ວັນສຸກ, ວັນທີ 16 ຕຸລາ 2026
ຊູແອັດ ຊື້ລະບົບຈະຫຼວດ HIMARS ເພື່ອເສີມສ້າງຄວາມໝັ້ນຄົງພາກເໜືອຂອງ ນາໂຕ
ເວລາອອກຂ່າວ: 2026-09-30 09:27:17 | ຜູ້ຂຽນ : admin1 | ຈຳນວນຄົນເຂົ້າຊົມ: 191 | ຄວາມນິຍົມ: 
ຕາມຂ່າວການທະຫານຕ່າງປະເທດລາຍງານວ່າ ຊູແອັດ ໄດ້ອະນຸມັດການຊື້ລະບົບຈະຫຼວດເຄື່ອນທີ່ສູງ HIMARS ທີ່ຜະລິດໂດຍສະຫະລັດ, ເຊິ່ງຈະຊ່ວຍເສີມຄວາມສາມາດໃນການໂຈມຕີໄລຍະໄກທີ່ມີຄວາມແມ່ນຍຳຂອງກອງທັບຊູແອັດ. ການຈັດສົ່ງລະບົບດັ່ງກ່າວ ທາງບໍລິສັດ Lockheed Martin ມີກຳນົດຈະເລີ່ມຕົ້ນໃນປີ 2027. ການຈັດຊື້ມີມູນຄ່າປະມານ 7 ຕື້ໂຄຣນາຊູແອັດ ຫຼື ປະມານ 729 ລ້ານໂດລາສະຫະລັດ ແລະ ຈະໄດ້ຮັບທຶນພາຍໃຕ້ແຜນການລົງທຶນປົກກະຕິຂອງກອງທັບຊູແອັດທີ່ເປັນການຈັດຊື້ທີ່ເໝາະສົມພາຍໃຕ້ຮ່າງກົດໝາຍວ່າດ້ວຍການປ້ອງກັນຊາດປີ 2025-2030. ລະບົບ HIMARS ຈະຊ່ວຍໃຫ້ກອງທັບຊູແອັດສາມາດປະຕິບັດງານໃນພື້ນທີ່ກວ້າງຂວາງ ແລະໂຈມຕີເປົ້າໝາຍໃນໄລຍະໄກກວ່າລະບົບທີ່ໃຊ້ໃນປັດຈຸບັນ. ມັນຈະເສີມລະບົບອາວຸດແບບເກົ່າເຊັ່ນລະບົບປືນໃຫຍ່ Archer ແລະ ປືນຍິງລະເບີດ, ໃນຂະນະທີ່ຮັກສາຄວາມເຂົ້າກັນໄດ້ກັບລະບົບພັນທະມິດ. ປະເທດຊູແອັດກຳລັງຂະຫຍາຍການຮ່ວມມືດ້ານປ້ອງກັນປະເທດກັບປະເທດແຟັງລັງ ເຊິ່ງໃຊ້ລະບົບຍິງລູກສອນໄຟຫຼາຍລູກ (MLRS) ທີ່ໃຊ້ລູກປືນ ແລະ ອົງປະກອບດຽວກັນກັບ HIMARS, ເຊິ່ງເປັນພື້ນຖານຮ່ວມກັນສຳລັບການຝຶກອົບຮົມຮ່ວມກັນ, ການສະໜັບສະໜູນ ແລະ ການພັດທະນາຄວາມສາມາດ. ລັດຖະມົນຕີກະຊວງປ້ອງກັນປະເທດຊູແອັດ ທ່ານ ຟາລ ຈອນສັນ ແລະ ລັດຖະມົນຕີກະຊວງປ້ອງກັນປະເທດແຟັງລັງ ທ່ານ ແອນຕິ ຮາກກາເນນ ໄດ້ລົງນາມໃນຖະແຫຼງການຮ່ວມກ່ຽວກັບຄວາມສາມາດຂອງລູກສອນໄຟປືນໃຫຍ່ຂອງສອງປະເທດ. ຂອບການຮ່ວມມືນີ້ກວມເອົາການເຝິິກອົບຮົມ, ການສຶກສາ, ການບຳລຸງຮັກສາ, ຄວາມປອດໄພໃນການສະໜອງ ແລະ ການຮ່ວມມືດ້ານການຜະລິດ. ທ່ານ ຈອນສັນ ກ່າວວ່າ, “ການນຳໃຊ້ລູກສອນໄຟປືນໃຫຍ່ສະແດງໃຫ້ເຫັນຢ່າງຊັດເຈນເຖິງຄວາມຮັບຜິດຊອບຂອງຊູແອັດຕໍ່ຄວາມໝັ້ນຄົງຂອງເອີຣົບ.” “ຖະແຫຼງການຮ່ວມກັບແຟັງລັງມີຈຸດປະສົງເພື່ອສົ່ງເສີມການພັດທະນາຄວາມສາມາດ, ການບຳລຸງຮັກສາ ແລະ ຄວາມປອດໄພໃນການສະໜອງສຳລັບລະບົບດັ່ງກ່າວ,” ລາວກ່າວຕື່ມ. “ພວກເຮົາກຳລັງຮ່ວມກັນພັດທະນາຄວາມສາມາດທີ່ສຳຄັນສຳລັບການປ້ອງກັນຮ່ວມກັນຂອງ NATO.” ປະເທດຊູແອັດກ່າວວ່າ ການລິເລີ່ມສອງຝ່າຍນີ້ຈະເສີມສ້າງຄວາມສາມາດດ້ານປ້ອງກັນປະເທດໃນເອີຣົບເໜືອ. ນອກຈາກນັ້ນ, ບໍລິສັດ Lockheed Martin ແລະ Saab ຍັງໄດ້ລົງນາມໃນຖະແຫຼງການຮ່ວມອີກສະບັບໜຶ່ງກ່ຽວກັບການຮ່ວມມືດ້ານອຸດສາຫະກຳທີ່ມີທ່າແຮງທີ່ກ່ຽວຂ້ອງກັບໂຄງການນີ້. ບໍລິສັດທັງສອງຈະສຳຫຼວດຄວາມເປັນໄປໄດ້ຂອງການລວມເອົາລະເບີດຂະໜາດນ້ອຍ (SDB) ຂອງ Saab ເຂົ້າໃນລະບົບ HIMARS. ການສົນທະນາດ້ານອຸດສາຫະກຳຍັງກວມເອົາການຜະລິດລູກປືນສຳລັບລະບົບ HIMARS ແລະລະບົບອື່ນໆ, ລວມທັງລະບົບປ້ອງກັນທາງອາກາດ Patriot ເຊີ່ງວຽກງານນີ້ຈະປັບປຸງຄວາມປອດໄພຂອງການສະໜອງອາວຸດຂອງຕົນ. ລັດຖະບານກ່າວວ່າລູກສອນໄຟປືນໃຫຍ່ກຳລັງກາຍເປັນຄວາມສາມາດທີ່ສຳຄັນເພີ່ມຂຶ້ນສຳລັບການໂຈມຕີເປົ້າໝາຍໄລຍະໄກທີ່ມີຄວາມແມ່ນຍຳສູງ ແລະ ລະບົບທີ່ມີຢູ່ແມ່ນຈຳເປັນເພື່ອເສີມປືນໃຫຍ່ແບບດັ້ງເດີມທ່າມກາງສະຖານະການຄວາມປອດໄພໃນປັດຈຸບັນ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
