ກອງທັບປະຊາຊົນລາວ

ວັນຈັນ, ວັນທີ 06 ກຸມພາ 2023



ກອງພົນທີ 5 ເຜີຍແຜ່ຜົນສຳເລັດກອງປະຊຸມວຽກງານກໍ່ສ້າງຮາກຖານການເມືອງ- ພັດທະນາຊົນນະບົດຮອບດ້ານ ແລະ ວຽກງານ 3 ສ້າງ
ເວລາອອກຂ່າວ: 2023-01-25 08:41:41 | ຜູ້ຂຽນ : admin2 | ຈຳນວນຄົນເຂົ້າຊົມ: 466 | ຄວາມນິຍົມ:



ໃນ​ວັນ​ທີ 24 ມັງກອນ 2023 ນີ້. ກອງ​ພົນ​ທີ 5 ໄດ້​ຈັດ​ຕັ້ງ​ເຜີຍແຜ່​ເຊື່ອມ​ຊືມ​ຜົນສຳເລັດ​ກອງ​ປະຊຸມ​ວຽກ​ງານ​ກໍ່ສ້າງ​ຮາກ​ຖານ​ການເມືອງ ຕິດ​ພັນ​ກັບ​ວຽກ​ງານ​ພັດທະນາ​ຊົນນະບົດ​ຮອບດ້ານ ແກ້​ໄຂ​ຄວາມທຸກ​ຍາກ ແລະ ວຽກ​ງານ 3 ສ້າງ ທົ່ວ​ປະເທດ ແຕ່​ປີ 2016-2021. ໂດຍ​ການ​ເຜີຍແຜ່​ເອກະສານ​ຂອງ​ ສະຫາຍ ພົນ​ຈັດຕະວາ ບົວ​ໄລ ພົມ​ມະ​ວົງ ຫົວໜ້າ​ກົມ​ກໍ່ສ້າງ​ຮາກ​ຖານ ກົມ​ໃຫຍ່​ການເມືອງ​ກອງທັບ, ມີ​ຄະນະ​ພັກ-ຄະນະ​ບັນຊາບັນດາ​ສະຫາຍ​ທີ່​ມາ​ຈາກ​ກົມ​ກອງ​ກຳລັງ​ຫຼວງ-ກຳລັງ​ທ້ອງຖິ່ນ 4 ແຂວງ​ພາກ​ໃຕ້, ພະນັກງານ​ຫຼັກ​ແຫຼ່ງ​ກອງ​ພົນ​ທີ 5 ເຂົ້າ​ຮ່ວມ. ໃນ​ການ​ເຜີຍແຜ່​ຄັ້ງ​ນີ້ ສະຫາຍ ພົນ​ຈັດຕະວາ ບົວ​ໄລ ໄດ້​ຍົກ​ໃຫ້​ເຫັນ ເນື້ອ​ໃນ​ສຳຄັນ​ຕົ້ນຕໍ ແລະ ວຽກ​ງານ​ຈຸດ​ສຸມ​ທີ່​ຕ້ອງ​ໄດ້​ເອົາໃຈໃສ່​ນຳພາ​ຊີ້​ນຳ​ໃນ​ແຕ່​ລະ​ຂົງເຂດ​ວຽກ​ງານ​ຕາມ​ຄວາມ​ຮັບຜິດຊອບ ແລະ ຈັດ​ຕັ້ງ​ປະຕິບັດ​ໃຫ້​ປະກົດ​ຜົນ​ເປັນ​ຈິງ​ໃນ​ຊຸມ​ປີ​ຕໍ່ໜ້າ ຕິດ​ພັນ​ກັບ​ການ​ເສີມ​ຂະຫຍາຍ​ຄວາມ​ເປັນ​ເຈົ້າ​ການ​ຂອງຕົນ. ທັງ​ນີ້​ກໍ່​ເພື່ອ​ແນ່​ໃສ່​ໃຫ້​ບັນດາ​ສະຫາຍ​ທີ່​ເຂົ້າ​ຮ່ວມ​ຮັບ​ຟັງ ມີ​ຄວາມ​ຮັບ​ຮູ້, ເຂົ້າໃຈ​ແຈ້ງ ແລະ ກຳ​ແໜ້ນ​ຕໍ່​ບັນຫາ​ໃຫຍ່ ກໍ່​ຄື​ເນື້ອ​ໃນ​ຈິດໃຈ​ຂອງ​ກອງ​ປະຊຸມ​ວຽກ​ງານ​ກໍ່ສ້າງ​ຮາກ​ຖານ​ການເມືອງ ຕິດ​ພັນ​ກັບ​ວຽກ​ງານ​ພັດທະນາ​ຊົນນະບົດ​ຮອບດ້ານ ແລະ ວຽກ​ງານ 3 ສ້າງ. ພ້ອມ​ທັງ​ນຳໄປ​ຈັດ​ຕັ້ງ​ຜັນ​ຂະຫຍາຍ​ເນື້ອ​ໃນ​ດັ່ງກ່າວ​ໃຫ້​ເປັນ​ແຜນ​ງານ, ແທດເໝາະ​ກັບ​ໜ້າທີ່​ວຽກ​ງານ​ຂອງ​ຕົນ​ໃຫ້​ເກີດ​ຜົນ​ເປັນ​ຈິງ ສຳເລັດ​ຕາມ​ລະດັບ​ຄາດໝາຍ, ສຳລັບ​ຮາກ​ຖານ​ການເມືອງ​ໃນ​ກຳລັງ ​ປກຊ-​ປກສ ໄປ​ພ້ອມ​ກັບ​ວຽກ​ງານ​ສ້າງ​ພັກ-ພະນັກງານ-ນັກຮົບ ຍັງ​ຕ້ອງ​ຕິດ​ພັນ​ກັບ​ການ​ສຶກ​ສາ​ອົບຮົມ​ມູນເຊື້ອ​ອັນ​ສະຫງ່າ​ອົງອາດ​ກ້າແກ່ນ​ຂອງ​ພັກ ແລະ ກຳລັງ​ປະກອບ​ອາວຸດ​ປະຊາຊົນ, ເພີ່ມ​ທະວີ​ການ​ມີ​ລະບຽບ​ວິໄນ, ຮັບປະກັນ​ການ​ປະຕິບັດ​ການ​ສ້າງ​ກົມ​ກອງ​ໃຫ້​ເຂັ້ມແຂງ​ກ້າວ​ສູ່​ຄວາມ​ທັນ​ສະໄໝ, ສືບຕໍ່​ກວດກາ ແລະ ກຳນົດ​ຈຸດ​ສຸມ​ພັດທະນາ​ຊົນນະບົດ​ຢູ່​ແຕ່​ລະ​ບ່ອນ​ຂອງ​ສູນ​ກາງ, ຂອງ​ແຂວງ, ເມືອງ​ໃຫ້​ຈະແຈ້ງ, ຊັດ​ເຈນ, ໂດຍ​ຕ້ອງ​ສຸມ​ທືນ​ຮອນ, ສຸມ​ກຳລັງ​ເຂົ້າ​ໃສ່​ຢ່າງ​ມີ​ຈຸດ​ສຸມ​ແທ້ໆ ເພື່ອ​ໃຫ້​ມີ​ບ້ານ​ຕົວ​ແບບ​ດ້ານ​ຕ່າງໆ, ເອົາໃຈໃສ່​ແບ່ງ​ຂັ້ນ​ຄຸ້ມ​ຄອງ​ລະຫວ່າງ​ສູນ​ກາງ ແລະ ທ້ອງຖິ່ນ​ໃຫ້​ຈະແຈ້ງ, ສືບຕໍ່​ຄົ້ນຄວ້າ​ໃນ​ແງ່​ຂອງ​ເນື້ອ​ໃນ ແລະ ການຈັດຕັ້ງ​ຂອງ​ວຽກ​ງານ​ກໍ່ສ້າງ​ຮາກ​ຖານ​ການເມືອງ, ວຽກ​ງານ​ພັດທະນາ​ຊົນນະບົດ​ກໍຄື​ວຽກ​ງານ 3 ສ້າງ, ປັບປຸງ​ຍົກ​ລະດັບ​ໃຫ້​ເຂັ້ມແຂງ ແລະ ໜັກ​ແໜ້ນເປັນຕົ້ນ​ແມ່ນ​ການ​ຍົກ​ສູງ​ຄວາມ​ສາມາດ​ນຳພາ​ຂອງ​ການຈັດຕັ້ງ​ພັກ, ການ​ບູລະນະ​ລະບົບ​ການເມືອງ​ປະຊາທິປະໄຕ​ປະຊາຊົນ ຢູ່​ຂັ້ນ​ທ້ອງຖິ່ນ-ຮາກ​ຖານໃຫ້​ມີ​ຄວາມ​ເຂັ້ມແຂງ, ສາມາດ​ປະຕິບັດ​ພາລະ​ບົດບາດ, ໜ້າທີ່​ການ​ປົກຄອງ ແລະ ຄຸ້ມ​ຄອງ​ບໍລິຫານ​ຕາມ​ກົດໝາຍ​ໃຫ້​ມີ​ຄວາມ​ສັກສິດ, ເປັນ​ບ່ອນ​ຮັບ​ໃຊ້​ສິດ ແລະ ຜົນ​ປະໂຫຍດ​ພື້ນຖານ​ທີ່​ສຸດ​ຂອງ​ປະຊາຊົນ. ໂອກາດ​ນີ້, ສະຫາຍ ພົນ​ຈັດຕະວາ ບົວ​ໄລ ພົມ​ມະ​ວົງ ຍັງ​ໄດ້​ເນັ້ນ​ໜັກ​ໃຫ້​ຄະນະ​ພັກ-ຄະນະ​ບັນຊາ​ທຸກ​ຂັ້ນ​ໃນ​ກົມ​ກອງ ກຳລັງ​ຫຼວງ-ກຳລັງ​ທ້ອງຖິ່ນ ຈົ່ງ​ພ້ອມ​ກັນ​ເຊີດ​ຊູ​ມານະ​ຈິດ​ປະຕິວັດ, ປັບປຸງ​ຕົນ​ເອງ​ຢ່າງຮອບດ້ານ ແລະ ສູ້​ຊົນ​ບຸກ​ບືນ, ເຮັດ​ແທ້​ທຳ​ຈິງ, ກ້າ​ປ່ຽນແປງ, ກ້າ​ເສຍສະຫຼະ ແລະ ກ້າ​ຮັບຜິດຊອບ​ໃນ​ວຽກ​ງານ​ຕົວ​ຈິງ ໃນ​ການ​ປັບປຸງ​ວຽກ​ງານ​ກໍ່ສ້າງ​ຮາກ​ຖານ​ການເມືອງ, ວຽກ​ງານ​ພັດທະນາ​ຊົນນະບົດ​ຮອບດ້ານ ແກ້​ໄຂ​ຄວາມທຸກ​ຍາກ ແລະ ວຽກ​ງານ 3 ສ້າງ ໃຫ້​ໄດ້​ຮັບ​ການຈັດຕັ້ງ​ປະຕິບັດ​ຢ່າງ​ເປັນ​ຂະ​ບວນ​ແຂງແຮງ ແລະ ເກີດ​ດອກ​ອອກ​ຜົນ​ຢ່າງ​ຈົບງາມ, ປະກອບສ່ວນ​ເຂົ້າ​ໃນ​ພາລະກິດ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ, ເພື່ອ​ນຳ​ເອົາ​ຄວາມ​ຮັ່ງມີ​ເຂັ້ມແຂງ, ຄວາມ​ສະຫງົບ​ປອດ​ໄພ​ມາສູ່​ປະຊາຊົນ ແລະ ປະເທດ​ຊາດ. ພາບ-ຂ່າວ: ທອງ​ມາ ໄຊ​ຍະ​ເພັງ​ສາ




 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ