ປະກາດຮັບຮອງເອົາ 4 ບ້ານ ເມືອງບໍລິຄັນ ແຂວງບໍລິຄຳໄຊ ເປັນບ້ານປ້ອງກັນຊາດເຂັ້ມແຂງ
ເວລາອອກຂ່າວ: 2022-09-28 08:53:11 | ຜູ້ຂຽນ : admin3 | ຈຳນວນຄົນເຂົ້າຊົມ: 167 | ຄວາມນິຍົມ:
ວັນທີ 22 ກັນຍາ 2022 ນີ້, ຢູ່ທີ່ຫ້ອງການບ້ານນາຫັນ ເມືອງບໍລິຄັນ ແຂວງບໍລິຄຳໄຊ, ໄດ້ປະກາດຮັບຮອງເອົາ 4 ບ້ານຄື: ບ້ານນາຫັນ, ບ້ານໂພນໄຊ ບ້ານໂພນແຍງ ແລະ ບ້ານໂພນສົງ ເປັນບ້ານປ້ອງກັນຊາດເຂັ້ມແຂງ ໂດຍການເປັນປະທານຂອງ ສະຫາຍ ພົນຈັດຕະວາ ຈວງຈັນ ລາດຊະວົງ ກຳມະການຄະນະປະຈຳພັກແຂວງ ຮອງປະທານ ຜູ້ປະຈຳການຄະນະກຳມະການ ປກຊ-ປກສ ແຂວງ, ຫົວໜ້າການເມືອງ ກອງບັນຊາການທະ ຫານແຂວງບໍລິຄຳໄຊ, ມີສະຫາຍວັນເລີນ ປຸ້ຍໄມນີ ກຳມະການພັກແຂວງ ເລຂາພັກເມືອງ ເຈົ້າເມືອງ ເມືອງບໍລິຄັນ, ມີຄະນະ
ພັກ-ຄະນະບັນຊາ ທະຫານ-ຕຳ ຫຼວດເມືອງ ແລະ ອຳນາດການປົກຄອງບ້ານເຂົ້າຮ່ວມ.
ສະຫາຍ ພັນໂທ ແສງວອນ ເພັດວົງແສງ ກຳມະການພັກເມືອງ ຫົວໜ້າການເມືອງ ກອງບັນຊາການທະຫານເມືອງບໍລິຄັນ ໄດ້ຜ່ານບົດສະຫຼຸບໃນການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງຢູ່ 4 ບ້ານຂອງເມືອງບໍລິຄັນໃນຄັ້ງນີ້, ຄະນະຮັບຜິດຊອບສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງໄດ້ສົບທົບກັບບັນດາອົງການປົກຄອງບ້ານ ນຳເອົາແນວທາງນະໂຍບາຍ, ມະຕິຄຳສັ່ງຂອງພັກ, ລະບຽບກົດໝາຍຂອງລັດ ແລະ ນິຕິກຳຕ່າງໆຂອງຂັ້ນເທິງ, ສະເພາະແມ່ນເອກະສານຂອງກະຊວງປ້ອງກັນປະເທດ ວ່າດ້ວຍ ການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງມາຈັດຕັ້ງເຜີຍ ແຜ່ເຊື່ອມຊຶມໃຫ້ປະຊາຊົນເຂົ້າ ໃຈແຈ້ງຕໍ່ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກຢ່າງແຂງແຮງ ເຮັດໃຫ້ປະຊາຊົນແຕ່ລະບ້ານ ມີຄວາມຕື່ນຕົວເປັນເຈົ້າການປະກອບສ່ວນສຳຄັນເຂົ້າໃນວຽກງານດັ່ງກ່າວຢ່າງຕັ້ງໜ້າ ພ້ອມກັນເຮັດໜ້າທີ່ຕິດຕາມສະພາບການເຄື່ອນໄຫວຂອງກຸ່ມຄົນບໍ່ດີ ໃນຂອບເຂດຄວາມຮັບຜິດຊອບຂອງບ້ານຢ່າງເຂັ້ມງວດ, ຕອບຕ້ານປະກົດການຫຍໍ້ທໍ້ໄດ້ທັນເວລາ, ພ້ອມນັ້ນອຳນາດການປົກຄອງ,ປະຊາຊົນແຕ່ລະບ້ານຍັງໄດ້ເອົາໃຈໃສ່ສ້າງສາເສດຖະກິດແກ້ໄຂຊີວິດການເປັນຢູ່ຂອງຄອບຄົວຕາມທ່າແຮງບົ່ມຊ້ອນຂອງຕົນດ້ວຍການຄ້າຂາຍ, ປູກຝັງ-ລ້ຽງສັດ ແລະ ອື່ນໆ ສາມາດເຮັດໃຫ້ແຕ່ລະຄອບຄົວຫຼຸດພົ້ນອອກຈາກຄວາມທຸກຍາກເທື່ອລະກ້າວ, ໃນ 4 ບ້ານມີ 407 ຫຼັງຄາເຮືອນ, ໃນນີ້ສາມາດຢັ້ງຢືນເປັນຄອບຄົວປ້ອງກັນຊາດເຂັ້ມແຂງໄດ້ 377 ຄອບຄົວ ແລະ ສາມາດຢັ້ງເປັນບ້ານປ້ອງກັນຊາດເຂັ້ມແຂງໄດ້ 100%.
ໂອກາດດັ່ງກ່າວ, ສະຫາຍ ພົນຈັດຕະວາ ຈວງຈັນ ລາດຊະວົງ ໄດ້ມອບໃບຢັ້ງຢືນບ້ານປ້ອງກັນຊາດເຂັ້ມແຂງໃຫ້ 4 ບ້ານດັ່ງກ່າວ, ພ້ອມທັງໂອ້ລົມຫຼາຍບັນຫາທີ່ສຳຄັນໃນການສ້າງບ້ານປ້ອງກັນຊາດເຂັ້ມແຂງ, ອຳນາດການປົກຄອງບ້ານຕ້ອງເປັນເສນາທິການໃຫ້ເມືອງໃນການເປັນຫູເປັນຕາສອດສ່ອງເກັບກຳສະພາບພາຍໃນບ້ານຂອງຕົນໃຫ້ມີຄວາມສະຫງົບ,ເອົາໃຈໃສ່ສ້າງສາພັດທະນາບ້ານໃຫ້ນັບມືມີຄວາມຈະເລີນກ້າວໜ້າ,ສັງຄົມມີຄວາມສະຫງົບປອດໄພ.
ໂດຍ: ສີທອງ ຈັນທະວົງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ