ວັນຈັນ, ວັນທີ 12 ຕຸລາ 2026
ຖືສຳຄັນຕໍ່ວຽກງານກໍ່ສ້າງຮາກຖານໃນໄລຍະໃໝ່ ຂອງກະຊວງປ້ອງກັນປະເທດ
ເວລາອອກຂ່າວ: 2026-09-17 10:10:09 | ຜູ້ຂຽນ : admin1 | ຈຳນວນຄົນເຂົ້າຊົມ: 95 | ຄວາມນິຍົມ: 
ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແກ້ໄຂຄວາມທຸກຍາກ ແລະ ວຽກງານ 3 ສ້າງ ເປັນວຽກງານຍຸດທະສາດ, ສູນກາງພັກໄດ້ຫັນແນວທາງນະໂຍບາຍລວມຂອງພັກ, ກວດກາ ແລະ ຊຸກຍູ້ທົ່ວລະບົບການເມືອງຢູ່ສູນ ກາງ ແລະ ທ້ອງຖິ່ນ ຫັນເປັນນິຕິກຳສະເພາະຂອງຕົນ. ສຳລັບຢູ່ກະຊວງປ້ອງກັນປະເທດ ໂດຍປະຕິບັດຕາມຄຳສັ່ງແນະນຳ ວ່າ ດ້ວຍການສ້າງບ້ານ ເປັນຫົວ ໜ່ວຍພັດທະນາ, ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ ຕິດພັນກັບວຽກງານ 3 ສ້າງ, ອີງຕາມມະຕິ ວ່າດ້ວຍ 4 ໜ້າທີ່ໃຫຍ່ 26 ແຜນງານທີ່ ຄະນະພັກກະຊວງປ້ອງກັນປະ ເທດວາງອອກ, ອີງຕາມແຜນ ການຮ່ວມມື ປະຈຳປີ 2026 ລະ ຫວ່າງກອງທັບປະຊາຊົນລາວ ແລະ ກອງທັບປະຊາຊົນຫວຽດ ນາມ ໃນການເປີດເຝິກອົບຮົມໃຫ້ພະນັກງານກໍ່ສ້າງຮາກຖານ ກົມໃຫຍ່ການເມືອງກອງທັບປະ ຊາຊົນລາວ ຈຳນວນ 10 ສະຫາຍ ແລະ ອີງຕາມຂໍ້ຕົກລົງຂອງກະ ຊວງປ້ອງກັນປະເທດ ວ່າດ້ວຍການອະນຸມັດໃຫ້ພະນັກງານໄປເຝິກອົບຮົມວຽກງານກໍ່ສ້າງຮາກຖານຢູ່ ສສ ຫວຽດນາມ ສົກຮຽນ 2026-2027 ໃຫ້ບັນລຸຕາມແຜນການ.
ໃນໂອກາດເຂົ້າຮ່ວມເຝິກອົບ ຮົມວຽກງານກໍ່ສ້າງຮາກຖານ ຢູ່ ສສ ຫວຽດນາມ, ສະຫາຍ ພັນເອກ ວັນໄຊ ຢາຫົງທອງ ຮອງຫົວໜ້າກົມກໍ່ສ້າງຮາກຖານ ກົມໃຫຍ່ການເມືອງກອງທັບ ໄດ້ໃຫ້ທັດສະນະຕໍ່ວຽກງານກໍ່ສ້າງຮາກຖານຂອງກອງທັບປະຊາຊົນ ລາວ ໃນໄລຍະໃໝ່ວ່າ: ວຽກ ງານຂົນຂວາຍ ແມ່ນວຽກງານໜຶ່ງທີ່ສຳຄັນ ແມ່ນໜ້າທີ່ຍຸດທະສາດຍາວນານຂອງພັກ-ລັດ, ຂອງກອງທັບປະຊາຊົນລາວ ທີ່ ຂາດບໍ່ໄດ້. ເຊິ່ງວຽກງານດັ່ງ ກ່າວ ພັກ-ລັດ ໄດ້ຫັນວຽກພັດ ທະນາຊົນນະບົດ ແລະ ແກ້ໄຂຄວາມທຸກຍາກ ເປັນວາລະແຫ່ງຊາດ ໃນນັ້ນ, ວຽກງານກໍ່ສ້າງຮາກຖານການເມືອງ ກໍແມ່ນປັດ ໄຈໜຶ່ງທີ່ນອນໃນວາລະແຫ່ງຊາດ ສະນັ້ນ, ຄະນະບໍລິຫານງານສູນກາງພັກໄດ້ອອກມະຕິ ວ່າດ້ວຍການເພີ່ມທະວີການນຳພາຂອງພັກ ຕໍ່ກັບວຽກງານກໍ່ສ້າງຮາກຖານການເມືອງ ຕິດພັນກັບວຽກງານພັດທະນາຊົນນະບົດ, ແກ້ໄຂຄວາມທຸກຍາກ ແລະ ວຽກງານ 3 ສ້າງ ໃນໄລຍະໄໝ່. ດັ່ງ ນັ້ນ, ຈຶ່ງເວົ້າໄດ້ວ່າ: ວຽກງານກໍ່ ສ້າງຮາກຖານການເມືອງແມ່ນ ວຽກງານສຸດທີ່ສຳຄັນ ເປັນພື້ນ ຖານໃຫ້ແກ່ການພັດທະນາເສດ ຖະກິດ-ສັງຄົມ.
ສະຫາຍຮອງຫົວໜ້າກົມກໍ່ ສ້າງຮາກຖານ ຍັງກ່າວຕື່ມວ່າ: ຜ່ານໄລຍະເຝິກອົບຮົມເກືອບ 1 ເດືອນ ຢູ່ ສສ ຫວຽດນາມ ນັກເຝິກອົບຮົມແຕ່ລະສະຫາຍໄດ້ຂຶ້ນຫ້ອງຮ່ຳຮຽນທິດສະດີ, ເຊິ່ງລວມມີ 8 ເອກະສານ ທີ່ສຳຄັນກ່ຽວກັບວຽກງານຂົນຂວາຍຂອງກອງທັບປະຊາຊົນຫວຽດນາມ ຄື: ວຽກງານປະສານສົມທົບກັບ ບັນດາອົງການ ການເມືອງ-ສັງ ຄົມ ໃນການເຄື່ອນໄຫວວຽກງານ ຂົນຂວາຍກອງທັບປະຊາຊົນຫວຽດນາມ; ເອກະສານວຽກ ງານຂົນຂວາຍຂອງກອງທັບປະ ຊາຊົນຫວຽດນາມ, ເອກະສານ ລັດທິ ມາກ-ເລນິນ, ແນວຄິດ ປະ ທານ ໂຮ່ຈີມິນ ແລະ ທັດສະນະ ຂອງພັກກອມມູນິດຫວຽດນາມ ກ່ຽວກັບວຽກງານຂົນຂວາຍ; ເອກະສານບາງເນື້ອໃນພື້ນຖານ ກ່ຽວກັບວຽກງານໂຄສະນາເຜີຍ ແຜ່ພິເສດຂອງກອງທັບປະຊາ ຊົນຫວຽດນາມ; ເອກະສານກອງ ທັບເຂົ້າຮ່ວມແກ້ໄຂບາງກໍລະນີ ທີ່ຫຍຸ້ງຍາກຂອງສັງຄົມ; ເອກະ ສານວຽກງານຂົນຂວາຍຂອງກອງທັບປະຊາຊົນຫວຽດນາມ ຢູ່ບັນດາເຂດຊົນເຜົ່າ ແລະ ສາ ສະໜາ; ເອກະສານວຽກງານຂົນຂວາຍທະຫານຊາຍແດນຫວຽດນາມ ແລະ ເອກະສານບົດ ຮຽນໃນການຈັດຕັ້ງການເຄື່ອນ ໄຫວບາງຮູບການວຽກງານຂົນ ຂວາຍຂອງທະຫານຊາຍແດນ. ນອກຈາກຂຶ້ນຫ້ອງຮຽນພາກທິດສະດີແລ້ວ ຄະນະກົມຂົນຂວາຍ, ຄະນະສູນ 871 ໄດ້ນຳພານັກເຝິກອົບຮົມເຄື່ອນໄຫວຢ້ຽມຢາມແລກປ່ຽນບົດຮຽນ ຢູ່ 4 ກົມກອງ ເປັນຕົ້ນແມ່ນ ທັດສະນະສຸສານ ປະທານ ໂຮ່ຈີມິນ, ຫໍພິ ພິທະພັນ ໂຮ່ຈີມິນ, ຫໍພິພິທະ ພັນປະຫວັດສາດການທະຫານ ກອງທັບປະຊຊົນຫວຽດນາມ, ແລກປ່ຽນບົດຮຽນຢູ່ກອງບັນ ຊາການທະຫານແຂວງບັກນິງ, ກອງບັນຊາການທະຫານແຂວງ ນິງບິງ, ກອງບັນຊາການທະຫານແຂວງເຫງະອານ ນອກຈາກນັ້ນ, ຍັງໄດ້ໄປທັດສະນະ, ທ່ຽວຊົມສະຖານທີ່ຮ່ອງຮອຍປະຫວັດ ສາດອະລິຍະທຳທີ່ມີສື່ສຽງຂອງປະເທດຫວຽດນາມ ເຊັ່ນ: ບ້ານເກີດ ປະທານ ໂຮ່ຈີມິນ, ສະຖານທີ່ຮ່ອງຮອຍປະຫວັດສາດ ຮວ່າງຖ່ານ, ແຫຼ່ງທ່ອງທ່ຽວຈ່າງອານ ເມືອງເກົ່າອະລິຍະທຳຮວ່າລືນິງ ບິງ. ການເຄື່ອນໄຫວທັດສະນະ ກົມກອງ ກໍຄື ທ່ອງທ່ຽວບັນດາ ສະຖານທີ່ຮ່ອງຮອຍປະຫວັດ ສາດ, ວັດທະນະທຳອັນດີງາມຂອງຊາດຫວຽດນາມ ທີ່ມີມາແຕ່ດຶກດຳບັນ ເຫັນໄດ້ວ່າ ປະຊາຊົນຫວຽດນາມມີມູນເຊື້ອສາມັກຄີ, ມີນໍ້າໃຈຮັກຊາດອັນສູງສົ່ງ, ມີມູນເຊື້ອດຸໝັ່ນ, ມີນ້ຳໃຈຕໍ່ສູ້ຕ້ານຜູ້ຮຸກຮານຢ່າງພິລະອາດຫານແຕ່ລະຍຸກ, ແຕ່ລະສະໄໝ ໄດ້ຮັບໄຊຊະນະເປັນກ້າວໆມາ ກ້າວໄປສູ່ປົດປ່ອຍປະເທດຊາດ ໄດ້ຢ່າງສະຫງ່າງາມ.
ຜ່ານການແລກປ່ຽນບັນດາບົດຮຽນນຳກົມກອງເພື່ອນ ທາງດ້ານທິດສະດີ ແລະ ແລກປ່ຽນບົດຮຽນພຶດຕິກຳຕົວຈິງນຳບັນ ດາກົມກອງ ເຊິ່ງໄປແຕ່ລະບ່ອນ ໄດ້ຮັບຟັງການລາຍງານ ວຽກງານຂົນຂວາຍແຕ່ລະກົມກອງ ຢ່າງມີສີສັນຂອງວຽກງານຂົນ ຂວາຍປະຊາຊົນຫວຽດນາມ ເຊິ່ງສະແດງອອກ ເຮັດໃຫ້ບ້ານປະຊາຊົນມີຄວາມສະຫງົບ, ເສດ ຖະກິດ-ສັງຄົມ ມີການຂະຫຍາຍ ຕົວຢ່າງກ້າວກະໂດດນັ້ນ. ນັກເຝິກອົບຮົມທຸກສະຫາຍໄດ້ນຳບົດຮຽນທີ່ໄດ້ຮໍ່າຮຽນມາໄປໝູນ ໃຊ້ເຂົ້າໃນສະພາບແວດລ້ອມ ຂອງກົມກອງຮາກຖານກອງທັບປະຊາຊົນລາວ ໃຫ້ເກີດຜົນປະ ໂຫຍດສູງສຸດ. ອີກປະການທີ່ສຳ ຄັນເຫັນໄດ້ວ່າ ບັນດາຄູ-ອາຈານ ໄດ້ເອົາໃຈໃສ່ຖ່າຍທອດຄວາມຮູ້ ປະສົບການວຽກງານຂົນຂວາຍກອງທັບປະຊາຊົນຫວຽດນາມ ໃຫ້ນັກເຝິກອົບຮົມຂອງກົມກໍ່ ສ້າງຮາກຖານກົມໃຫຍ່ການ ເມືອງກອງທັບປະຊາຊົນລາວ ເຫັນວ່າແຕ່ລະສະຫາຍໄດ້ຕັ້ງໜ້າ ຄົ້ນຄວ້າຮ່ຳຮຽນ ແລະ ເອົາໃຈໃສ່ສົນທະນາແລກປ່ຽນບົດຮຽນຕົວຈິງຂອງແຕ່ລະກົມກອງ ດ້ວຍບັນຍາກາດຟົດຟື້ນ. ການຈັດຕັ້ງປະຕິບັດເຮັດໄດ້ດີບັນດາຮູບການຂົນຂວາຍມີຄວາມອຸດົມສົມບູນ, ຈັດສັນດ້ານງົບປະມານເປັນບູລິ ມະສິດ ໃສ່ວຽກງານຂົນຂວາຍບັນລຸຜົນສຳເລັດສູງໃນການແລກ ປ່ຽນນຳບັນດາກົມກອງ, ນັກເຝິກ ອົບຮົມໄດ້ເອົາໃຈໃສ່ຄົ້ນຄວ້າແລກປ່ຽນບົດຮຽນນຳເພື່ອນບ້ານ ຢ່າງກົງໄປກົງມາ ດ້ວຍບັນຍາ ກາດເຕັມໄປດ້ວຍໄມຕີຈິດມິດ ຕະພາບ ອັນສະໜິດສະໜົມ.
ສັງລວມແລ້ວ ການເຝິກອົບ ຮົມຄັ້ງນີ້ ເຖິງເວລາຈະສັ້ນ ການແລກປ່ຽນບົດຮຽນ, ຄວາມຮັບ ຜິດຊອບ ແລະ ເອົາໃຈໃສ່ຂອງ ກົມຂົນຂວາຍກອງທັບປະຊາຊົນຫວຽດນາມ ກໍຄື ຄວາມຮັບຜິດ ຊອບຂອງບັນດາສະຫາຍທີ່ໄປເຝິກອົບຮົມມີຫຼາຍ ຈຶ່ງເຮັດໃຫ້ບັ້ນເຝິກອົບຮົມວຽກງານຂົນຂວາຍ ກອງທັບປະຊາຊົນຫວຽດນາມ ກໍຄື ວຽກງານກໍ່ສ້າງຮາກຖານການເມືອງ ກອງທັບປະຊາຊົນລາວ ໃນຄັ້ງນີ້ ໄດ້ຮັບຜົນສຳເລັດສູງ.
ຄຳວ່າ ລາວ-ຫວຽດນາມ, ຫວຽດນາມ-ລາວ ແມ່ນອ້າຍນ້ອງທີ່ມີມູນເຊື້ອສາມັກຄີມາແຕ່ດົນນານ, ແມ່ນສາຍພົວພັນພິເສດ ແລະ ຮ່ວມມືຮອບດ້ານທີ່ບໍ່ຄືກັບປະເທດໃດໆ ເຊິ່ງສາຍພົວພັນດັ່ງ ກ່າວ ໂດຍແມ່ນປະທານ ໂຮ່ຈີ ມິນ, ປະທານ ໄກສອນ ພົມວິ ຫານ, ປະທານ ສຸພານຸວົງ ກໍຄື ຜູ້ນຳອື່ນໆ ເປັນຜູ້ລິເລີ່ມກໍຕັ້ງ ແລະ ການນຳຮຸ່ນຕໍ່ຮຸ່ນ ໄດ້ພ້ອມກັນສືບຕໍ່ບູລະນະເພີ່ມພູນຄູນສ້າງ ມາແຕ່ລະໄລຍະ, ນັບແຕ່ສະໄໝຕໍ່ສູ້ກູ້ຊາດຈົນມາຮອດປັດຈຸບັນ. ສາຍພົວພັນ ລາວ-ຫວຽດນາມ ເຊິ່ງຜູ້ນຳທີ່ຍິ່ງໃຫຍ່ ຂອງສອງປະເທດ ໄດ້ກ່າວໄວ້ ແລະ ຍັງຝັງ ຢູ່ໃນດວງໃຈ ຂອງປະຊາຊົນລາວ ແລະ ປະຊາຊົນຫວຽດນາມຕະຫຼອດໄປ ໃນນັ້ນ, ປະທານ ໂຮ່ຈີມິນ ກ່າວວ່າ: “ຮັກຫອມກັນໝາຍໝັ້ນ ຫຼາຍສັນພູກໍປີນໄຕ່ ຫຼາຍແມ່ນ້ຳໃຫຍ່ ແລະ ໂຄກຄ້ອຍຂວາງກັ້ນ ກໍດຸ່ງໄປ ສອງຊາດ ລາວ-ຫວຽດໄດ້ ຝັງຄວາມຮັກຢູ່ໃນໃຈ ຮົ່ງຮາ ທັງແມ່ຂອງ ບໍເລິກປູນປານໄດ້” ແລະ ປະທານ ໄກສອນ ພົມວິຫານ ໄດ້ຢືນຢັນວ່າ: “ເຖິງວ່າ ພູຈະຖືກເຊາະເຈື່ອນ, ແມ່ນໍ້າລຳເຊຈະເຫືອດແຫ້ງ, ແຕ່ສາຍພົວພັນມິດຕະພາບ ລາວ-ຫວຽດນາມ ຈະໝັ້ນຄົງທະນົງແກ່ນຊົ່ວກາລະນານ”. ພ້ອມກັນນັ້ນ, ປະທານ ສຸພານຸວົງ ໄດ້ຢືນຢັນອີກວ່າ: “ສາຍສຳພັນ ລາວ-ຫວຽດນາມ ສູງກວ່າພູ ເຂົາ, ຍາວກວ່າແມ່ນໍ້າລຳເຊ, ກວ້າງກວ່າທະເລມະຫາສະໝຸດ, ງາມກວ່າດວງຈັນ, ຫອມຫວນກວ່າດອກໄມ້ ທີ່ຫອມທີ່ສຸດ”.
ໂດຍ: ສາຍໃຈປະຕິວັດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
