ວັນຈັນ, ວັນທີ 12 ຕຸລາ 2026
ປິດຊຸດອົບຮົມ-ຫັດແອບ ໃຫ້ກຳລັງກອງຫຼອນ ກອງຮ້ອຍທີ 2 ຕາແສງນ້ຳແກ້ວຫຼວງ
ເວລາອອກຂ່າວ: 2026-09-07 09:53:07 | ຜູ້ຂຽນ : admin1 | ຈຳນວນຄົນເຂົ້າຊົມ: 148 | ຄວາມນິຍົມ: 
ພິທີ ປິດຊຸດອົບຮົມ-ຫັດແອບ ການເມືອງ-ການທະຫານ ໄລຍະທີ II ປະຈຳປີ 2026 ໃຫ້ກຳລັງກອງຫຼອນ ກອງຮ້ອຍທີ 2 ຕາແສງນ້ຳແກ້ວຫຼວງ ເມືອງສິງ ແຂວງຫຼວນ້ຳທາ ໄດ້ຈັດຂຶ້ນໃນບໍ່ດົນຜ່ານມານີ້, ໂດຍການເປັນປະທານຂອງ ສະຫາຍ ພັນໂທ ສົມຊາຍ ຫຼ້າພິມພອນ ຫົວໜ້າການທະຫານ ກອງບັນຊາການທະຫານເມືອງສິງ, ມີສະຫາຍ ສີທອງ ທຳມະວົງ ຮັກສາການ ຄະນະກຳມະການຕາແສງນ້ຳແກ້ວຫຼວງ, ມີເລຂາພັກບ້ານ, ຄູເຝິກ ແລະ ອ້າຍນ້ອງກຳລັງກອງຫຼອນທົ່ວກອງຮ້ອຍ ເຂົ້າຮ່ວມ.
ສະຫາຍ ພັນຕີ ຄຳອຸ້ຍ ທິບພະວົງ ຊ່ວຍວຽກຂະແໜງອົບຮົມ ກອງບັນຊາການທະຫານເມືອງສິງ ໄດ້ຜ່ານບົດສະຫຼຸບ ຜ່ານການອົບຮົມ-ຫັດແອບ ໄລຍະ 12 ວັນ, ຍົກໃຫ້ເຫັນດ້ານດີ, ດ້ານອ່ອນ ແລະ ດ້ານທີ່ພົ້ນເດັ່ນ ເປັນຕົ້ນແມ່ນ ອ້າຍນ້ອງກຳລັງກອງຫຼອນ ໄດ້ເອົາໃຈໃສ່ສຸມສະຕິປັນຍາ ເຂົ້າໃນການອົບຮົມ-ຫັດແອບຢ່າງເປັນຂະບວນການຟົດຟື້ນ ແລະ ຄູອາຈານກໍມີຄວາມຮັບຜິດຊອບສູງຕໍ່ການສິດສອນ ທັງພາກທິດສະດີ ກໍຄື ພາກປະຕິບັດຕົວຈິງ ເຮັດໃຫ້ການອົບຮົມ-ຫັດແອບ ບັນລຸໄດ້ຕາມຄາດໝາຍທີ່ວາງໄວ້ ສາມາດຕີລາຄາຜົນໄດ້ຮັບ ພາກການເມືອງ ບັນລຸໄດ້ 85,25%, ພາກການທະຫານ 90,28%, ພາກຍຸດທະວິທີ 83,27%, ສະເລຍຜົນໄດ້ຮັບລວມ ເທົ່າກັບ 86,26%. ໃນພິທີຍັງໄດ້ຜ່ານຂໍ້ຕົກລົງ ຂອງກອງບັນຊາການທະຫານເມືອງສິງ ວ່າດ້ວຍການປະຕິບັດນະໂຍບາຍ ຕໍ່ກຳລັງກອງຫຼອນຜູ້ທີ່ພົ້ນອາຍຸກະສຽນ ອອກພັກຜ່ອນ ຈຳນວນ 2 ສະຫາຍ ຄື:
ສະຫາຍ ຫົວວູອ່ອນ ຫົວໜ້າກອງຮ້ອຍ ແລະ ສະຫາຍ ຫົວແສງອ່ອນ ຮອງກອງຮ້ອຍ, ພ້ອມທັງຜ່ານຂໍ້ຕົກລົງ ວ່າດ້ວຍການແຕ່ງຕັ້ງ ສະຫາຍ ຄຳຫຼ້າ ໂດຍວິໄລ ເປັນຫົວໜ້າກອງຮ້ອຍ, ສະຫາຍ ທອງແກ້ວ ເປັນຮອງກອງຮ້ອຍ ແລະ ສະຫາຍ ຢາພາ ເປັນຄະນະ.
ໂອກາດນີ້, ສະຫາຍ ພັນໂທ ສົມຊາຍ ຫຼ້າພິມພອນ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດບັ້ນອົບຮົມ-ຫັດແອບໃນຄັ້ງນີ້, ພ້ອມທັງຮຽກຮ້ອງໃຫ້ອ້າຍນ້ອງກຳລັງກອງຫຼອນ ຈົ່ງພ້ອມກັນນຳເອົາບົດຮຽນທີ່ໄດ້ຮ່ຳຮຽນມາ ໄປຈັດຕັ້ງປະຕິບັດເຂົ້າໃນວຽກງານຕົວຈິງ ເຮັດໃຫ້ກຳລັງກອງຫຼອນ ມີຄວາມເຂັ້ມແຂງຂຶ້ນເລື້ອຍໆ, ສືບຕໍ່ເອົາໃຈໃສ່ເຮັດວຽກງານປ້ອງກັນຊາດ-ປ້ອງກັນຄວາມສະຫງົບ ພາຍໃນບ້ານ, ເພື່ອສະກັດກັ້ນປະກົດການຍໍ້ທໍ້ຕ່າງໆ ແລະ ການເຄື່ອນໄຫວຂອງ
ພວກກຸ່ມຄົນບໍ່ຫວັງດີ ເຮັດໃຫ້ຂອບເຂດຮັບຜິດຊອບ ມີຄວາມສະຫງົບປອດໄພ.
ໂດຍ: ບຸນປັນ ປັນຍາລິນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
