ວັນພະຫັດ, ວັນທີ 17 ກັນຍາ 2026
6 ເດືອນຕົ້ນປີນີ້ ແຂວງອັດຕະປື ເສດຖະກິດຂະຫຍາຍຕົວ 4,3%
ເວລາອອກຂ່າວ: 2026-09-03 09:27:30 | ຜູ້ຂຽນ : admin1 | ຈຳນວນຄົນເຂົ້າຊົມ: 174 | ຄວາມນິຍົມ: 
ແຫຼ່ງຂ່າວຈາກແຂວງອັດ ຕະປືໃຫ້ຮູ້ວ່າ: ແຂວງອັດຕະປື ຈັດກອງປະຊຸມສະຫຼຸບການຈັດ ຕັ້ງປະຕິບັດແຜນພັດທະນາເສດ ຖະກິດ-ສັງຄົມ, ແຜນລົງທຶນຂອງລັດ ແລະ ແຜນງົບປະມານແຫ່ງລັດ ໃນ 6 ເດືອນຕົ້ນປີ 2026 ພ້ອມກຳນົດທິດທາງ ແລະ ແຜນວຽກຈຸດສຸມໃນ 6 ເດືອນທ້າຍປີ ໃນວັນທີ 31 ສິງຫາ 2026 ໂດຍການເປັນປະທານຂອງທ່ານ ສຸລິວົງ ອະໄພວົງ ຄະນະປະຈຳພັກແຂວງ ຫົວໜ້າພະແນກການເງິນແຂວງອັດຕະປື ພ້ອມດ້ວຍຂະແໜງການທີ່ກ່ຽວຂ້ອງຂອງແຂວງ, ເມືອງເຂົ້າຮ່ວມ.
ທ່ານ ນິດສາ ມຽງລາວັນ ຮອງຫົວໜ້າພະແນກການເງິນແຂວງອັດຕະປື ໄດ້ລາຍງານວ່າ: ໄລຍະ 6 ເດືອນຕົ້ນປີ 2026 ເສດຖະກິດແຂວງອັດຕະປື ຂະ ຫຍາຍຕົວ 4,3%, ມູນຄ່າ ຈີດີພີ ປະມານ 5.271 ຕື້ກີບ, ໂດຍ ຂະແໜງກະສິກຳ-ປ່າໄມ້ ຂະ ຫຍາຍຕົວ 4,9% ແລະ ກວມ 51% ຂອງ ຈີດີພີ; ຂະແໜງອຸດ ສາຫະກຳ ຂະຫຍາຍຕົວ 4,2% ກວມ 29%; ຂະແໜງບໍລິການ ຂະຫຍາຍຕົວ 3,7% ກວມ 17% ແລະ ຂະແໜງພາສີ-ອາກອນ ຂະຫຍາຍຕົວ 5,8%. ດ້ານງົບ ປະມານ ໃນ 6 ເດືອນ ສາມາດຈັດເກັບລາຍຮັບໄດ້ 1.113 ຕື້ກີບ ເທົ່າກັບ 63,06% ຂອງແຜນການປີ. ສ່ວນລາຍຈ່າຍປະ ຕິບັດໄດ້ 341,15 ຕື້ກີບ ເທົ່າກັບ 31,02% ຂອງແຜນການ. ຂະນະທີ່ຕົວເລກຮອດປັດຈຸບັນ ລາຍຮັບລວມບັນລຸ 1.485,48 ຕື້ກີບ ເທົ່າກັບ 84,14% ຂອງແຜນການປີ ໃນນັ້ນ, ລາຍຮັບຂອງແຂວງ 1.245,17 ຕື້ກີບ ແລະ ລາຍຮັບສູນກາງທີ່ປະຕິບັດຢູ່ແຂວງ 240,31 ຕື້ກີບ, ລາຍຈ່າຍລວມບັນລຸ 474,46 ຕື້ກີບ ຫຼື 42,97% ຂອງແຜນການ, ດ້ານການຄ້າ, ມູນຄ່າສົ່ງອອກ-ນຳເຂົ້າບັນລຸ 159,28 ລ້ານໂດ ລາສະຫະລັດ ເທົ່າກັບ 49% ຂອງແຜນການ ແລະ ເພີ່ມຂຶ້ນ 18% ຈາກໄລຍະດຽວກັນຂອງປີຜ່ານມາ ໃນນັ້ນ, ສົ່ງອອກ 120,88 ລ້ານໂດລາ ແລະ ນຳເຂົ້າ 38,39 ລ້ານໂດລາ, ດ້ານການລົງທຶນ ລວມມີມູນຄ່າ 1.652 ຕື້ກີບ ເທົ່າກັບ 50% ຂອງແຜນການ. ແຜນລົງທຶນຂອງລັດມີ 197 ໂຄງການ ມູນຄ່າ 2.428 ຕື້ກີບ, ໂດຍມີ 95 ໂຄງການໄດ້ຮັບອະນຸມັດເບີກ ຈ່າຍ ມູນຄ່າ 90,52 ຕື້ກີບ. ສ່ວນທຶນ ODA ມີ 16 ໂຄງການ ແລະ ການລົງທຶນເອກະຊົນພາຍໃນ-ຕ່າງປະເທດ ໃນ 6 ເດືອນ ອະນຸຍາດ 25 ໂຄງການ.
ຂະນະທີ່ສິນເຊື່ອທະນາຄານຍອດສະສົມບັນລຸ 1.543 ຕື້ກີບ ຫຼື 79% ຂອງແຜນການ, ໂດຍສ່ວນໃຫຍ່ເນັ້ນໃສ່ຂະແໜງກະ ສິກຳ-ປ່າໄມ້ 44%, ບໍລິການ 20% ແລະ ອຸດສາຫະກຳ 12%.
ສຳລັບ 6 ເດືອນທ້າຍປີ 2026, ແຂວງອັດຕະປື ຈະສຸມໃສ່ເລັ່ງລັດການຈັດເກັບລາຍຮັບໃຫ້ບັນລຸແຜນການ, ອັດຊ່ອງວ່າງການຮົ່ວໄຫຼ່, ຊຸກຍູ້ການຜະລິດພາຍໃນ, ແກ້ໄຂໜີ້ສິນ ແລະ ຂໍ້ຄົງຄ້າງ, ເລັ່ງການເບີກຈ່າຍໂຄງການລົງ ທຶນ, ສົ່ງເສີມການຄ້າ-ການລົງ ທຶນ ພ້ອມທັງເອົາໃຈໃສ່ແກ້ໄຂບັນຫາຂາດແຄນຄູ ແລະ ການປະລະການຮຽນ ເພື່ອຍົກສູງຄຸນນະພາບຊັບພະຍາກອນມະນຸດ.
ການດຳເນີນງານດັ່ງກ່າວ ມຸ່ງໝາຍເພື່ອສືບຕໍ່ຮັກສາການຂະຫຍາຍຕົວ, ສ້າງພື້ນຖານໃຫ້ແຂວງສາມາດບັນລຸເປົ້າໝາຍແຜນພັດທະນາໃນປີ 2026 ແລະ ສ້າງຄວາມໝັ້ນຄົງດ້ານງົບປະ ມານ-ເສດຖະກິດໃຫ້ດີຂຶ້ນ.
ໂດຍ: ມະນີວອນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
