POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນສຸກ, ວັນທີ 16 ຕຸລາ 2026

ສປ ຈີນ ແລະ ອາເມຣິກາ ບັນລຸຄວາມຮັບຮູ້ ທີ່ເປັນເອກະພາບນຳກັນ 8 ຂໍ້
ເວລາອອກຂ່າວ: 2026-09-30 09:38:12 | ຜູ້ຂຽນ : admin1 | ຈຳນວນຄົນເຂົ້າຊົມ: 223 | ຄວາມນິຍົມ:

ການຢ້ຽມຢາມຄັ້ງປະຫວັດ ສາດ ໃນລະຫວ່າງວັນທີ 23-25 ກັນຍາ ຜ່ານມາ, ໄດ້ນຳພາການພົວພັນທີ່ໝັ້ນທ່ຽງທາງຍຸດທະສາດທີ່ສ້າງສັນ ລະຫວ່າງຈີນ-ອາເມຣິກາ ໄປສູ່ການຂະຫຍາຍຕົວໃໝ່, ໄດ້ສົ່ງສັນຍານທາງບວກວ່າ ຈີນ-ອາເມຣິກາ ກຳລັງຈະກ້າວເດີນຕາມທິດທາງດຽວກັນ, ຢູ່ຮ່ວມກັນໂດຍສັນຕິ ແລະຕ່າງຝ່າຍຕ່າງໄດ້ຮັບຜົນປະໂຫຍດ. ໄດ້ເສີມສ້າງເນື້ອໃນໃໝ່ຕື່ມອີກໃຫ້ແກ່ຕຳແໜ່ງໃໝ່ຂອງການພົວພັນລະຫວ່າງ ຈີນ-ອາເມຣິກາ, ສອງຝ່າຍຕົກລົງທີ່ຈະສ້າງ “ການພົວພັນທີ່ໝັ້ນທ່ຽງທາງຍຸດທະສາດທີ່ສ້າງສັນລະຫວ່າງຈີນ-ອາເມຣິກາ ບົນພື້ນຖານຄວາມເຄົາລົບເຊິ່ງກັນ ແລະ ກັນ, ຍຸຕິທຳ ແລະ ສະເໝີພາບກັນ”, ໄດ້ໃຫ້ການຊີ້ນຳດ້ານຍຸດທະສາດທີ່ຊັດເຈນກວ່າເກົ່າເຂົ້າໃນການຄົ້ນຄວ້າຫາລືກ່ຽວກັບວິທີຢູ່ຮ່ວມກັນຂອງສອງປະເທດໃຫຍ່ຈີນ-ອາເມຣິກາ; ໄດ້ສ້າງພື້ນທີ່ໃໝ່ດ້ານການຮ່ວມມືລະຫວ່າງຈີນ-ອາເມຣິກາ; ໄດ້ສ້າງຂົວມິດ ຕະພາບໃໝ່ລະຫວ່າງຈີນ-ອາເມຣິກາ; ແລະ ໄດ້ສະແດງໃຫ້ເຫັນເຖິງຄວາມຮັບຜິດຊອບໃໝ່ໃນຖານະປະເທດໃຫຍ່. ຕອນເຊົ້າວັນທີ 25 ກັນຍາ ຜ່ານມາ, ຕາມເວລາທ້ອງຖິ່ນ, ທ່ານ ສີ ຈິ້ນຜິງ ປະທານປະເທດຈີນ ພ້ອມດ້ວຍ ທ່ານ ນາງເຜີງລີ້ຢວນ ພັນລະຍາ ແລະ ທ່ານ ໂດນັນ ທຣຳ ປະທານາທິບໍດີ ອາເມຣິກາ ພ້ອມດ້ວຍ ທ່ານ ນາງ ເມລາເນຍ ພັນລະຍາ ໄດ້ເຂົ້າຮ່ວມງານລ້ຽງນ້ຳຊາ ພ້ອມສົນທະນາກັນລະຫວ່າງຄອບຄົວສອງການນຳແບບສ່ວນຕົວເປັນກັນເອງ ຢູ່ທຳນຽບຂາວ. ໃນນັ້ນ, ປະມຸກລັດສອງປະເທດເຫັນດີຮ່ວມກັນວ່າ ຈະເພີ່ມເນື້ອໃນຂອງຕຳແໜ່ງສາຍພົວພັນຈີນ-ອາເມຣິກາ ໃຫ້ອຸດົມສົມບູນຂຶ້ນຕື່ມອີກ, ຮ່ວມກັນສ້າງ“ສາຍພົວພັນທີ່ໝັ້ນທ່ຽງທາງຍຸດທະສາດ ທີ່ສ້າງສັນບົນພື້ນຖານແຫ່ງຄວາມເຄົາລົບເຊິ່ງກັນ ແລະ ກັນ, ຍຸຕິທຳ ແລະ ສະ ເໝີພາບກັນ”. ທ່ານ ສີ ຈິ້ນຜິງ ຊີ້ໃຫ້ເຫັນວ່າ: ນີ້ແມ່ນການເດີນທາງມາຢ້ຽມ ຢາມນະຄອນຫຼວງວໍຊິງຕັນ ແລະ ຢ້ຽມຢາມອາເມຣິກາ ທາງລັດຖະກິດ ອີກຄັ້ງຂອງຂ້າພະເຈົ້າໃນຮອບ 11 ປີຜ່ານມາ. ໃນການຢ້ຽມຢາມຄັ້ງນີ້ ພວກເຮົາໄດ້ ເພີ່ມເນື້ອໃນຂອງຕຳແໜ່ງສາຍພົວພັນຈີນ-ອາເມຣິກາ ໃຫ້ອຸດົມສົມບູນຂຶ້ນຕື່ມອີກ, ເຫັນດີຮ່ວມກັນສ້າງ “ສາຍພົວພັນທີ່ໝັ້ນທ່ຽງທາງຍຸດທະສາດທີ່ສ້າງສັນ ບົນພື້ນຖານແຫ່ງຄວາມເຄົາລົບເຊິ່ງກັນແລະກັນ, ຍຸຕິທຳ ແລະ ສະເໝີພາບກັນ”, ໃນຂົງເຂດເສດຖະກິດການຄ້າກໍໄດ້ຮັບໝາກຜົນທີ່ຕ່າງຝ່າຍຕ່າງໄດ້ຮັບຜົນປະໂຫຍດ ເຊິ່ງຈະໄດ້ຮັບຄວາມຊົມເຊີຍຈາກປະຊາຊົນສອງຊາດ ກໍຄືປະຊາຄົມໂລກ. ທ່ານ ສີ ຈິ້ນຜິງ ເນັ້ນໜັກວ່າ: ສາຍພົວພັນຈີນ-ອາເມຣິກາ ມີອະນາຄົດທີ່ສົດໃສ, ນີ້ແມ່ນທ່າອ່ຽງລວມທາງປະຫວັດສາດ. ພ້ອມກັນນັ້ນ, ເສັ້ນທາງທີ່ກ້າວໄປສູ່ຄວາມສົດໃສມັກຈະເປັນເສັ້ນທາງທີ່ຄົດລ້ຽວ, ມັກຈະປະສົບຄວາມຫຍຸ້ງຍາກ ແລະ ສິ່ງທ້າທາຍຕ່າງໆ, ເຊິ່ງສອດຄ່ອງກັບກົດເກນແຫ່ງການພັດທະນາ. ຂ້າພະເຈົ້າ ຍິນດີຮ່ວມກັບ ທ່ານ ປະທານາທິບໍດີ ໂດນັນ ທຣຳ, ໃຊ້ຄວາມກ້າຫານ ແລະ ຄວາມຮັບຜິດຊອບຕໍ່ປະຫວັດສາດ ເພື່ອຮ່ວມກັນຂຽນໜ້າໜຶ່ງທີ່ໂດດເດັ່ນໃນປະຫວັດການພັດທະນາສາຍພົວພັນ ຈີນ-ອາເມຣິກາ. ທ່ານ ໂດນັນ ທຣຳ ກ່າວວ່າ: ການຢ້ຽມຢາມອາເມຣິກາທາງລັດຖະກິດຂອງທ່ານ ປະທານ ສີ ຈິ້ນຜິງ ໃນຄັ້ງນີ້ ແມ່ນການຢ້ຽມ ຢາມຄັ້ງໜຶ່ງທີ່ສ້າງສັນ ແລະ ໄດ້ຮັບຜົນສຳເລັດຢ່າງຈົບງາມ. ສອງຝ່າຍໄດ້ລົງເລິກແລກປ່ຽນກ່ຽວກັບສາຍພົວພັນອາເມຣິກາ-ຈີນ ກໍຄື ບັນຫາສຳຄັນໃນພາກພື້ນ ແລະ ສາກົນ, ໄດ້ຮັບໝາກ ຜົນທີ່ຕັ້ງໜ້າຫຼາຍຢ່າງ ແລະ ມີຜົນດີຕໍ່ສອງປະເທດ. ຂ້າພະເຈົ້າຄອງຄອຍທີ່ຈະສືບຕໍ່ຮັກສາການແລກປ່ຽນຢ່າງໃກ້ຊິດກັບ ທ່ານ ປະທານ ສີ ຈິ້ນຜິງ ເພື່ອຮ່ວມກັນນຳພາການພັດທະນາສາຍພົວ ພັນ ອາເມຣິກາ-ຈີນ. ຖັດຈາກນັ້ນ ປະມຸກລັດຂອງຈີນ ແລະ ອາເມຣິກາ ພ້ອມດ້ວຍພັນລະຍາ ໄດ້ໄປທັດສະນະສຶກສາຢູ່ສູນສຳເນົາເອກະສານແຫ່ງຊາດອາເມຣິກາ. ໂອກາດນີ້ ທ່ານ ສີ ຈິ້ນຜິງ ກ່າວວ່າ: ການສຳເນົາເອກະສານໄດ້ບັນຈຸສະຕິປັນຍາຂອງບັນພະບຸລຸດ, ທັງເປັນບັນ ດານໃຈຕໍ່ອະນາຄົດ. ຕະຫຼອດໄລຍະ 250 ປີຜ່ານມາ, ປະຊາຊົນອາເມຣິກາ ສະແຫວງຫາຄວາມໃຝ່ຝັນຂອງອາເມຣິກາ, ໂດຍໄດ້ສ້າງປະເທດທີ່ຮັ່ງມີເຂັ້ມແຂງ ແລະ ສວຍງາມຢູ່ທະວີບອາເມຣິກາເໜືອ. ປະຊາຊົນຈີນໄດ້ສືບທອດອະລິຍະທຳ 5.000 ປີຂອງປະຊາຊາດຈີນ, ຍາດໄດ້ຜົນງານ ໃໝ່ຢ່າງບໍ່ຢຸດຢັ້ງບົນຂະບວນການໃໝ່ ເພື່ອບັນລຸຄວາມໃຝ່ຝັນຂອງຈີນທີ່ຈະຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະ ຊາຊາດຈີນ. ຈີນ ແລະ ອາເມຣິ ກາແມ່ນປະເທດທີ່ມີເອກະລັກຂອງຕົນ, ເຖິງວ່າສອງປະເທດມີຄວາມແຕກຕ່າງກັນໃນດ້ານປະ ຫວັດສາດ, ວັດທະນະທຳ, ລະ ບອບສັງຄົມ ແລະ ເສັ້ນທາງການພັດທະນາ ກໍຕາມ, ແຕ່ປະຊາຊົນສອງຊາດມີຄວາມປາຖະໜາຕໍ່ຊີວິດການເປັນຢູ່ອັນດີງາມທີ່ຄ້າຍຄືກັນ. ການຍອມຮັບ ແລະ ເຄົາລົບຄວາມແຕກຕ່າງຂອງ ກັນ ແລະ ກັນ, ເຂົ້າໃຈກັນ ແລະ ຖອດຖອນບົດຮຽນນຳກັນ, ຄົ້ນຫາຜົນປະໂຫຍດຮ່ວມຫຼາຍທີ່ ສຸດ, ເປີດກວ້າງບັນຊີລາຍຊື່ແຫ່ງການຮ່ວມມື ແລະ ຄວບຄຸມຄວາມຂັດແຍ້ງກັນຢ່າງເໝາະສົມຈະເຮັດໃຫ້ສາຍພົວພັນສອງປະເທດສາມາດກ້າວເດີນໄປໄກຢ່າງໝັ້ນທ່ຽງ. ການຢ້ຽມຢາມຄັ້ງນີ້, ປະມຸກລັດສອງປະເທດໄດ້ແລກປ່ຽນຄວາມຄິດຄວາມເຫັນຢ່າງເລິກ ເຊິ່ງກ່ຽວກັບສາຍພົວພັນທີ່ໝັ້ນທ່ຽງທາງຍຸດທະສາດທີ່ສ້າງສັນ ລະຫວ່າງຈີນ-ອາເມຣິກາ ແລະ ບັນຫາສຳຄັນສາກົນ ແລະ ພາກພື້ນ, ໄດ້ບັນລຸຄວາມເຫັນທີ່ເປັນເອກະພາບກັນ 8 ຂໍ້, ເຊິ່ງມີເນື້ອໃນດັ່ງນີ້: ໜຶ່ງ, ສອງຝ່າຍເຫັນດີສ້າງສາຍພົວພັນທີ່ໝັ້ນທ່ຽງທາງຍຸດທະສາດທີ່ສ້າງສັນ ລະຫວ່າງຈີນ-ອາເມຣິກາ ບົນພື້ນຖານການເຄົາລົບເຊິ່ງກັນ ແລະ ກັນ ຍຸຕິທຳ ແລະ ສະເໝີພາບກັນ. ສອງ, ສອງຝ່າຍເຫັນດີສະ ໜັບສະໜູນເຊິ່ງກັນ ແລະ ກັນ ເພື່ອຈັດກອງປະຊຸມ ບໍ່ເປັນທາງການຂອງຜູ້ນຳອົງການຮ່ວມມືເສດຖະກິດອາຊີ-ປາຊີຟິກ ຫຼື ເອເປັກ ແລະ ກອງປະຊຸມສຸດຍອດກຸ່ມ 20 ປະເທດ ຫຼື G20 ໃຫ້ດີ. ປະມຸກລັດສອງປະເທດສະແດງເຈດຈຳນົງຈະເຂົ້າຮ່ວມກອງ ປະຊຸມທີ່ອີກຝ່າຍໜຶ່ງເປັນເຈົ້າ ພາບ. ສາມ, ປະມຸກລັດສອງປະເທດເຫັນດີນຳກັນວ່າ ອີຣານ ຄວນປະຕິບັດຕາມຄຳໝັ້ນສັນຍາທີ່ຈະບໍ່ພັດທະນາອາວຸດນິວເຄລຍ, ປະເທດ ຫຼື ອົງການຈັດຕັ້ງໃດໆ ລ້ວນແຕ່ບໍ່ຄວນເກັບຄ່າທຳນຽມຕໍ່ເສັ້ນທາງນ້ຳສາກົນ. ສີ່, ປະມຸກລັດສອງປະເທດທົບທວນຄືນເຖິງ ຈີນ ແລະ ອາເມຣິກາ ເປັນພັນທະມິດກັນໃນສົງຄາມໂລກ ຄັ້ງທີ 2, ໄດ້ຕໍ່ສູ້ຄຽງບ່າຄຽງໄຫຼ່ກັນ ແລະ ຍາດໄດ້ໄຊຊະນະໃນສົງຄາມ. ຫ້າ, ປະມຸກລັດສອງປະເທດຍອມຮັບບົດບາດທີ່ຕັ້ງໜ້າຂອງກົນໄກການເຈລະຈາເສດຖະກິດການຄ້າລະຫວ່າງຈີນ-ອາເມຣິກາ ແລະ ຜົນຂອງການເຈລະຈາລະຫວ່າງທີມງານເສດຖະກິດການຄ້າສອງຝ່າຍ, ເຊິ່ງລວມທັງ ການສ້າງຕັ້ງ ແລະ ການພັດທະນາກົນໄກຕ່າງໆ ເຊັ່ນ: ສະພາການຄ້າ ແລະ ອື່ນໆ, ການບັນລຸມາດຕະການຫຼຸດພາສີແບບເທົ່າທຽມກັນສຳລັບສິນຄ້າທີ່ມີມູນຄ່າ “30 ຕື້ໂດລາສະຫະລັດ”, ແກ່ຍາວເວລາປະຕິບັດຜົນການເຈລະຈາເສດຖະກິດການຄ້າຢູ່ນະຄອນຫຼວງກົວລາລຳເປີ ຂອງມາເລເຊຍ ແລະ ອື່ນໆ, ທັງຊີ້ນຳໃຫ້ຈັດຕັ້ງປະຕິບັດຕົວຈິງຕາມທີ່ໄດ້ຕົກລົງກັນ. ຫົກ, ການຮ່ວມມືລະຫວ່າງພາກສ່ວນປາບປາມຢາເສບຕິດ ແລະ ບັງຄັບໃຊ້ກົດໝາຍລະ ຫວ່າງຈີນ-ອາເມຣິກາ ໄດ້ຮັບໝາກຜົນທີ່ສາມາດເຫັນໄດ້ຢ່າງຊັດເຈນ. ເຈັດ, ສອງຝ່າຍເຫັນດີສ້າງຕັ້ງການສົນທະນາກ່ຽວກັບປັນຍາປະດິດລະຫວ່າງຈີນ-ອາເມຣິກາ, ແລກປ່ຽນຄວາມສ່ຽງ ແລະ ຜົນປະໂຫຍດກ່ຽວກັບປັນຍາປະດິດ. ການສົນທະນາຄັ້ງຕໍ່ໄປຈະຈັດຂຶ້ນໃນເດືອນພະຈິກ ປີ 2026 ນີ້. ສອງຝ່າຍເຫັນດີສ້າງ ຕັ້ງຊ່ອງທາງແລກປ່ຽນສຳລັບບັນຫາທີ່ກ່ຽວຂ້ອງກັບປັນຍາປະດິດ. ແປດ, ອາເມຣິກາ ສະແດງຄວາມຍິນດີຕ້ອນຮັບ ໝີແພນດ້າຄູ່ໜຶ່ງ ທີ່ຈີນໃຫ້ຢືມມາຍັງສວນສັດແອັດແລນຕາຂອງອາເມຣິກາ. ນອກນີ້, ກອງທັບຈີນ ແລະ ອາເມຣິກາ ຕົກລົງເຫັນດີທີ່ຈະລົງນາມບົດບັນທຶກຄວາມເຂົ້າໃຈກ່ຽວກັບການເພີ່ມທະວີການແລກປ່ຽນ ແລະ ປ້ອງກັນວິກິດການໃຫ້ໄວເທົ່າທີ່ຈະໄວໄດ້ ແລະ ສືບຕໍ່ຮ່ວມມືໃນການຄົ້ນຫາຊາກສົບຂອງທະຫານອາເມຣິກາ ທີ່ຫາຍສາບສູນຢູ່ຈີນ.

news to day and hot news