ວັນພະຫັດ, ວັນທີ 05 ທັນວາ 2024
ໂຮງຮຽນກໍ່ສ້າງນາຍສິບເລກ 2 ວຽງໄຊ ຈັດຕັ້ງຮັບຟັງເລົ່າຄືນມູນເຊື້ອວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 63 ປີ
ເວລາອອກຂ່າວ: 2024-04-01 12:42:16 | ຜູ້ຂຽນ : admin2 | ຈຳນວນຄົນເຂົ້າຊົມ: 1854 | ຄວາມນິຍົມ: 
ໃນວັນທີ29 ມີນາ 2024 ນີ້, ຢູ່ທີ່ສະໂມສອນໂຮງຮຽນກໍ່ສ້າງນາຍສິບເລກ 2 ວຽງໄຊ ໄດ້ຈັດຕັ້ງຮັບຟັງປາຖະກະຖາຫວນຄືນມູນເຊື້ອວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 63 ປີ (5 ເມສາ 1961-5 ເມສາ 2024) ໂດຍການເລົ່າຄືນມູນເຊື້ອ ຂອງ ສະຫາຍ ພົນຈັດຕະວາ ສີພັນ ວົງເຮືອງຄຳ ພະນັກງານອາວຸໂສບຳນານ ອາດີດຫົວໜ້າກອງບັນຊາການ ປກສ ແຂວງຈຳປາສັກ, ມີສະຫາຍ ພັນເອກ ພູເວີນ ວົງຄຳຊາວ ຫົວໜ້າການເມືອງໂຮງຮຽນ ພ້ອມຄະນະ, ມີຄະນະກຳມະການປ້ອງກັນຊາດ-ປ້ອງກັນຄວາມສະຫງົບແຂວງຈຳປາສັກ, ມີຄະນະພັກ-ຄະນະບັນຊາຫ້ອງການ, ຕະຫຼອດຮອດ ພະນັກງານຫຼັກແຫຼ່ງທົ່ວໂຮງຮຽນ ເຂົ້າຮ່ວມ.
ສະຫາຍ ພົນຈັດຕະວາ ສີພັນ ວົງເຮືອງຄໍາ ພະນັກງານອາວຸໂສບໍານານ ອາດີດຫົວໜ້າກອງບັນຊາການ ປກສ ແຂວງຈຳປາສັກ, ໄດ້ເລົ່າຄືນການກໍາເນີດເຕີບໃຫຍ່ຂະຫຍາຍຕົວຂອງກໍາລັງປ້ອງກັນຄວາມສະຫງົບ ຕະຫຼອດໄລຍະ 63 ປີທີ່ຜ່ານມາ ເຊິ່ງເປັນວັນປະຫວັດສາດທີ່ສຳຄັນຢ່າງຍິ່ງຂອງຊາດ-ຂອງພັກ ເວົ້າລວມ-ເວົ້າສະເພາະ ກໍ່ແມ່ນວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ນັບແຕ່ໄດ້ຮັບການສ້ງາຕັ້ງຂຶ້ນມາ ກຳລັງປ້ອງກັນຄວາມສະຫງົບ ແມ່ນໄດ້ປະກອບສ່ວນຜົນງານຢ່າງໃຫຍ່ຫຼວງໃນພາລະກິດປົດປ່ອຍຊາດ, ເປັນກຳລັງປະຈັນບານປະເຊີນໜ້າໂດຍກົງ, ເປັນກຳລັງທີ່ມີມູນເຊື້ອກໍ່ສ້າງຮາກຖານການເມືອງ ຕິດພັນສະໜິດແໜ້ນກັບປະຊາຊົນ, ປ້ອງກັນຜູ້ນຳພັກ-ລັດ ຢ່າງເດັດດ່ຽວ ນາຍ ແລະ ພົນຕຳຫຼວດ ທຸກຮຸ້ນໃນແຕ່ລະໄລຍະໄດ້ກາຍເປັນກໍາລັງທີ່ຈົ່ງຮັກພັກດີຕໍ່ປະເທດຊາດ ແລະ ປະຊາຊົນບັນດາເຜົ່າ, ເປັນກຳລັງທີ່ຢູ່ໃຕ້ການຊີ້ນຳ ນໍາພາຢ່າງເດັດຂາດ, ໂດຍກົງ, ຮອບດ້ານຂອງພັກປະຊາຊົນ ປະຕິວັດລາວ ທີ່ມີກຽດສະຫງ່າງາມ ໄດ້ອຸທິດເລືອດເນື້ອ, ເຫື່ອແຮງເພື່ອຄວາມສະຫງົບສຸກຂອງປະຊາຊົນລາວບັນດາເຜົ່າຕະຫຼອດມາ.
ພາຍຫຼັງທີ່ປະເທດຊາດໄດ້ຮັບການປົດປ່ອຍຢ່າງເປັນທາງການກໍ່ຄືໃນວັນທີ2 ທັນວາ 1975 ເປັນຕົ້ນມາ, ເຊິ່ງແມ່ນຢູ່ໃນໄລຍະປົກປັກຮັກສາ ແລະສ້າງສາພັດທະນາປະເທດຊາດ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງສະພາບການໃໝ່, ກຳລັງປ້ອງກັນຄວາມສະຫງົບ ກໍ່ໄດ້ປັບປຸງຢ່າງຮອບດ້ານຢູ່ຂັ້ນຮາກຖານໄດ້ຈັດຕັ້ງແນວຮົບປ້ອງກັນຊາດ-ປ້ອງກັນຄວາມສະຫງົບຢູ່ຂັ້ນທ້ອງຖິ່ນຢ່າງແໜ້ນໜາ, ປັບປຸງຍົກສູງຄຸນນະພາບຂອງບັນດາກຳລັງປະກອບອາວຸດປະຊາຊົນ, ເດັດດ່ຽວທັບມ້າງທຸກກົນອຸບາຍການເຄື່ອນໄຫວມ້າງເພທຳລາຍຂອງສັດຕູ ແລະ ປົກປັກຮັກສາປະເທດຊາດໄດ້ຢ່າງໝັ້ນຄົງພ້ອມທັງມີຜົນງານຫຼາຍດ້ານຈົນມາຮອດປະຈຸບັນ. ຕອນທ້າຍ ສະຫາຍ ພັນເອກ ພູເວີນ ວົງຄຳຊາວ ຫົວໜ້າການເມືອງໂຮງຮຽນ ໄດ້ມອບກະຕ່າຂອງຂວັນໃຫ້ທ່ານຕື່ມອີກ.
ໂດຍ : ຄຳແປງ ຟອງສາຍໄໝ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
