POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນສຸກ, ວັນທີ 16 ຕຸລາ 2026

ຜົນງານ ແລະ ໄຊຊະນະ ຂອງສະຫະພັນນັກຮົບເກົ່າແຫ່ງຊາດລາວ
ເວລາອອກຂ່າວ: 2026-09-09 09:16:41 | ຜູ້ຂຽນ : admin1 | ຈຳນວນຄົນເຂົ້າຊົມ: 1082 | ຄວາມນິຍົມ:

ໃນພາລະກິດຂອງການປະ ຕິວັດຊາດປະຊາທິປະໄຕພາຍໃຕ້ການນຳພາຂອງພັກປະຊາຊົນປະຕິວັດລາວ ການຕໍ່ສູ້ອັນຍຶດເຍື້ອຍາວນານມີຫຼາຍສະຫາຍໃນກຳລັງປະກອບອາວຸດໄດ້ເສຍ ສະຫຼະຊີວິດ, ຫຼາຍສະຫາຍຖືກບາດເຈັບເສຍອົງຄະເພື່ອແລກເອົາຄວາມເປັນເອກະລາດແຫ່ງຊາດ, ເພື່ອຄວາມຜາສຸກຂອງປະຊາຊົນລາວບັນດາເຜົ່າ. ພ້ອມກັນນັ້ນກໍມີຫຼາຍສະຫາຍໄດ້ກາຍ ເປັນວິລະຊົນແຫ່ງຊາດ, ນັກຮົບແຂ່ງຂັນ, ກາຍເປັນພະນັກງານການນຳຫົວຈັກຫຼັກແຫຼ່ງຢູ່ຕາມກະຊວງ, ອົງການ, ກົມກອງ, ຂະແໜງການ ແລະ ທ້ອງຖິ່ນຕ່າງໆ ໃນຂອບເຂດທົ່ວປະເທດ, ສ່ວນຫຼວງຫຼາຍມີອາຍຸສູງ, ສຸຂະ ພາບອ່ອນເພຍ, ໄດ້ອອກພັກ ຜ່ອນຮັບບຳນານ, ບຳເນັດ ຢູ່ຕາມທ້ອງຖິ່ນຕ່າງໆ, ແຕ່ບັນດາສະຫາຍເຫຼົ່ານັ້ນຍາມໃດກໍຍົກສູງທາດແທ້ມູນເຊື້ອນັກຮົບປະຕິວັດ ແລະ ພ້ອມແລ້ວທີ່ຈະສຶບຕໍ່ທຸ່ມ ເທເຫື່ອແຮງ, ສະຕິປັນຍາປະ ກອບສ່ວນເຂົ້າໃນພາລະກິດປ່ຽນ ແປງໃໝ່ຮອບດ້ານທີ່ມີຫຼັກການຂອງພັກ, ບັນດາສະຫາຍເຫຼົ່ານັ້ນມີຄວາມມຸ້ງມາດປາຖະໜາຢາກ ໃຫ້ມີການຈັດຕັ້ງເພື່ອເປັນບ່ອນ ເຕົ້າໂຮມຄວາມສາມັກຄີ, ເຕົ້າ ໂຮມຄວາມຄິດຄວາມເຫັນ ເພື່ອປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດໃຫ້ດີຂຶ້ນເລື້ອຍໆ. ສະຫາຍ ພົນໂທ ແສງນວນ ໄຊຍະລາດ ປະທານສະຫະພັນນັກຮົບເກົ່າແຫ່ງຊາດລາວ ໃຫ້ທັດສະນະວ່າ: ເນື່ອງໃນໂອກາດວັນສ້າງຕັ້ງສະຫະພັນນັກຮົບເກົ່າ ແຫ່ງຊາດລາວ ຄົບຮອບ 24 ປີ (9 ກັນຍາ 2002-9 ກັນຍາ 2024) ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງພາລະກິດປະຕິວັດ ໃນການປົກປັກຮັກສາ ແລະ ພັດທະນາປະເທດຊາດ ກໍຄື ການປົກປັກ ຮັກສາໝາກຜົນຂອງການປະຕິ ວັດ ແລະ ລະບອບໃໝ່ຂອງພວກເຮົາໄວ້ຢ່າງໝັ້ນຄົງນັ້ນ ແລະ ຕອບສະໜອງຄວາມມຸ້ງມາດປາດຖະໜາຂອງນັກຮົບເກົ່າ, ເພື່ອເຕົ້າໂຮມຄວາມສາມັກຄີອັນເປັນປຶກແຜ່ນ ແລະ ເບິ່ງແຍງຊ່ວຍເຫຼືອເຊິ່ງກັນ ແລະ ກັນໃນ ເວລາພົບຄວາມຫຍຸ້ງຍາກສັບ ສົນຂອງຖັນແຖວນັກຮົບເກົ່າໃນການດຳລົງຊີວິດ ແລະ ການສ້າງເສດຖະກິດຄອບຄົວແກ້ໄຂຄວາມທຸກຍາກ ເພື່ອຕີຖອຍຖ້ອຍທຳນອງທີ່ວ່າ: “ນາແລ້ວຂ້າຄວາຍເຖິກ ເສິກແລ້ວຂ້າຄົນຫານ” ໃຫ້ກາຍມາເປັນຄຳເວົ້າທີ່ວ່າ: “ແລ້ວນາລ້ຽງຄວາຍເຖິກ ແລ້ວເສິກເບິ່ງຄົນຫານ” ພ້ອມກັນນັ້ນ, ກໍເປັນການເສີມຂະຫຍາຍມູນເຊື້ອອັນດີງາມ ຂອງຊາດ, ຂອງພັກ ແລະ ຂອງກອງທັບ, ທັດສະນະທາດແທ້ນັກ ຮົບປະຕິວັດໃນເມື່ອກ່ອນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະໃໝ່. ມາຮອດ ປີ 2002 ກົມການເມືອງສູນກາງພັກ ໄດ້ອອກມະຕິສະບັບເລກທີ 68/ກມສພ; ລົງວັນທີ 9/9/2002 ວ່າດ້ວຍການສ້າງຕັ້ງສະຫະພັນນັກຮົບເກົ່າແຫ່ງຊາດລາວ; ເຊິ່ງການຈັດຕັ້ງສະຫະພັນນັກຮົບເກົ່າແຫ່ງຊາດລາວ ແມ່ນອົງການ ຈັດຕັ້ງການເມືອງ-ສັງຄົມໜຶ່ງນອນຢູ່ໃນລະບົບການເມືອງຂອງລະບອບປະຊາທິປະໄຕ ປະຊາຊົນ ໃຕ້ການນຳພາຂອງພັກປະຊາຊົນປະຕິວັດລາວ, ມີພາລະບົດບາດ, ໜ້າທີ່ເຕົ້າໂຮມບັນດາພະນັກງານ-ນັກຮົບເກົ່າເສີມຂະຫຍາຍມູນເຊື້ອຮັກຊາດ ແລະ ເປັນກຳ ລັງແຮງໃນການປົກປັກຮັກສາ ແລະ ສ້າງສາພັດທະນາປະເທດຊາດ. ຕະຫຼອດໄລຍະ 24 ປີ ພາຍໃຕ້ການຊີ້ນຳ-ນຳພາຢ່າງໃກ້ຊິດຂອງກົມການເມືອງສູນກາງພັກ, ຄະນະເລຂາທິການສູນກາງພັກ, ລັດຖະບານ, ຄວາມເອົາໃຈໃສ່ຊີ້ນຳ-ນຳພາ ຂອງຄະນະພັກ-ຄະນະປົກຄອງທ້ອງຖິ່ນແຕ່ລະຂັ້ນ, ການສະໜັບສະໜູນອູ້ມຊູຊ່ວຍເຫຼືອຂອງບັນດາກະຊວງ-ອົງການ ແລະ ຊັ້ນຄົນໃນສັງຄົມ ສະຫະພັນນັກຮົບເກົ່າໄດ້ຮັບ ການປັບປຸງ ແລະ ພັດທະນາໃນ ຫຼາຍດ້ານໃຫ້ມີການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ, ສາ ມາດເຄື່ອນໄຫວປະຕິບັດພາລະບົດບາດຂອງຕົນ ແລະ ຍາດໄດ້ ຜົນງານຫຼາຍດ້ານ ໃນນັ້ນ ໄດ້ ເອົາໃຈໃສ່ເຮັດໜ້າທີ່ສຶກສາອົບ ຮົມການເມືອງ-ນຳພາແນວຄິດຕໍ່ບັນດາສະຫາຍນັກຮົບເກົ່າ, ພະ ນັກງານ-ລັດຖະກອນດ້ວຍຫຼາຍ ຮູບຫຼາຍວິທີ; ຫັນລົງຮາກຖານ, ເກັບກຳສະພາບການເມືອງ-ແນວຄິດ, ຮັບຟັງຄຳຄິດຄຳເຫັນຂອງແຕ່ລະເປົ້າໝາຍ; ຈັດຕັ້ງເຜີຍແຜ່ເຊື່ອມຊຶມແນວທາງແຜນ ນະໂຍບາຍ, ມະຕິ, ຄຳສັ່ງຂອງ ພັກ, ລະບຽບກົດໝາຍຂອງລັດ; ຈັດຕັ້ງປາຖະກະຖາມູນເຊື້ອ, ເຜີຍ ແຜ່ສະພາບການ, ໂຮມຊຸມນຸມ ສະເຫຼີມສະຫຼອງວັນປະຫວັດ ສາດສຳຄັນຂອງຊາດ, ຂອງພັກ-ລັດ, ຂອງກຳລັງປະກອບອາວຸດ ແລະ ຂອງອົງການຕົນ; ຈັດຕັ້ງເຊື່ອມຊຶມມະຕິ, ຄຳສັ່ງ, ກົດລະ ບຽບຂອງສະຫະພັນນັກຮົບເກົ່າແຫ່ງຊາດລາວຢ່າງທົ່ວເຖິງ ໄປຄວບຄູ່ກັບການປະຕິບັດຂະບວນການແຂ່ງຂັນ 3 ດີ 6 ຮັກສາ ຂອງສະຫະພັນນັກຮົບເກົ່າຕິດພັນກັບຂະບວນການແຂ່ງຂັນ “ຮັກຊາດ ແລະ ພັດທະນາ”. ພ້ອມນັ້ນ, ຍັງໄດ້ປົກປ້ອງສິດ ຜົນປະໂຫຍດອັນຊອບທຳຂອງນັກຮົບເກົ່າ ແລະ ຕິດຕາມຊຸກຍູ້, ການປະຕິບັດເງິນນະໂຍບາຍຕ່າງໆເປັນຕົ້ນແມ່ນການປ່ຽນແທນໂກຕາລົດໄລຍະຜ່ານມາປະ ຕິບັດໄດ້ ຈຳນວນ 1994 ທ່ານ ນະໂຍບາຍຕໍ່ວິລະຊົນແຫ່ງຊາດໄດ້ 51 ທ່ານ, ນັກຮົບແຂ່ງຂັນ 294 ທ່ານ, ນະໂຍບາຍແກ້ໄຂບຳນານຄືນ 2.721 ທ່ານ, ສະ ເໜີນະໂຍບາຍປຸກສ້າງເຮືອນໃຫ້ນັກຮົບເກົ່າຜູ້ທີ່ທຸກຍາກປ່ຽວພອຍໄດ້ 21 ຫຼັງ; ຍາດແຍ່ງທຶນຊ່ວຍ ເຫຼືອ ຜ່າຕັດແກ່ນຕາຂຸ້ນໃຫ້ນັກ ຮົບເກົ່າໄດ້ 232 ຄົນ. ປັດຈຸບັນກົງຈັກການຈັດຕັ້ງສະຫະພັນນັກຮົບເກົ່າຂັ້ນແຂວງ ແລະ ນະຄອນ ຫຼວງວຽງຈັນ ມີ 18 ອົງການ, ຂັ້ນເມືອງ ແລະ ນະຄອນ ມີ 148 ໜ່ວຍ, ສະ ຫະພັນນັກຮົບເກົ່າຂັ້ນບ້ານ 1.750 ບ້ານ (ກຳລັງຄົ້ນຄວ້າຈັດຕັ້ງສະຫະພັນນັກຮົບເກົ່າຂັ້ນຕາແສງ), ສະມາຊິກນັກຮົບເກົ່າ ທັງໝົດ 61.217 ສະຫາຍ, ຍິງ 6.662 ສະຫາຍ ກວມເອົາ 85% ຂອງຈຳນວນນັກຮົບເກົ່າ ທັງ ໝົດສາມາດອອກບັດສະມາຊິກນັກຮົບເກົ່າໄດ້ທັງໝົດ 15.876 ບັດ ກວມ 30% ຂອງສະມາຊິກທັງໝົດ. ອັນພົ້ນເດັ່ນ ໃນປີ 2018 ກົດໝາຍ ວ່າດ້ວຍສະຫະພັນ ນັກຮົບເກົ່າລາວ ສະບັບເລກທີ 42/ສພຊ, ລົງວັນທີ 13 ມິຖຸນາ 2018 ໄດ້ຖືກຮັບຮອງເອົາຢ່າງເປັນທາງການ ໃນກອງປະຊຸມສະໄໝສາມັນເທື່ອທີ 5 ຂອງສະ ພາແຫ່ງຊາດ ຊຸດທີ VIII, ເຊິ່ງ ເປັນຂີດໝາຍປະຫວັດສາດຂອງສະຫະພັນນັກຮົບເກົ່າທີ່ມີນິຕິກຳໃນການປົກປ້ອງສິດ ແລະ ຜົນປະໂຫຍດອັນຊອບທຳໂດຍແທ້ຈິງຕໍ່ພະນັກງານ-ນັກຮົບເກົ່າ; ວຽກງານການສ້າງເສດຖະກິດ, ແກ້ ໄຂຊີວິດການເປັນຢູ່ ແລະ ແກ້ໄຂ ຄວາມທຸກຍາກສະຫະພັນນັກຮົບ ເກົ່າແຕ່ລະຂັ້ນໄດ້ຖືເອົາການຜະ ລິດກະສິກຳປູກຝັງ-ລ້ຽງສັດ, ການບໍລິການຕ່າງໆຕາມເງື່ອນ ໄຂທ່າແຮງບົ່ມຊ້ອນຂອງຕົນເຮັດໃຫ້ຄອບຄົວນັກຮົບເກົ່າຜູ້ທີ່ທຸກຍາກໄດ້ຮັບການພັດທະນາ ແລະ ປັບປຸງຕົນເອງລຸດພົ້ນອອກຈາກຄວາມທຸກຍາກ ໃນນັ້ນບາງຮາກຖານກໍມີການສ້າງກອງທຶນໃນຮູບແບບຕ່າງໆ, ການຮ່ວມມືທຸລະກິດກັບນັກທຸລະກິດກັບພາຍໃນ ແລະ ຕ່າງປະເທດ ມີຫຼາຍແຂວງ, ເມືອງ ແລະ ບ້ານມີກອງທຶນຊ່ວຍເຫຼືອເຊິ່ງກັນ ແລະ ກັນ ຂອງນັກຮົບເກົ່າ, ເຊິ່ງສາມາດແກ້ໄຂໃນເວລາເຈັບເປັນ ແລະ ພົບຄວາມຫຍຸ້ງຍາກໃນຄອບຄົວ ຮັບປະກັນໃນການປະຕິບັດໜ້າ ທີ່ການເມືອງ ປັດຈຸບັນແມ່ນພວມ ສຸມໃສ່ໂຄງການກໍ່ສ້າງສຳນັກ ງານສູນກາງສະຫະພັນນັກຮົບເກົ່າແຫ່ງຊາດລາວຫຼັງໃໝ່ໄດ້ 80%, ຫ້ອງມູນເຊື້ອສຳເລັດ 100%, ຫ້ອງການເຮັດວຽກນັກ ຮົບເກົ່າຂັ້ນເມືອງ ຈຳນວນ 30 ເມືອງ ສຳເລັດແລ້ວ 80%, ສ້າງເຮືອນໃຫ້ຜູ້ທຸກຍາກປ່ຽວພອຍ 21 ຫຼັງ ສຳເລັດ 100%. ວຽກງານພົວພັນຮ່ວມມືກັບ ຕ່າງປະເທດ ແລະ ສາກົນໄດ້ມີ ການພົວພັນ, ຮ່ວມມືກັບສະມາ ຄົມນັກຮົບເກົ່າຕ່າງປະເທດ, ພາກພື້ນ ແລະ ສາກົນ ໂດຍສະເພາະແມ່ນການຮ່ວມມືຊ່ວຍເຫຼືອເຊິ່ງ ກັນ ແລະ ກັນແບບພິເສດຮອບ ດ້ານກັບສະມາຄົມນັກຮົບເກົ່າ ສສ ຫວຽດນາມ; ພົວພັນຮ່ວມ ມືສອງຝ່າຍກັບສະມາຄົມນັກ ຮົບເກົ່າຣາຊະອານາຈັກກຳປູ ເຈຍ, ນັກຮົບເກົ່າ ສປ ຈີນ ແລະ ສະມາຄົມນັກຮົບເກົ່າຕ້ານຈັກ ກະພັດອາເມຣິກາ ສປປ ເກົາຫຼີ. ນອກຈາກນັ້ນ, ສະຫະພັນນັກຮົບເກົ່າແຫ່ງຊາດລາວ ຍັງໄດ້ພົວພັນປະສານງານກັບສະມາຄົມນັກ ຮົບເກົ່າໂລກ, ສະມາຄົມນັກຮົບເກົ່າ ສ ຣັດເຊຍ, ຝຣັ່ງ, ອົງການ ຈັດຕັ້ງສາກົນ, ອົງການບໍ່ຂຶ້ນກັບລັດຖະບານ (NGOs) ທີ່ພົວພັນ ເຖິງວຽກງານນັກຮົບເກົ່າ. ວັນທີ 15 ກັນຍາ 2012 ໄດ້ເຂົ້າເປັນສະມາຊິກສະມາຄົມນັກຮົບເກົ່າອາຊຽນຢ່າງເປັນທາງການ ແລະ ໄດ້ຕັ້ງໜ້າປະກອບສ່ວນເຄື່ອນໄຫວຕາມພາລະບົດບາດ, ສ້າງສາຍພົວພັນທີ່ດີກັບບັນດາປະເທດສະມາຊິກຕະຫຼອດມາ. ປີ 2018 ຜ່ານມາ ສະຫະພັນນັກຮົບເກົ່າແຫ່ງຊາດລາວ ໄດ້ເປັນປະທານໝູນວຽນນັກຮົບເກົ່າອາຊຽນ ແລະ ດຳເນີນກອງປະຊຸມໃຫຍ່ນັກ ຮົບເກົ່າ ຄັ້ງທີ 18 ດ້ວຍໜາກຜົນອັນຈົບງາມ, ເຊິ່ງເຮັດໃຫ້ບົດບາດຂອງສະຫະພັນນັກຮົບເກົ່າແຫ່ງຊາດລາວ ພົ້ນເດັ່ນຂຶ້ນໃນເວທີພາກພື້ນ ແລະ ສາກົນ. ຈາກຜົນງານ ແລະ ໄຊຊະນະທີ່ກ່າວມາຂ້າງເທິງນັ້ນ ສະຫະພັນນັກຮົບເກົ່າແຫ່ງຊາດລາວໄດ້ຮັບການຍ້ອງຍໍຈາກພັກ, ລັດຖະ ບານ, ປະເທດເພື່ອນມິດ ແລະ ສາກົນ ດັ່ງນີ້: ໄດ້ຮັບຫຼຽນໄຊອິດ ສະຫຼະຊັ້ນ I ຈຳນວນ 1 ໜ່ວຍ, ຫຼຽນໄຊແຮງງານຊັ້ນ I ຈຳນວນ 1 ໜ່ວຍ, ຫຼຽນກາມິດຕະພາບຈາກສະມາຄົມນັກຮົບເກົ່າ ສສ ຫວຽດນາມ 1 ໜ່ວຍ, ຫຼຽນກາປະທານກິດຕິມະສັກສະມາພັນນັກຮົບເກົ່າອາຊຽນ 1 ໜ່ວຍ, ຫຼຽນກາກຽດຕິຄຸນສະມາພັນນັກຮົບເກົ່າອາຊຽນ 1 ໜ່ວຍ, ໃບຍ້ອງຍໍຈາກສະມາຄົມນັກຮົບເກົ່າອາຊຽນ 1 ໃບ ແລະ ໃບຍ້ອງຍ້ອງຂັ້ນຕ່າງໆອີກຈຳນວນໜຶ່ງຢ່າງສົມກຽດ.

news to day and hot news