ວັນພະຫັດ, ວັນທີ 05 ທັນວາ 2024
ວຽກງານກອງທຶນ ຂອງພະແນກຊາວໜຸ່ມ ວປກ ມີທ່າຂະຫຍາຍຕົວດີ
ເວລາອອກຂ່າວ: 2024-04-10 09:26:08 | ຜູ້ຂຽນ : admin1 | ຈຳນວນຄົນເຂົ້າຊົມ: 1275 | ຄວາມນິຍົມ: 
ສະຫາຍ ພັນໂທ ນາງ ມະນີພອນ ພົມມະຈັນ ຮອງຫົວໜ້າກົມການເມືອງ, ຜູ້ຊີ້ນຳອົງການຈັດຕັ້ງມະຫາຊົນ ວິທະຍາຄານປ້ອງກັນຊາດ ໄກສອນ ພົມວິຫານ (ວປກ) ໃຫ້ຮູ້ໃນກອງປະຊຸມສະຫຼຸບວຽກງານກອງທຶນ, ປັນຜົນ ປະຈຳປີ 2023 ແລະ ວາງທິດທາງແຜນການ ປະຈຳປີ 2024 ນີ້ ວ່າ: ຄະນະພັກ-ຄະນະບັນຊາແຕ່ລະຂັ້ນ ກໍຄືພະແນກຊາວໜຸ່ມ ແລະ ຄະນະບໍລິຫານຊາວໜຸ່ມແຕ່ລະກົມກອງ ໄດ້ເອົາໃຈໃສ່ປຸກລະດົມ, ຊຸກຍູ້ການເຄື່ອນໄຫວ ແລະ ໃຫ້ຄວາມໝາຍສຳຄັນ ຕໍ່ວຽກງານກອງທຶນຂອງຊາວໜຸ່ມ ເຮັດໃຫ້ສະມາຊິກຊາວໜຸ່ມ, ໄວໜຸ່ມເຊື່ອມຊຶມກຳແໜ້ນຢ່າງເລິກເຊິ່ງ ແລະ ຫັນມາເຂົ້າຮ່ວມ ກອງທຶນນັບມື້ເພີ່ມຂຶ້ນ, ບວກກັບຄະນະຮັບຜິດຊອບກອງທຶນໄດ້ຍົກສູງຄວາມຮັບຜິດຊອບຂອງຕົນເຂົ້າໃນການບໍລິ
ຫານກອງທຶນ ດ້ວຍຄວາມໂປ່ງໃສ ເພື່ອຮັບປະກັນໃຫ້ແກ່ການບໍລິຫານກອງທຶນມີຄວາມເປັນເອກະພາບ, ຖືກຕ້ອງຕາມແຕ່ລະຂັ້ນຕອນ ແລະ ແທດເໝາະກັບສະພາບຄວາມເປັນຈິງຂອງກອງທຶນນັ້ນ, ຄະນະຮັບຜິດຊອບກອງທຶນດັ່ງກ່າວ ຈຶ່ງໄດ້ວາງຂໍ້ກຳນົດ, ກົດລະບຽບເພື່ອເປັນບ່ອນອີງໃຫ້ແກ່ການເຄື່ອນໄຫວໃນການຄຸ້ມຄອງ-ບໍລິຫານກອງທຶນ ໃຫ້ມີຄວາມຮັດກຸມ, ຖືກຕ້ອງ ຕາມຂໍ້ກຳນົດ, ກົດລະບຽບ ແລະ ສາມາດກວດສອບໄດ້, ຈິ່ງເຮັດໃຫ້ກອງທຶນນັບມື້ເຕີບໃຫຍ່ຂະຫຍາຍ ຕົວຢ່າງຕໍ່ເນື່ອງ. ມາຮອດປັດຈຸບັນມີສະມາຊິກຊາວໜຸ່ມເຂົ້າຮ່ວມກອງທຶນທັງໝົດຈຳນວນ 572 ສະຫາຍ ໃນຈຳນວນສະມາຊິກຊາວໜຸ່ມທັງໝົດຈາກ 18 ຫົວໜ່ວຍກົມກອງ, ມີເງິນກອງທຶນສະສົມຕົວຈິງຈຳນວນ 470.733.000 ກີບ ໂດຍເງິນຈຳນວນດັ່ງກ່າວ ໄດ້ປ່ອຍກູ້ໃຫ້ສະມາຊິກກອງທຶນ ກໍຄືສະມາຊິກຊາວໜຸ່ມກູ້ຢືມໄປສ້າງເສດຖະກິດ, ແກ້ໄຂຊີວິດການເປັນຢູ່ໃນຄອບຄົວ ແລະ ລວມໝູ່, ເຮັດທຸລະກິດສ່ວນຕົວທີ່ບໍ່ຜິດຕໍ່ກົດໝາຍ, ຢືມໄປໃຊ້ຈ່າຍໃນຍາມເຈັບເປັນ, ເປັນທຶນການສຶກສາ ແລະ ອື່ນໆ ເຊິ່ງໄດ້ເຮັດໃຫ້ຊີວິດການເປັນຢູ່ຂອງສະມາຊິກກອງທຶນດີຂຶ້ນເທື່ອລະກ້າວ.
ສ່ວນເງື່ອນໄຂຂອງການກູ້ຢືມຖ້າແມ່ນສະມາຊິກຊາວໜຸ່ມທີ່ເປັນສະມາຊິກກອງທຶນ ຈະຄິດ ໄລ່ດອກເບ້ຍ 2% ຕໍ່ເດືອນ, ຖ້າບໍ່ແມ່ນສະມາຊິກກອງທຶນກໍສາມາດຢືມໄດ້ແຕ່ຈະຄິດໄລ່ດອກເບ້ຍ 3% ຕໍ່ເດືອນ ແຕ່ຕ້ອງມີຫຼັກຊັບຄ້ຳປະກັນ, ຜ່ານການປ່ອຍເງິນໃຫ້ສະມາຊິກກອງທຶນກູ້ຢືມໃນປີ 2023 ຜ່ານມາ ສາມາດສ້າງລາຍຮັບຈາກດອກເບ້ຍການປ່ອຍກູ້ໄດ້ຈຳນວນ 36.817000 ກີບ ພ້ອມນີ້ກໍໄດ້ແບ່ງປັນຜົນປີ 2023 ມີ 6 ພາກສ່ວນຄື: ແບ່ງໃຫ້ສະມາຊິກກອງທຶນ 70%, ແບ່ງໃຫ້ສະຫວັດດີການ 11%, ແບ່ງໃຫ້ຄະນະຮັບຜິດຊອບຂັ້ນໜ່ວຍ 8%, ແບ່ງໃຫ້ຄະນະຮັບຜິດຊອບຂັ້ນພະແນກ 6%, ແບ່ງໃຫ້ຄັງແຮຊຳຮອງ 3% ແລະ ແບ່ງໃຫ້ຄະນະທີ່ປຶກສາ 2%. ທັງໝົດທີ່ກ່າວມານັ້ນ ແມ່ນໝາກຜົນແຫ່ງການຊີ້ນຳຂອງຄະນະກອງທຶນຊາວໜຸ່ມແຕ່ລະຂັ້ນໄດ້ຮັບການພັດທະນາດີຂຶ້ນເປັນກ້າວໆ.
ໂດຍ: ສາວີວັນ ວົງຄຳຊາວ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
