ວັນຈັນ, ວັນທີ 02 ທັນວາ 2024
ກຳມາທິການກົດໝາຍ ດຳເນີນກອງປະຊຸມຄົບຄະນະ ປະຈຳປີ 2024
ເວລາອອກຂ່າວ: 2024-11-07 08:54:47 | ຜູ້ຂຽນ : admin3 | ຈຳນວນຄົນເຂົ້າຊົມ: 160 | ຄວາມນິຍົມ: 
ກອງປະຊຸມຄົບຄະນະຂອງກຳມາທິການກົດໝາຍ (ກກໝ) ປະຈຳປີ 2024 ຈັດຂຶ້ນໃນວັນທີ 4 ພະຈິກ 2024 ໂດຍການເປັນປະທານຂອງ ທ່ານ ຄຳແພງ ວິລະພັນ ປະທານກຳມາທິການກົດໝາຍ, ມີບັນດາຮອງປະທານກຳມາທິການພາຍໃນ ສພຊ, ຮອງລັດຖະມົນຕີກະຊວງຍຸຕິທຳ, ຮອງລັດຖະມົນຕີກະຊວງພາຍໃນ, ຮອງຫົວໜ້າຫ້ອງວ່າການສຳນັກງານປະທານປະເທດ, ຮອງຫົວໜ້າຫ້ອງວ່າການສຳ
ນັກງານນາຍົກລັດຖະມົນຕີ, ບັນດາສະມາຊິກສະພາແຫ່ງຊາດທີ່ສັງກັດ ກກໝ ແລະ ພາກ ສ່ວນກ່ຽວຂ້ອງ ເຂົ້າຮ່ວມ.
ກອງປະຊຸມໄດ້ຮັບຟັງການລາຍງານ ແລະ ປະກອບຄຳເຫັນໃສ່ຮ່າງບົດສະຫຼຸບການເຄື່ອນໄຫວວຽກງານປີ 2024 ແລະ ທິດທາງແຜນການເຄື່ອນໄຫວວຽກງານປີ 2025 ຂອງກຳມາທິການກົດໝາຍ; ຮ່າງແຜນການສ້າງ ແລະ ປັບປຸງກົດໝາຍ ປະຈຳປີ 2025 ຂອງຄະນະປະຈຳສະພາແຫ່ງຊາດ; ການລາຍງານຂອງກະຊວງຍຸຕິທຳ ແລະ ກະຊວງພາຍໃນ ກ່ຽວກັບວຽກງານສ້າງ ແລະ ປັບປຸງກົດໝາຍ, ວຽກງານໂຄສະນາເຜີຍແຜ່ກົດໝາຍ ແລະ ວຽກງານການຜັນຂະຫຍາຍມາດຕາຂອງກົດໝາຍ ອອກເປັນນິຕິກຳໃຕ້ກົດໝາຍ ປະຈຳປີ 2024 ແລະ ຜ່ານຮ່າງມະຕິກອງປະຊຸມຄົບຄະນະຂອງ ກກໝ ປະ ຈຳປີ 2024.
ທ່ານ ຄຳແພງ ວິລະພັນ ໄດ້ມີຄຳເຫັນໂດຍເນັ້ນໃຫ້ສຸມໃສ່ກະກຽມຮຽບຮຽງບັນດາກົດໝາຍທີ່ຈະຮັບຮອງໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃຫ້ສຳເລັດໂດຍໄວ ເພື່ອໃຫ້ທັນໄດ້ປະກາດໃຊ້ຕາມກົດໝາຍ ແລະ ລະບຽບການກຳນົດ; ຮີບຮ້ອນປະສານສົມທົບກັບບັນ ດາກະຊວງ-ອົງການທີ່ເປັນເຈົ້າຂອງກົດໝາຍ ແລະ ບັນດາກຳມາທິການທີ່ກ່ຽວຂ້ອງ ເພື່ອກະກຽມແຜນ ການສ້າງ ແລະ ປັບປຸງກົດໝາຍ 5 ປີ (2026-2030) ແລະ ແຜນການສ້າງ ແລະ ປັບປຸງກົດໝາຍ ປີ 2025 ໃຫ້ສຳເລັດໂດຍໄວ ເພື່ອລາຍງານຕໍ່ຄະນະປະຈຳສະພາແຫ່ງຊາດ ພິຈາລະນາຕົກລົງ ແລະ ໃຫ້ທັນໄດ້ປະກາດໃຊ້ໃນຕົ້ນປີ 2025; ເອົາໃຈໃສ່ປະສານສົມທົບກັບບັນດາກະຊວງ-ອົງການທີ່ເປັນເຈົ້າຂອງກົດໝາຍ ເພື່ອສ້າງເງື່ອນໄຂຕ່າງໆໃນການນຳເອົາບັນດາກົດໝາຍທີ່ໄດ້ປະກາດໃຊ້ແລ້ວ ລົງໂຄສະນາເຜີຍແຜ່ຢູ່ສູນກາງ ແລະ ທ້ອງຖິ່ນ ເພື່ອໃຫ້ປະຊາຊົນລາວບັນດາເຜົ່າ ໄດ້ຮັບຮູ້, ເຂົ້າໃຈຢ່າງກວ້າງຂວາງ ດ້ວຍຫຼາຍວິທີ, ຫຼາຍຮູບການ.
ໂດຍ: ອາລິນ ສຸພິມມະປະດິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
