ວັນພະຫັດ, ວັນທີ 17 ກັນຍາ 2026
ນັກກິລາຟັນດາບລາວ ຄວ້າແຊັມສາກົນ ສ້າງຄວາມໝັ້ນໃຈ ກ່ອນເຂົ້າຮ່ວມແຂ່ງຂັນ ເອຊຽນເກມ 2026
ເວລາອອກຂ່າວ: 2026-09-03 09:37:43 | ຜູ້ຂຽນ : admin1 | ຈຳນວນຄົນເຂົ້າຊົມ: 152 | ຄວາມນິຍົມ: 
ນັກກິລາຟັນດາບທີມຊາດລາວ ສ້າງຜົນງານອັນໂດດເດັ່ນໃນເວທີລະດັບໂລກ ຫຼັງສາມາດຄວ້າແຊັມລາຍການແຂ່ງຂັນລະດັບມະຫາວິທະຍາໄລສາກົນ ໂດຍການກວາດລາງວັນຊະນະເລີດທັງປະເພດດ່ຽວ ແລະ ປະເພດທີມ ເຊິ່ງເປັນການສ້າງຂວັນກຳລັງໃຈອັນສຳຄັນ ກ່ອນກຽມຕົວເປັນຕົວແທນທີມຊາດລຸຍເສິກ ເອຊຽນເກມ ຄັ້ງທີ 20 ທີ່ປະເທດຍີ່ປຸ່ນ.
ທ່ານ ລິຄິດ ອິນທະວົງ ຮອງປະທານ ແລະ ເລຂາທິການສະຫະພັນຟັນດາບແຫ່ງຊາດລາວ ໄດ້ໃຫ້ຮູ້ວ່າ: ທາງສະຫະພັນໄດ້ສົ່ງ ທ້າວ ໄຊຊະນະ ກ່ອງຕິນ ນັກກິລາຟັນດາບລູກຊອດ ລາວ-ຝຣັ່ງ (ພໍ່ເປັນຄົນລາວ, ແມ່ເປັນຄົນຝຣັ່ງ) ເຊິ່ງເປັນຕົວແທນທີມຊາດລາວພຽງໜຶ່ງດຽວ ເຂົ້າຮ່ວມການແຂ່ງຂັນຟັນດາບຊີງແຊັມລະດັບສາກົນ ລາຍການ BUCS FENCING SK Telecom One Series Nine Cities Grand Prix 2026. ການແຂ່ງຂັນຄັ້ງນີ້ແມ່ນລາຍການສະເພາະນັກກິລາລະດັບມະຫາວິທະຍາໄລຈາກທົ່ວໂລກ ໂດຍມີຜູ້ເຂົ້າຮ່ວມຈາກ 44 ປະເທດ. ເຊິ່ງຜົນການແຂ່ງຂັນປາກົດວ່າ ທ້າວ ໄຊຊະນະສາມາດໂຊຟອມໄດ້ຢ່າງດີຢ້ຽມ ຍາດໄດ້ລາງວັນຊະນະເລີດມາຄອງຢ່າງສົມກຽດ ທັງໃນປະເພດເຊເບີບຸກຄົນດ່ຽວຊາຍ (Man Sabre Individual Single) ແລະ ປະເພດເຊເບີທີມລວມດາລາມະຫາວິທະຍາໄລ (All Star University team Sabre
Individual).
ຜົນງານໄຊຊະນະໃນຄັ້ງນີ້ ນັບເປັນນິມິດໝາຍອັນດີ ແລະ ເປັນການສ້າງຂວັນກຳລັງໃຈຢ່າງໃຫຍ່ຫຼວງໃຫ້ແກ່ນັກກິລາຟັນດາບລາວ ໃນການກະກຽມຄວາມ
ພ້ອມເພື່ອເຂົ້າຮ່ວມການແຂ່ງຂັນກິລາ ເອຊຽນເກມ ຄັ້ງທີ 20 ທີ່ຈະຈັດຂຶ້ນທີ່ເມືອງໄອຈິ-ນາໂກຢ້າ ປະເທດຍີ່ປຸ່ນ ໃນລະຫວ່າງວັນທີ 19 ກັນຍາ ຫາ 4 ຕຸລາ 2026 ນີ້. ສຳລັບກິລາຟັນດາບ ຖືເປັນໜຶ່ງໃນ 16 ປະເພດກິລາ ທີ່ ສປປ ລາວ
ຈະສົ່ງເຂົ້າຮ່ວມແຂ່ງຂັນໃນມະຫະກຳກິລາ ເອຊຽນເກມ 2026 ໂດຍຄະນະນຳ ແລະ ຕົວແທນປະກອບມີ: ທ່ານ ລິຄິດ ອິນທະວົງ ຮອງປະທານ ແລະ ເລຂາ ທິການສະຫະພັນ (ເປັນຫົວໜ້າຄະນະ), ທ່ານ ນາງ ສະຫວັນດາຣາ ອາເຣນລາໂນ (ເປັນຄູເຝິກ) ແລະ ທ້າວ ໄຊຊະນະ ກ່ອງຕິນ (ນັກກິລາ).
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
