ກອງທັບປະຊາຊົນລາວ

ວັນຈັນ, ວັນທີ 06 ກຸມພາ 2023



ກອງ​ປະຊຸມ​ລາຍ​ງານ​ການ​ກະກຽມ​ຄວາມ​ພ້ອມ​ເປັນ​ເຈົ້າພາບ ແລະ ປະທານ​ອາ​ຊຽນ
ເວລາອອກຂ່າວ: 2023-01-25 09:22:13 | ຜູ້ຂຽນ : admin2 | ຈຳນວນຄົນເຂົ້າຊົມ: 13 | ຄວາມນິຍົມ:



ໃນ​ວັນ​ທີ 24 ມັງກອນ 2023 ນີ້, ຢູ່​ທີ່​ສະໂມສອນ ຫ້ອງ​ວ່າການ​ກະຊວງ​ປ້ອງ​ກັນ​ປະເທດ ໄດ້​ຈັດ​ກອງ​ປະຊຸມ ລາຍ​ງານ​ຄວາມ​ຄືບ​ໜ້າ​ໃນ​ການ​ກະກຽມ​ຄວາມ​ພ້ອມ​ໃຫ້​ແກ່​ການ​ເປັນ​ເຈົ້າພາບ ແລະ ປະທານ​ອາ​ຊຽນ ຂອງ​ກອງທັບ​ປະຊາຊົນ​ລາວ ໃນ​ປີ 2024, ໂດຍ​ການ​ເປັນ​ປະທານ​ຂອງ ສະຫາຍ ພົນ​ຕີ ວົງ​ຄຳ ພົມ​ມະກອນ ຮອງ​ລັດຖະມົນຕີ​ກະຊວງ​ປ້ອງ​ກັນ​ປະເທດ, ມີ​ສະຫາຍ ພົນ​ຕີ ສາຍໃຈ ກົມ​ມະ​ສິດ ຫົວໜ້າ​ຫ້ອງ​ວ່າການ​ກະຊວງ​ປ້ອງ​ກັນ​ປະເທດ ແລະ ບັນດາ​ຄະນະ​ກຳມະການ, ອາ​ນຸ​ກຳມະການ​ຮັບຜິດຊອບ​ວຽກ​ງານ​ຕ່າງໆເຂົ້າ​ຮ່ວມ. ສະຫາຍ ພັນ​ໂທ ທວນ​ຄຳ ສຸກ​ຈະເລີນ ຫົວໜ້າ​ພະແນກການ​ເມືອງ ແລະ ຄວາມ​ໝັ້ນຄົງ​ອາ​ຊຽນ, ກົມ​ພົວພັນ​ຕ່າງປະເທດ ກະຊວງປ້ອງກັນປະເທດ ໄດ້​ຂຶ້ນ​ລາຍ​ງານ​ແຜນການ ໃນ​ການ​ກະກຽມ​ຄວາມ​ພ້ອມ​ໃຫ້​ແກ່​ການ​ເປັນ​ເຈົ້າພາບ ແລະ ເປັນ​ປະທານ​ອາ​ຊຽນ ຂອງ​ກອງທັບ​ປະຊາຊົນ​ລາວ​ໃນ​ປີ 2024 ເຊິ່ງ​ໃນ​ນັ້ນ​ປະກອບ​ມີ: ຂັ້ນ​ວິຊາ​ການ ມີ​ກອງ​ປະຊຸມ​ວິຊາ​ການ​ເຈົ້າ​ໜ້າທີ່​ອາວຸໂສ​ປ້ອງ​ກັນ​ຊາດ​ປະເທດ​ອາ​ຊຽນ, ກອງ​ປະຊຸມ​ວິຊາ​ການ​ເຈົ້າ​ໜ້າທີ່​ອາວຸໂສ​ປ້ອງ​ກັນ​ຊາດ​ປະເທດ​ອາ​ຊຽນ-ບວກ, ກອງ​ປະຊຸມ​ປືກ​ສາ​ຫາລື​ເຈົ້າ​ໜ້າທີ່​ປ້ອງ​ກັນ​ຊາດ​ໃນ​ຂອບ​ເວທີພາກ​ພື້ນ​ອາ​ຊຽນ, ກອງ​ປະຊຸມ​ໜ່ວຍ​ງານ​ຜູ້​ຊ່ຽວຊານ​ໃນ​ຂອບ​ກອງ​ປະຊຸມ​ລັດຖະມົນຕີ​ປ້ອງ​ກັນ​ປະເທດ​ອາ​ຊຽນ-ບວກ, ຂັ້ນ​ຫ້ອງ​ວ່າການ ແລະ ຫົວໜ້າ​ກົມ ມີ: ກອງ​ປະຊຸມ​ວິຊາ​ການ​ເຈົ້າ​ໜ້າທີ່​ອາວຸໂສ​ປ້ອງ​ກັນ​ຊາດ​ປະເທດ​ອາ​ຊຽນ, ກອງ​ປະຊຸມ​ວິຊາ​ການ​ເຈົ້າ​ໜ້າທີ່​ອາວຸໂສ​ປ້ອງ​ກັນ​ຊາດ​ປະເທດ​ອາ​ຊຽນ-ບວກ, ກອງ​ປະຊຸມ​ຫົວໜ້າ​ສືບ​ຂ່າວ​ທະຫານ​ອາ​ຊຽນ, ກອງ​ປະຊຸມ​ຫົວໜ້າ​ສູ້​ຮົບ​ອາ​ຊຽນ, ກອງ​ປະຊຸມ​ນະໂຍບາຍ ແລະ ຄວາມ​ໝັ້ນຄົງ ໃນ​ຂອບ​ເຂດ​ເວທີ​ອາ​ຊຽນ, ກອງ​ປະຊຸມ​ປະຈຳ​ປີ ເຄືອ​ຂ່າຍ​ສະ​ຖາ​ບັນ​ປ້ອງ​ກັນ​ຊາດ ແລະ ຄວາມ​ໝັ້ນຄົງ​ອາ​ຊຽນ ແລະ ກອງ​ປະຊຸມເຄືອ​ຂ່າຍ​ສະ​ຖາ​ບັນ​ປ້ອງ​ກັນ​ຊາດ ແລະ ຄວາມ​ໝັ້ນຄົງ​ອາ​ຊຽນ​ວົງ​ແຄບ, ຂັ້ນ​ລັດຖະມົນຕີ ແລະ ຫົວໜ້າ​ກົມ​ໃຫຍ່​ເສນາ: ມີ​ກອງ​ປະຊຸມ​ລັດຖະມົນຕີ​ປ້ອງ​ກັນ​ປະເທດ​ອາ​ຊຽນ, ກອງ​ປະຊຸມ​ລັດ​ຖະ​ມົນ​ປ້ອງ​ກັນ​ປະເທດ​ອາຊຽນ-ບວກ, ກອງ​ປະຊຸມ​ລັດຖະມົນຕີ​ປ້ອງ​ກັນ​ປະເທດ​ອາ​ຊຽນ​ວົງ​ແຄບ, ກອງ​ປະຊຸມ​ບໍ່​ເປັນ​ທາງ​ການລັດຖະມົນຕີ​ປ້ອງ​ກັນ​ປະເທດ​ອາ​ຊຽນ+1 ແລະ ກອງ​ປະຊຸມ​ຜູ້​ບັນຊາ​ການ​ທະຫານ​ສູງ​ສຸດ​ອາ​ຊຽນ. ພ້ອມ​ດຽວ​ກັນ​ນັ້ນ, ບັນດາ​ຄະນະ​ກຳມະການ, ອະນຸ​ກຳມະການ​ຮັບຜິດຊອບ​ວຽກ​ງານ​ຕ່າງໆ ກໍໄດ້​ຜັດປ່ຽນ​ກັນ​ຂື້ນ​ລາຍ​ງານ​ຄວາມ​ຄືບ​ໜ້າ​ໃນ​ການ​ກະກຽມ​ຄວາມ​ພ້ອມ​ແຕ່​ລະ​ໜ້າ​ວຽກ​ຂອງ​ຕົນ. ໂອກາດ​ນີ້, ສະຫາຍປະທານ ກໍ​ໄດ້​ໃຫ້​ທິດ​ຊີ້​ນຳ​ຕໍ່ຄະນະ​ກຳມະການ​ຮັບຜິດຊອບ​ວຽກ​ງານ​ດ້ານ​ຕ່າງໆ​ທີ່​ໄດ້​ຮັບ​ການ​ແຕ່ງຕັ້ງ ແລະ ມອບ​ໝາຍ ຈົ່ງ​ພ້ອມ​ກັນ​ກະກຽມ ແລະ ສືບຕໍ່​ດຳເນີນ​ຕາມ​ແຜນການ ເປັນຕົ້ນ​ແມ່ນ ດ້ານ​ງົບປະມານ, ພາຫະນະ​ເຕັກນິກ, ສະຖານທີ່​ພັກ ແລະ ເຄື່ອງຮັບ​ໃຊ້​ວຽກ​ງານ​ຕ່າງໆ, ປະສານ​ສົມທົບ​ກັບ​ບັນດາ​ປະເທດ​ອາ​ຊຽນ​ໃນ​ການ​ພົວພັນ​ວຽກ​ງານ ເພື່ອ​ເຮັດ​ໃຫ້ການ​ເປັນ​ເຈົ້າພາບ ແລະ ປະທານ​ອາ​ຊຽນ​ຂອງ​ກອງທັບ​ປະຊາຊົນ​ລາວ ໃນ​ປີ 2024 ນີ້​ໃຫ້​ໄດ້​ຮັບ​ໝາກຜົນ​ສູງ. ໂດຍ: ອາ​ນຸ​ສອນ ສິມ​ວົງສາ




 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ