ວັນສຸກ, ວັນທີ 16 ຕຸລາ 2026
ມູນເຊື້ອ ແລະ ຄວາມພິລະອາດຫານ ຂອງເຫຼົ່າຮົບລົດຕັງ-ຍານເກາະ ກອງທັບປະຊາຊົນລາວ ຕະຫຼອດໄລຍະ 65 ປີ
ເວລາອອກຂ່າວ: 2026-09-30 14:18:34 | ຜູ້ຂຽນ : admin2 | ຈຳນວນຄົນເຂົ້າຊົມ: 796 | ຄວາມນິຍົມ: 
ເມື່ອເວົ້າເຖິງກຳລັງແຮງທາງດ້ານເກາະເຫຼັກ ແລະ ພາຫະນະຍານເກາະ ຂອງກອງທັບປະຊາຊົນລາວ ຊື່ຂອງເຫຼົ່າຮົບລົດຕັງ-ຍານເກາະ ເປັນອີກເຫຼົ່າຮົບໜຶ່ງ ທີ່ມີບົດບາດສຳຄັນ ໃນພາລະກິດປົກປັກຮັກສາປະເທດຊາດ, ປົກປ້ອງອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດ. ຕະຫຼອດໄລຍະ 65 ປີ (1 ຕຸລາ 1961-1 ຕຸລາ 2026) ແຫ່ງການກໍ່ຕັ້ງ, ຕໍ່ສູ້ ແລະ ພັດທະນາ ເຫຼົ່າຮົບລົດຕັງ-ຍານເກາະ ໄດ້ສະສົມມູນເຊື້ອອັນດີງາມ ແລະ ປະສົບການອັນລ້ຳຄ່າ ພ້ອມກັນນັ້ນ, ຍັງຫຼໍ່ຫຼອມຈິດໃຈ ຂອງນັກຮົບປະຕິວັດເຫຼົ່າຮົບລົດຕັງ-ຍານເກາະ ໃຫ້ມີຄວາມກ້າຫານ, ເດັດດ່ຽວ, ອົດທົນ ແລະ ພ້ອມປະຕິບັດພາລະກິດໃນທຸກສະຖານະການ.
ພາຍໃຕ້ສະພາບການຕໍ່ສູ້ໃນໄລຍະຕ້ານສົງຄາມ ແລະ ຕໍ່ຕ້ານການຮຸກຮານ, ຄວາມຕ້ອງການດ້ານກຳລັງ ແລະ ອາວຸດຍຸດໂທປະກອນ ທີ່ທັນສະໄໝໄດ້ເພີ່ມຂຶ້ນ ໃນວັນທີ 1 ຕຸລາ 1961 ກຳລັງລົດຕັງ-ຍານເກາະ ໄດ້ຮັບການສ້າງຕັ້ງຂຶ້ນ ເປັນບາດກ້າວສຳຄັນໃນການສ້າງກຳລັງສູ້ຮົບຂອງກອງທັບ. ໃນໄລຍະເລີ່ມຕົ້ນ, ກຳລັງດັ່ງກ່າວ ຕ້ອງປະເຊີນກັບຫຼາຍບັນຫາທີ່ມີຄວາມຫຍຸ້ງຍາກ ທັງດ້ານອາວຸດ-ຍຸດໂທປະກອນ, ການເຝິກອົບຮົມ, ພາຫະນະ ແລະ ສະພາບສະໜາມຮົບ ແຕ່ດ້ວຍຈິດໃຈອົດທົນ, ກ້າຫານ ແລະ ເດັດດ່ຽວ, ບັນດານັກຮົບ ລົດຕັງ-ຍານເກາະ ໄດ້ພະຍາຍາມເຝິກຝົນ, ສະສົມປະສົບການ ແລະ ປະຕິບັດພາລະກິດຮ່ວມກັບກຳລັງຮົບອື່ນໆ. ໃນຂະບວນການຕໍ່ສູ້, ກຳລັງລົດຕັງ-ຍານເກາະ ໄດ້ມີສ່ວນຮ່ວມໃນຫຼາຍພາລະກິດສຳຄັນ ແລະ ຮ່ວມກັບກຳລັງຮົບອື່ນໆ ສ້າງຜົນງານໃນການຕໍ່ສູ້, ປະກອບສ່ວນສຳຄັນໃນຂະບວນການປົດປ່ອຍຊາດ ແລະ ສ້າງຕັ້ງ ສປປ ລາວ ໃນປີ 1975.
ມູນເຊື້ອອັນພິລະອາດຫານ ແລະ ຈິດໃຈ ຂອງນັກຮົບ ໃນຕະຫຼອດ 65 ປີຜ່ານມາ, ມູນເຊື້ອຂອງເຫຼົ່າຮົບລົດຕັງ-ຍານເກາະ ໄດ້ຖືກຫຼໍ່ຫຼອມຜ່ານການເຝິກຝົນ, ການປະຕິບັດພາລະກິດ ແລະ ປະສົບການຈາກຫຼາຍຮຸ່ນຄົນ ມູນເຊື້ອສຳຄັນປະກອບມີ: ຄວາມຈົງຮັກພັກດີ ແລະ ຄວາມຮັບຜິດຊອບ ຍຶດໝັ້ນໃນໜ້າທີ່, ມີລະບຽບວິໄນ ແລະ ພ້ອມຮັບໃຊ້ຊາດ ແລະ ປະຊາຊົນ; ຄວາມກ້າຫານ ແລະ ອົດທົນ, ເຜີຍແຜ່ຈິດໃຈບໍ່ຫຍໍ້ທໍ້ ສາມາດປັບຕົວເຂົ້າກັບສະພາບພູມມີປະເທດ, ສະພາບອາກາດ ແລະ ສະພາບການປະຕິບັດພາລະກິດທີ່ແຕກຕ່າງກັນ ຄວາມຊຳນານດ້ານວິຊາການ ເອົາໃຈໃສ່ການຮຽນຮູ້ ເຝິກຝົນທັກສະ ບຳລຸງຮັກສາພາຫະນະ ແລະ ຍຸດໂທປະກອນໃຫ້ຢູ່ໃນສະພາບພ້ອມໃຊ້ງານ ຈິດໃຈສາມັກຄີ ແລະ ເຮັດວຽກເປັນໝູ່ຄະນະ ປະສານງານຢ່າງໃກ້ຊິດກັບບັນດາກຳລັງເຫຼົ່າຮົບອື່ນ ແລະ ພາກສ່ວນຕ່າງໆ ເພື່ອໃຫ້ພາລະກິດບັນລຸຜົນ.
ໃນສະພາບການປັດຈຸບັນ, ການພັດທະນາເຫຼົ່າຮົບລົດຕັງ-ຍານເກາະ ບໍ່ໄດ້ຈຳກັດຢູ່ພຽງການເພີ່ມຈຳນວນພາຫະນະ ຫຼື ຍຸດໂທປະກອນ ແຕ່ຍັງມຸ່ງເນັ້ນໃສ່ການຍົກສູງຄຸນນະພາບບຸກຄະລາກອນ, ຄວາມຊຳນານດ້ານວິຊາການ, ການເຝິກແອບ ແລະ ການບຳລຸງຮັກສາຍຸດໂທປະກອນ. ພ້ອມກັນນັ້ນ, ເຫຼົ່າຮົບລົດຕັງ-ຍານເກາະ ຍັງມີບົດບາດໃນວຽກງານຊ່ວຍເຫຼືອປະຊາຊົນໃນເວລາເກີດໄພພິບັດ, ການກູ້ໄພ-ກູ້ຊີບ ແລະ ວຽກງານອື່ນໆ ຕາມພາລະໜ້າທີ່. ສິ່ງນີ້ ສະທ້ອນໃຫ້ເຫັນເຖິງບົດບາດ ຂອງກຳລັງທະຫານໃນການຮ່ວມມືກັບປະຊາຊົນ ແລະ ຮັບມືກັບສະພາບສຸກເສີນຕ່າງໆ.
ລົດຕັງອາດສ້າງດ້ວຍເຫຼັກກ້າ, ແຕ່ຄວາມເຂັ້ມແຂງ ຂອງນັກຮົບ ຢູ່ທີ່ຈິດໃຈ, ວິໄນ, ຄວາມສາມັກຄີ ແລະ ຄວາມຮັບຜິດຊອບຕໍ່ພາລະໜ້າທີ່ ຕະຫຼອດໄລຍະ 65 ປີ ແຫ່ງການຮັກສາມູນເຊື້ອ ແລະ ຄວາມພິລະອາດຫານ ເນື່ອງໃນໂອກາດ ວັນສ້າງຕັ້ງເຫຼົ່າຮົບລົດຕັງ-ຍານເກາະ (1 ຕຸລາ 1961-1 ຕຸລາ 2026) ນີ້ແມ່ນໂອກາດສຳຄັນໃນການທົບທວນຄືນເສັ້ນທາງການກໍ່ຕັ້ງ, ຕໍ່ສູ້ ແລະ ພັດທະນາ ຂອງເຫຼົ່າຮົບລົດຕັງ-ຍານເກາະ ຕະຫຼອດໄລຍະ 65 ປີ ທີ່ຜ່ານມາ. ມູນເຊື້ອ ຂອງບັນດານັກຮົບຮຸ່ນອາວຸໂສ ແລະ ນັກຮົບຮຸ່ນກ່ອນ ຈະເປັນບົດຮຽນອັນລ້ຳຄ່າໃຫ້ແກ່ພະນັກງານ-ນັກຮົບຮຸ່ນສືບທອດໃນການເຝິກຝົນຫຼໍ່ຫຼອມຕົນເອງ, ການຍົກສູງວິຊາການ, ວິໄນ ແລະ ຄວາມພ້ອມໃນການປະຕິບັດພາລະໜ້າທີ່ ທີ່ການຈັດຕັ້ງຂັ້ນເທິງມອບໝາຍໃຫ້.
ຈາກອະດີດສູ່ປັດຈຸບັນ, ຈາກບັນດາຮຸ່ນອາວຸໂສ ສູ່ຮຸ່ນສືບທອດ, ມູນເຊື້ອ ຂອງເຫຼົ່າຮົບລົດຕັງ-ຍານເກາະ ຍັງຄົງເປັນບົດຮຽນໃນການສ້າງກຳລັງທີ່ມີວິໄນ, ມີຄວາມຮູ້, ມີຄວາມຊຳນານ ແລະ ມີຈິດໃຈຮັບຜິດຊອບຕໍ່ໜ້າທີ່ ຮັກສາໄດ້ມູນເຊື້ອພິລະອາດຫານ ປັບປຸງເຫຼົ່າຮົບໃນທຸກດ້ານ ກຳແໜ້ນແນວທາງ ຂອງພັກ ໃນການປະຕິບັດສອງຍຸດທີ່ສາດຄື: ປົກປັກຮັກສາ ແລະສ້າງສາພັດທະນາປະເທດຊາດໃຫ້ທັນສະໄໝ ແລະ ເປັນລົດເຫຼັກກ້ າທີ່ເຂັ້ມແຂງດັ່ງຄໍາເວົ້າທີ່ວ່າ: “ລົດຕັງ-ຍານເກາະ ປຽບເໝືອນດັ່ງເຫຼັກໄຫຼຊຸບດ້ວຍແປວໄຟສົງຄາມຮຸກຮານຫຼາຍສີບປີຜ່ານຜົນງານລືໄຊໃຫ້ດັງກ້ອງໄປໄກ”.
ໂດຍ: ໄພລິນ ບຸນຍັງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
