ວັນສຸກ, ວັນທີ 04 ຕຸລາ 2024
ທະຫານແຂວງບໍ່ແກ້ວ ຈັດຕັ້ງມອບໃບຢັ້ງຢືນກົມກອງ 3 ປອດ ປະຈໍາປີ 2024
ເວລາອອກຂ່າວ: 2024-10-01 12:51:16 | ຜູ້ຂຽນ : admin2 | ຈຳນວນຄົນເຂົ້າຊົມ: 173 | ຄວາມນິຍົມ: 
ໃນວັນທີ 27 ກັນຍາ 2024 ນີ້, ກອງບັນຊາການທະຫານແຂວງບໍ່ແກ້ວ ໄດ້ຈັດຕັ້ງມອບໃບຢັ້ງຢືນກົມກອງ 3 ປອດ ປະຈໍາປີ 2024 ຂຶ້ນ. ໂດຍການເປັນປະທານຂອງ ສະຫາຍ ພົນຈັດຕະວາ ບຸນມີ ພາມີໄຊ ຫົວໜ້າການເມືອງ ກອງບັນຊາການທະຫານແຂວງບໍ່ແກ້ວ, ມີຄະນະພັກ-ຄະນະບັນຊາ 6 ຫ້ອງ, 5 ກອງບັນຊາການທະຫານເມືອງ, 2 ກອງພັນ, ໂຮງຮຽນ, ໂຮງໝໍ, ກອງຮ້ອຍເອກກະລາດ ຕະຫຼອດຮອດພະນັກງານຫຼັກແຫຼ່ງເຂົ້າຮ່ວມ.
ສະຫາຍ ພັນຕີ ພູວັນ ອິນໄພຍະລາດ ຮອງຫົວໜ້າພະແນກປ້ອງກັນພາຍໃນ ກອງບັນຊາການທະຫານແຂວງບໍ່ແກ້ວ ໄດ້ຜ່ານບົດສະຫຼຸບໂດຍຫຍໍ້ການສ້າງກົມກອງ 3 ປອດ ( ປອດໃສ, ປອດໄພ, ປອດຄະດີ) ປະຈຳປີ 2023-2024. ໃນໄລຍະ 1 ປີຜ່ານມາ, ຄະນະພັກ-ຄະນະບັນຊາ ໄດ້ເອົາໃຈໃສ່ນຳພາ-ຊີ້ນໍາຂະບວນການກໍ່ສ້າງກົມກອງ 3 ປອດ ຕິດພັນກັບໜ້າທີ່ການເມືອງຂອງກົມກອງ, ຊີ້ນຳຄະນະພັກ-ຄະນະບັນຊາ ແລະ ຜູ້ຮັບຜິດຊອບວຽກງານປ້ອງກັນພາຍໃນແຕ່ລະຂັ້ນ ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານ-ນັກຮົບ ຍົກສູງສະຕິລະວັງຕົວ ທັງປັບປຸງເນື້ອໃນຮູບແບບ ແລະ ວິທີການສຶກສາອົບຮົມດ້ວຍຫຼາຍຮູບການ, ໄດ້ຊຸກຍູ້ຢ່າງແຂງແຮງຂະບວນການວຽກງານປ້ອງກັນພາຍໃນຂັ້ນອົງການ, ກົມກອງ, ຖືເອົາການປ້ອງຕົນເອງ, ປ້ອງກັນການຈັດຕັ້ງ ກໍຄືກົມກອງເປັນສຳຄັນ ແລະ ບໍ່ລ່ວງລະເມີດລະບຽບກົດໝາຍ, ຕ້ານ ແລະ ສະກັດກັ້ນ ກົນອຸບາຍຫັນປ່ຽນໂດຍສັນຕິ ຂອງອິດທິກຳລັງປໍລະປັກ ແລະ ປະກົດການຫຍໍ້ທໍ້ຢູ່ພາຍໃນ, ພະນັກງານ-ນັກຮົບ ໄດ້ຍົກສູງສະຕິລະວັງຕົວສູງຂຶ້ນ, ມີທັດສະນະຫຼັກໝັ້ນຊົນຊັ້ນ, ຈຳແນກໄດ້ມິດ ແລະ ສັດຕູຢ່າງຈະແຈ້ງ, ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ, ມີນ້ຳໃຈຮັກຊາດ, ຮັກລະບອບໃໝ່, ມີນ້ຳໃຈເສຍສະຫຼະ ແລະ ຮັກສາໄດ້ມູນເຊື້ອອັນດີງາມຂອງກອງທັບ. ເອົາໃຈໃສ່ເຄື່ອນໄຫວວຽກງານປ້ອງກັນພາຍໃນ, ເກັບກຳສະພາບການເມືອງພາຍໃນຂອງກົມກອງ, ຄຸ້ມຄອງກຳແໜ້ນຊີວະປະຫວັດ ແລະ ປະຫວັດການເຄື່ອນໄຫວຂອງພະນັກງານ-ນັກຮົບເປັນປົກກະຕິ, ເຊິ່ງຜ່ານການ ຕີລາຄາຜົນການກໍ່ສ້າງກົມກອງ 3 ປອດ ປະຈຳປີ 2023-2024 ທົ່ວທະຫານແຂວງບໍ່ແກ້ວ ສາມາດຕີລາຄາແບ່ງປະເພດໄດ້ດັ່ງນີ້: ປະເພດ I ມີ 26 ກົມກອງ ຄື: ຫ້ອງການເມືອງ, ຫ້ອງພະລາທິການ, ຫ້ອງເຕັກນິກ, ຫ້ອງການ ປກຊ-ປກສ, ໂຮງຮຽນການທະຫານທ້ອງຖິ່ນ, ກອງບັນຊາການທະຫານເມືອງຫ້ວຍຊາຍ, ເມືອງຜາອຸດົມ, ເມືອງປາກທາ, ກອງພັນ 419, ກອງຮ້ອຍ 11, 12, 13, 14, 15, 16,17,31, 231, 310, ກອງຮ້ອຍທະຫານຊາຍ 122, 124, 125, ກອງຮ້ອຍຜະສິດ, ກອງປະຕິບັດງານ 213 ແລະ ກອງຮ້ອຍສ້ອມແປງ, ປະເພດ II ມີ 7 ກົມກອງຄື: ຫ້ອງການ ແລະ ບໍລິຫານ, ຫ້ອງເສນາທິການ, ກອງບັນຊາການທະຫານເມືອງເມິງ, ໂຮງໝໍທະຫານແຂວງ, ກອງພັນນ້ອຍ 405, ກອງຮ້ອຍທະຫານຊາຍແດນ 121 ແລະ 123.
ໂອກາດດັ່ງກ່າວນີ້, ຍັງໄດ້ປະດັບຫຼຽນໄຊພິລະອາດຫານ ແລະ ໃບຍ້ອງຍໍຂອງກະຊວງປ້ອງກັນປະເທດໃຫ້ ນາຍ ແລະ ພົນທະຫານ ຜູ້ທີ່ມີຜົນງານດີເດັ່ນໃນການເຄື່ອນໄຫວຕ້ານ ແລະ ສະກັດກັ້ນຢາເສບຕິດ, ກຸ່ມຄົນບໍ່ຫວັງດີ ທີ່ກໍ່ຄວາມບໍ່ສະຫງົບໃນລະຫວ່າງຊາດ ແລະ ເຮັດສໍາເລັດໜ້າທີຕາມການມອບໝາຍຂອງຂັ້ນເທິງ, ດັ່ງນັ້ນ, ກະຊວງປ້ອງກັນປະເທດຕົກລົງ: ມອບຫຼຽນໄຊພິລະອາດຫານ ຊັ້ນ III ໃຫ້ຈຳນວນ 17 ສະຫາຍ ແລະ ໃບຍ້ອງຍໍ ຈຳນວນ 14 ສະຫາຍ. ເປັນກຽດຂຶ້ນມອບໂດຍ ສະຫາຍ ພົນຈັດຕະວາ ບຸນມີ ພາມີໄຊ ພ້ອມຄະນະຢ່າງສົມກຽດ.
ໂດຍ: ວໍລະສິດ ພິດສະຫາຍ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
