ລັດຖະມົນຕີກະຊວງປ້ອງກັນປະເທດ ສສ ຫວຽດນາມ ຢ້ຽມຢາມ ແລະ ເຮັດວຽກຢູ່ກອງພົນທີ 1
ເວລາອອກຂ່າວ: 2022-09-15 10:22:01 | ຜູ້ຂຽນ : admin3 | ຈຳນວນຄົນເຂົ້າຊົມ: 334 | ຄວາມນິຍົມ:
ໃນໂອກາດທີ່ ສະຫາຍ ຟານວັນຢາງ ກຳມະການກົມການເມືອງ ສູນກາງພັກກອມມູນິດຫວຽດນາມ, ລັດຖະມົນຕີກະ ຊວງປ້ອງກັນປະເທດ ສສ ຫວຽດນາມ ພ້ອມດ້ວຍຄະນະ ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຢ່າງເປັນທາງການລະຫວ່າງ ວັນທີ 13-17 ກັນຍາ 2022 ນີ້, ໃນວັນທີ 14 ກັນຍາ ນີ້, ສະຫາຍ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ກອງພົນທີ 1, ນຳ ພາໂດຍ ສະຫາຍ ພົນຕີ ວົງຄຳ ພົມມະກອນ ຮອງລັດຖະມົນຕີກະຊວງປ້ອງກັນປະເທດລາວ ພ້ອມດ້ວຍວິຊາການທີ່ກ່ຽວຂ້ອງ. ໂດຍການຕ້ອນຮັບຢ່າງອົບອຸ່ນຂອງ ສະຫາຍ ພົນຈັດຕະວາ ອຸ່ນຈັນ ແດງວັນສົມ ຫົວໜ້າການທະຫານ ກອງພົນທີ 1 ພ້ອມດ້ວຍຄະນະພັກ-ຄະນະບັນຊາກອງພົນ.
ໂອກາດນີ້, ສະຫາຍ ລັດຖະ ມົນຕີກະຊວງປ້ອງກັນປະເທດ ຫວຽດນາມ ໄດ້ຮັບຟັງການລາຍງານປະຫວັດຄວາມເປັນມາ, ພາລະບົດບາດ, ໜ້າທີ່ ແລະ ໂຄງປະກອບການຈັດຕັ້ງຂອງກອງພົນ, ລວມທັງສະພາບການຈັດຕັ້ງປະຕິບັດໜ້າທີ່ວຽກງານໂດຍຫຍໍ້ ຈາກ ສະຫາຍ ພົນຈັດຕະວາ ອຸ່ນຈັນ ແດງວັນສົມ, ກອງພົນທີ 1 ເຮັດໜ້າທີ່ເປັນກຳລັງເຄື່ອນທີ່ໃຫ້ແກ່ກະຊວງປ້ອງກັນປະເທດໃນເມື່ອມີຄວາມຕ້ອງການ, ປະສານກັບກົມກອງເພື່ອນເຮັດໜ້າທີ່ປົກປັກຮັກສານະຄອນຫຼວງວຽງຈັນ ແລະ ບັນດາແຂວງເຂດໃຈກາງຂອງປະເທດ, ພ້ອມກັນນັ້ນ, ກໍເຮັດໜ້າທີ່ຢຶດຈັ້ງ ແລະ ເຄື່ອນໄຫວແກ້ໄຂໜໍ່ແໜງກຸ່ມຄົນບໍ່ຫວັງດີເຂດໃຈກາງຂອງປະເທດ, ຈັດຕັ້ງກຳລັງລົງກໍ່ສ້າງຮາກຖານການເມືອງຢູ່ 2 ແຂວງຄື: ແຂວງວຽງຈັນ ແລະ ໄຊສົມບູນ, ໄປພ້ອມກັນນັ້ນ, ກໍໄດ້ເອົາ ໃຈໃສ່ປັບປຸງກໍ່ສ້າງກຳລັງໃຫ້ເຕີບໃຫຍ່ເຂັ້ມແຂງ ໜັກແໜ້ນໃນທຸກດ້ານ ແລະ ມີແບບແຜນທັນສະໄໝ, ສຸມໃສ່ນຳພາ-ຊີ້ນຳພະນັກງານ-ນັກຮົບ ຈັດຕັ້ງປະຕິບັດໜ້າທີ່ການເມືອງຂອງກົມກອງປິ່ນອ້ອມ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງປ້ອງກັນປະເທດວາງອອກ ສາ ມາດຍາດໄດ້ຜົນສຳເລັດທີ່ເປັນພື້ນຖານຫຼາຍດ້ານ. ນອກຈາກ ນີ້, ກອງພົນຍັງໄດ້ຖືສຳຄັນວຽກ ງານພົວພັນຮ່ວມມືກັບຕ່າງປະເທດ ໂດຍສະເພາະກອງທັບປະ ຊາຊົນຫວຽດນາມ ອັນພົ້ນເດັ່ນແມ່ນໄດ້ແຮກສ່ຽວກັບກອງພົນ 324 ທະຫານເຂດ 4 ກອງທັບປະຊາຊົນຫວຽດນາມ ເພື່ອແລກ ປ່ຽນຂໍ້ມູນຂ່າວສານ ແລະ ຊ່ວຍ ເຫຼືອເຊິ່ງກັນ ແລະ ກັນ. ໃນໄລ ຍະຜ່ານມາກອງພົນໄດ້ຮັບການຊ່ວຍເຫຼືອຈາກກອງທັບປະຊາ ຊົນຫວຽດນາມຫຼາຍໆດ້ານຄື: ສູນບັນຊາກອງພົນ, ໂຮງສີເຂົ້າ ທັນສະໄໝຂອງກອງພົນ, ໄລຍະມໍ່ໆມານີ້ ກໍໄດ້ຮັບການຊ່ວຍເຫຼືອຈາກກອງພົນ 324 ດ້ານອຸປະ ກອນການແພດຕ້ານພະຍາດ ໂຄວິດ-19, ອຸປະກອນກິລາການທະຫານ ແລະ ຊ່ວຍເຝິກອົບຮົມວຽກງານ, ພະລາທິການ ແລະ ເຕັກນິກໄລຍະສັ້ນ. ພິເສດແມ່ນ ກະຊວງປ້ອງກັນປະເທດຫວຽດ ນາມ ໄດ້ຊ່ວຍເຫຼືອໂຄງການກໍ່ ສ້າງຫ້ອງການສອງຊັ້ນຂອງກອງພົນ ປັດຈຸບັນນີ້ພວມດຳເນີນການກໍ່ສ້າງ.
ໃນວາລະເຄື່ອນໄຫວຢຽມຢ້າມ ແລະ ເຮັດວຽກຢູ່ກອງພົນທີ 1, ສະຫາຍ ພົນເອກ ຟານ ວັນຢາງ ໄດ້ສະແດງຄວາມຂອບໃຈຄະນະນຳກະຊວງປ້ອງກັນປະເທດລາວ ທີ່ໄດ້ອຳນວຍຄວາມສະດວກ ແລະ ສະແດງຄວາມຮັກແພງມາຍັງຄະນະພັກ-ຄະນະບັນຊາກອງພົນທີ 1 ທີ່ໄດ້ໃຫ້ການຕ້ອນຮັບອັນອົບອຸ່ນ, ເຕັມໄປດ້ວຍໄມຕີຈິດມິດຕະພາບອັນດີ, ສະແດງຄວາມຍ້ອງຍໍຊົມເຊີຍຕໍ່ໝາກ ຜົນ-ຜົນງານທີ່ກອງພົນຍາດມາໄດ້ໃນໄລຍະຜ່ານມາ, ພິເສດແມ່ນການຮ່ວມມືແຮກສ່ຽວລະຫວ່າງກອງພົນທີ 1 ກັບກອງພົນ 324, ນີ້ແມ່ນໝາກຜົນໜຶ່ງທີ່ຍົກໃຫ້ເຫັນມູນເຊື້ອຮ່ວມສຳພັນແບບພິເສດຂອງສອງກອງທັບປະຊາຊົນຫວຽດນາມ-ລາວທີ່ມີມາແຕ່ດົນນານ ແລະ ຍັງຮັກສາມາຈົນເທົ່າທຸກວັນນີ້. ພ້ອມດຽວກັນນີ້, ສະຫາຍພ້ອມດ້ວຍຄະນະທັງສອງຝ່າຍ ຍັງໄດ້ລົງຕິດຕາມກວດກາໂຄງການກໍ່ສ້າງຫ້ອງການສອງຊັ້ນຂອງກອງພົນ 1 ທີ່ພວມດຳເນີນການກໍ່ສ້າງ ໂດຍແມ່ນການຊ່ວຍເຫຼືອຈາກກະ ຊວງປ້ອງກັນປະເທດຫວຽດ ນາມ.
ໂດຍ: ອາຫວຸ້ນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ