ກອງທັບປະຊາຊົນລາວ
 
ວັນພຸດ, ວັນທີ 19 ມິຖຸນາ 2024

  

ມອບ-ຮັບ ໂຄງການກໍ່ສ້າງເດີ່ນອະນຸສອນສະຖານ ທ່ານ ມາ ໄຂຄໍາພິທູນ
ເວລາອອກຂ່າວ: 2024-05-27 15:41:07 | ຜູ້ຂຽນ : admin2 | ຈຳນວນຄົນເຂົ້າຊົມ: 295 | ຄວາມນິຍົມ:



ໃນຕອນເຊົ້າວັນທີ25 ພຶດສະພາ 2024, ທີ່ຫ້ວຍມາລາ ບ້ານໂພນໄຮ ເມືອງເຊໂປນ ແຂວງສະຫວັນນະເຂດ ໄດ້ມີຈັດພິທີມອບ-ຮັບໂຄງການກໍ່ສ້າງ, ຕິດຕັ້ງ ແລະ ຕົບແຕ່ງເດີ່ນອະນຸສອນສະຖານ ທ່ານ ມາ ໄຂຄໍາພິທູນ. ໃຫ້ກຽດເຂົ້າຮ່ວມພິທີດັ່ງກ່າວມີ ທ່ານ ບຸນທອງ ຈິດມະນີ ຮອງປະທານປະເທດ, ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ພ້ອມດ້ວຍບັນດາທ່ານເຈົ້າແຂວງ, ຮອງລັດຖະມົນຕີ, ຄອບຄົວໄຂຄຳພິທູນ, ການນຳ ແລະ ປະຊາຊົນຊາວເມືອງເຊໂປນ ແຂວງສະຫວັນນະເຂດ ເຂົ້າຮ່ວມ. ໃນໂອກາດນີ້, ທ່ານ ທອງສະຫວັດ ໄຂຄໍາພິທູນ ພະນັກງານປະຕິວັດອາວຸໂສບໍານານ ໄດ້ຕາງໜ້າໃຫ້ການນໍາພັກ-ລັດ ແລະ ຄອບຄົວ ໄຂຄໍາພິທູນ ໄດ້ກ່າວມອບອະນຸສອນສະຖານທ່ານ ມາ ໄຂຄຳພິທູນ ໃຫ້ແຂວງສະຫວັນນະເຂດ ເປັນຜູ້ຮັບຜິດຊອບຄຸ້ມຄອງ, ນໍາໃຊ້ໃຫ້ເກີດຜົນປະໂຫຍດສູງສຸດ ພ້ອມທັງ ຍົກໃຫ້ເຫັນຄວາມໝາຍ, ຄວາມສຳຄັນຂອງໂຄງການດັ່ງກ່າວ ໂດຍສະເພາະ ເພື່ອສະແດງຄວາມຮັກ, ຄວາມເຄົາລົບນັບຖື ແລະ ຮູ້ບຸນຄຸນຕໍ່ນັກຮົບປະຕິວັດອາວຸໂສ ທີ່ໄດ້ເສຍສະຫຼະເພື່ອພາລະກິດປະຕິວັດຕະຫຼອດມາ; ທ່ານ ມາ ໄຂຄໍາພິທູນ ແມ່ນໜຶ່ງໃນຜູ້ນໍາອາວຸໂສ ຂອງພັກ ແລະ ຂອງລັດ, ແມ່ນນັກຮົບປະຕິວັດຜູ້ອົງອາດກ້າແກ່ນ, ເດັດດ່ຽວໜຽວແໜ້ນ, ມີນໍ້າໃຈຮັກຊາດ, ຮັກປະຊາຊົນ, ມີຄວາມຈົງຮັກພັກດີຕໍ່ອຸດົມການ ແລະ ພາລະກິດປະຕິວັດຂອງພັກ, ເປັນຜູ້ນໍາທີ່ສະຫຼຽວສະຫຼາດ ປະກອບສ່ວນເຂົ້າໃນການນໍາພາ-ຊີ້ນໍາຂອງພັກ-ລັດ, ເປັນຜູ້ມີຄຸນສົມບັດສິນທໍາປະຕິວັດ ທີ່ບໍລິສຸດຜ່ອງໃສ, ຊື່ສັດບໍລິສຸດຕໍ່ພັກ, ຕໍ່ລັດ, ຕໍ່ປະເທດຊາດ ແລະ ປະຊາຊົນຕະຫຼອດມາ. ສໍາລັບໂຄງການອະນຸສອນສະຖານດັ່ງກ່າວ ມີເນື້ອທີ່ 5 ເຮັກຕາ, ຕັ້ງຢູ່ຫ້ວຍມາລາ, ບ້ານໂພນໄຮ, ເມືອງເຊໂປນ, ແຂວງສະຫວັນນະເຂດ ໄດ້ມີພິທີວາງສີລາຈາລຶກການກໍ່ສ້າງໂຄງການ ໃນວັນທີ19 ສິງຫາ 2023 ທີ່ຜ່ານມາ, ເຊິ່ງມາຮອດວັນທີ25 ພຶດສະພາ 2024 ເປັນໄລຍະເວລາ 10 ເດືອນ ແມ່ນໄດ້ກໍ່ສ້າງສໍາເລັດໂດຍພື້ນຖານ. ສໍາລັບຈຸດປະສົງຂອງການກໍ່ສ້າງ ແມ່ນເພື່ອສ້າງສະຖານທີ່ແຫ່ງນີ້ ໃຫ້ເປັນບ່ອນສຶກສາຮຽນຮູ້ທາງດ້ານປະຫວັດສາດ, ຄຸນສົມບັດສິນທໍາປະຕິວັດ ແລະ ແບບຢ່າງອັນດີງາມ ຂອງນັກຮົບປະຕິວັດອັນກ້າແກ່ນ ແລະ ເດັດດ່ຽວໜຽວແໜ້ນ ໃຫ້ຄົນຮຸ່ນສືບທອດ. ພ້ອມດຽວກັນ ຍັງສ້າງເພື່ອໃຫ້ເປັນແຫຼ່ງທ່ອງທ່ຽວທາງດ້ານປະຫວັດສາດ ແລະ ວັດທະນະທຳ ຂອງເມືອງເຊໂປນ, ແຂວງສະຫວັນນະເຂດ ອີກດ້ວຍ. ໃນໂອກາດດຽວກັນ, ທ່ານ ເຈົ້າແຂວງສະຫວັນນະເຂດ ໄດ້ຕາງໜ້າໃຫ້ຄະນະພັກ, ອົງການປົກຄອງ ແລະ ປະຊາຊົນບັນດາເຜົ່າຊາວແຂວງສະຫວັນນະເຂດ ກ່າວຮັບເອົາໂຄງການດັ່ງກ່າວ ພ້ອມທັງ ໃຫ້ຄໍາໝັ້ນສັນຍາວ່າ ຈະສືບຕໍ່ຄຸ້ມຄອງບົວລະບັດ, ປົກປັກຮັກສາ, ເສີມຂະຫຍາຍຄຸນປະໂຫຍດ ຂອງອະນຸສອນສະຖານດັ່ງກ່າວ ເຂົ້າໃນການສຶກສາອົບຮົມ, ປູກຈິດສໍານຶກໃຫ້ແກ່ຮຸ່ນສືບທອດໄດ້ຮຽນຮູ້ ກ່ຽວກັບມູນເຊື້ອປະຫວັດສາດອັນດີງາມຂອງຊາດ ເວົ້າລວມ, ເວົ້າສະເພາະ ແມ່ນຄຸນງາມຄວາມດີ ແລະ ຜົນງານອັນໃຫຍ່ຫຼວງ ຂອງທ່ານ ມາ ໄຂຄໍາພິທູນ ທີ່ໄດ້ອຸທິດຕົນຕະຫຼອດຊີວິດເພື່ອປະເທດຊາດ, ເພື່ອປະຊາຊົນ ແລະ ການປະຕິວັດໃຫ້ຍືນຍົງຄົງຕົວຕະຫຼອດເຊັ່ນລູກເຊັ່ນຫຼານຕໍ່ໆໄປ. ໃນຕອນທ້າຍຂອງພິທີ, ບັນດາທ່ານ ການນຳຂັ້ນສູງຂອງພັກ-ລັດ ທີ່ເຂົ້າຮ່ວມພິທີຄັ້ງນີ້ ໄດ້ຕັດແຖບຜ້າ, ລັ່ນຄ້ອງ 9 ບາດ ເພື່ອເປັນສິລິມຸງຄຸນແກ່ໂຄງການດັ່ງກ່າວ, ພ້ອມທັງປູກຕົ້ນໄມ້ເປັນທີ່ລະນຶກໃນອະນຸສອນສະຖານແຫ່ງນີ້ຕື່ມອີກ. ພາບ ແລະ ຂ່າວໂດຍ: ກົມປະຊາສຳພັນ, ຫສນຍ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ