ໄຕ້ຫວັນ ຂະຫຍາຍອາຍຸປະຕິບັດງານນັກບິນທະຫານອາກາດ ເຖິງ 58 ປີ ເພື່ອແກ້ໄຂບັນຫາຂາດແຄນກຳລັງພົນ
ເວລາອອກຂ່າວ: 2026-10-15 09:46:22 | ຜູ້ຂຽນ : admin1 | ຈຳນວນຄົນເຂົ້າຊົມ: 196 | ຄວາມນິຍົມ: ![]()
ຕາມຂ່າວສານການທະຫານຕ່າງປະເທດລາຍງານວ່າ ໄຕ້ຫວັນ ກຳລັງພິຈາລະນາຂະຫຍາຍອາຍຸການປະຕິບັດງານຂອງນັກບິນກອງທັບອາກາດຈາກທີ່ໃຊ້ປະຈຳການແຕ່ປີ 48-52 ມາເປັນ 58 ປີ ພ້ອມກຽມສະເໜີຕໍ່ຄະນະລັດຖະມົນຕີເພື່ອພິຈາລະນາເພີ່ມເງິນອຸດໜູນພິເສດໃຫ້ນັກບິນ ເພື່ອຮັກສາກຳລັງພົນທີ່ມີປະສົບການ ແລະ ຫຼຸດບັນຫາການລາອອກໄປເຮັດວຽກໃນພາກເອກະຊົນ.
ຕາມຂໍ້ມູນທີ່ລາຍງານ ປັດຈຸບັນກອງທັບອາກາດ ໄຕ້ຫວັນ ກຳນົດເກນອາຍຸປະຕິບັດງານຂອງນັກບິນຕາມຊັ້ນຍົດ ໂດຍນັກບິນຊັ້ນນາວາອາກາດໂທມີເກນອາຍຸ 48 ປີ ແລະ ຊັ້ນນາວາອາກາດເອກມີເກນອາຍຸ 52 ປີ. ເມື່ອຮອດເກນອາຍຸດັ່ງກ່າວ ນັກບິນຈະຕ້ອງຍ້າຍໄປປະຕິບັດໜ້າທີ່ອື່ນ ແທນການປະຕິບັດງານບິນ. ກອງທັບອາກາດໄຕ້ຫວັນມີຍົນຮົບຫຼາຍຮຸ່ນ ລວມທັງ F-16A/B ປະມານ 140 ລຳ, Mirage 2.000 ປະມານ 50 ລຳ, ຍົນຮົບທີ່ຜະລິດໃນປະເທດຕະກູນ AIDC ປະມານ 130 ລຳ ແລະ F-16V ອີກ 66 ລຳ ທີ່ຢູ່ໃນແຜນການທະຍອຍຮັບມອບ. ຕົວເລກດັ່ງກ່າວສະທ້ອນໃຫ້ເຫັນເຖິງພາລະໜ້າທີ່ໃນການຈັດຫາ ແລະ ຮັກສານັກບິນໃຫ້ພຽງພໍຕໍ່ການປະຕິບັດງານຂອງກຳລັງທາງອາກາດ.
ອີກບັນຫາໜຶ່ງແມ່ນການທີ່ນັກບິນທະຫານອາກາດບາງສ່ວນລາອອກໄປເຮັດວຽກກັບສາຍການບິນພາກພານິດ ເນື່ອງຈາກໂອກາດດ້ານອາຊີບ ແລະ ຜົນຕອບແທນ. ຂະນະທີ່ການເຝິກສ້າງນັກບິນລຸ້ນໃໝ່ຕ້ອງໃຊ້ເວລາດົນ ແລະ ຕ້ອງຜ່ານການເຝິກອົບຮົມຫຼາຍຂັ້ນຕອນ ຈຶ່ງບໍ່ສາມາດທົດແທນນັກບິນທີ່ຂາດໄປໄດ້ຢ່າງວ່ອງໄວ. ມາດຕະການຂະຫຍາຍເກນອາຍຸປະຕິບັດງານເຖິງ 58 ປີ ຈຶ່ງມີເປົ້າໝາຍຮັກສານັກບິນທີ່ມີປະສົບການໃຫ້ຢູ່ໃນລະບົບໄດ້ດົນຂຶ້ນ. ຄຽງຄູ່ກັນນັ້ນ ການຂໍເພີ່ມເງິນອຸດໜູນພິເສດກໍມີຈຸດປະສົງສ້າງແຮງຈູງໃຈໃຫ້ນັກບິນຢູ່ຮັບໃຊ້ກອງທັບຕໍ່ໄປ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ















