ວັນສຸກ, ວັນທີ 04 ຕຸລາ 2024
ຄະນະພັກຮາກຖານ ກອງພັນ 513 ສໍາເລັດກອງປະຊຸມໃຫຍ່ສະມາຊິກພັກ ຄັ້ງທີ II
ເວລາອອກຂ່າວ: 2024-09-30 15:36:08 | ຜູ້ຂຽນ : admin2 | ຈຳນວນຄົນເຂົ້າຊົມ: 220 | ຄວາມນິຍົມ: 
ກອງປະຊຸມໃຫຍ່ສະມາຊິກພັກ ຄັ້ງທີ II ຂອງຄະນະພັກຮາກຖານ ກອງພັນ 513 ນະຄອນຫຼວງວຽງຈັນ ໄດ້ໄຂຂຶ້ນ ແລະ ອັດລົງດ້ວຍຜົນສໍາເລັດ ໃນວັນທີ 27 ກັນຍາ 2024 ນີ້, ໂດຍການເຂົ້າຮ່ວມເປັນປະທານຂອງ ສະຫາຍ ພົນຈັດຕະວາ ໂສພາວັນ ທຳມະເທວາ ກຳມະການຄະນະບໍລິຫານງານພັກນະຄອນຫຼວງ, ເລຂາຄະນະ
ພັກ ຫົວໜ້າການເມືອງກອງບັນຊາການທະຫານນະຄອນຫຼວງວຽງຈັນ, ມີຄະນະພັກຮາກຖານກອງພັນ ພ້ອມດ້ວຍແຂກຖືກເຊີນຕະຫຼອດຮອດສະມາຊິກພັກສົມບູນ ເຂົ້າຮ່ວມ.
ສະຫາຍ ພັນໂທ ອານຸສັກ ສຸທຳມະວົງ ເລຂາຄະນະພັກຮາກຖານ ກອງພັນ 513 ນະຄອນຫຼວງວຽງຈັນ ໄດ້ຍົກໃຫ້ເຫັນຜົນງານຫຼາຍດ້ານທີ່ພົ້ນເດັ່ນໃນຕະຫຼອດໄລ 5 ປີຜ່ານມາ ເຫັນວ່າຄະນະພັກຮາກຖານ ໄດ້ຖືເອົາວຽກງານສຶກສາອົບຮົມການເມືອງ-ນຳພາແນວຄິດໃຫ້ພະນັກງານສະມາຊິກພັກ ເປັນບັນຫາສໍາຄັນດ້ວຍການເຊື່ອມຊຶມ, ກໍາແໜ້ນບັນດາແນວທາງແຜນນະໂຍບາຍຂອງພັກ, ກົດໝາຍຂອງລັດຕິດພັນກັບຂະບວນການດ້ານຕ່າງໆ ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງປ້ອງກັນປະເທດວາງອອກ ໃຫ້ເປັນຂະບວນການຟົດຟື້ນ ແລະ ມີຜົນສຳເລັດຫຼາຍດ້ານ, ເອົາໃຈໃສ່ປັບປຸງກໍ່ສ້າງພັກໃຫ້ ປອດໃສ ເຂັ້ມແຂງ ໜັກແໜ້ນ ໂດຍໄດ້ປະຕິບັດຕາມ 5 ຫຼັກການ 3 ທິດນຳຂອງພັກຢ່າງເຂັ້ມງວດ, ຖືເອົາການເຄື່ອນໄຫວດຳເນີນຊີວິດການເມືອງພາຍໃນພັກເປັນໃຈກາງໃນການປັບປຸງກໍ່ສ້າງພັກ, ມີການສະຫຼຸບຖອດຖອນບົດຮຽນ ແລະ ກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ຢ່າງເປັນປົກກະຕິ, ປັດຈຸບັນ ຄະນະພັກຮາກຖານກອງພັນ 513 ນະຄອນຫຼວງວຽງຈັນ ຍັງໄດ້ຊອກຫາແຫຼ່ງລາຍຮັບເຂົ້າກົມກອງຕາມທ່າແຮງຂອງຕົນດ້ວຍການປູກ-ການລ້ຽງ ແລະ ການບໍລິການ ໄດ້ 1.103.881.000 ກີບ. ພ້ອມກັນນັ້ນ, ໃນກອງປະຊຸມຍັງໄດ້ຜັດປ່ຽນກັນປະກອບຄໍາຄິດເຫັນໃສ່ບົດລາຍງານການເມືອງທັງສອງພາກຢ່າງກົງໄປກົງມາ ແລະ ໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະພັກຮາກຖານຊຸດໃໝ່. ເຊິ່ງກອງປະຊຸມຄັ້ງປະຖົມມະລຶກໄດ້ເລືອກເອົາ ສະຫາຍ ພັນໂທ ອານຸສັກ ສຸທຳມະວົງ ເປັນເລຂາ, ສະຫາຍ ພັນໂທ ແສງ ພົມມະວົງ ເປັນຮອງເລຂາ, ສະຫາຍ ພັນຕີ ພູດອຍ ຫົງໄຂຄໍາ ເປັນປະທານກວດກາ, ສະຫາຍ ພັນຕີ ວັນເພັງ ມາລາວົງ ເປັນຮອງປະທານກວດກາ, ສະຫາຍ ພັນຕີ ສຸລິເດັ່ນ ນຸລາໄຊ, ສະຫາຍ ພັນຕີ ພຸດທະສອນ ໄຊຍະສອນ ແລະ ສະຫາຍ ຮ້ອຍເອກ ບຸນພອນ ພວງສີ ເປັນຄະນະ. ພ້ອມກັນນັ້ນ, ຍັງໄດ້ປ່ອນບັດຄັດເລືອກເອົາຜູ້ແທນສົມບູນ-ສຳຮອງ ໄປຮ່ວມກອງປະຊຸມໃຫຍ່ຂອງອົງຄະນະກອງບັນຊາການທະຫານນະຄອນຫຼວງວຽງຈັນ ຕາມລະດັບຄາດໝາຍ.
ໂດຍ: ວຽງສີ ແກ້ວກອງສຸດາ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
