ກອງທັບປະຊາຊົນລາວ

ວັນພຸດ, ວັນທີ 27 ຕຸລາ 2021



ກົມໃຫຍ່ເຕັກນິກ ມອບຫຼຽນກາມິດຕະພາບກອງທັບປະຊາຊົນລາວໃຫ້ຄະນະຊ່ຽວຊານຫວຽດນາມ
ເວລາອອກຂ່າວ: 2021-10-14 10:48:25 | ຜູ້ຂຽນ : admin2 | ຈຳນວນຄົນເຂົ້າຊົມ: 2 | ຄວາມນິຍົມ:



ວັນທີ 11 ຕຸລາ 2021 ນີ້, ກົມໃຫຍ່ເຕັກນິກກອງທັບ ໄດ້ຈັດ ພິທີມອບຫຼຽນກາມິດຕະພາບກອງທັບປະຊາຊົນລາວໃຫ້ຄະນະຊ່ຽວຊານຫວຽດນາມ ແລະ ສະຫຼຸບຖອດຖອນບົດຮຽນຜົນສຳເລັດຂອງການອົບຮົມ ລະບົບຈັບທ່ຽງ ລັອກເປົ້າໝາຍ ປືນເທິງລົດຕັງ ແລະ ການບົວລະບັດລູກກະສຸນ, ໂດຍການເປັນປະທານຂອງສະຫາຍ ພົນຕີ ປະສິດ ທ່ຽງທຳ  ຫົວໜ້າກົມໃຫຍ່ເຕັກນິກກອງທັບ, ເຂົ້າຮ່ວມມີ ສະຫາຍ ພັນເອກ ພິເສດ ຫວໍວັນທົ໋ງ ທີ່ປຶກສາທູດປ້ອງກັນຊາດຫວຽດນາມ ປະຈຳ ສປປ ລາວ ພ້ອມດ້ວຍຄະນະ, ມີຄະນະກົມພົວພັນການຕ່າງປະເທດ, ຫ້ອງວ່າການກະຊວງ, ບັນດາຄະນະພັກອົງການກົມໃຫຍ່ຕະຫຼອດຮອດພະນັກງານວິຊາການ. ໃນພິທີ ສະຫາຍ ພັນໂທ ທະວີສັກ ສີຊາເນດ ຮອງຫົວໜ້າຫ້ອງການກົມໃຫຍ່ເຕັກນິກ ຂຶ້ນຜ່ານຂໍ້ຕົກລົງຂອງລັດຖະມົນຕີກະຊວງປ້ອງກັນປະເທດ ວ່າດ້ວຍການມອບຫຼຽນກາມິດຕະພາບກອງທັບປະຊາຊົນລາວ ອີງຕາມ ດຳລັດຂອງນາຍົກລັດຖະມົນຕີແຫ່ງ ສປປ ລາວ ສະບັບເລກທີ 116 / ລບ, ລົງວັນທີ 22 ເມສາ 2019 ວ່າດ້ວຍການແຂ່ງຂັນ ແລະ ຍ້ອງຍໍ, ກະຊວງປ້ອງກັນປະເທດຕົກລົງ ມາດຕາ1: ມອບຫຼຽນກາມິດຕະພາບກອງທັບປະຊາຊົນລາວໃຫ້ແກ່ຄະນະຊ່ຽວຊານກົມໃຫຍ່ເຕັກນິກກອງທັບປະຊາຊົນຫວຽດນາມ ຈຳນວນ 4 ສະຫາຍຄື: ພັນໂທ ຟາມຮິວຟິກ, ພັນໂທ ເວືອງແທງເຟືອງ, ພັນໂທ ດຶງກຸຍເຢືອງ, ຮ້ອຍເອກ ເລແທງຟອງ, ເພື່ອເປັນການຍ້ອງຍໍ ແລະ ສັນລະເສີນຜົນງານ ຂອງຄະນະຊ່ຽວຊານກົມໃຫຍ່ເຕັກນິກກອງທັບປະຊາຊົນຫວຽດນາມ ທີ່ໄດ້ປະກອບສ່ວນຊ່ວຍເຫຼືອຢ່າງຕັ້ງໜ້າ ແລະ ທຸ່ມເທສະຕິປັນຍາເຂົ້າໃສ່ວຽກງານການເຝິກອົບຮົມບົວລະບັດລູກກະສຸນ ແລະ ການເຝິກອົບຮົມໃນການນຳໃຊ້ລະບົບລັອກເປົ້າໝາຍ ປືນເທິງລົດຕັງ-ຫຸ້ມເກາະ ເປັນເວລາ 45 ວັນ ໃຫ້ແກ່ ກົມໃຫຍ່ເຕັກນິກກອງທັບປະຊາຊົນລາວ ແລະ ໄດ້ສຳເລັດຕາມແຜນການ, ຜົນງານດັ່ງກ່າວເປັນການປະກອບສ່ວນອັນສຳຄັນ ທັງເປັນການເສີມສ້າງສາຍພົວພັນ, ມິດຕະພາບຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດລາວ-ຫວຽດນາມ ໃຫ້ໝັ້ນຄົງທະນົງແກ່ນຕະຫຼອດກາລະນານ, ຈາກນັ້ນ ສະຫາຍ ພັນເອກ ຟອງສະໝຸດ ພົນທິລາດ ຫົວໜ້າກົມເຕັກນິກເຫຼົ່າຮົບ ໄດ້ຂຶ້ນລາຍງານຜົນລຳເລັດຂອງການເຝິກອົບຮົມ ລະບົບຈັບທ່ຽງ ແລະ ລັອກເປົ້າໝາຍປືນເທິງລົດຕັງ-ຫຸ້ມເກາະ ໄລຍະ 45 ວັນ, ພ້ອມທັງຕີລາຄາຜົນໄດ້ຮັບຂອງການເຝິກອົບຮົມ ເຊິ່ງຜົນການຮັບຮູ້ຂອງພະນັກງານເຝິກອົບຮົມ ໂດຍລວມບັນລຸໄດ້ 85%, ຈຳນວນເຂົ້າຮ່ວມເຝິກອົບຮົມທັງໝົດ 24 ສະຫາຍ, ສອບເສັງໄດ້ຄະແນນເກັ່ງ ຈໍານວນ 09 ສະຫາຍ, ເທົ່າກັບ 37,5%, ສອບເສັງໄດ້ຄະແນນແຂງ ຈໍານວນ 15 ສະຫາຍ, ເທົ່າກັບ 62,5%. ໂອກາດດັ່ງກ່າວ ,ສະຫາຍ ພົນຕີ ປະສິດ ທ່ຽງທຳ  ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜົນງານ, ຜົນສຳເລັດທີ່ທັງສອງຄະນະຊ່ຽວຊານລາວ-ຫວຽດນາມຍາດມາໄດ້ເຊິ່ງມັນສະແດງອອກທາງດ້ານຄວາມສາມັກຄີ, ຜົນງານຜົນສຳເລັດຄັ້ງນີ້ມີຄວາມໝາຍສຳຄັນຕໍ່ກົມໃຫຍ່ເຕັກນິກຢ່າງຍິ່ງ ຂອງການຮ່ວມມືຊ່ວຍເຫຼືອຄັ້ງນີ້  ພ້ອມທັງກ່າວຄຳຂອບໃຈຕໍ່ຄະນະຊ່ຽວຊານຫວຽດນາມທີ່ໃຫ້ຄວາມຊ່ວຍເຫຼືອ ເຖິງວ່າສະພາບການຂອງໂລກຍັງຜັນແປໄປຢ່າງສັບສົນ, ແຕ່ກໍ່ບໍ່ຫວັ່ນໄຫວຕໍ່ສະພາບການດັ່ງກ່າວ ແລະ ຝາກຄວາມຢ້ຽມຢາມຖາມຂ່າວເຖິງການນຳ ອັນອົບອຸ່ນ ແລະ ການຊ່ວຍເຫຼືອອັນລໍ້າຄ່າທີ່ມີຕໍ່ກອງທັບປະຊາຊົນລາວ ພ້ອມທັງອວຍພອນໃຫ້ຄວາມສາມັກຄີພິເສດລາວ-ຫວຽດນາມ ຈົ່ງໝັ້ນຄົງທະນົງແກ່ນຕະຫຼອດກາລະນານ. ໂດຍ: ຄຳສອນ ພົມໄຊຍາ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ