ກອງທັບປະຊາຊົນລາວ
 
ວັນພະຫັດ, ວັນທີ 22 ກຸມພາ 2024

  

ໂຮງຮຽນ 307 ສະຫຼຸບວຽກງານຮອບດ້ານປະຈໍາປີ 2023 ແລະ ວາງທິດທາງແຜນການປະຈໍາປີ 2024
ເວລາອອກຂ່າວ: 2024-02-12 14:55:34 | ຜູ້ຂຽນ : admin2 | ຈຳນວນຄົນເຂົ້າຊົມ: 319 | ຄວາມນິຍົມ:



ໃນວັນທີ 8 ກຸມພາ 2024 ນີ້, ໂຮງຮຽນ307 ໄດ້ສະຫຼຸບວຽກງານຮອບດ້ານປະຈໍາປີ 2023 ແລະ ວາງທິດທາງແຜນການປະຈໍາປີ 2024 ແລະ ມອບໃບຢັ້ງຢືນກອງປອດໃສ, ປອດໄພ, ປອດຄະດີ, ໂດຍພາຍໃຕ້ການເປັນປະທານຂອງ ສະຫາຍ ພົນຈັດຕະວາ ຄໍາເຫຼັກ ວົງດອນໄຊ ຫົວໜ້າກົມກົດລັບ ກົມໃຫຍ່ເສນາທິການກອງທັບ, ເຂົ້າຮ່ວມມີ ສະຫາຍ ພັນໂທ ສຸດທະນູສັກ ແສງຈອມຄໍາ ຫົວໜ້າພະແນກປ້ອງກັນພາຍໃນຫ້ອງການເມືອງ ກົມໃຫຍ່ເສນາທິການກອງທັບ, ມີຄະນະພັກ-ຄະນະບັນຊາ, ພະແນກການ, ກອງພັນ 302 ແລະ ພະນັກງານ-ນັກຮົບທົ່ວກົມກອງເຂົ້າຮ່ວມ. ສະຫາຍ ພັນໂທ ບຸນສະຫຼອງ ວິໄລຫານ ຫົວໜ້າການທະຫານໂຮງຮຽນ307 ໄດ້ຂຶ້ນລາຍງານການເຄື່ອນໄຫວວຽກງານຮອບດ້ານປະຈໍາປີ 2023 ແລະ ວາງທິດທາງແຜນການປະຈໍາປີ 2024 ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກ, ເຊິ່ງຄະນະພັກ-ຄະນະບັນຊາໂຮງຮຽນ307 ໄດ້ເອົາໃຈໃສ່ຊີ້ນໍາ-ນໍາພາລົງເລິກບັນດາວຽກງານຕ່່າງໆຂອງແຕ່ລະພະແນກການທີ່ຂຶ້ນກັບໂຮງຮຽນຢ່າງໃກ້ຊິດຕິດແທດໂດຍຖືເອົາວຽກງານສຶກສາອົບຮົມການເມືອງນໍາພາ-ແນວຄິດເປັນກົກ, ນໍາເອົາບັນດາມະຕິຕ່າງໆຂອງພັກ, ກົດໝາຍຂອງລັດ, ຂໍ້ກໍານົດກົດລະບຽບຂອງກອງທັບ ມາຈັດຕັ້ງເຜີຍແຜ່ເຊື່ອມຊຶມໃຫ້ພະນັກງານ-ນັກຮົບທົ່ວກົມກອງເຮັດໃຫ້ມີຄຸນທາດການເມືອງໜັກແໜ້ນ, ເຊື່ອໝັ້ນຕໍ່ການນໍາພາຂອງພັກ-ລັດ, ມີຄວາມຫ້າວຫັນໃນການປະຕິບັດໜ້າທີ່ວຽກງານຂອງຕົນ ພ້ອມນັ້ນກໍ່ໄດ້ສຸມໃສ່ຊີ້ນໍາ-ນໍາພາຈັດຕັ້ງປະຕິບັດໜ້າທີ່ວຽກງານວິຊາສະເພາະ, ອົບຮົມ-ຫັດແອບໃຫ້ນັກຮຽນກໍ່ສ້າງທັງ 3 ລະບົບພ້ອມທັງຈັດຕັ້ງສອບເສັງປິດຊຸດຮຽນ ແລະ ມອບໃບປະກາດໃຫ້ນັກຮຽນໄດ້ຕາມແຜນການທີ່ວາງໄວ້, ນອກນີ້ຍັງໄດ້ສຸມໃສ່ວຽກງານພະລາທິການ-ເຕັກນິກ, ວຽກງານເພີ່ມພູນຜະລິດຜົນປູກຝັງ- ລ້ຽງສັດເພື່ອແກ້ໄຂຊີວິດການເປັນຢູ່ຂອງກົມກອງໃຫ້ດີຂຶ້ນ ຕາມທ່າແຮງບົ່ມຊ້ອນຂອງກົມກອງເພື່ອປ້ອນເຂົ້າເຮືອນຄົວລວມ ແລະ ຂາຍຕາມທ້ອງຕະຫຼາດໃນ 1 ປີຜ່ານມາສາມາດສະໜອງພືດຜັກລົ້ມລຸກຕາມລະດູການເຂົ້າເຮືອນຄົວລວມ ແລະ ຂາຍໃຫ້ທ້ອງຕະຫຼາດໄດ້ 24.000 ກິໂລ ຄິດເປັນເງິນ 120.000.000 ກີບ, ຂ້າໝູຂາຍໄດ້ 16 ໂຕ ເປັນກໍາໄລ 9.400.000 ກີບ, ຂາຍສັດປີກທຸກຊະນິດ 2.584 ກິໂລ ຄິດເປັນເງິນ 165.542.000 ກີບ, ຂາຍປາເຂົ້າເຮືອນຄົວລວມ 266 ກິໂລ ຄິດເປັນເງິນ 8.478.000 ກີບ, ຂາຍກົບ 341 ກິໂລ ຄິດເປັນເງິນ 17.044.000 ກີບ, ຂາຍງົວ 6 ໂຕ ຄິດເປັນເງິນ 25.900.000 ກີບ, ຂະແໜງຊາວໜຸ່ມສ້າງລາຍຮັບໄດ້ 99.575.000 ກີບ, ເອື້ອຍນ້ອງສະຫະພັນແມ່ຍິງສ້າງລາຍຮັບໄດ້ 147.193.000 ກີບ ແລະ ລາຍຮັບຈາກເງິນຫ່ວງບໍລິຫານຕ່າງໆ 127.080.000 ກີບ ລວມລາຍຮັບທັງໝົດ 720.212.000 ກີບ ຈາກນັ້ນກອງປະຊຸມກໍ່ໄດ້ມີພິທີມອບຮັບໃບຢັ້ງຢືນກອງປອດໃສ, ປອດໄພ, ປອດຄະດີ, ປະເພດ I ໃຫ້ບັນດາພະແນກການ, ກອງພັນ302 ທີ່ຂຶ້ນກັບໂຮງຮຽນ307 ຢ່າງສົມກຽດ. ໂອກາດນີ້, ສະຫາຍ ພົນຈັດຕະວາ ຄໍາເຫຼັກ ວົງດອນໄຊ ຫົວໜ້າກົມກົດລັບ ກົມໃຫຍ່ເສນາທິການກອງທັບ ກໍ່ໄດ້ໃຫ້ກຽດໂອ້ລົມ ແລະ ເນັ້ນໜັກໃຫ້ຄະນະພັກ-ຄະນະບັນຊາແຕ່ລະຂັ້ນເອົາໃຈໃສ່ສຶກສາອົບຮົມວຽກງານການເມືອງ-ນໍາພາແນວຄິດໃຫ້ພະນັກງານ, ສະມາຊິກພັກ ແລະ ນັກຮົບພາຍໃນກົມກອງໃຫ້ຍົກສູງຄວາມຮັບຜິດຊອບເຂົ້າໃນໜ້າທີ່ການເມືອງ, ມີແບບແຜນວິທີເຮັດວຽກ ແລະ ແບບແຜນດໍາລົງຊີວິດທີ່ປອດໃສຂາວສະອາດ, ຕັ້ງໜ້າເຝິກຝົນຫຼໍ່ຫຼອມຕົນເອງໃຫ້ມີຄຸນສົມບັດສິນທໍາປະຕິວັດ, ດຸໝັ່ນຄົ້ນຄວ້າຮໍ່າຮຽນການເມືອງ, ການທະຫານ, ພະລາທິການ ແລະ ເຕັກນິກ ເພື່ອໃຫ້ສາມາດນໍາໃຊ້ເຂົ້າໃນໜ້າທີ່ວຽກງານຂອງຕົນໄດ້ຢ່າງມີຄຸນນະພາບ ແລະ ສຸມເຫື່ອແຮງເຂົ້າໃນຂະບວນການກໍ່ສ້າງກອງປອດໃສ, ປອດໄພ, ປອດຄະດີ, ໃນປີຕໍ່ໄປໃຫ້ໄດ້ຮັບຜົນສໍາເລັດຕາມຄາດໝາຍທີ່ວາງໄວ້. ໂດຍ:ແກ່ນຕາ ສີລິລາດ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ