ວັນພະຫັດ, ວັນທີ 17 ກັນຍາ 2026
6 ເດືອນຕົ້ນປີ 2026 ລະບົບສະໜອງເລືອດແຫ່ງຊາດ ເກັບເລືອດໄດ້ 35.741 ຖົງ
ເວລາອອກຂ່າວ: 2026-09-03 09:26:20 | ຜູ້ຂຽນ : admin1 | ຈຳນວນຄົນເຂົ້າຊົມ: 173 | ຄວາມນິຍົມ: 
ອົງການກາແດງແຫ່ງຊາດລາວ ຈັດກອງປະຊຸມສະຫຼຸບຕີລາຄາວຽກງານປຸກລະດົມບໍລິ ຈາກເລືອດ 6 ເດືອນຕົ້ນປີ 2026 ແລະ ວາງທິດທາງຈຸດສຸມ 6 ເດືອນທ້າຍປີ ພາຍໃຕ້ “ໂຄງການສ້າງຄວາມເຂັ້ມແຂງໃຫ້ແກ່ວຽກງານປຸກລະດົມບໍລິຈາກເລືອດ ແລະ ສະໜອງເລືອດປອດໄພ” ໃນວ່າງບໍ່ດົນມານີ້ ເຊິ່ງ 6 ເດືອນຕົ້ນປີຜ່ານມາ ລະບົບສະໜອງເລືອດແຫ່ງຊາດ ໄດ້ເກັບເລືອດໄດ້ 35.741 ຖົງ ຈາກສະຖາບັນເລືອດແຫ່ງຊາດ ແລະ ສູນບໍລິຈາກເລືອດ 17 ແຂວງ ກວມເອົາ 42% ຂອງເປົ້າໝາຍປະຈຳປີ 85.000 ຖົງ. ໃນນັ້ນ 47% ແມ່ນບໍລິຈາກເລືອດແບບສະໝັກໃຈ ແລະ ອີກ 53% ແມ່ນບໍລິ ຈາກເລືອດຈາກສະມາຊິກຄອບ ຄົວຂອງຄົນເຈັບ.
ທ່ານ ຄຳລາວັນ ຈັນທະລາວັນ ປະທານອົງການກາແດງແຫ່ງ ຊາດລາວ ໄດ້ກ່າວວ່າ: "ໂຄງ ການສ້າງຄວາມເຂັ້ມແຂງໃຫ້ແກ່ວຽກງານປຸກລະດົມບໍລິຈາກເລືອດ ແລະ ຕອບສະໜອງເລືອດທີ່ປອດໄພ" ໄດ້ຮັບສະໜັບສະໜູນຈາກອົງການກາແດງສະວິດ ລວມມູນຄ່າທັງໝົດ 716.641 ຝຣັງສະວິດ, ມີໄລຍະເວລາ 4 ປີ (2025-2028) ໂດຍໄດ້ຮັບການອະນຸມັດຈາກກະຊວງການຕ່າງປະເທດ ຕາມຂໍ້ຕົກລົງ ສະບັບເລກທີ 8778/ຕປທ.ຈສກ, ລົງວັນທີ 13 ທັນວາ 2024. ໂຄງການດັ່ງກ່າວແມ່ນການ ຮ່ວມມືໃນຂົງເຂດວຽກງານເລືອດທີ່ໄດ້ຕໍ່ຍອດມາຈາກການໃຫ້ການສະໜັບສະໜູນໃນໄລຍະ 3 ປີ ຜ່ານມາ (2022-2024) ຂອງອົງການກາແດງສະວິດ ເຊິ່ງມີຈຸດປະສົງເພື່ອປະກອບສ່ວນເຂົ້າໃນການປັບປຸງດ້ານການບໍລິ ການສາທາລະນະສຸກ ໂດຍສະ ເພາະແມ່ນສະໜັບສະໜູນຕາມການພັດທະນາແຜນຍຸດທະສາດເລືອດແຫ່ງຊາດ ໃຫ້ເປັນໄປຕາມ ມາດຕະຖານຂອງສະຖາບັນ ເລືອດ ແລະ ຄູ່ມືຂອງສາກົນ. ນອກຈາກນັ້ນ, ກໍເພື່ອປັບປຸງ ການຂະຫຍາຍ, ຄຸນນະພາບ, ປະລິມານ ຂອງການເຈາະເກັບເລືອດ, ກວດວິເຄາະ, ແຍກ-ເກັບຮັກສາສ່ວນ ປະກອບຂອງເລືອດ ແລະ ການສົ່ງ ເລືອດ ໂດຍຜ່ານແຜນງານເລືອດແຫ່ງຊາດ ຢູ່ໃນ ສປປ ລາວ.
ຜ່ານການຈັດຕັ້ງປະຕິບັດໃນໄລຍະຜ່ານມາເຫັນໄດ້ວ່າ ວຽກງານປຸກລະດົມບໍລິຈາກເລືອດ ແລະ ຕອບສະໜອງເລືອດທີ່ປອດ ໄພ ໃນລະດັບສູນກາງ ແລະ ທ້ອງ ຖິ່ນໄດ້ຮັບການປັບປຸງໃຫ້ດີຂຶ້ນ ເປັນຕົ້ນແມ່ນ ການພັດທະນາພື້ນ ຖານໂຄງລ່າງ, ການຕອບສະ ໜອງພາຫະນະ ສຳລັບອອກຮັບບໍລິຈາກເລືອດ, ການຕອບສະໜອງ ອຸປະກອນການແພດທີ່ຈຳເປັນ, ຕະຫຼອດເຖິງການອົບຮົມຍົກລະ ດັບຄວາມຮູ້ຄວາມສາມາດໃຫ້ ແກ່ພະນັກງານວິຊາການທີ່ເຮັດວຽກໃນຂົງເຂດວຽກງານນີ້ ກໍໄດ້ຮັບການປັບປຸງທາງດ້ານວິຊາ ການໃຫ້ດີຂຶ້ນ. ພ້ອມນີ້, ໂຄງການ ມີຈຸດປະສົງສຳຄັນໃນການປັບປຸງ ລະບົບເລືອດແຫ່ງຊາດໃຫ້ສອດ ຄ່ອງກັບມາດຕະຖານສາກົນ, ເພີ່ມປະລິມານ ແລະ ຄຸນນະພາບການບໍລິຈາກເລືອດ, ປັບປຸງການ ເກັບ, ກວດວິເຄາະ, ແຍກ ແລະ ຮັກສາສ່ວນປະກອບຂອງເລືອດ ລວມທັງການສົ່ງຕໍ່ເລືອດໃຫ້ປອດໄພ ແລະ ພຽງພໍແກ່ຜູ້ປ່ວຍ.
ພ້ອມນີ້, ກອງປະຊຸມຍັງໄດ້ ຮັບຟັງການລາຍງານກ່ຽວກັບ ຜົນສຳເລັດທີ່ພົ້ນເດັ່ນຫຼາຍດ້ານຕາມແຜນໃນປີ 2026 ເຊິ່ງຜົນ ສຳເລັດທີ່ສຳຄັນແມ່ນສະຖາບັນເລືອດແຫ່ງຊາດ ສາມາດຕອບສະໜອງໄດ້ 85% ທຽບກັບຄວາມຕ້ອງການເລືອດ. ພ້ອມນີ້, ອົງການກາແດງແຫ່ງຊາດລາວ ໄດ້ສຸມໃສ່ການພັດທະນາໂຄງລ່າງ ແລະ ອຸປະກອນ, ໄດ້ສ້ອມ ແປງສູນເລືອດແຂວງບໍ່ແກ້ວ, ສ້ອມແປງອຸປະກອນແຍກສ່ວນປະກອບເລືອດໃຫ້ແຂວງຈຳປາສັກ ແລະ ຫຼວງພະບາງ, ພ້ອມທັງຈັດຊື້ລົດຕູ້ອອກຮັບບໍລິຈາກເລືອດ 2 ຄັນ ສຳລັບສະຖາບັນເລືອດແຫ່ງຊາດ ແລະ ສູນເລືອດແຂວງບໍ່ແກ້ວ, ປັບປຸງຖານຂໍ້ມູນສຳລັບທົ່ວປະເທດ ແລະ ຈັດສົ່ງເຄື່ອງຍິງບາໂຄດສ່ວນປະກອບຂອງເລືອດໃຫ້ 3 ແຂວງ ຄື: ຫຼວງພະບາງ, ໄຊຍະບູລີ ແລະ ແຂວງວຽງຈັນ. ພ້ອມທັງເຝິກອົບຮົມພະນັກງານລະດັບແຂວງ 150 ເທື່ອຄົນ ແລະ ກະກຽມບຸກຄະລາກອນດ້ານວິຊາການ ເພື່ອສອບເສັງໃບຢັ້ງຢືນຄຸນນະພາບ AABB ຈາກສາກົນ. ສຳລັບຄຸນ ນະພາບເລືອດ, ເລືອດທຸກຖົງ ທົ່ວປະເທດໄດ້ຮັບການກວດວິ ເຄາະຢ່າງເປັນລະບົບຕາມມາດ ຕະຖານວິຊາການ ແລະ ອື່ນໆ.
ສຳລັບທິດທາງຈຸດສຸມໃນ 6 ເດືອນທ້າຍປີ 2026 ຈະສືບຕໍ່ເສີມສ້າງການຮັບສະໝັກ ແລະ ຮັກສາຜູ້ບໍລິຈາກເລືອດແບບສະ ໝັກໃຈ, ຍົກສູງການຄຸ້ມຄອງຄຸນ ນະພາບ, ຄວາມປອດໄພຂອງເລືອດ, ລະບົບຂໍ້ມູນ ແລະ ສືບຕໍ່ກະກຽມໄປສູ່ການຮັບຮອງຕາມມາດຕະຖານສາກົນ. ທັງນີ້, ເປົ້າໝາຍສຳຄັນຂອງໂຄງການໃນໄລຍະ 2025-2028 ແມ່ນການເພີ່ມຈຳນວນການບໍລິຈາກເລືອດຈາກຫຼາຍກວ່າ 80.400 ຖົງໃນປີ 2025 ເປັນ 85.000 ຖົງ, 93.000 ຖົງ ແລະ 100.000 ຖົງໃນປີ 2028, ພ້ອມຕັ້ງເປົ້າໃຫ້ ການບໍລິຈາກແບບສະໝັກໃຈບັນ ລຸ 85% ເມື່ອໂຄງການສິ້ນສຸດ ແລະ ໃຫ້ຢ່າງໜ້ອຍ 50% ຂອງຜູ້ບໍລິຈາກແບບສະໝັກໃຈກັບຄືນມາບໍລິຈາກຫຼາຍຄັ້ງ.
ໂດຍ: ແສງສະຫວັນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
