ກອງທັບປະຊາຊົນລາວ
 
ວັນອັງຄານ, ວັນທີ 17 ພະຈິກ 2026

  

​ສປປ ລາວ ພ້ອມ​ສົ່ງ​ທັບ​ນັກ​ກິລາ​ຄົນ​ພິການ 27 ທ່ານ ເຂົ້າ​ຮ່ວມ​ງານ​ກິລາ​ອາຊຽນ​ພາ​ຣາ​ເກມ ຄັ້ງ​ທີ V ທີ່​ປະເທດ​ຍີປຸ່ນ
ເວລາອອກຂ່າວ: 2026-10-08 14:09:56 | ຜູ້ຂຽນ : admin1 | ຈຳນວນຄົນເຂົ້າຊົມ: 289 | ຄວາມນິຍົມ:



ໃນ​ວັນ​ທີ 6 ຕຸລາ 2026 ທີ່​ຫ້ອງ​ປະຊຸມ​ກະຊວງ​ສຶກ​ສາ​ທິ​ການ ແລະ ກິລາ ໄດ້​ມີ​ພິທີ​ພົບ​ປະ​ໂອ້​ລົມ​ຄະນະ​ນຳ, ຄູ​ເຝິກ ແລະ ນັກ​ກິລາ​ຄົນ​ພິການ​ທີມ​ຊາດ​ລາວ ກ່ອນ​ອອກ​ເດີນທາງ​ເຂົ້າ​ຮ່ວມ​ງານ​ແຂ່ງຂັນ​ກິລາ​ອາ​ຊຽນ​ພາ​ຣາ​ເກມ ຄັ້ງ​ທີ V ທີ່​ເມືອງ ນາ​ໂກ​ຢາ ປະເທດ​ຍີປຸ່ນ, ໂດຍ​ການ​ເປັນ​ປະທານ​ຂອງ ທ່ານ ວິລະ​ວັນ ບຸນ​ສຸກ​ໄທ ຫົວໜ້າ​ກົມ​ກິລາ​ມວນ​ຊົນ, ພະລະ ແລະ ສິລະ​ປະ​ສຶກ​ສາ, ກະຊວງ​ສຶກ​ສາ​ທິ​ການ ແລະ ກິລາ ທັງ​ເປັນ​ຮອງ​ປະທານ-ເລຂາທິການ ຄະນະ​ກຳມະການ​ພາ​ຣາ​ແລມ​ປິກ​ແຫ່ງ​ຊາດ​ລາວ (​ຄພລ), ພ້ອມ​ດ້ວຍ ທ່ານ ພອນ​ສຸກ​ສິນ ເຕໂຊ ຕາງໜ້າ​ຈາກ​ບໍລິສັດ ໂດ​ເນັກ ກຣຸບ ຕະຫຼອດ​ຮອດ​ຄູ​ເຝິກ, ຜູ້​ຊ່ວຍ​ຄູ​ເຝິກ ແລະ ນັກ​ກິລາ​ຄົນ​ພິການ​ທີມ​ຊາດ​ລາວ ເຂົ້າ​ຮ່ວມ​ຢ່າງ​ພ້ອມພຽງ. ໃນ​ກອງ​ປະຊຸມ, ທ່ານ ສີ​ວິ​ໄຊ ແສງ​ດາ​ວົງ ຫົວໜ້າ​ພະ​ແນກ​ກິລາ-ກາຍຍະກຳ​ຄົນ​ພິການ ກົມ​ກິລາ​ມວນ​ຊົນ, ພະລະ ແລະ ສິລະ​ປະ​ສຶກ​ສາ, ກະຊວງ​ສຶກ​ສາ​ທິ​ການ ແລະ ກິລາ ໄດ້​ລາຍ​ງານ​ຫຍໍ້​ກ່ຽວ​ກັບ​ການ​ກະກຽມ​ຄວາມ​ພ້ອມ​ຮອບດ້ານ​ໃຫ້​ຮູ້​ວ່າ: ສຳລັບ​ງານ​ແຂ່ງຂັນ​ກິລາ​ເອ​ຊຽນ​ພາ​ຣາ​ເກມ ຄັ້ງ​ທີ V ຈະ​ຈັດ​ຂຶ້ນ​ໃນ​ລະຫວ່າງ​ວັນ​ທີ 10-25 ຕຸລາ 2026 ທີ່​ເມືອງ​ນາ​ໂກ​ຢາ ປະເທດ​ຍີ່ປຸ່ນ, ເຊິ່ງ​ມີ 45 ປະເທດ​ສະມາຊິກ​ເຂົ້າ​ຮ່ວມ. ສຳລັບ ​ສປປ ລາວ ໄດ້​ສົ່ງ​ທັບ​ນັກ​ກິລາ​ເຂົ້າ​ຮ່ວມ​ທັງ​ໝົດ 27 ທ່ານ ຍິງ 12 ທ່ານ ລົງ​ຊີງ​ໄຊ​ໃນ 4 ປະເພດ​ກິລາ​ຄື: ກິລາ​ແລ່ນ-ລານ, ກິລາລອຍນ້ຳ, ກິລາ​ລົດຖີບ ແລະ ກິລາ​ບານບ້ວງ​ລໍ້​ເລື່ອນ (ທີມ​ຍິງ). ຜ່ານ​ມາ, ທາງ​ຄະນະ​ນຳ ໄດ້​ເອົາໃຈໃສ່​ນຳພາ-ຊີ້​ນຳ​ໃນ​ການ​ເຂົ້າ​ສູນ​ເຝິກ​ຊ້ອມ​ເປັນ​ເວລາ 120 ວັນ (ເລີ່ມ​ແຕ່​ວັນ​ທີ 7 ມິຖຸນາ ເຖິງ 10 ຕຸລາ 2026), ພ້ອມ​ທັງ​ສົ່ງ​ນັກ​ກິລາ​ໄປ​ເກັບ​ຕົວ ແລະ ແຂ່ງຂັນ​ທົດ​ສອບ​ຢູ່ ປະເທດ​ໄທ ເພື່ອ​ຍົກ​ລະດັບ​ຄວາມ​ສາມາດ ແລະ ຄວາມ​ພ້ອມ​ກ່ອນ​ເດີນທາງ​ຕົວ​ຈິງ. ສຳລັບ​ການ​ເດີນທາງ​ໄປ​ເຂົ້າ​ຮ່ວມ​ແຂ່ງຂັນ​ງານ​ດັ່ງກ່າວ ແມ່ນ​ໄດ້​ແບ່ງ​ອອກ​ເປັນ 4 ຄະນະ ໂດຍ​ຄະນະ​ທີ 1 ແມ່ນ​ຈະ​ອອກ​ເດີນທາງ​ໃນ​ວັນ​ທີ 7 ຕຸລາ 2026 ນຳ​ໂດຍ ທ່ານ ວິລະ​ວັນ ບຸນ​ສຸກ​ໄທ ຫົວໜ້າ​ກົມ​ກິລາ​ມວນ​ຊົນ, ພະລະ ແລະ ສິລະ​ປະ​ສຶກ​ສາ, ກະຊວງ​ສຶກ​ສາ​ທິ​ການ ແລະ ກິລາ ທັງ​ເປັນ​ຮອງ​ປະທານ-ເລຂາທິການ ຄະນະ​ກຳມະການ​ພາ​ຣາ​ແລມ​ປິກ​ແຫ່ງ​ຊາດ​ລາວ; ຄະນະ​ທີ 2 ແມ່ນ​ຈະ​ອອກ​ເດີນທາງ​ໃນ​ວັນ​ທີ 10 ນຳພາ​ໂດຍ ທ່ານ ສີ​ວິ​ໄຊ ແສງ​ດາ​ວົງ ຫົວໜ້າ​ພະ​ແນກ​ກິລາ-ກາຍຍະກຳ​ຄົນ​ພິການ ກົມ​ກິລາ​ມວນ​ຊົນ, ພະລະ ແລະ ສິລະ​ປະ​ສຶກ​ສາ; ຄະນະ​ທີ 3 ແມ່ນ​ຈະ​ອອກ​ເດີນທາງ​ໃນ​ວັນ​ທີ 11 ຕຸລາ 2026 ນຳພາ​ໂດຍ ທ່ານ ລັດ​ທະ​ໄຊ ອິນ​ທະ​ວົງ ຮອງ​ຫົວໜ້າ​ກົມ​ກິລາ​ມວນ​ຊົນ, ພະລະ ແລະ ສິລະ​ປະ​ສຶກ​ສາ, ກະຊວງ​ສຶກ​ສາ​ທິ​ການ ແລະ ກິລາ; ຄະນະ​ທີ 4 ຈະ​ເດີນທາງ​ໃນ​ວັນ​ທີ 17 ຕຸລາ 2026 ແມ່ນ​ທ່ານ ກິ່ງ​ມະໂນ ພົມ​ມະຫາ​ໄຊ ຮອງ​ລັດຖະມົນຕີ ກະຊວງ​ສຶກ​ສາ​ທິ​ການ ແລະ ກິລາ ທັງ​ເປັນ​ປະທານ​ຄະນະ​ກຳມະການ​ພາ​ຣາ​ແລມ​ປິກ​ແຫ່ງ​ຊາດ​ລາວ. ໃນ​ພິທີ​ອັນ​ທີ່​ມີ​ຄວາມ​ໝາຍ​ຄວາມ​ສຳຄັນ​ດັ່ງກ່າວ, ບໍລິສັດ ໂດ​ເນັກ ກຣຸບ ຜູ້​ຜະລິດ ແລະ ຈຳໜ່າຍ​ເຄື່ອງ​ກິລາ​ລາຍ​ໃຫຍ່​ຈາກ​ປະເທດ​ຫວຽດນາມ ໄດ້​ໃຫ້ການ​ສະໜັບສະໜູນ​ເຄື່ອງນຸ່ງ (ເສື້ອ​ໂປໂລ​ສີຂາວ ແລະ ຊຸດ​ວອມ​ສີຟ້າ) ລວມ​ມູນ​ຄ່າ 71.844.000 ກີບ ເພື່ອ​ຄວາມ​ເປັນ​ລະບຽບ​ຮຽບ​ຮ້ອຍ ແລະ ເປັນ​ເອກະ​ພາບ​ໃນ​ການເຄື່ອນໄຫວ​ຂອງ​ທັບ​ນັກ​ກິລາ​ລາວ, ກ່າວ​ມອບ​ໂດຍ ທ່ານ ພອນ​ສຸກ​ສິນ ເຕໂຊ ຕາງໜ້າ​ຈາກ​ບໍລິສັດ ໂດ​ເນັກ ກຣຸບ ແລະ ກ່າວ​ຮັບ​ແມ່ນ ທ່ານ ວິລະ​ວັນ ບຸນ​ສຸກ​ໄທ ຫົວໜ້າ​ກົມ​ກິລາ​ມວນ​ຊົນ, ພະລະ ແລະ ສິລະ​ປະ​ສຶກ​ສາ, ກະຊວງ​ສຶກ​ສາ​ທິ​ການ ແລະ ກິລາ ທັງ​ເປັນ​ຮອງ​ປະທານ-ເລຂາທິການ ຄະນະ​ກຳມະການ​ພາ​ຣາ​ແລມ​ປິກ​ແຫ່ງ​ຊາດ​ລາວ. ໂອກາດ​ນີ້, ທ່ານ ວິລະ​ວັນ ບຸນ​ສຸກ​ໄທ ໄດ້​ມີ​ຄຳ​ເຫັນ​ໂອ້​ລົມ ແລະ ໃຫ້​ທິດ​ຊີ້​ນຳ ໂດຍ​ເນັ້ນ​ໜັກ​ໃຫ້​ທຸກ​ຄົນ​ຮັກສາ​ສຸຂະພາບ, ມີ​ຄວາມ​ສາມັກຄີ, ປະຕິບັດ​ລະ ບຽບ​ວິໄນ​ຢ່າງ​ເຂັ້ມ​ງວດ ແລະ ສູ້​ຊຸດ​ສຸດ​ໃຈ​ເພື່ອ​ຍາດ​ເອົາ​ຜົນງານ ແລະ ຊື່​ສຽງ​ມາ​ໃຫ້​ປະເທດ​ຊາດ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ