ່າງເພື່ອສຸຂະພາບ, ເຕັ້ນແອໂຣບິກ, ຂະບວນການສິລະປະ-ວັນນະຄະດີ, ຂະບວນການກິລາ, ກິດຈະກໍາຖາມ-ຕອບຄວາມຮູ້ຮອບຕົວ, ຂະບວນການອອກແຮງງານ ຮ່ວມກັບ 3 ອົງການຈັດຕັ້ງມະຫາຊົນ, ເຂົ້າຢ້ຽມຊົມຫໍມູນເຊື້ອກໍາລັງປ້ອງກັນຄວາມສະຫງົບ, ຫໍມູນເຊື້ອແມ່ຍິງລາວ ແລະ ອື່ນໆ. ຄະນະນໍາສະຫະພັນແມ່ຍິງແຕ່ລະຂັ້ນ ຍັງໄດ້ເປັນເຈົ້າການນໍາພາຈັດຕັ້ງປະຕິບັດ ຂໍ້ແຂ່ງຂັນ 3 ດີ ທີ່ສູນກາງສະຫະພັນແມ່ຍິງລາວວາງອອກ ຢ່າງເປັນຂະບວນຟົດຟື້ນ, ສາມາດຄັດເລືອກໄດ້ແມ່ຍິງ 3 ດີປະເພດ I ຈໍານວນ 591 ສະຫາຍ, ປະເພດ II ຈໍານວນ 72 ສະຫາຍ, ໜ່ວຍ 3 ດີປະເພດ I ຈໍານວນ 35 ໜ່ວຍ ໃນນີ້, ມີ 4 ໜ່ວຍຮາກຖານ, ໜ່ວຍ 3 ດີປະເພດ II ຈໍານວນ 9 ໜ່ວຍ, ແມ່ຍິງຕົວແບບ 193 ສະຫາຍ, ຄອບຄົວຕົວແບບ 98 ຄອບຄົວ, ກົມກອງຊີ້ນໍາ-ນໍາພາວຽກງານແມ່ຍິງດີເດັ່ນ ປະເພດ I ມີ 11 ກົມກອງ, ປະເພດ II ມີ 5 ກົມກອງ ແລະ ພະແນກໄດ້ຮັບການຢັ້ງຢືນເປັນພະແນກແມ່ຍິງ 3 ດີປະເພດ I. ນອກຈາກນີ້, ພະແນກສະຫະພັນແມ່ຍິງ ຍັງມີກອງທຶນເງິນຝາກ, ມີສະມາຊິກກອງທຶນທັງໝົດ 274 ສະຫາຍ, ມີເງິນຝາກ 1.813.336.000 ກີບ. ຈາກນັ້ນ, ຜູ້ແທນກອງປະຊຸມ ໄດ້ພ້ອມກັນປະກອບຄໍາຄິດເຫັນ ຢ່າງກົງໄປກົງມາ ໃສ່ເນື້ອໃນບົດລາຍງານການເມືອງ ແລະ ທິດທາງແຜນການໃນຕໍ່ໜ້າ.
ໃນກອງປະຊຸມ ຍັງໄດ້ມອບຂອງຂວັນໃຫ້ຄອບຄົວການນໍາ, ອະດີດຄະນະນໍາສະຫະພັນແມ່ຍິງ, ມອບຂອງຂວັນໃຫ້ຄອບຄົວ ແລະ ບຸກຄົນຕົວແບບ ພ້ອມທັງໄດ້ຮັບຟັງຄຳເຫັນໂອ້ລົມ ຈາກສະຫາຍ ປະທານກອງປະຊຸມ ຕື່ມອີກ.
ໂດຍ: ນາງ ໜູແດງ ພົມມະສອນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
