ວັນພະຫັດ, ວັນທີ 03 ຕຸລາ 2024
ຮອງຫົວໜ້າຫ້ອງການກໍາມະບານກອງທັບ ຊຸກຍູ້ວຽກງານກໍາມະບານຢູ່ໂຮງງານມິດຕະພາບ ລາວ-ຫວຽດນາມ
ເວລາອອກຂ່າວ: 2024-09-13 14:50:28 | ຜູ້ຂຽນ : admin2 | ຈຳນວນຄົນເຂົ້າຊົມ: 404 | ຄວາມນິຍົມ: 
ວັນທີ 13 ກັນຍາ 2024 ນີ້, ສະຫາຍ ພັນໂທ ໜູດຳ ສຸລິໄຊ ຮອງຫົວໜ້າຫ້ອງການກໍາມະບານກອງທັບ ພ້ອມດ້ວຍຄະນະໄດ້ລົງເຄື່ອນໄຫວຊຸກຍູ້ຂະບວນການກໍາມະບານຮາກຖານຢູ່ໂຮງງານມິດຕະພາບລາວ-ຫວຽດນາມ, ໂດຍການຕ້ອນຮັບສະຫາຍ ພັນໂທ ແສງມະນີ ສີພອນໄຊ ຄະນະພັກຮາກຖານ ຮອງຫົວໜ້າອໍານວຍການໂຮງງານມິດຕະພາບລາວ-ຫວຽດນາມ ພ້ອມດ້ວຍຄະນະ.
ສະຫາຍ ພັນໂທ ສົມປ້ອງ ແກ້ວບຸດຕະລາດ ປະທານສະຫະພັນກຳມະບານຮາກຖານໂຮງງານມິດຕະພາບລາວ - ຫວຽດນາມ ໄດ້ຜ່ານບົດສະຫຼຸບວຽກງານກຳມະບານ ປະຈໍາ 6 ເດືອນຕົ້ນປີ 2024 ໃຫ້ຮູ້ວ່າ: ກຳມະບານຮາກຖານໂຮງງານມິດຕະພາບລາວ-ຫວຽດນາມ ແມ່ນຮາກຖານໜຶ່ງ ມີພາລະບົດບາດໜ້າທີ່ຮັບໃຊ້ການຜະລິດ ແລະ ສ້ອມແປງ ຟື້ນຟູພາຫະນະເຕັກນິກຮັບໃຊ້ກອງທັບ ແລະ ສັງຄົມຈຳນວນໜຶ່ງ, ເປັນບ່ອນເຝິກຝົນຫຼໍ່ຫຼອມໃຫ້ແກ່ພະນັກງານເຕັກນິກ, ເພື່ອໃຫ້ກາຍເປັນພະນັກງານນຳພາ-ບັນຊາ ເຂົ້າໃນຂະແໜງການອຸດສາຫະກຳປ້ອງກັນຊາດ, ເປັນບ່ອນເຝິກອົບຮົມ, ເຝິກງານຂອງນາຍຊ່າງໃຫ້ແກ່ນັກຮຽນທັງກອງທັບ ແລະ ພາກລັດ ໃຫ້ກາຍເປັນນາຍຊ່າງຜູ້ສຳນານງານ, ເຊິ່ງໃນໄລຍະຜ່ານມາ ກຳມະບານຮາກຖານໂຮງງານມິດຕະພາບລາວ-ຫວຽດນາມ ໄດ້ຖືເອົາວຽກງານສຶກສາອົບຮົມການເມືອງນຳພາແນວຄິດເປັນກົກ, ສອດຫ້ອຍເຂົ້າໃນທຸກຂົງເຂດວຽກງານ ດ້ວຍຫຼາຍຮູບການ, ຫຼາຍເນື້ອໃນ ໂດຍສອດຄ່ອງກັບສະພາບຈຸດພິເສດ ໜ້າທີ່ການເມືອງຂອງກົມກອງ ຕິດພັນກັບການຈັດຕັ້ງປະຕິບັດຂະບວນການຂໍ້ແຂ່ງຂັນ 5 ເປັນເຈົ້າຂອງສູນກາງສະຫະພັນກຳມະບານລາວວາງອອກ, ໃນນີ້ໄດ້ລົງຊຸກຍູ້ຊີ້ນຳໃຫ້ອົງການຈັດຕັ້ງຂັ້ນໜ່ວຍ ຕິດພັນກັບການຜະລິດ ແລະ ສ້ອມແປງ ເພື່ອກຽມພ້ອມກຳລັງຫຼັກທາງດ້ານສີມືແຮງງານຮັບໃຊ້ການຜະລິດ ແລະ ກຽມຄວາມພ້ອມທາງດ້ານອຸປະກອນການຮັບໃຊ້ໃຫ້ແກ່ການຜະລິດ ແລະ ສ້ອມແປງ ເຊັ່ນ: ເຄື່ອງມື, ເຄື່ອງຈັກຮັບໃຊ້ການຜະລິດໃຫ້ຮັບປະກັນໄດ້ 100% ເພື່ອໃຫ້ທ່ວງທັນເວລາເມື່ອມີຄຳສັ່ງ ຫຼື ໂຕເລກແຜນການຜະລິດ ແລະ ສ້ອມແປງ ສົມທົບແໜ້ນກັບອົງການຈັດຕັ້ງພາຍໃນ, ນອກນີ້ ຍັງໄດ້ສ້າງກອງທຶນຊ່ວຍເຫຼືອເຊິ່ງກັນ ແລະ ກັນ ໃນຍາມເຈັບເປັນ ແລະ ປະຕິບັດນະໂຍບາຍຊ່ວຍເຫຼືອສະມາຊິກຂອງຕົນຕາມຄວາມເໝາະສົມ, ໃນນີ້ມີສະມາຊິກກອງທຶນທັງໝົດ 172 ສະຫາຍ, ມີທຶນສະມາຊິກສະສົມທັງໝົດ 51,200,000 ກີບ, ທຶນບຸກຄົນຝາກເອົາດອກເບ້ຍ 10%ຕໍ່ປີ ຈໍານວນ 510,200,000 ກີບ, ປັດຈຸບັນເຫຼືອເງິນຢູ່ຄັງທັງໝົດ 3,297,000ກີບ.
ໂດຍ: ບຸນຊ້ອຍ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
