ວັນພະຫັດ, ວັນທີ 03 ຕຸລາ 2024
ຜົນງານການເຄື່ອນໄຫວ ຂອງຊາວໜຸ່ມ ທະຫານແຂວງຄຳມ່ວນ ໃນໄລຍະ 5 ປີຜ່ານມາ
ເວລາອອກຂ່າວ: 2024-09-13 10:21:17 | ຜູ້ຂຽນ : admin3 | ຈຳນວນຄົນເຂົ້າຊົມ: 340 | ຄວາມນິຍົມ: 
ອົງການຈັດຕັ້ງຊາວໜຸ່ມ ກອງບັນຊາການທະຫານແຂວງຄຳມ່ວນ ມີບົດບາດສຳຄັນໃນການເຄື່ອນໄຫວປະຕິບັດໜ້າທີ່ວຽກງານຕົວຈິງຂອງກົມກອງ ໃຫ້ມີຜົນສຳເລັດ ເປັນຕົ້ນແມ່ນ ການເຄື່ອນໄຫວວຽກງານປ້ອງກັນຊາດ-ປ້ອງກັນຄວາມສະຫງົບ ເຮັດໃຫ້ທົ່ວແຂວງຄຳມ່ວນ ມີຄວາມສະຫງົບຢ່າງໜັກແໜ້ນ, ເປັນກຳລັງແຮງໃນການປັບປຸງກໍ່ສ້າງກົມກອງ ໃຫ້ເຕີບໃຫຍ່ເຂັ້ມແຂງ, ປະກອບສ່ວນເຂົ້າໃນການຈັດຕັ້ງປະຕິບັດແຜນການ ແລະ ຄາດໝາຍສູ້ຊົນດ້ານຕ່າງໆ ທີ່ກົມກອງວາງອອກ ໃຫ້ປະສົບຜົນສຳເລັດ ໄປພ້ອມກັນນັ້ນ, ກໍໄດ້ເສີມຂະຫຍາຍທາດແທ້ມູນເຊື້ອອັນດີງາມຂອງຊາດ, ຂອງພັກ, ຂອງກອງທັບ ກໍຄື ຂອງຊາວໜຸ່ມ ພ້ອມທັງຈັດຕັ້ງຜັນຂະຫຍາຍເນື້ອໃນຂໍ້ແຂ່ງຂັນ 4 ບຸກ ທີ່ສູນກາງຊາວໜຸ່ມປະຊາຊົນປະຕິວັດລາວວາງອອກ ເຂົ້າສູ່ວຽກງານຕົວຈິງ ຢ່າງເປັນຂະບວນຟົດຟື້ນ ແລະ ກວ້າງຂວາງ ເຮັດໃຫ້ອົງການຈັດຕັ້ງຊາວໜຸ່ມແຕ່ລະຂັ້ນ ມີຄວາມເຕີບໃຫຍ່ຂະຫຍາຍຕົວ ຢ່າງບໍ່ຢຸດຢັ້ງ.
ສະຫາຍ ພັນໂທ ແສງສຸລິນ ເດດມະສອນ ຫົວໜ້າພະແນກຊາວໜຸ່ມ ກອງບັນຊາການທະຫານແຂວງຄຳມ່ວນ ລາຍງານໃນໂອກາດດຳເນີນກອງປະຊຸມຜູ້ແທນຊາວໜຸ່ມ ທົ່ວກອງບັນຊາການທະຫານແຂວງຄຳມ່ວນ ຄັ້ງທີ IV ຈັດຂຶ້ນໃນຫວ່າງບໍ່ດົນຜ່ານ ໃຫ້ຮູ້ວ່າ: ໃນໄລຍະ 5 ປີຜ່ານມາ ຄະນະຊາວໜຸ່ມແຕ່ລະຂັ້ນ ແມ່ນໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານ-ສະມາຊິກຊາວໜຸ່ມ ມີແນວຄິດອຸ່ນອຽນທຸ່ນທ່ຽງ, ເຊື່ອໝັ້ນຕໍ່ການນຳພາຂອງພັກ-ລັດ ແລະ ເອົາໃຈໃສ່ປະຕິບັດໜ້າທີ່ວຽກງານວິຊາສະເພາະທີ່ຂັ້ນເທິງມອບໝາຍໃຫ້ເປັນຢ່າງດີ, ສະ
ມາຊິກຊາວໜຸ່ມ ໄດ້ຕັ້ງໜ້າປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ເປັນຕົ້ນແມ່ນ ການປ້ອງກັນເວນຍາມວັນບຸນສຳຄັນຕ່າງໆ, ປ້ອງກັນການນຳ, ປ້ອງກັນສຳນັກງານ-ຫ້ອງການ, ປ້ອງກັນບໍລິສັດ, ປ້ອງກັນຄ້າຍຄູ, ປ້ອງກັນເສັ້ນທາງຍຸດທະສາດ ແລະ ປ້ອງກັນບໍລິເວນຊາຍແດນໃນຂອບເຂດທີ່ກົມກອງຮັບຜິດຊອບ ມີຄວາມສະຫງົບປອດໄພໂດຍພື້ນຖານ ພ້ອມດຽວກັນນີ້, ສະມາຊິກຊາວໜຸ່ມ ຍັງໄດ້ເປັນເຈົ້າການປະກອບສ່ວນເຂົ້າໃນວຽກງານອົບຮົມ-ຫັດແອບການເມືອງ, ການທະຫານ, ພະລາທິການ-ເຕັກນິກ, ປະກອບສ່ວນເຂົ້າໃນຂະບວນການກິລາ, ສິລະປະ-ວັນນະຄະດີ, ຂະບວນການອອກແຮງງານ ແລະ ຂະບວນການປັບປຸງສະຖານທີ່ຄ້າຍຄູ ໃຫ້ມີຄວາມເປັນລະບຽບຮຽບຮ້ອຍ, ສະອາດງາມຕາ. ຄະນະຊາວໜຸ່ມແຕ່ລະຂັ້ນ ຍັງໄດ້ສົມທົບກັບ ຄະນະພັກ-ຄະນະບັນຊາ ກໍຄື ຜູ້ຊີ້ນຳວຽກງານອົງການຈັດຕັ້ງມະຫາຊົນ ເຄື່ອນໄຫວຊຸກຍູ້ບັນດາໜ່ວຍຊາວໜຸ່ມທີ່ຂຶ້ນກັບ ໃຫ້ເອົາໃຈໃສ່ທຳການຜະລິດ ປູກຝັງ-ລ້ຽງສັດ ຕາມທ່າແຮງບົ່ມຊ້ອນພາຍໃນກົມກອງ ເພື່ອຊອກແຫຼ່ງລາຍຮັບເຂົ້າຄັງລວມ ຂອງໜ່ວຍ ໃນນັ້ນ, ມີເນື້ອທີ່ສວນມັນຕົ້ນ 20 ເຮັກຕາ, ເກັບກູ້ໄດ້ 60 ໂຕນ, ເນື້ອທີ່ນາປີ 5,5 ເຮັກຕາ, ເກັບກູ້ເຂົ້າໄດ້ 2,5 ໂຕນຕໍ່ປີ, ສະໜອງພືດຜັກ ແລະ ສັດປີກເຂົ້າເຮືອນຄົວລວມ ໄດ້ຈຳນວນໜຶ່ງ. ນອກຈາກນີ້, ພະແນກຊາວໜຸ່ມ ຍັງໄດ້ເອົາໃຈໃສ່ຊຸກຍູ້ການຈັດຕັ້ງປະຕິບັດຂໍ້ແຂ່ງ
ຂັນ 4 ບຸກ ທີ່ສູນກາງຊາວໜຸ່ມປະຊາຊົນປະຕິວັດລາວວາງອອກ ຖືເອົາຂໍ້ແຂ່ງຂັນດັ່ງກ່າວ ຕິດພັນກັບທຸກຂົງເຂດວຽກງານ, ປຸກລະດົມສະມາຊິກຊາວໜຸ່ມ ເຂົ້າຮ່ວມຈັດຕັ້ງປະຕິບັດຢ່າງເປັນຂະບວນການຟົດຟື້ນ ເຮັດໃຫ້ທົ່ວກອງບັນຊາການທະຫານແຂວງຄຳມ່ວນ ສາມາດຕີລາຄາໜ່ວຍຊາວໜຸ່ມປະເພດ ແຂງ ມີ 32 ໜ່ວຍ, ປະເພດກາງ 12 ໜ່ວຍ, ມີສະມາຊິກຊາວໜຸ່ມ ແຂງ 1.935 ສະຫາຍ, ກາງ 64 ສະຫາຍ, ໄດ້ຮັບນາມມະຍົດ ທຸງໄຊນຳໜ້າໃນຂະບວນການແຂ່ງຂັນ 4 ບຸກ ມີ
5 ຄະນະຊາວໜຸ່ມຮາກຖານ, 32 ໜ່ວຍຊາວໜຸ່ມເອກະລາດ ແລະ ສະມາຊິກຊາວໜຸ່ມໄດ້ຮັບໃບຢັ້ງຢືນ 4 ບຸກ ມີ 1.935 ສະຫາຍ.
ສະຫາຍ ພັນໂທ ແສງສຸລິນ ເດດມະສອນ ຍັງໃຫ້ຮູ້ຕື່ມວ່າ: ທິດທາງແຜນການໃນຕໍ່ໜ້ານີ້ ຈະສືບຕໍ່ເຮັດວຽກງານສຶກສາອົບຮົມການເມືອງ-ນຳພາແນວຄິດ ໃຫ້ພະນັກງານ-ສະມາຊິກຊາວໜຸ່ມ ຢ່າງຕໍ່ເນື່ອງ ແລະ ແທດເຖິງຕົວຈິງ, ສືບຕໍ່ເຂົ້າຮ່ວມຂະບວນການກິລາ, ສິລະປະ-ວັນນະຄະດີ ທີ່ກົມກອງຈັດຂຶ້ນ, ສືບຕໍ່ນຳເອົາເນື້ອໃນຂໍ້ແຂ່ງຂັນ 4 ບຸກ ມາເປັນເງື່ອນໄຂມາດຖານ ໃນການກໍ່ສ້າງໜ່ວຍຊາວໜຸ່ມ 4 ບຸກ ໃຫ້ໄດ້ຕາມຄາດໝາຍທີ່ວາງໄວ້, ສືບຕໍ່ປັບປຸງການຈັດຕັ້ງຊາວໜຸ່ມແຕ່ລະຂັ້ນໃຫ້ໜັກແໜ້ນເຂັ້ມແຂງໃນທຸກດ້ານ, ເອົາໃຈໃສ່ຊຸກຍູ້ສະມາຊິກຊາວໜຸ່ມ ໃຫ້ມີຄວາມຮັບຜິດຊອບສູງຕໍ່ໜ້າທີ່ວຽກງານ ແລະ ພ້ອມກັນເປັນກຳແຮງນຳໜ້າ ໃນທຸກຂະບວນການຂອງກົມກອງ ເພື່ອຍາດໃຫ້ໄດ້ຜົນງານອັນໃໝ່ ແລະ ຍິ່ງໃຫຍ່ກວ່າເກົ່າ.
ໂດຍ: ວິໄລວອນ ພົມມະວົງສາ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
