ກອງທັບປະຊາຊົນລາວ
 
ວັນອັງຄານ, ວັນທີ 23 ກໍລະກົດ 2024

  

ໝາກຜົນ ການ​ກໍ່ສ້າງ​ພັກ-ພະນັກງານ ຢູ່​ກອງພັນ​ໃຫຍ່ 641
ເວລາອອກຂ່າວ: 2024-06-17 08:52:13 | ຜູ້ຂຽນ : admin1 | ຈຳນວນຄົນເຂົ້າຊົມ: 155 | ຄວາມນິຍົມ:



ອີງຕາມ ບົດ​ລາຍ​ງານ​ການເມືອງ ​ທີ່​ ສະຫາຍ ພັນ​ເອກ ສອນ​ແກ້ວ ຜາ​ລີ​ທອງ ເລຂາຄະນະ​ພັກ, ຫົວໜ້າ​ການເມືອງ ກອງ ພັນ​ໃຫຍ່ 641 ສະເໜີ​ຕໍ່​ກອງ​ປະ ຊຸມ​ໃຫຍ່​ຜູ້​ແທນ​ສະມາຊິກພັກ​ ຄັ້ງ​ທີ VII ຂອງ​ອົງຄະ​ນະ​ພັກ​ກອງພັນ​ໃຫຍ່ 641 ໃຫ້ຮູ້​ວ່າ: ໃນ​ຊຸມ​ປີຜ່ານມາ, ຄະນະ​ພັກ-ຄະນະ ​ບັນຊາກອງພັນໃຫຍ່ 641 ຍາມ ​ໃດ​ກໍ​ໄດ້ຍົກສູງຄວາມຮັບຜິດຊອບ ໃນ​ການ​ນຳພາ-ຊີ້ນໍາ ພະນັກງານ-ນັກຮົບ ເຄື່ອນ​ໄຫວ​ວຽກ​ງານ ປິ່ນ​ອ້ອມ​ໜ້າທີ່​ການເມືອງ​ຂອງ​ກົມ​ກອງ ເຖິງ​ແມ່ນ​ວ່າ​ຈະ​ພົບ​ກັບ​ຄວາມ​ຫຍຸ້ງຍາກ​ຫຼາຍ​ດ້ານ ອັນ​ເນື່ອງ​ມາ​ຈາກ​ສະພາບ​ແວດ​ລ້ອມ​ໃນ​ຕົວ ແລະ ນອກ​ຕົວ ແຕ່​ ກົມ​ກອງ ​ກໍ​ສາມາດ​ສ້າງ​ໄດ້ຜົນ ສຳເລັດ​ທີ່​ເປັນ​ພື້ນຖານ​ຫຼາຍ​ດ້ານ ໂດຍ​ສະເພາະ ຂົງເຂດວຽກງານ​ ກໍ່ສ້າງ​ພັກ ຄະນະ​ພັກ ໄດ້​ເອົາໃຈ ໃສ່​ກໍ່ສ້າງ​ພັກ​ທາງ​ດ້ານ​ການ ເມືອງ-ແນວ​ຄິດເປັນ​ກົກ ແລະ ຖື​ ເປັນ​ໜ້າທີ່​ສຳຄັນ​ຕົ້ນຕໍ ໂດຍໄດ້​ ເອົາໃຈໃສ່ສຶກ​ສາ​ອົບຮົມ​ການ ເມືອງ-ນຳພາ​ແນວ​ຄິດ ໃຫ້ສະມາ ຊິກ​ພັກ, ພະນັກງານ-ນັກຮົບ ຢ່າງ ​ຕໍ່​ເນື່ອງ, ຈັດ​ຕັ້ງ​ເຜີຍແຜ່, ເຊື່ອມ ​ຊຶມ ແລະ ຜັນຂະຫຍາຍຜົນສຳ ເລັດ​ກອງ​ປະຊຸມ​ໃຫຍ່​ແຕ່​ລະ​ຂັ້ນ​ຂອງ​ພັກ ເຮັດ​ໃຫ້​ສະມາຊິກ​ພັກ, ພະນັກງານ-ນັກຮົບ ເຂົ້າໃຈ ແຈ້ງ, ເຊື່ອ​ໝັ້ນ​ຕໍ່​ການ​ນຳພາ ແລະ ເປັນ​ເອກະພາບສູງຕໍ່ແນວທາງນະ ໂຍບາຍ​ຂອງ​ພັກ, ເຮັດ​ໃຫ້​ພາຍ​ ໃນ​ພັກ ມີ​ຄວາມສະຫງົບໜັກແໜ້ນ. ການ​ກໍ່ສ້າງ​ພັກ ທາງດ້ານ​ການ ຈັດຕັ້ງໄດ້​ຢຶດ​ໝັ້ນ​ໃນຫຼັກການ​ກໍ່ສ້າງພັກ ຕາມ 5 ຫຼັກການ 3 ທິດ​ນຳ, ເອົາໃຈໃສ່​ປັບປຸງຮາກ​ຖານພັກ ຕາມ​ທິດຂັ້ນ​ໝູ່ ມີ​ສະມາ ຊິກ​ພັກ, ຂັ້ນ​ໝວດ ມີ​ຈຸ​ພັກ, ຂັ້ນ​ກອງຮ້ອຍ ມີ​ໜ່ວຍ​ພັກ, ຂັ້ນ​ກອງ ພັນ ​ມີຄະນະ​ພັກ​ຮາກ​ຖານ ໂດຍ​ເລີ່ມ​ຈາກ​ສ້າງ​ສະມາຊິກ​ພັກ ໃຫ້​ມີ​ສະຕິ​ຕື່ນ​ຕົວ, ເປັນ​ແບບຢ່າງ​ນຳ​ໜ້າ ໃນ​ທຸກ​ຂົງເຂດ​ວຽກ​ງານ, ສຸມ​ໃສ່​ຊຸກຍູ້​ຂະ​ບວນ​ການ​ກໍ່ສ້າງ​ໜ່ວຍ​ພັກ ປອດ​ໃສ ເຂັ້ມແຂງ ໜັກ​ແໜ້ນ ເປັນ​ໜ້າທີ່​ໃຈກາງ ທັງ​ແມ່ນ​ຄວາມ​ຮັບຜິດຊອບ ຂອງ​ການຈັດຕັ້ງ​ພັກ ແຕ່​ລະ​ຂັ້ນ ແລະ ສະມາຊິກ​ພັກ​ແຕ່​ລະ​ສະຫາຍ. ປັດຈຸບັນ, ທົ່ວ​ກອງພັນ​ໃຫຍ່ ມີ​ສະມາຊິກ​ພັກ​ທັງ​ໝົດ 620 ສະ ຫາຍ, ສຳຮອງ 68 ສະຫາຍ, ທຽບ ໃສ່ກອງ​ປະຊຸມໃຫຍ່ຄັ້ງຜ່ານມາ ມີ​ສະມາຊິກ​ພັກ​ເພີ່ມ​ຂຶ້ນ 47,10%, ດ້ານ​ການຈັດຕັ້ງ​ພັກ ມີ 1 ອົງຄະ​ນະ​ພັກ, 5 ຄະນະ​ພັກ​ຮາກ​ຖານ, 5 ໜ່ວຍ​ພັກ​ເອກະລາດ ແລະ 20 ໜ່ວຍ​ພັກ​ຂຶ້ນ​ກັບ​ຄະນະ​ພັກ​ຮາກ​ຖານ, ສາມາດ​ຕີ​ລາຄາ​ແບ່ງ​ປະ ເພດ ສະມາຊິກ​ພັກ​ແຂງ 578 ສະ ຫາຍ, ກາງ 35 ສະຫາຍ, ບໍ່​ໄດ້​ແບ່ງ​ປະເພດ 7 ສະຫາຍ, ມີ​ໜ່ວຍ​ພັກ ປອດ​ໃສ ເຂັ້ມແຂງ ໜັກ​ແໜ້ນ 23 ໜ່ວຍ​ພັກ ທຽບໃສ່​ກອງ​ປະຊຸມ​ໃຫຍ່​ຄັ້ງ​ຜ່ານ​ມາ ເພີ່ມ​ຂຶ້ນ 47,82%, ຄະນະ​ພັກ​ຮາກ​ຖານ ​ແຂງ ມີ 5 ຄະນະ, ໜ່ວຍ​ພັກ​ເອກະລາດ ​ແຂງ 5 ໜ່ວຍ​ພັກ, ໜ່ວຍ​ພັກ​ຂຶ້ນ​ກັບ​ຄະນະ​ພັກ​ຮາກ​ຖານ ແຂງ 18 ໜ່ວຍ​ພັກ ແລະ ກາງ 2 ໜ່ວຍ​ພັກ. ດ້ານ​ວຽກ​ງານ​ຂະຫຍາຍ​ພັກ ຄະນະ​ພັກ ໄດ້​ຖື​ເອົາ​ຄຸນ​ນະ​ພາບ​ເປັນ​ກົກ ໂດຍ​ຜ່ານ​ການ​ກໍ່ສ້າງ ແລະ ທົດ​ສອບ​ໃນ​ຂະ​ບວນ​ການ​ວຽກ​ງານ​ຕົວ​ຈິງ ສາມາດ​ຂະຫຍາຍ​ມະຫາຊົນ​ກ້າວໜ້າເຂົ້າ​ເປັນ​ສະມາຊິກພັກ​ ສຳຮອງ​ໄດ້ 231 ສະຫາຍ, ເລື່ອນ ​ສຳຮອງ ຂຶ້ນ ​ສົມບູນ 200 ສະ ຫາຍ, ຮຽນ​ສະໜັບສະໜູນ 279 ສະຫາຍ ແລະ ຮຽນກົດລະບຽບ ​ພັກ 248 ສະຫາຍ. ວຽກ​ງານ​ຄຸ້ມ​ຄອງ-ປ້ອງ​ກັນ​ພັກ ໄດ້​ເອົາໃຈໃສ່​ຕິດຕາມ, ກວດກາ ແລະ ປ້ອງ​ກັນ​ພັກ ຢ່າງ​ເຂັ້ມ​ງວດ, ໄດ້​ຄຸ້ມ​ຄອງ​ການເຄື່ອນໄຫວ ​ຂອງສະມາຊິກ​ພັກ, ເກັບ​ກຳ​ສະຖິຕິ​ການປ່ຽນ ແປງ​ດ້ານ​ຈຳນວນ​ພົນ, ຄຸນ​ນະ ​ພາບ, ສະຫຼຸບລາຍ​ງານ​ການ ເຄື່ອນໄຫວ​ ຂອງ​ສະມາຊິກ​ພັກ​ແຕ່​ລະ​ໄລຍະ, ສົ່ງ​ເງິນ​ສະຖິຕິ​ພັກ ຕາມ​ກຳນົດ​ເວລາ ແລະ ມອບ​ບັດ​ໃຫ້​ສະມາຊິກ​ພັກ​ສົມບູນ ໄດ້ 2 ງວດ, ມີ 87 ສະຫາຍ ໄປ​ພ້ອມ​ກັນ​ນີ້, ຄະນະ​ພັກ ຍັງ​ໄດ້​ເອົາໃຈໃສ່​ຕໍ່​ວຽກ​ງານ​ພະນັກງານ ເຊິ່ງ​ໄດ້​ຄຸ້ມ​ຄອງ​ການເຄື່ອນໄຫວ​ຂອງ​ພະນັກງານ, ເກັບ​ກຳ​ສະຖິຕິ, ກວດກາ​ຄຸນ​ທາດ​ການເມືອງ, ຄຸນສົມບັດ​ສິນ​ທຳ​ປະຕິວັດ, ຄວາມ​ສາມາດ​ໃນ​ການ​ນຳພາ-ບັນຊາ​ຂອງ​ພະນັກງານ, ຕີ​ລາ ຄາ​ແບ່ງ​ປະເພດ ແລະ ມອບໝາຍ ​ໜ້າທີ່​ໃຫ້​ຮັບຜິດຊອບຕາມ​ລະ ດັບ​ຄວາມ​ຮູ້​ ຄວາມ​ສາມາດຂອງ ແຕ່​ລະ​ສະຫາຍ, ໄດ້ສະເໜີ​ ເລື່ອນ ​ຊັ້ນ, ເລື່ອນ​ທຽບ​ຊັ້ນ​ໃຫ້ພະນັກ ງານ-ນັກຮົບ ທີ່ມີມາດຖານເງື່ອນ ໄຂ​ຄົບ​ຖ້ວນ 615 ສະຫາຍ, ສະ ເໜີປະດັບທຽບຊັ້ນນາຍທະຫານ ໃຫ້​ນັກຮຽນ​ທີ່​ຮຽນ​ຈົບ​ວິຊາ​ສະ ເພາະ​ຈາກ​ສາຍ​ລັດ 56 ສະຫາຍ, ຍົກ​ຂັ້ນ​ເງິນເດືອນ 134 ສະຫາຍ ພ້ອມ​ທັງ​ໄດ້ແຕ່ງຕັ້ງ ​ເປັນ​ຫົວໜ້າ​ຂະແໜງ, ຮອງຫົວໜ້າ​ກອງ ພັນ, ຄະນະ​ກອງຮ້ອຍ ແລະ ພະ ນັກງານ​ຊ່ວຍ​ວຽກ 203 ສະ ຫາຍ, ສົ່ງ​ພະນັກງານໄປ​ບຳ ລຸງ- ກໍ່ສ້າງ ຢູ່​ພາຍ​ໃນ ແລະ ຕ່າງປະ ເທດ 48 ສະຫາຍ, ສາມາດ​ຕີ​ລາຄາພະນັກງານ​ປະເພດ​ແຂງ​ມີ 593 ແລະ ປະເພດ​ກາງ 191 ສະຫາຍ. ສຳລັບ​ທິດ​ທາງ​ແຜນການ​ໃນຕໍ່ໜ້າ​ນີ້, ຄະນະ​ພັກ-ຄະນະບັນ ຊາກອງພັນ​ໃຫຍ່ 641 ຈະ​ສືບຕໍ່​ສ້າງ​ໂອກາດ​ໃຫ້​ສະມາຊິກ​ພັກ-ພະນັກງານ ໄດ້​ຮັບ​ການ​ຄົ້ນຄວ້າ​ຮ່ຳຮຽນ ທິດ​ສະ​ດີ​ມາກ-ເລນິນ, ຈັດ​ຕັ້ງ​ຄົ້ນຄວ້າ​ເຊື່ອມ​ຊຶມ​ມະຕິ, ແນວທາງ​ນະໂຍບາຍ, ກົດ​ລະ ບຽບ ແລະ ນິຕິ​ກຳ​ຕ່າງໆ ຂອງ​ພັກ ເພື່ອ​ເຮັດ​ໃຫ້​ສະມາຊິກ​ພັກ ມີ​ຄວາມ​ໜັກ​ແໜ້ນ​ຕໍ່​ອຸດົມ​ການ​ຂອງ​ພັກ, ບໍລິສຸດ​ຕໍ່​ພັກ, ຕໍ່​ປະເທດ​ຊາດ, ໄດ້​ກະກຽມ​ພະນັກງານ​ໄປ​ເຝິກອົບຮົມ​ວຽກ​ງານ​ຈັດຕັ້ງ ​ພັກ ພ້ອມ​ທັງກະກຽມ​ເປີດ​ອົບ ຮົມ​ກວດ​ສອບເລ​ຂາ-ຮອງ​ເລ ຂາຄະນະ​ພັກ ແລະ ປະຕິບັດລະ ບອບສ່ອງ​ແສງ​ລາຍງານເປັນ​ ປົກກະຕິ, ສືບຕໍ່​ປັບປຸງ​ການຈັດ ຕັ້ງ​ພັກ ແຕ່ລະຂັ້ນໃຫ້​ມີ​ຄວາມ​ໜັກ​ແໜ້ນ​ເຂັ້ມແຂງ​ໃນ​ທຸກ​ດ້ານ, ຊຸກຍູ້​ຂະ​ບວນ​ການ​ກໍ່ສ້າງ​ໜ່ວຍ​ພັກ ປອດ​ໃສ ເຂັ້ມແຂງ ໜັກ​ແໜ້ນ ໃຫ້​ເປັນ​ຂະ​ບວນ​ການຟົດຟື້ນ ແລະ ສະເໜີ​ຂັ້ນ​ເທິງ​ອອກ​ບັດ​ສະມາ ຊິກ​ພັກ​ສົມບູນ ໃຫ້​ບັນລຸຕາມຄາດ ໝາຍ​ທີ່​ວາງ​ໄວ້, ສືບຕໍ່​ການຂະ ຫຍາຍ​ພັກ ໂດຍຖືເອົາ​ຄຸນ​ນະ​ພາບ​ ເປັນ​ກົກໂດຍ​ວາງຄາດໝາຍ ຮອດປີ 2029 ໃຫ້​ສະມາຊິກ​ພັກ​ຂຶ້ນ 200 ກວ່າ​ສະຫາຍ. ດ້ານ ​ວຽກ​ງານພະນັກງານສືບຕໍ່ກໍ່ສ້າງ ​ພະນັກງານ ຕາມ​ທິດຫັນ​ເປັນ​ໜຸ່ມ ດ້ວຍ​ການ​ສົ່ງ​ໄປ​ສຶກ​ສາ​ຮຽນ ເພື່ອ​ ຍົກລະດັບດ້ານ​ວິຊາ​ສະເພາະ ຢູ່​ ຕາມ​ໂຮງຮຽນ​ແຫ່ງ​ຕ່າງໆ ທັງ ພາຍໃນ ແລະ ຕ່າງປະເທດ ແລະ ສູ້​ຊົນ​ແຕ່​ນີ້​ຮອດ​ປີ 2029 ເຮັດ​ໃຫ້​ ທົ່ວ​ກອງພັນ​ໃຫຍ່ 641 ມີນາຍ ທະຫານ​ເພີ່ມ​ຂຶ້ນ 200 ກວ່າ​ສະຫາຍ. ໂດຍ: ນາງ ຍ້ອມ​ເພັດ ວິໄລ​ພັນ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ