ວັນເສົາ, ວັນທີ 14 ກັນຍາ 2024
ທະຫານແຂວງອຸດົມໄຊ ສະຫຼຸບຖອດຖອນບົດຮຽນການຕ້ອນຮັບຄະນະຜູ້ແທນຕ່າງປະເທດ
ເວລາອອກຂ່າວ: 2024-09-05 10:39:57 | ຜູ້ຂຽນ : admin2 | ຈຳນວນຄົນເຂົ້າຊົມ: 284 | ຄວາມນິຍົມ: 
ວັນທີ 04 ກັນຍາ ນີ້, ກອງບັນຊາການທະຫານແຂວງອຸດົມໄຊ ສະຫຼຸບຖອດຖອນບົດຮຽນການຕ້ອນຮັບຄະນະຜູ້ແທນ ກອງບັນຊາການທະຫານປ້ອງກັນຊາຍແດນກິ່ງ ແຂວງສິບສອງພັນນາ ສປ ຈີນ ແລະ ກອງບັນຊາການທະຫານແຂວງລາຍເຈົ່າ ສສ ຫວຽດນາມ ທີ່ມາຢ້ຽມຢາມ ແລະ ເຮັດວຽກຢູ່ ກອງບັນຊາການທະຫານແຂວງອຸດົມໄຊ ໂດຍການເປັນປະທານຂອງ ສະຫາຍ ພົນຈັດຕະວາ ຄຳເຜີຍ ໂສມພັນ ຫົວໜ້າການທະຫານ ກອງບັນຊາການທະຫານແຂວງອຸດົມໄຊ, ມີ ສະຫາຍ ພັນເອກ ຕຸ້ຍ ພົມມີໄຊ ຫົວໜ້າການເມືອງ ກອງບັນຊາການທະຫານແຂວງອຸດົມໄຊ, ມີ ຄະນະພັກ-ຄະນະບັນຊາ ແລະ ຄະນະຮັບຜິດຊອບ ເຂົ້າຮ່ວມ.
ສະຫາຍ ພັນຕີ ຈັນເລີຍ ໄຊຍະອິນ ຮອງຫົວໜ້າພະແນກພົວພັນຕ່າງປະເທດ ກອງບັນຊາການທະຫານແຂວງອຸດົມໄຊ ໄດ້ລາຍງານຫຍໍ້ຜົນສຳເລັດການຕ້ອນຮັບ ຄະນະຜູ້ແທນກອງບັນຊາການທະຫານປ້ອງກັນຊາຍແດນກິ່ງ ແຂວງສິບສອງພັນນາ ສປ ຈີນ ລະຫວ່າງ 7-9 ສິງຫາ ແລະ ກອງບັນຊາການທະຫານແຂວງລາຍເຈົ່າ ສສ ຫວຽດນາມ ລະຫວ່າງ 19-22 ສິງຫາ 2024 ຜ່ານມານີ້, ພ້ອມທັງຕີລາຄາຜົນງານດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້, ເຊິ່ງສະແດງໃຫ້ເຫັນຜົນສຳເລັດທີ່ພົ້ນເດັ່ນຫຼາຍ, ເປັນຕົ້ນດ້ານເນື້ອໃນພິທີການ, ວຽກງານຂະບວນການ, ແຜນງົບປະມານ, ສະຖານທີ່ພັກເຊົ່າ, ສະຖານທີ່ປະຊຸມ, ສະຖານທີ່ທ່ອງທ່ຽວ ແລະ ຮັບປະກັນໄດ້ຄວາມສະຫງົບປອດໄພ 100%. ທັງນີ້, ຍ້ອນຄະນະພັກ-ຄະນະບັນຊາ ກໍຄືຄະນະພັກແຕ່ລະຂັ້ນໄດ້ນຳພາ-ຊີ້ນຳ, ໃກ້ສິດຕິດແທດຕິດຕາມກວດກາ, ຊຸກຍູ້ ພະແນກການທີ່ກ້ຽວຂ້ອງມີຄວາມຕື່ນຕົວປະຕິບັດຕາມການຈັດຕັ້ງມອບໝາຍໃຫ້ມີຜົນສຳເລັດຢ່າງຈົບງາມ.
ໂອກາດນີ້ ຄະນະພັກ-ຄະນະບັນຊາ, ຄະນະຮັບຜິດຊອບແຕ່ລະພາກສ່ວນໄດ້ປະກອບຄຳຄິດເຫັນສົ່ງເສີມດ້ານດີທີ່ຜົນເດັ່ນ ແລະ ພ້ອມກັນປັບປຸງແກ້ໄຂຈຸດທີ່ຍັງຄົງຄ້າງ ເພື່ອຮັບປະກັນການຕ້ອນຮັບແຂກທັງພາຍໃນ ແລະ ຕ່າງປະເທດເຂົ້າມາຢ້ຽມຢາມ ແລະ ເຮັດວຽກນໍາກອງບັນຊາການທະຫານແຂວງອຸດົມໄຊ ໃນຕໍ່ໜ້າມີຄວາມຮັດກຸ່ມດີຂຶ້ນກວ່າເກົ່າ.
ຕອນທ້າຍພິທີ ສະຫາຍ ພົນຈັດຕະວາ ຄຳເຜີຍ ໂສມພັນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດໃນໄລຍະການຕ້ອນຮັບ 2 ຄະນະຜູ້ແທນການຕ່າງເທດຄັ້ງນີ້, ພ້ອມທັງເນັ້ນໜັກໃຫ້ເອົາໃຈໃສ່ຍົກສູງພາລະບົດບາດ, ສິດ ແລະ ໜ້າທີ່ຂອງຕົນ, ປັບປຸງແບບແຜນວິທີເຮັດວຽກລວມສູນປະຊາທິປະໄຕ, ແບ່ງບຸກຄົນຮັບຜິດຊອບໃຫ້ຖືກຕ້ອງສອດຄ່ອງກັບໜ້າວຽກງານຕົວຈິງ, ພ້ອມກັນເຮັດສຳເລັດໜ້າທີ່ ທີ່ພັກ-ລັດຂັ້ນເທິງມອບໝາຍໃຫ້.
ໂດຍ: ສົມພູນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
