ວັນສຸກ, ວັນທີ 04 ຕຸລາ 2024
ກອງປະຊຸມປຶກສາຫາລື ກ່ຽວກັບການແກ້ໄຂໄພພິບັດນໍ້າຖ້ວມ
ເວລາອອກຂ່າວ: 2024-10-02 13:35:37 | ຜູ້ຂຽນ : admin2 | ຈຳນວນຄົນເຂົ້າຊົມ: 133 | ຄວາມນິຍົມ: 
ໃນວັນທີ 1 ຕຸລາ 2024 ນີ້, ຢູ່ທີ່ຫ້ອງປະຊຸມຫ້ອງເສນາທິການທະຫານແຂວງຫຼວງນໍ້າທາ ໄດ້ຈັດກອງປະຊຸມປຶກສາຫາລື ກ່ຽວກັບການແກ້ໄຂໄພພິບັດນໍ້າຖ້ວມ ຢູ່ບັນດາບ້ານທີ່ຂຶ້ນກັບແຂວງຫຼວງນໍ້າທາ, ໂດຍການເປັນປະທານຂອງ ສະຫາຍ ພົນຈັດຕະວາ ອີ່ນແກ້ວ ມະນີຈັນ ກໍາມະການປະຈໍາພັກແຂວງ, ຫົວໜ້າການທະຫານກອງບັນຊາການທະຫານແຂວງຫຼວງນໍ້າທາ, ມີບັນດາຄະນະກໍາມະການຄຸ້ມຄອງໄພພິບັດກອງບັນຊາການ, ແລະ ບັນດາກົມກອງທີ່ກ່ຽວຂ້ອງ ເຂົ້າຮ່ວມ.
ສະຫາຍ ພົນຈັດຕະວາ ອີ່ນແກ້ວ ມະນີຈັນ ໄດ້ລາຍງານສະພາບລວມຂອງໄພພິບັດ ແລະ ການຕອບໂຕ້ ສຸກເສີນ ປີ 2024, ເຊິ່ງນັບແຕ່ວັນທີ 8-9 ກັນຍາ 2024 ມາຮອດປັດຈຸບັນ, ແຂວງຫຼວງນໍ້າທາ ໄດ້ຮັບຜົນກະທົບຈາກພາຍຸໃຕ້ຝຸ່ນດີເປຣຊັນ ຢາກິ, ໂດຍອີງຕາມຂໍ້ມູນທີ່ຄະນະກຳມະການຄຸ້ມຄອງໄພພິບັດຂັ້ນແຂວງລາຍງານຜົນກະທົບວ່າ: ມາຮອດວັນທີ 30 ກັນຍາ 2024 ນີ້, ສໍາລັບແຂວງທີ່ໄດ້ຮັບຜົນກະທົບຫຼາຍກວ່າໝູ່ເເມ່ນເມືອງຫຼວງນໍ້າທາ. ພ້ອມດຽວກັນນີ້, ໃນກອງປະຊຸມຍັງໄດ້ລາຍງານກ່ຽວກັບການຊ່ວຍເຫຼືອສຸກເສີນ, ແຜນການຟື້ນຟູໃນໄລຍະຮີບດ່ວນ ຂັ້ນເເຂວງ, ຂັ້ນເມືອງ ການຊ່ວຍເຫຼືອຈາກພາຍໃນ ເເລະ ຕ່າງປະເທດ, ພ້ອມທັງໄດ້ ປຶກສາຫາລື ແລະ ເອກະພາບຕໍ່ແຜນຈຸດສຸມໃນການນໍາໃຊ້ກອງທຶນຄຸ້ມຄອງໄພພິບັດ, ແກ້ໄຂໄພພິບັດ, ເເຜນການຟື້ນຟູຮີບດ່ວນ ເເລະ ເເຜນການຈຸດສຸມໃນຕໍ່ໜ້າ ຕື່ມອີກ.
ໂອກາດນີ້, ສະຫາຍ ພົນຈັດຕະວາ ອີ່ນແກ້ວ ມະນີຈັນ ຍັງໄດ້ໃຫ້ທິດຊີ້ນໍາ, ພ້ອມທັງເນັ້ນໜັກຫຼາຍບັນຫາຕໍ່ຄະນະກໍາມະການຄຸ້ມຄອງໄພພິບັດ ເເລະ ພາກສ່ວນທີ່ກ່ຽວຂ້ອງຕ່າງໆ ເອົາໃຈໃສ່ຕໍ່ຄວາມຮັບຜິດຊອບຂອງຕົນເປັນໜ້າທີ່ສຳຄັນມີເເບບເເຜນ, ມີການປະສານສົມທົບກັນຢ່າງລະອຽດໃນເເຕ່ລະຂັ້ນ ເພື່ອເເກ້ໄຂໃຫ້ທ່ວງທັນເວລາ, ສືບຕໍ່ໂຄສະນາຕິດຕາມການປ່ຽນແປງຂອງສະພາບອາກາດ ເພື່ອແຈ້ງເຕືອນປະຊາຊົນໃຫ້ມີສະຕິລະວັງຕົວປ້ອງກັນລ່ວງໜ້າຢ່າງເປັນເຈົ້າການ, ຄະນະກຳມະການຄຸ້ມຄອງໄພພິບັດແຕ່ລະຂັ້ນ ນັບເເຕ່ຂັ້ນກອງບັນຊາການ ຮອດຂັ້ນກົມກອງທ້ອງຖິ່ນ ຕ້ອງກຽມຄວາມພ້ອມຮອບດ້ານເພື່ອຮັບມື ເເລະ ແກ້ໄຂຟື້ນຟູ, ສ້ອມເເປງຢ່າງຮີບດ່ວນ ໃນການຊ່ວຍເຫຼືອດ້ານຕ່າງໆຕໍ່ກັບບັນດາເມືອງ, ບ້ານ ທີ່ໄດ້ຖືກຜົນກະທົບໃຫ້ກັບມາສູ່ສະພາບປົກກະຕິໃຫ້ໄດ້ໄວທີ່ສຸດ.
ໂດຍ: ບຸນມີ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
